Job 3:1-26
3 Kẹsena Job o te mu ẹme họ ẹta, ọ tẹ be bọwo ẹdẹ nọ a ro yẹi ehao.*+
2 Job ọ ta nọ:
3 “Jọ ẹdẹ nọ a ro yẹ omẹ ọ raha,+Te aso nọ ohwo jọ ọ rọ ta nọ: ‘A di eva ọzae họ no!’
4 Jọ ẹdẹ yena o muebi.
Jọ Ọghẹnẹ nọ ọ rrọ obọ ehru na o gbolaro kẹe;Jọ elo ọvuọvo o lo fihọ iẹe he.
5 Jọ okpa ebi* o rehọ ẹdẹ yena no.
Jọ ẹgho oso o ruru iei.
Jọ eware kpobi nọ i re ru ẹdẹ muebi i ru ozọ mu ei.
6 Jọ ebi ọlala ọ rehọ aso yena no;+Jọ ẹdẹ yena o lele edẹ efa nọ e rrọ ukpe na ghọghọ họ,Jọ a kele iei kugbe edẹ nọ e rrọ emerae na ha.
7 Evaọ uzẹme! Jọ aso yena ọ jọ ọga;Jọ a yo edo oghọghọ ovuọvo evaọ eva riẹ hẹ.
8 Jọ enọ e rẹ bọwo ẹdẹ ehao, e bọwo ẹdẹ yena ehao,Enọ e rẹ sae rọwo Levayatan* no owezẹ ze.+
9 Jọ isi ohiohiẹ* riẹ i zihe ruọ ebi;Jọ ọ hẹrẹ oke nọ u re rrie bẹ,Jọ ọ ruẹ elo oke nọ u bi rrie ze he.
10 Keme ọ kare ẹthẹ edhede oni mẹ hẹ;+Yọ ọ ko uye dhere aro mẹ hẹ.
11 Fikieme me gbe whu evaọ okenọ a je yẹ omẹ hẹ?
Fikieme me gbe whu evaọ okenọ me no eva edhede ze he?+
12 Fikieme ighilawọ nọ a wọ omẹ fihọ e rọ jariẹ?Fikieme evie ọ rọ jariẹ nọ a kẹ omẹ?
13 Keme enẹ yọ me kiẹzẹ ababọ oware ovo nọ u bi kpokpo omẹ;+Enẹ yọ mẹ rrọ owezẹ bi serihọ+
14 Kugbe ivie otọakpọ na avọ ekiroro rai,Enọ e bọ eria kẹ omarai nọ e raha no enẹna,*
15 Hayo kugbe emezae-ivie nọ i wo igoru,Enọ isiliva e vọ iwou rai.
16 Hayo fikieme eva mẹ e gbẹ lẹlẹ no oni mẹ hẹ,Wọhọ emọ nọ e ruẹ elo vievie he?
17 Irumuomu dede a gbe wo idhọvẹ hẹ evaọ obei;Enọ oma o rrọ no na a rrọ obei serihọ.+
18 Enọ a fihọ uwou-odi a rrọ obei kugbe dhedhẹ;A bi yo urru ohwo nọ ọ be gba ae họ ru iruo ho.
19 Te ohwo ologbo avọ oruori ẹrẹrẹe a rrọ evaọ obei,+Ọrigbo o wo ufuoma no obọ olori riẹ no.
20 Fikieme ọ rọ rehọ elo kẹ ọnọ ọ be ruẹ uyeJẹ rọ uzuazọ kẹ enọ idhọvẹ egaga e rrọ oma?*+
21 Fikieme uwhu u bi ro si ai urru, rekọ uwhu o be nyaze he?+
A tubẹ tọ gwọlọ iẹe vi ekwakwa-aghae nọ a ko dhere,
22 Enọ e be ghọghọ gaga,Nọ eva e rẹ were nọ a tẹ ruẹ uki.
23 Fikieme ọ rọ rehọ elo kẹ ọzae nọ o vru no edhere nọ ọ be nya,Ọnọ Ọghẹnẹ ọ ma ogba wariẹ họ?+
24 Keme unuofiẹ o rehọ ẹta emu mẹ no,+Yọ imẹ-idio mẹ+ i bi hwẹ ze wọhọ ame.
25 Keme oware nọ mẹ jẹ ruawa riẹ na u te omẹ oma no,Yọ oware nọ mẹ jẹ dhozọ riẹ na o via kẹ omẹ no.
26 Me wo udhedhẹ hẹ, me wo ufuoma ha, me wo eriosehọ họ,Rekọ uye u bi bru omẹ ze ọvo.”
Eme-Obotọ
^ Evaọ Hibru, “ọ tẹ be bọwo ẹdẹ riẹ ehao.”
^ Hayo “ebi avọ uwoho uwhu.”
^ A dhesẹ nọ arao nana yọ edhere hayo oghẹrẹ arao ologbo ọfa nọ ọ rrọ gaga nọ ọ rẹ rria ame.
^ Hayo “aso.”
^ Hayo o sae jọ nọ, “enọ e bọ eria ifofe kẹ omarai.”
