Itẹ 29:1-27
29 Ohwo nọ o re ru uriohọ riẹ kekeke* dede nọ a whọku ei gaga no+A ti wiri ei te epanọ a gbẹ sai ro siwi ei hi.+
2 Nọ ahwo okiẹrẹe a tẹ rrọ buobu, ahwo a rẹ ghọghọ,Rekọ nọ ohwo omuomu o te bi su, ahwo a re dimẹ.+
3 Ohwo nọ o you areghẹ o re ru ọsẹ riẹ eva were,+Rekọ ohwo nọ ọ rẹ nya usu kugbe igberẹ ọ rẹ raha efe riẹ kufiẹ.+
4 Ovie nọ o re bru uvioziẹ o re ru ẹwho jọ dhedhẹ,+Rekọ ohwo nọ ọ rẹ gwọlọ re udi ọ rẹ raha ẹwho.
5 Ohwo nọ o re jiri ọrivẹ riẹ ujiro igbenuO bi fi ẹriri họ kẹ awọ riẹ.+
6 Imuemu ekpehre ohwo e wọhọ agbefẹ kẹe,+Rekọ ohwo okiẹrẹe o re bo ubo oghọghọ jẹ wereva.+
7 Epanọ a re ro bru uvioziẹ kẹ iyogbe o rẹ jọ ohwo okiẹrẹe oja,+Rekọ ohwo omuomu o wo iroro itieye he.+
8 Ahwo nọ a re seha a re tu erae họ ẹwho,+Rekọ enọ i wo areghẹ a re ru ahwo siọ ofu ba.+
9 Nọ ohwo owareghẹ o te bi lele ohwo ogheghẹ si ikẹ,Edo gbe ẹkoko-ose ọ rẹ romavia, yọ erere ọvo o re noi ze he.+
10 Ahwo nọ azẹ-okpe o bi siuru a re mukpahe ohwo kpobi nọ abọ riẹ ọ fo,*+Yọ a rẹ gwọlọ kpe ohwo* nọ o kiete.*
11 Ohwo ogheghẹ o re dhesẹ evedha* riẹ kpobi via,+Rekọ ohwo owareghẹ ọ rẹ nyẹ omariẹ.+
12 Nọ osu ọ tẹ be gaviezọ kẹ erue,Idibo riẹ kpobi e rẹ jọ ahwo omuomu.+
13 Oyogbe avọ ohwo okienyẹ epọvo na a rrọ evaọ onana:*
Jihova họ ọnọ ọ be kẹ ibiaro rai elo.*
14 Nọ ovie o te bi bru uvioziẹ kẹ iyogbe,+Agbara-uvie riẹ o re dikihẹ kothi ẹsikpobi.+
15 Ọkpọ* gbe ọwhọkuo e rẹ lẹliẹ ohwo wo areghẹ,+Rekọ ọmọ nọ a vuwa re o ru onọ u je rie ọ rẹ wha omovuọ se oni riẹ.
16 Nọ ahwo omuomu a te bi vihọ, izieraha i re vihọ,Rekọ ahwo okiẹrẹe a te ruẹ ekie rai.+
17 Whọku ọmọ* ra, o ve ti ru udu te owhẹ otọ;Ọ vẹ te jẹ kẹ owhẹ* omaweromẹ ulogbo.+
18 Nọ aruọruẹ* ọ gbẹ riẹ hẹ, ahwo a re mu ru,+Rekọ eva e rẹ were enọ i bi koko uzi na.+
19 Odibo ọ rẹ jẹ eme nọ a be rọ kpọe vi rehọ họ,Keme dede nọ o wo otoriẹ rai, o bi ru lele ai hi.+
20 Whọ ruẹ ohwo nọ o re roro ẹme te re ọ tẹ ta ha no?+
Ẹruore ọ rrọ kẹ ohwo ogheghẹ vi ei.+
21 Nọ a tẹ rọ odibo robọ no emaha ze,Ukuhọ riẹ o re yere ohwo nọ o ru ọghọ kẹe he.
22 Ohwo nọ eva i re kri ẹdha ha ọ rẹ so ẹwhọ ze;+Ohwo kpobi nọ o re kri ofu emu hu o re ru eware buobu thọ.+
23 Uke-ufuo ohwo u re hrẹ riẹ kpotọ,+Rekọ ohwo kpobi nọ o wo omaurokpotọ o ti wo orro.+
24 Ohwo nọ avọ oji a gbẹ rrọ ẹgba o mukpahe omobọ* riẹ.
Ọ tẹ maki yo uworo inọ jọ a nyaze ti se isẹri,* ọ rẹ ta oware ovuovo via ha.+
25 Nọ ohwo o te bi nuhu fiki ahwo-akpọ, o re kie ruọ agbefẹ,*+Rekọ ọnọ ọ rẹroso Jihova a te thọe.+
26 Ahwo buobu a rẹ gwọlọ epanọ osu ọ rẹ rọ kẹ ae ovao,*Rekọ Jihova họ ọnọ o re bru uvioziẹ kẹ ohwo.+
27 Ohwo okienyẹ o re tu ohwo okiẹrẹe oma,+Rekọ ohwo nọ edhere riẹ o kiete o re tu ohwo omuomu oma.+
Eme-Obotọ
^ Hayo “Ohwo nọ o re veghe uzou.”
^ Hayo “ọ kare afuẹwẹ.”
^ Hayo o sae jọ nọ, “Rekọ ohwo nọ o kiete ọ rẹ gwọlọ epanọ ọ rẹ rọ sẹro uzuazọ riẹ.”
^ Evaọ Hibru, “ẹzi.”
^ Evaọ Hibru, “a ziọ oria ovo.”
^ Koyehọ, Ọye ọ kẹ rai uzuazọ.
^ Hayo “Uye-okẹ.”
^ Evaọ Hibru, “ọmọzae.”
^ Hayo “eruẹaruẹ; erovie via.”
^ Hayo “uworo ehao-ebọwo.”
^ Hayo “Ozodhẹ rọkẹ ahwo-akpọ o rẹ kpahe agbefẹ.”
^ Hayo o sae jọ nọ, “epanọ osu o re ro rri rai aro.” Evaọ Hibru, “gwọlọ ovao osu.”
