Kpohọ eme nọ e riẹ eva

Kpohọ oria izoẹme

 UWUHRẸ AVỌ 10

Kareghẹhọ Aye Lọt

Kareghẹhọ Aye Lọt

Lọt o je lele Abraham oniọvo-ọsẹ riẹ rria ẹwho Kenan. Nọ oke jọ o vrẹ no, erao Abraham avọ erọ Lọt i te bu gaga, fikiere otọ na o gbẹ jẹ gba ai hi. Abraham ọ tẹ ta kẹ Lọt nọ: ‘Mẹ avọ owhẹ ma sae gbẹ rria oria ovona ha. Ivie, salọ abọ nọ ọ were owhẹ, mẹ omamẹ me ti kpohọ abọ nọ o kiọkọ.’ Emamọ uruemu Abraham o dhesẹ na, o gbẹ rrọ ere?

Lọt ọ tẹ ruẹ abọjọ otọ na nọ o woma gaga nọ ọ kẹle okpẹwho jọ nọ a re se Sọdọm. Ame buobu ọ jariẹ avọ ẹbe nọ ọ rrọ bọbọbọ. Fikiere ọ tẹ salọ oria yena jẹ kwa ahwo uviuwou riẹ kpohọ etẹe.

Ahwo Sọdọm gbe ahwo ẹwho nọ ọ kẹle riẹ nọ a re se Gomora, a yoma gaga. Ahwo na a yoma te epanọ Jihova ọ rọ ta nọ ọ rẹ raha ewho na no. Rekọ Ọghẹnẹ ọ gwọlọ siwi Lọt avọ uviuwou riẹ, fikiere o te vi ijẹle ivẹ nyabru ai. Ijẹle na e tẹ ta kẹ ae nọ: ‘Wha dhẹ no ẹwho na no ovẹrẹ! Jihova ọ be te raha iẹe.’

Lọt ọ kake dhẹ no ẹwho na ha. Ọ jẹ raha oke. Fikiere ijẹle na a te kru Lọt, aye riẹ, gbe emetẹ ivẹ riẹ obọ, jẹ rehọ ae dhẹ no ẹwho na. A tẹ ta kẹ ae nọ: ‘Wha dhẹ kẹ uzuazọ rai, wha rri emu hu. Wha te rri emu, wha ti whu.’

Okenọ a dhẹ te ẹwho nọ a re se Zoa, Jihova o te vi oso erae gbe isọ-ọre ze rọ raha Sọdọm avọ Gomora. Ọ tẹ raha ewho ivẹ  na muotọ. Aye Lọt o yoẹme kẹ Jihova ha keme o rri emu, fikiere o te zihe ruọ ukulu uwhei. Rekọ Lọt avọ emetẹ ivẹ riẹ a zọ keme a yoẹme kẹ Jihova. O sae jọnọ o kẹ rai uye gaga fikinọ oni rai o yoẹme he. Rekọ eva e were e rai inọ a yoẹme kẹ Jihova.

“Wha kareghẹhọ aye Lọt.”​—Luk 17:32