Itẹ 4:1-27
4 Emezae mẹ, wha gaviezọ kẹ uthubro* ọsẹ;+Wha gaviezọ ziezi re wha ruẹsi wo otoriẹ,
2 Keme mẹ te kẹ owhai emamọ uthubro;Wha gbabọkẹ uwuhrẹ* mẹ hẹ.+
3 Mẹ jọ uvi ọmọ kẹ ọsẹ mẹ+Gbe ọnọ oni mẹ o you gaga.+
4 O wuhrẹ omẹ, ọ ta nọ: “Jọ eme mẹ e jọ udu ra ẹsikpobi.+
Koko ijaje mẹ re whọ rria tọ.+
5 Daoma wo areghẹ, daoma wo otoriẹ.+
Jọ o thọrọ owhẹ ẹro ho, whọ nyasiọ ẹme nọ mẹ ta ba ha.
6 Who gbabọkẹe he, o vẹ te thọ owhẹ.
You rie, o vẹ te sẹro ra.
7 Areghẹ họ oware nọ o mai wuzou,*+ fikiere daoma wo areghẹ,
Yọ evaọ usu eware kpobi nọ whọ rẹ daoma wo, daoma wo otoriẹ.+
8 Rri rie ghaghae, o vẹ te kpare owhẹ kpehru.+
O te wha orro se owhẹ, keme whọ dhẹ gbalọ iẹe.+
9 O ti ku emamọ idodo nọ a zuo gheghelie họ uzou ra;Ọ te rọ etu-uvie nọ o woma gaga gọ owhẹ ẹgọ.”
10 Ọmọzae mẹ, gaviezọ re whọ jẹ eme mẹ rehọ,Ikpe uzuazọ ra e vẹ te jọ buobu.+
11 Me ti wuhrẹ owhẹ edhere areghẹ;+Me ti su owhẹ nya idhere* ẹrẹreokie.+
12 Okenọ whọ te nyavrẹ, oware ovo o te za owhẹ dhe he;Yọ whọ tẹ be dhẹ ohrẹ, who ti zoruẹ hẹ.
13 Kru uthubro* gaga, who siobọnoi hi.+
Sẹro riẹ ziezi, keme oye uzuazọ ra o roma hwa.+
14 Whọ nyaruọ edhere irumuomu hu,Whọ nya edhere ahwo omuomu hu.+
15 Whaha iẹe, whọ nyae he;+Kẹnoma kẹe, nya edhere ọfa se iẹe ba.+
16 Keme a rẹ sae wezẹ hẹ, ajokpanọ a ru eyoma.
A rẹ rọ owezẹ te ẹro ho, ajokpanọ a gele ohwo jọ kie.
17 A rẹ rọ ebrẹdi emuemu kuọ omarai,Yọ a rẹ da enwaene ozighi.
18 Rekọ edhere ikiẹrẹe na ọ wọhọ elo ohiohiẹNọ ọ rẹ rọ ẹmẹrera dhe evevẹ, bẹsenọ uvo o rẹ bẹre ze ziezi.+
19 Edhere irumuomu na ọ wọhọ ebi;A rẹ riẹ oware nọ u bi ru ai zoruẹ hẹ.
20 Ọmọzae mẹ, gaviezọ kẹ eme mẹ;Kezọ ziezi* kẹ eme nọ mẹ be ta.
21 Jọ e thọrọ owhẹ ẹro ho;*Fi ai họ obeva udu ra.+
22 Keme e rẹ rọ uzuazọ kẹ enọ e jẹ rai rehọ+Je ru ai wo omokpokpọ.*
23 Evaọ usu eware nọ whọ rẹ mae sẹro* kpobi, sẹro udu ra ziezi,*+Keme eva riẹ eware nọ e rẹ kẹ uzuazọ i re no ze.
24 Whọ ta eme ẹghẹ hẹ,+Whaha eme eviẹhọ riẹriẹriẹ.
25 Jọ ibiaro ra i rri obaro kiọkiọkiọ,Ẹhẹ, tẹrovi* obaro ọvo.+
26 Ruẹrẹ edhere nọ whọ be nya họ re o jọ riẹriẹriẹ,*+Kẹsena idhere ra kpobi e vẹ te jọ wowoma.
27 Whọ wẹriẹ kpohọ obọze hayo ẹkpẹlobọ họ.+
Si awọ ra no edhere omuomu.
Eme-Obotọ
^ Hayo “ọwhọkuo; uwuhrẹ.”
^ Hayo “uzi.”
^ Hayo “oware ọsosuọ.”
^ Hayo “imidhere.”
^ Hayo “ọwhọkuo; uwuhrẹ.”
^ Evaọ Hibru, “Fi ozọ ra hotọ.”
^ Hayo “Who si ibiaro ra no ai hi.”
^ Evaọ Hibru, “Gbe omokpokpọ kẹ uwo-oma rai kpobi.”
^ Hayo “nọ whọ rẹ mai rou.”
^ Hayo “rou udu ra ziezi.”
^ Hayo “tọ ibiaro ra nọ i bi ke na vi”
^ Hayo o sae jọ nọ, “Nabi roro edhere nọ whọ be te nya na te.”
