Job 40:1-24
40 Jihova ọ tẹ gbẹ be ta ẹme kẹ Job inọ:
2 “Kọ ohwo ọ rẹ gwọlọ oruthọ evaọ obọ Erumeru na re o lele iei kpohọ ẹdhọ?+
Jọ ohwo nọ ọ gwọlọ whọku Ọghẹnẹ ọ ta ẹme.”+
3 Job ọ tẹ kẹ Jihova uyo nọ:
4 “Rri! Me te oware ovo ho.+
Eme mẹ rẹ sae kpahe kẹ owhẹ?
Mẹ rọ obọ mẹ ruru unu mẹ.+
5 Mẹ ta ẹme ẹsiẹvo, rekọ mẹ gbẹ te wariẹ ta ẹme he;Mẹ ta ẹme isiava, rekọ mẹ gbẹ te ta ha.”
6 Kẹsena Jihova ọ tẹ kpahe ẹme kẹ Job no ofou ọwhibo na ze inọ:+
7 “Ivie, mu eku ra ga wọhọ ọzae;Mẹ te nọ owhẹ enọ, whọ vẹ te kẹ omẹ iyo.+
8 Kọ whọ rẹ ta nọ me bi bru uvioziẹ hẹ?*
Kọ who re brukpe omẹ re whọ jọ ọnọ ọ riẹ ru?+
9 Kọ who wo ugbobọ nọ u wo ẹgba wọhọ orọ Ọghẹnẹ uzẹme na,+Hayo kọ urru ra o sai ru edo egbrara wọhọ oriẹ?+
10 Ivie, rọ adhẹẹ gbe oruaro gọ omara ẹgọ;Fi ọghọ avọ orro họ omara wọhọ ewu.
11 Dhesẹ ofu ọgaga ra via;Rri ohwo kpobi nọ o wo omorro, re whọ rehọ iẹe ziọ otọ.
12 Rri ohwo kpobi nọ o wo omorro, re who hrẹ riẹ kpotọ,Re who thihi irumuomu na nyaotọ evaọ oria nọ a dikihẹ.
13 Si ai kpobi no fihọ ẹkpẹ;*Gba ae* fihọ oria nọ u siomano,
14 Kẹsena mẹ omamẹ mẹ vẹ te rọwo*Inọ obọze ra o rẹ sai siwi owhẹ.
15 Rri Bẹhimọt* nọ mẹ ma wọhọ epanọ mẹ ma owhẹ na.
Ọ rẹ re ẹbe wọhọ eruẹ.
16 Rri ẹgba nọ ọ rrọ eku riẹGbe ogaga nọ o rrọ iriẹ eva riẹ!
17 O re ru uweli riẹ gaga wọhọ ure sida;A zuo iriẹ ikpekpawọ riẹ kugbe.
18 Igbenwa riẹ e wọhọ ekpọ ekọpa;Abọ gbe awọ riẹ e wọhọ ekpọ ayọno.
19 Evaọ usu emama itieye na, ọye họ ọrọ ọsosuọ* evaọ iruo Ọghẹnẹ;Ọnọ ọ ma riẹ na ọvo ọ rẹ sae nyabru ei avọ ọgbọdọ riẹ.
20 Keme evaọ igbehru na ọ rẹ jọ ruẹ emu re,Oria nọ erao ẹwọ na kpobi a rẹ jọ zaharo.
21 O re kiẹzẹ otọ ire lotọs,Ọ rẹ jọ otọ ikpoko oria nọ o rrọ ameame.
22 Ire lotọs e rẹ kẹe edhedhẹ riẹ,Yọ ire pọpla ukiekpotọ* na e wariẹ e riẹ họ.
23 Nọ ẹvohẹ ọ tẹ rrọ evaọ ethẹ na, ozọ u re mu ei hi.
Udu o rẹ jariẹ awọ, dede nọ ame Jọdan+ o bi kporo ẹkẹre ọgaga fihọ iẹe unu.
24 Kọ ohwo jọ ọ rẹ sai mu ei yọ o bi rri rie,Hayo jẹ oghọlọ* fihọ unwe riẹ?
Eme-Obotọ
^ Hayo “oziẹ mẹ o woma ha?”
^ Hayo “ovu.”
^ Evaọ Hibru, “Gba ovao rai.”
^ Hayo “me ve ti jiri owhẹ.”
^ O sae jọ nọ eni-ame.
^ Evaọ Hibru, “Ọye họ emuhọ.”
^ Hayo “uto.”
^ Evaọ Hibru, “ẹta.”
