Job 31:1-40
31 “Mẹ re ọvọ kugbe ibiaro mẹ no.+
Kọ ẹvẹ mẹ sai ro rri ọmọtẹ-kọkọ evaọ edhere nọ o fo ho?+
2 Me te ru ere, eme u re no obọ Ọghẹnẹ nọ ọ rrọ obehru na ze te omẹ,Ukuoriọ vẹ u re no obọ Erumeru nọ ọ rrọ obehru na ze?
3 Kọ okpẹtu o gbẹ be hẹrẹ ohwo nọ o ru oware uyoma?Kọ uye o gbẹ be hẹrẹ enọ i bi ru eware nọ e rẹ wha ebẹbẹ ze?+
4 Kọ ọ gbẹ be ruẹ idhere mẹ+Je kele ithihi awọ mẹ kpobi?
5 Kọ mẹ nya edhere nọ ọ rrọ orọ uzẹme he* no ẹdẹ jọ?
Kọ owọ mẹ o nya ovovẹrẹ nyae viẹ ahwo họ no ẹdẹ jọ?+
6 Jọ Ọghẹnẹ ọ rehọ iskeli egbagba rọ wawọ omẹ;+Kẹsena o ve ti vuhu ẹgbakiete mẹ mu.+
7 Otẹrọnọ awọ mẹ ọ nya no edhere na+Hayo udu mẹ u siuru eware nọ ibiaro mẹ e ruẹ+Hayo me gbe abọ mẹ ku,
8 Jomẹ kọ ibi re omọfa ọ re ae,+Jọ a vi eware nọ mẹ kọ kufiẹ.*
9 Otẹrọnọ udu mẹ u wo isiuru kẹ aye jọ+Me je kiekọ unuwou ọrivẹ mẹ be hẹrẹ,+
10 Jọ aye mẹ o wuhu eka kẹ ọzae ọfa,Jọ ezae efa a lele iei wezẹ.*+
11 Keme oyena yọ uruemu omovuọ,Oware uyoma nọ u fo nọ ibruoziẹ a rẹ rọ fiki riẹ kẹ ohwo uye.+
12 Oyena yọ erae nọ e rẹ to jẹ raha eware no,*+Onọ o rẹ tubẹ to awọ* ekakọ mẹ kpobi no.
13 Otẹrọnọ mẹ se inọ me re bru uvioziẹ kẹ idibo ezae gbe erọ eyae mẹ hẹNọ a tẹ ta oware jọ nọ me ru nọ o kẹ rai uye,*
14 Eme mẹ rẹ sai ru nọ Ọghẹnẹ ọ tẹ nọ omẹ unu?*
Eme mẹ rẹ sae kpahe kẹe nọ ọ tẹ nọ omẹ kpahe oware nọ me ru na?+
15 Kọ ogbẹrọnọ Ọnọ ọ ma omẹ eva edhede ọye ọ ma rai re?+
Kọ ogbẹrọnọ Omọvo na ọ ma omai taure a te ti yẹ omai?*+
16 Otẹrọnọ mẹ rọwo ho inọ mẹ rẹ kẹ iyogbe na oware nọ o were rai+Hayo ru aye-uku rẹro bẹ;*+
17 Otẹrọnọ mẹ ọvo mẹ re emu mẹNọ mẹ gbẹ kẹ emọ nọ i wo esẹgbini hi;+
18 (Keme no oke uzoge mẹ ze, ọmọ nọ o wo ọsẹgboni hi ọ jọ kugbe omẹ wọhọ ẹsenọ mẹ rrọ ọsẹ riẹ,Yọ mẹ sẹro aye-uku no emaha mẹ ze.*)
19 Mẹ tẹ ruẹ ohwo nọ ekpahe i bi kpe whu no fikinọ o wo ewu huHayo oyogbe nọ o wo oware ovuovo nọ o re ro ruru oma riẹ hẹ;+
20 Otẹrọnọ ọ lẹ ẹro* siwi omẹ hẹ+Nọ ọ be rehọ iwhulu nọ i no igodẹ mẹ ze ru oma riẹ ruọruọ na;
21 Otẹrọnọ me nuhu obọ mẹ wọso ọmọ nọ o wo ọsẹgboni hi+Nọ ọ tẹ gwọlọ obufihọ mẹ evaọ obọ unuẹthẹ okpẹwho na;*+
22 Jọ ugbobọ* mẹ u kie no ẹkoko mẹ,Jọ ugbobọ mẹ u wiri evaọ eghilobọ mẹ.*
23 Keme mẹ dhozọ okpẹtu nọ o re no obọ Ọghẹnẹ ze,Gbe nọ mẹ rẹ sai dikihẹ rri oruaro riẹ hẹ.
24 Otẹrọnọ mẹ rẹroso igoruHayo ta kẹ emamọ igoru nọ, ‘Whẹ họ ẹruore mẹ!’+
25 Otẹrọnọ efe obuobu mẹ oye oghọghọ mẹ u bi no ze+Fiki ekwakwa ibuobu nọ me wo;+
26 Otẹrọnọ mẹ ruẹ ọre* na nọ o bi loHayo ọvẹre na nọ o bi ghelie avọ erru;+
27 Udu mẹ o tẹ lẹlẹ wo isiuru,*Yọ unu mẹ o tẹ viọlọ obọ mẹ be gọ ae;+
28 Oyena yọ oware uyoma nọ u fo nọ ibruoziẹ a rẹ rọ fiki riẹ kẹ ohwo uye,Keme yọ mẹ siọ Ọghẹnẹ uzẹme nọ ọ rrọ obehru na no.
