Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 100

Pọl avọ Timoti

Pọl avọ Timoti

Timoti yọ oniọvo ọmọzae nọ ọ jọ ukoko obọ Listra. Ọsẹ riẹ ohwo Griki, rekọ oni riẹ ohwo Ju. Odẹ oni riẹ Yunisi, yọ odẹ oni-ode riẹ Lọis. Aimava na a wuhrẹ Timoti kpahe Jihova no emaha ze.

Nọ Pọl o kpohọ Listra evaọ erẹ usiuwoma ota avivẹ riẹ, o te muẹrohọ nọ Timoti o you inievo na gaga, yọ ọ gwọlọ fiobọhọ kẹ ae. Pọl ọ tẹ ta kẹ Timoti nọ o lele iei kpohọ erẹ usiuwoma ota riẹ. Ẹmẹrera na, Pọl o te wuhrẹ Timoti epanọ a rẹ ta usiuwoma je wuhrẹ ahwo ziezi.

Ẹzi ọfuafo na ọ jẹ kpọ Pọl avọ Timoti evaọ oria kpobi nọ a jẹ nya. Evaọ aso ẹdẹjọ, Pọl ọ tẹ jọ eruẹaruẹ ruẹ ọzae jọ nọ ọ be ta kẹe nọ ọ nyaze obọ Masidonia ti fiobọhọ kẹ ai. Fikiere Pọl, Timoti, Saelas, gbe Luk a te kpobọ Masidonia nyae ta usiuwoma jẹ to ikoko ekpokpọ họ.

Evaọ ẹwho Masidonia jọ nọ a re se Tẹsalonika, ezae gbe eyae buobu a zihe ruọ ilele Jesu. Rekọ ahwo Ju jọ a tẹ jẹ re Pọl avọ inievo na ihri. Ahwo Ju na a te koko ahwo buobu họ re a wha ozighi fihọ ẹwho na, a tẹ rehọ inievo na bru isu ẹwho na be ta nọ: ‘Ezae nana a be wọso egọmeti Rom!’ Fikinọ ahwo na a gwọlọ kpe Pọl avọ Timoti no, aimava a tẹ dhẹ kpobọ Bẹria evaọ aso.

Ahwo Bẹria a gaviezọ ziezi kẹ usiuwoma na, fikiere te ahwo Griki te ahwo Ju a te zihe ruọ ilele Jesu. Rekọ nọ ahwo Ju jọ a no obọ Tẹsalonika ze, a tẹ bẹbẹ ahwo ẹwho na họ re a ru ozighi, fikiere Pọl o te kpobọ ẹwho nọ a re se Athẹns. Rekọ Timoti avọ Saelas a tẹ daji obọ Bẹria re a bọ inievo na ga. Nọ oke jọ o vrẹ no, Pọl ọ tẹ ta kẹ Timoti nọ o zihe kpobọ Tẹsalonika nyae tuduhọ inievo na awọ, re a sai thihakọ ukpokpoma ogaga nọ a jẹ rẹriẹ  ovao dhe evaọ obei. Uwhremu na, Pọl o te vi Timoti kpohọ ikoko buobu re ọ tuduhọ ai awọ.

Pọl ọ ta kẹ Timoti nọ: ‘Ahwo kpobi nọ a gwọlọ gọ Jihova a ti kpokpo ai.’ A kpokpo Timoti je fi ei họ uwou-odi fikinọ o fi ẹrọwọ họ Jesu. Rekọ eva e jẹ were iẹe keme ọ riẹ nọ ọ be gọ Jihova.

Pọl ọ ta kẹ inievo obọ Filipai nọ: ‘Me bi vi Timoti bru owhai ze. O ti wuhrẹ owhai oghẹrẹ nọ a rẹ gọ Ọghẹnẹ evaọ emamọ edhere, je wuhrẹ owhai epanọ a rẹ ta usiuwoma na.’ Pọl ọ riẹ nọ ọ rẹ sai fievahọ Timoti. Aimava a jọ egbẹnyusu, yọ a ta usiuwoma na kugbe evaọ ikpe buobu.

“Me wo omọfa nọ o wo ọkpọ uruemu riẹ hẹ nọ ọ te rọ eva riẹ kpobi rẹrote eware nọ e rrọ ọdawẹ kẹ owhai. Keme ahwo nọ a kiọkọ kpobi a be gwọlọ ewoma obọrai orọnikọ ọrọ Jesu Kristi hi.”​—Ahwo Filipai 2:20, 21