Job 26:1-14
26 Job ọ tẹ kpahe ẹme nọ:
2 “Rri epanọ who fiobọhọ kẹ ọnọ o wo ogaga ha te!
Rri epanọ who ro siwi ugbobọ ọnọ o wo ẹgba ha!+
3 Rri obọdẹ ohrẹ nọ whọ kẹ ọnọ ọ kare areghẹ na!+
Who gine dhesẹ uvi areghẹ ra via* unuẹse buobu!
4 Ono whọ be gwọlọ ta ẹme kẹ na,Obọ ono eme nana nọ whọ be ta na i no ze?*
5 Enọ i whu no nọ i wo ogaga ovo ho a re nuhu;Obonọ a rrọ u tube kodo vi ame obuobu na gbe eware nọ e be rriae eva.
6 Uki* u kpefihọ evaọ aro Ọghẹnẹ,*+Yọ oria ọraha na u rovie fihọ.*
7 Ọ rriẹ idadeghe obọ ẹkpẹlobọ ovatha-ọre* na fihọ evevẹ* na,+O fi otọakpọ na họ ehru oware ovo ho;
8 Ọ rehọ ẹgho riẹ variẹ ame obuobu na,+Re ẹgho na ọ gbẹ bẹre no fiki ẹgbẹdẹ riẹ hẹ;
9 O ruru oria agbara-uvie riẹ re a se iẹe ba ẹruẹ,Ọ rriẹ ẹgho riẹ ruru iei.+
10 O fi umuo họ kẹ idadeghe na, onọ o wọhọ ẹsenọ o rehọ abọ duwu otọ* evaọ ehru ame obuobu na;+O fi uwhru họ udevie elo avọ ebi.
11 Ipila obọ odhiwu i bi nuhu;Ọwhọkuo riẹ ọ lẹliẹ e rai mudhe avọ ozọ.
12 Ọ rẹ rọ ogaga riẹ wha ẹvohẹ họ abade na,+Yọ ọ rẹ rọ otoriẹ riẹ bru arao ologbo abade na* ekekẹ.+
13 Ọ rẹ rehọ ẹwẹ-okuo* riẹ ru ehru na ghariẹ;Obọ riẹ u re duwu araomuomu ẹghẹ* na.
14 Rri! Enana yọ amabọ jọ gheghe orọ idhere riẹ;+Emedo kakao ọvo a yo kpahe iẹe no!
Kọ ono ọ rẹ sai wo otoriẹ agbrara ologbo riẹ?”+
Eme-Obotọ
^ Hayo “Who ru oware areghẹ via.”
^ Evaọ Hibru, “Ẹwẹ (hayo ẹzi) ono who ku ze na?”
^ Evaọ Hibru, “riẹ.”
^ Hayo “Yọ Abadọn o rovie fihọ.”
^ Evaọ Hibru, “ufofe.”
^ Evaọ Hibru, “Ọ rriẹ ẹkpẹlobọ ovatha-ọre.”
^ Evaọ Hibru, “O fi umuo họ kẹ egheghelie na.”
^ Evaọ Hibru, “Rehab.”
^ Hayo “ofou.”
^ Hayo “nọ ọ rẹ fia.”
