Job 2:1-13
2 Kẹsena u te ti te ẹdẹ nọ emọ Ọghẹnẹ uzẹme na*+ a rọ nyaziọ aro Jihova,+ yọ Setan ọ ruọ udevie rai re ọ ziọ aro Jihova re.+
2 Jihova ọ tẹ nọ Setan nọ: “Bovẹ who no ze?” Setan o te yo kẹ Jihova nọ: “Obọ otọakpọ na me bi jo ghoro kpenẹ avọ enẹ jẹ be nya kpenẹ avọ enẹ evaọ eva riẹ.”+
3 Jihova ọ tẹ nọ Setan nọ: “Kọ who muẹrohọ* Job odibo mẹ no? Ohwo ọvo nọ ọ wọhọ e riẹ ọ rrọ otọakpọ na ha. Ohwo okiẹrẹe nọ ọ gbakiete,*+ nọ ọ be dhozọ Ọghẹnẹ jẹ be kẹnoma kẹ oware uyoma. O gbe kru ẹgbakiete riẹ gaga,+ dede nọ whọ gwọlọ ru omẹ wọso ẹe+ re mẹ raha iẹe* no ababọ oware nọ o ru thọ.”
4 Setan o te yo kẹ Jihova nọ: “Ohọroma rọkẹ ohọroma. Ohwo o re siobọno eware nọ o wo kpobi fiki uzuazọ* riẹ.
5 Rekọ, re onana u nwene, rriẹ obọ ra re whọ tehe* ugbonwa riẹ avọ uwo-oma riẹ, ọ te la owhẹ eka evaọ iraro ra.”+
6 Jihova ọ tẹ ta kẹ Setan nọ: “Rri! Ọ rrọ owhẹ obọ. Thakpinọ who kpei no ho!”*
7 Fikiere Setan ọ tẹ nya no aro* Jihova ọ tẹ rọ eruẹso nọ e rẹ da gaga* tehe Job,+ no obọ evawọ riẹ rite oko uzou riẹ.
8 Job ọ tẹ tọlọ ẹwẹ othẹ nọ o whu no jẹ rọ fọrọ oma riẹ, yọ ọ keria udevie enwo.+
9 Uwhremu na, aye riẹ ọ tẹ ta kẹe nọ: “Kọ who gbe bi kru ẹgbakiete ra gaga? La Ọghẹnẹ eka re who whu!”
10 Rekọ ọ tẹ ta kẹ aye riẹ nọ: “Whọ be ta ẹme wọhọ eyae nọ i wo areghẹ hẹ. Kọ oware uwoma ọvo ma rẹ rehọ mi Ọghẹnẹ, ma gbẹ rehọ uyoma re?”*+ Evaọ eware nana kpobi, Job ọ rehọ igbenu riẹ raha uzi hi.+
11 Egbẹnyusu* esa Job a yo kpahe eware okpẹtu kpobi nọ i te rie, omomọvo o te no ọvuọ oboriẹ ze, Ẹlifaz+ ohwo Timan, Bildad+ ohwo Shuah,+ gbe Zofa+ ohwo Neama. Fikiere a tẹ ta mu nọ a re kuomagbe re a nyai lele Job weri jẹ sasa iẹe oma.
12 Nọ a kparo ruẹ e riẹ evaọ ugbo, a vuhu i rie he. A te mu enu oviẹ họ eku jẹ bẹre iwu rai, a tẹ be whẹ ẹkpẹ gbolo kpehru fihọ uzou rai.+
13 Kẹsena a tẹ keria otọ kugbei edẹ ihrẹ gbe eso ihrẹ. Ae ọvuọvo ọ ta ẹme ọvo kẹe he, keme a ruẹ nọ edada nọ e riẹe oma e rrọ gaga.+
Eme-Obotọ
^ Oghẹrẹ ofa nọ a rẹ jọ ẹvẹrẹ Hibru se ikọ-odhiwu.
^ Evaọ Hibru, “whọ gale udu ra vi.”
^ Hayo “Ohwo nọ ọ kare afuẹwẹ je kiete.”
^ Evaọ Hibru, “lọe.”
^ Hayo “bọwo.”
^ Hayo “whọ rọ obọ te uzuazọ riẹ hẹ.”
^ Evaọ Hibru, “ovao.”
^ Hayo “ela nọ i yoma gaga.”
^ Hayo “kọ ma gbẹ jẹ uyoma rehọ re?”
^ Hayo “Egbẹrioma.”
