Job 9:1-35
9 Job ọ tẹ kpahe nọ:
2 “Mẹ riẹ vevẹ nọ ere o rrọ.
Rekọ ẹvẹ ohwo-akpọ gheghe* ọ rẹ rọ rease nọ o te bi lele Ọghẹnẹ gu ẹdhọ?+
3 Otẹrọnọ ohwo jọ ọ gwọlọ lele iei vro avro,*+Ohwo yena ọ sae za onọ ọvo ho nọ ọ tẹ nọ enọ odu ọvo (1,000).
4 O wo areghẹ je wo ogaga ulogbo.+
Ono ọ rẹ sai lele iei họre nọ ọ gbẹ nwoma ha?+
5 Ọ rẹ wọ* igbehru no oria, ohwo ọvo ọ rẹ riẹ hẹ;Ọ rẹ rọ evedha gele ai kie.
6 O re nuhu otọakpọ na no ẹta riẹ,Ipila riẹ i ve muhọ enuhu.+
7 O jie uzi kẹ ọre na nọ ọ va ze heO di elo isi na;+
8 Ọye ọvo ọ rriẹ odhiwu na họ,+Yọ ọ rẹ nya ehru ẹkporo ọgaga abade.+
9 Ọ ma ẹko isi Ash,* ẹko isi Kisil,* gbe ẹko isi Kaema,*+Te eko isi nọ e rrọ ehru evaọ obọze ovatha-ọre na;*
10 O re ru eware ilogbo nọ a rẹ sae kiẹ otọ rai via ha,+Eware igbunu nọ a rẹ sai kele mu hu.+
11 Ọ rẹ nya akotọ mẹ vrẹ, yọ mẹ rẹ sae ruẹ e riẹ hẹ;Ọ rẹ nyavrẹ omẹ, rekọ mẹ rẹ riẹ hẹ.*
12 Ọ tẹ tabọ mi oware, ono ọ rẹ sae zae dhe?
Ono ọ rẹ sae ta kẹe nọ, ‘Yọ eme who bi ru na?’+
13 Ọghẹnẹ ọ te gba ofu riẹ hẹ;+Makọ enọ i bi fiobọhọ kẹ Rehab*+ a ti guzou kpotọ kẹe.
14 O tubẹ mae gwọlọ nọ mẹ rẹ romakpotọ nọ mẹ tẹ be kpahe ẹme kẹeMẹ rẹ nabe ma ẹme mẹ te nọ me te bi lele iei vro avro!
15 O tẹ make rọnọ mẹ họ ọnọ ọ riẹ ru, mẹ rẹ kpahe ẹme ọvo kẹe he.+
Mẹ rẹ lẹ obruoziẹ mẹ* ọvo inọ ọ re ohrọ mẹ.
16 Me te bo sei, kọ o ti yo kẹ omẹ?
U mu omẹ ẹro nọ ọ te gaviezọ kẹ urru mẹ hẹ,
17 Keme ọ be rehọ ofou ọwhibo guọghọ omẹ.Yọ ọ be nwa omẹ oma ẹnwẹnwa dede nọ me ru oware ovo thọ họ.+
18 Ọ be jọ omẹ wẹ hẹ;Eware eyayare ọvo ọ be kẹ omẹ re.
19 O tẹ rrọ ẹme ohwo nọ ọ mae ga, ọye ọ mae ga.+
O tẹ rrọ ẹme oziẹ okiẹrẹe, ọ ta nọ: ‘Ono ọ rẹ sae rehọ omẹ gu ẹdhọ?’*
20 Otẹrọnọ mẹ họ ọnọ ọ riẹ ru, unu obọmẹ u ti brukpe omẹ;Mẹ tẹ maki kru ẹgbakiete mẹ,* o ti bruoziẹ nọ mẹ reabe.*
21 Mẹ tẹ maki kru ẹgbakiete mẹ,* mẹ rẹ sae robọ sudu hu;*Uzuazọ mẹ o vẹso omẹ no.*
22 Eware na kpobi epọvo na. Oyejabọ nọ mẹ rọ ta nọ,‘Ọ rẹ raha ahwo nọ a ru oware ovo thọ họ* kugbe ahwo omuomu.’
23 Otẹrọnọ owhe nọ ọ rẹ wọ ze ẹsiẹvo o kpe ahwo idudhe,Ọ rẹ hwẹ ahwo nọ a ru oware ovo thọ họ nọ uye o be bẹ.
24 A fi otọakpọ họ obọ ahwo omuomu no;+O ruru aro* ibruoziẹ riẹ.
Otẹrọnọ ọye he, kọ ono?
