Job 11:1-20
11 Zofa+ ohwo Neama na ọ tẹ kpahe ẹme nọ:
2 “Kọ a re fibo nọ a gbẹ kpahe ẹme ọvuọvo fihọ eme nana kpobi hi,Hayo kọ ọtabuo o re ru ohwo fihọ emamọ ohwo?*
3 Kọ eme ifofe ra e te lẹliẹ ahwo fibo?
Kọ ohwo ọvo ọ gbẹ te whọku owhẹ fiki eme ijehwẹ ra?+
4 Keme whọ ta nọ, ‘Eware nọ me bi wuhrẹ e rrọ gbagba,*+Yọ mẹ rrọ fuafo evaọ aro ra.’+
5 Dodokọ Ọghẹnẹ ọvo ọ rẹ ta ẹmeRe o rovie igbenu riẹ kẹ owhẹ!+
6 O ve ti dhesẹ edidi areghẹ kẹ owhẹ,Keme uvi areghẹ u re wo abọ buobu.
Who ve ti vuhumu nọ Ọghẹnẹ ọ be kpairoro vrẹ iruthọ ra jọ.
7 Kọ whọ sae kiẹ eware ididi Ọghẹnẹ viaHayo riẹ oware kpobi kpahe* Erumeru na?
8 U kpehru vi odhiwu na. Eme whọ rẹ sai ru?
U diwi vi Uki.* Eme whọ rẹ sae riẹ?
9 U theri vi otọakpọ naJẹ kẹre vi abade na.
10 Otẹrọnọ ọ nya akotọ ohwo vrẹ o je kru ohwo, nọ o je se ahwo ziọ ekọto,Ono ọ rẹ sae whaha iẹe?*
11 Keme ọ rẹ riẹ nọ ahwo a tẹ be ta ọrue.*
Nọ ọ tẹ ruẹ oware umuomu, kọ o gbe vuhu iei mu?
12 Rekọ ohwo nọ ọ kare iroro o ti wo otoriẹ riẹOtẹrọnọ eketekete ẹwọ ọ rẹ sai yẹ ohwo-akpọ.*
13 Dodokọ whọ rẹ ruẹrẹ udu ra họRe whọ rriẹ abọ ra bru ei.
14 Otẹrọnọ whọ be rọ obọ ra ru oware uyoma, siomanoi thethabọ,Whọ jọ umuomu ovuovo o jọ eva iwou-udhu ra ha.
15 Kẹsena whọ vẹ sae kpare ovao ra kpehru ababọ epe;Whọ vẹ sai dikihẹ kothi ababọ ozọ.
16 Uye ra o vẹ te thọrọ owhẹ ẹro no;Whọ vẹ te kareghẹhọ iẹe wọhọ ame nọ o su vrẹ owhẹ no.
17 Uzuazọ ra u ve ti lo vi uvo kekeke;Makọ ebi riẹ dede o te jọ wọhọ ohiohiẹ.
18 Udu o te jọ owhẹ awọ keme who wo ẹruore,Who ve ti rri wariẹ họ je kiẹzẹ avọ omofọwẹ.
19 Who ti kiẹzẹ ababọ ohwo jọ nọ o re ru ozọ mu owhẹ,Yọ ahwo buobu a te gwọlọ aruoriwo ra.
20 Rekọ ibiaro ahwo omuomu i ti tu;A te ruẹ oria ovuovo nọ a rẹ rọ dhẹ vabọ họ,*Ẹruore nọ a ti wo kpobi họ uwhu.”*+
