Job 36:1-33
36 Elaihu ọ tẹ gbẹ ruabọhọ ẹme riẹ inọ:
2 “Gbe wo odiri kẹ omẹ omojọ re me ru ẹme na vẹ,Keme me gbe wo eme nọ mẹ te ta kpahe Ọghẹnẹ.
3 Mẹ te ta eme buobu kpahe eware nọ mẹ riẹ,Yọ me ti dhesẹ nọ Ọnọ ọ ma omẹ o kiẹrẹe.+
4 Evaọ uzẹme, mẹ be ta ọrue he;Ọnọ o wo eriariẹ egbagba+ na ọ rrọ etenẹ kugbe owhẹ.
5 Evaọ uzẹme, Ọghẹnẹ ọ re gaga+ yọ ọ rẹ siọ ohwo ọvo ho;O wo ogaga ulogbo nọ o re ro wo otoriẹ eware.*
6 O ti siwi uzuazọ irumuomu hu,+Rekọ o ti bru uvioziẹ kẹ enọ a bi gboja kẹ.+
7 O re si ubiẹro riẹ no ikiẹrẹe na ha;+Ọ rẹ rehọ ae keria kugbe ivie,*+ yọ a te kpare ai kpehru bẹdẹ bẹdẹ.
8 Otẹrọnọ a rehọ egbregba gba aeJẹ rehọ ifi oja-oriọ gba ae,
9 O ve dhesẹ oware nọ a ru na kẹ ae,Izieraha rai nọ omorro rai o wha ze.
10 O re rovie ezọ rai kẹ ọkpọvioỌ vẹ ta kẹ ae nọ a siọ oware uyoma ba eru.+
11 Otẹrọnọ a yoẹme jẹ gọe,Eware i ti woma kẹ ae evaọ edẹ uzuazọ rai kpobi,Yọ ikpe uzuazọ rai e te vọ avọ omawere.+
12 Rekọ a gbe yoẹme he, a ti whu uwhu ọgbọdọ*+A ti whu ababọ eriariẹ.
13 Ahwo nọ a riẹ Ọghẹnẹ hẹ* evaọ udu rai a re fi ẹgo họ eva.
A re bo kẹ obufihọ họ nọ ọ tẹ make rọ ifi gba ae dede.
14 A re whu* nọ a gbẹ rrọ ọmaha,+A rẹ raha oke rai* kugbe igberẹ ezae etẹmpol.+
15 Rekọ Ọghẹnẹ ọ rẹ thọ enọ e be reoja evaọ etoke oja-oriọ rai;O re rovie ezọ rai re a yo ẹme riẹ nọ a te bi kienyẹ ae.
16 O re si owhẹ no akotọ ẹbẹbẹ+Kpohọ oria nọ o rrọ kẹkẹe nọ awhaha ọ rrọ họ,+Avọ emamọ emu nọ ọ rrọ ehru emẹjẹ ra nọ ọ rẹ rọ sasa owhẹ oma.+
17 Kẹsena oziẹ nọ a ti brukpe irumuomu na o vẹ te vọ owhẹ eva,+Nọ a te guẹdhọ na je bru uvioziẹ no.
18 Rekọ yọroma re ofu ọ gbẹ lẹliẹ owhẹ jẹ egrẹ hẹ,*+Yọ whọ kuvẹ re udi-oriọ ulogbo u su owhẹ thọ họ.
19 Kọ oviẹ ra kẹ obufihọHayo omodawọ ogaga ra u ti si owhẹ no idhọvẹ?+
20 Who du rẹro aso gaga ha,Okenọ a rẹ gbẹ rọ ruẹ ahwo evaọ eria nọ a jọ họ.
21 Yọroma re whọ siọ umuomu ba eru,Whọ salọ oyena ha, ukpoye salọ oja-oriọ.+
22 Rri! A kpare Ọghẹnẹ kpehru fiki ogaga ulogbo riẹ;Owuhrẹ vẹ ọ wọhọ e riẹ?
23 Ono o dhesẹ edhere kẹe* no ẹdẹ jọ+Hayo ta kẹe nọ, ‘Oware nọ who ru na o thọ’?+
24 Kareghẹhọ jiri iruẹru riẹ,+Enọ ahwo-akpọ a rọ so ile no.+
25 Ahwo-akpọ kpobi a ruẹ onana no,Ohwo-akpọ o bi rri no ugbothabọ ze.
26 Evaọ uzẹme, ma rẹ sae riẹ epanọ Ọghẹnẹ ọ rro te he;+A rẹ sae riẹ epanọ ikpe riẹ i bu te he.*+
27 O re se egẹgẹ ame kpehru;+I ve zihe ruọ oso nọ o bi no igrigri riẹ ze;
28 Kẹsena o ve hwẹ no ẹgho na ze fihọ otọ;+Ọ vẹ rrọ fihọ ahwo-akpọ.
29 Kọ ohwo jọ ọ rẹ sae riẹ oghẹrẹ nọ ẹgho na ọ rrọ,Gbe egbrara nọ i bi no uwou-udhu* riẹ ze?+
30 Rri epanọ o ru elo egbrara riẹ lo fihọ oma riẹ soso+Je ruru edidi* abade na.
31 Enana ọ be rọ rẹrote* ahwo na;Ọ be kẹ ae emu buobu.+
32 Ọ be rọ abọ riẹ ruru elo egbrara na,Yọ ọ rẹ kpọe bru ọnọ ọ gwọlọ rehọ iẹe tehe.+
33 Egbrara riẹ e be ta kpahe iẹe,Makọ uthuru erao i re vuhu ohwo* nọ ọ be tha.
Eme-Obotọ
^ Evaọ Hibru, “O wo udu ulogbo.”
^ Hayo o sae jọ nọ, “Ọ rẹ rehọ ivie mu.”
^ Hayo “okwakwa enwoma (ose).”
^ Hayo “Enọ e siọ orọwọ na no.”
^ Hayo o sae jọ nọ, “raha uzuazọ rai no.”
^ Hayo “tehe abọ egrẹ hẹ.”
^ Hayo o sae jọ nọ, “Ono ọ fo riẹ; Ono ọ rehọ e riẹ guẹdhọ.”
^ Hayo “sae kiẹ otọ ikpe riẹ via ha.”
^ Evaọ Hibru, “uwou-owhre.”
^ Evaọ Hibru, “awọ.”
^ Hayo o sae jọ nọ, “thọ.”
^ Hayo o sae jọ nọ, “oware.”