29 Kọ mẹ ghọghọ no ẹdẹ jọ fiki ọraha nọ o te ọwegrẹ mẹ+Hayo wereva fiki oware uyoma nọ o via kẹe?
30 Mẹ kẹ unu mẹ uvẹ vievie he re o raha uziRe me duwu iyei inọ o* whu.+
31 Kọ ezae nọ e be rria uwou mẹ a gbẹ ta nọ,‘Ono ọ rẹ ruẹ ohwo jọ dhesẹ nọ ọ re re emu* riẹ vọ eva ha?’+
32 U du gwọlọ nọ ọrara* ọvuọvo ọ rẹ wezẹ otafe asohẹrioke he;+Me rovie ethẹ mẹ fihọ kẹ ohwo nọ o bi kpohọ erẹ.
33 Kọ mẹ daoma ko iruthọ mẹ dhere no ẹdẹ jọ, wọhọ epanọ amọfa a bi ru,+Re me si izieraha mẹ no họ ẹkpa ewu mẹ?
34 Kọ mẹ jẹ dhozọ oghẹrẹ nọ o te jọ ahwo buobu oma,Hayo kọ mẹ dhozọ ekpehre ubiẹro nọ iviuwou efa a ti ro rri omẹ,Onọ u ru omẹ fibo jẹ dhozọ inọ mẹ rẹ ruọ otafe he?
35 Dodokọ ohwo jọ ọ rẹ gaviezọ kẹ omẹ!+
Mẹ rẹ rehọ odẹ mẹ whobọhọ ẹme nọ mẹ ta.*
Jọ Erumeru na ọ kẹ omẹ uyo!+
Dodokọ ohwo nọ ọ be wọ eku họ omẹ uzou na o kere eware nọ ọ ta nọ me ru thọ na fihọ obe!
36 Mẹ rẹ rọ ẹkoko mẹ whae,Yọ me re thuru iei fihọ uzou mẹ wariẹ họ wọhọ etu-uvie.
37 Mẹ rẹ niyẹrẹ kẹe kpahe owọ kpobi nọ mẹ jẹ;Mẹ rẹ nyabru ei ududu wọhọ osu.*
38 Otẹrọnọ otọ obọmẹ u re bo via fiki mẹYọ udevie ikuele ithethei nọ e rrọ otọ na kpobi e rẹ viẹ;
39 Otẹrọnọ mẹ re ubi riẹ ababọ osa nọ mẹ hwa,+Hayo otẹrọnọ me ru enọ* i wo rie vioja;+
40 Jọ idhigbo e dhẹ ze kẹ omẹ viukpọ iwhitiGbe ẹbe nọ o re gbo ekpehre ore viukpọ ebali.”
Etenẹ ẹme Job o jo kuhọ.
Eme-Obotọ
^ Hayo o sae jọ nọ, “mẹ nya lele ahwo nọ a rẹ ta uzẹme he.”
^ Hayo o sae jọ nọ, “Jọ a le emọ mẹ kufiẹ.”
^ Evaọ Hibru, “Jọ ezae efa a kigwẹ fihọ ehru riẹ.”
^ Evaọ Hibru, “re (muotọ) bẹsenọ o rẹ raha no.”
^ Hayo “Nọ u re vi.”
^ Hayo “a te wo ẹdhọ jọ kugbe omẹ.”
^ Evaọ Hibru, “ọ tẹ kpama?”
^ Evaọ Hibru, “eva edhede?”
^ Evaọ Hibru, “ru ibiaro aye-uku dhe no.”
^ Evaọ Hibru, “no edhede oni mẹ ze.”
^ Evaọ Hibru, “eku riẹ ọ lẹ ẹro.”
^ Hayo o sae jọ nọ, “Nọ mẹ tẹ ruẹ nọ ahwo a te jọ abọ mẹ evaọ obọ unuẹthẹ okpẹwho na.”
^ Hayo “akpalobọ.”
^ Hayo “u no ẹzo riẹ; o kpare no ugbonwa obehru riẹ.”
^ Evaọ Hibru, “elo.”
^ Hayo “viẹ omẹ họ.”
^ Evaọ Hibru, “arao.”
^ Hayo “ohwo orẹwho ọfa.”
^ Hayo “Mẹ whobọhọ iẹe.”
^ Evaọ Hibru, “ọmọzae-ovie.”