25 Whaọ enẹna edẹ uzuazọ mẹ e be dhẹ vẹrẹ vi ohwo nọ ọ be dhẹ ohrẹ;+E be dhẹ vrẹ ababọ oware uwoma nọ mẹ be ruẹ.
26 E be whra vrẹ ọvo wọhọ okọ nọ a rehọ ikpoko ku,Wọhọ igo nọ i bi vo mu oware nọ a bi mu.
27 Mẹ tẹ ta nọ, ‘Mẹ rẹ siọ eware nọ e be kẹ omẹ uye ba ẹta via,Mẹ rẹ sasa ovao jẹ wereva,’
28 Ozọ u ti mu omẹ ghele fiki edada mẹ kpobi,+Yọ mẹ riẹ nọ mẹ te rease evaọ obọ ra ha.
29 Mẹ te reabe.*
Kọ fikieme mẹ jẹ lahiẹ oma kufiẹ?+
30 Mẹ tẹ rọ ame nọ ọ ghra no ekpalekpa-ame ze rọ họ,Jẹ rehọ odha* wozẹ abọ mẹ fo,+
31 Who ve ti duwu omẹ họ ọgọdọ,Re mẹ jọ tọtọtọ rọkẹ iwu mẹ dede.
32 Keme ọ rrọ ohwo wọhọ omẹ hẹ nọ mẹ jẹ kpahe ẹme kẹe,Nọ mẹ avọ iẹe ma re ro kpohọ okọto.+
33 Ohwo ọvo ọ riẹ hẹ nọ o ti bruoziẹ* mai,Ọnọ ọ sae jọ obruoziẹ mai.*
34 Otẹrọnọ ọ rẹ siọ omẹ ba ekpe*Jẹ siọ idudu riẹ ba ẹwhẹhọ omẹ oma,+
35 Mẹ vẹ te ta ẹme kẹe ababọ ozọ,Keme mẹ riẹ epanọ a rẹ rọ ozọ ta ẹme he.
Eme-Obotọ
^ Hayo “nọ o re whu.”
^ Hayo “rehọ iẹe kpohọ okọto.”
^ Hayo “O re si.”
^ O sae jọ nọ onana họ ẹko isi nọ a re se Great Bear (Ursa Major).
^ Evaọ Hibru, “ibrikpẹ obọze ovatha-ọre na.”
^ O sae jọ nọ isi Pleiades nọ e rrọ eva ẹko isi Taurus.
^ O sae jọ nọ ẹko isi Orion.
^ Hayo “me re vuhu iei hi.”
^ O sae jọ nọ arao ologbo abade jọ.
^ Hayo o sae jọ nọ, “ohwo nọ ma gbe wo ẹdhọ.”
^ Evaọ Hibru, “sai se omẹ ẹdhọ?”
^ Hayo “O tẹ make rọnọ me ru oware ovo thọ họ.”
^ Evaọ Hibru, “mẹ yọ ohwo omuomu.”
^ Hayo “O tẹ make rọnọ me ru oware ovo thọ họ.”
^ Hayo “Uzuazọ mẹ o be tọtọ omẹ oma; Mẹ se uzuazọ mẹ nana.”
^ Hayo “enọ i bi kru ẹgbakiete rai.”
^ Evaọ Hibru, “ovao.”
^ Evaọ Hibru, “Mẹ te jọ ohwo omuomu.”
^ Hayo “ogo.”
^ Hayo “nọ ọ rẹ jọ obruthe.”
^ Evaọ Hibru, “Nọ o re fi obọ riẹ họ omai imava.”
^ Evaọ Hibru, “o re si ọkpọ riẹ no ehru mẹ.”
