Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Eware nọ Whọ rẹ Sai Wuhrẹ Evaọ Ebaibol Na

 UWUHRẸ AVỌ 15

Jihova ọ Kareghẹhọ Josẹf

Jihova ọ Kareghẹhọ Josẹf

Okenọ Josẹf ọ jọ uwou-odi na, ovie Ijipti nọ a re se Fẹro ọ tẹ wezẹ ewezẹ jọ nọ ohwo ọvo ọ jẹ sae fotọ rai hi. Odibo Fẹro jọ ọ tẹ ta kẹe nọ Josẹf ọ sae fotọ ewezẹ na. Fẹro o te vi ohwo nyai se Josẹf vẹrẹ vẹrẹ.

Fẹro ọ tẹ nọ Josẹf nọ: ‘Kọ whọ sae fotọ ewezẹ mẹ na?’ Josẹf ọ tẹ fotọ ewezẹ na kẹ Fẹro inọ: ‘Emu ọ te vọ Ijipti ikpe ihrẹ soso, rekọ ikpe ihrẹ nọ i ti lele ei, ohọo o vẹ te jọ Ijipti. Fikiere rehọ ohwo jọ nọ o wo areghẹ gaga mu, re o koko emu buobu họ nọ ahwo a te re evaọ ikpe ihrẹ nọ ohọo o te jọ na.’ Fẹro ọ tẹ ta kẹ Josẹf nọ: ‘Whẹ mẹ salọ! Whọ te jọ ohwo nọ ọ kẹle omẹ evaọ otọ Ijipti soso!’ Ẹvẹ Josẹf ọ sae rọ riẹ oware nọ Fẹro ọ wezẹ ewezẹ kpahe? Jihova o fiobọhọ kẹ Josẹf.

Evaọ ikpe ihrẹ nọ emu ọ rọ vọ Ijipti na, Josẹf o te koko emu buobu họ. Ikpe ihrẹ nọ i lele i rie, emu ọ gbẹ jọ oria ovo ho evaọ akpọ na soso, nwanọ wọhọ epanọ Josẹf ọ ta na. Ahwo a je no eria avọ eria ze te dẹ emu mi Josẹf. Nọ Jekọp ọsẹ Josẹf o yo nọ emu ọ rrọ obọ Ijipti, o te vi emezae ikpe riẹ nyae dẹ emu evaọ obei.

Josẹf o vuhu inievo riẹ nọ ọ nwane ruẹ e rai. Rekọ inievo riẹ a vuhu i rie he. A te guzou kpotọ kẹe wọhọ epanọ ọ wezẹ ewezẹ riẹ evaọ okenọ ọ gbẹ jọ ọmaha. Josẹf ọ gwọlọ riẹ sọ inievo riẹ a nwene no. Fikiere ọ tẹ ta kẹ ae nọ: ‘Whai yọ ekiotọ. Wha nyaze te kiẹ orẹwho mai riwi.’ Aikpobi a tẹ ta nọ: ‘Ijo! Mai yọ emọ 12 nọ ọsẹ mai o yẹ, yọ obọ Kenan ma no ze. Oniọvo mai jọ o whu no, yọ ọrọ  ọmaha kpobi ọ rrọ obọ uwou kugbe Ọsẹ mai.’ Josẹf ọ tẹ ta kẹ ae nọ: ‘Wha nyae rehọ ọrọ ọmaha na se omẹ re mẹ riẹ nọ uzẹme wha be ta.’ Fikiere a te zihe kpo bru ọsẹ rai.

Whaọ nọ emu rai ọ wariẹ re no, ọsẹ rai Jekọp ọ tẹ wariẹ vi ae zihe kpobọ Ijipti. Kẹsena a tẹ wha Bẹnjamin ọrọ ọmaha na lele oma. Re ọ riẹ sọ inievo riẹ a gine nwene no, Josẹf o te fi egho isiliva riẹ fihọ ẹkpa emu Bẹnjamin, kẹsena ọ tẹ ta nọ inievo riẹ a tho egho na. Nọ idibo Josẹf a gwọlọ ku egho na evaọ ẹkpa Bẹnjamin, akpọ o te gbe inievo Josẹf unu. A tẹ lẹ Josẹf nọ ọ kẹ ae uye ukpenọ ọ rẹ kẹ Bẹnjamin uye.

Onana u te ru Josẹf riẹ nọ inievo riẹ a nwene no. Josẹf ọ gbẹ sae gba oma riẹ hẹ. O te muhọ ẹviẹ jẹ ta nọ: ‘Mẹ yọ Josẹf, oniọvo rai. Kọ ọsẹ mẹ ọ gbẹ rrọ uzuazọ?’ Akpọ o te gbe inievo riẹ unu. Josẹf ọ tẹ ta kẹ ae nọ: ‘O kẹ owhai uye inọ wha zẹ omẹ kpohọ igbo ho. Ọghẹnẹ o vi omẹ ziọ obonẹ ti siwi uzuazọ rai. Wha nyae rehọ ọsẹ mẹ ze ovẹrẹ.’

A te kpo nyae vuẹ ọsẹ rai nọ Josẹf ọ gbẹ rrọ uzuazọ, yọ Josẹf ọ gwọlọ nọ a rehọ iẹe ziọ obọ Ijipti. Josẹf avọ ọsẹ riẹ a tẹ wariẹ ruẹ ohwohwo dede nọ ikpe buobu e vrẹ no.

“Wha gbẹ rọ iruthọ amọfa rọvrẹ rae he, Ọsẹ rai ọ te rọ iruthọ rai rọvrẹ owhai hi.”​—Matiu 6:15