Itẹ 14:1-35
14 Aye nọ o wo uvi areghẹ ọ rẹ bọ uwou riẹ ga,+Rekọ aye ogheghẹ ọ rẹ rọ abọ riẹ kporo uwou riẹ kuotọ.
2 Ọnọ ọ be nya evaọ ẹgbakiete o wo ozodhẹ kẹ Jihova,Rekọ ọnọ idhere riẹ e vọ avọ ẹghẹ* ọ be jẹe fiẹ.
3 Eme omorro nọ e rrọ unu ohwo ogheghẹ e wọhọ ọkpọ nọ a be rọ fa ohwo,Rekọ igbenu ohwo owareghẹ e te thọe.
4 Nọ iruẹ e gbẹ riẹ hẹ, oria emu erao o rẹ jọ fuafo,Rekọ ogaga eruẹ u re fiobọhọ kẹ ohwo vu ekakọ buobu.
5 Osisẹri nọ a re fievahọ ọ rẹ ta ọrue he,Rekọ osisẹri ọrue ọ rẹ ta ọrue ẹsikpobi.*+
6 Osẹkoko ọ rẹ gwọlọ wo areghẹ rekọ o re woi hi,Rekọ ohwo nọ o wo otoriẹ o re wo eriariẹ lọlọhọ.+
7 Kẹnoma kẹ ohwo ogheghẹ,Keme whọ te jọ igbenu riẹ ruẹ eriariẹ hẹ.+
8 Ohwo nọ o re rri otọ mu ọ rẹ riẹ obonọ ọ be nya keme o wo areghẹ,Rekọ ugheghẹ ahwo ogheghẹ o rẹ viẹ ae họ.*+
9 Ahwo ogheghẹ a rẹ rọ abe-ọriọ ru emiehwẹ,*+Rekọ o rẹ were enọ i kiete na re a ruẹrẹhọ kugbe ohwohwo.*
10 Udu na ọvo ọ riẹ oware nọ o be dae,*Yọ omọfa ọ sae riẹ oghọghọ nọ o rrọ udu ohwo ho.
11 A te raha uwou ohwo omuomu no,+Rekọ eware e te riẹ nya evaọ uwou-udhu ohwo nọ o kiete.
12 U wo edhere jọ nọ o wọhọ nọ u kiehọ evaọ aro ohwo,+Rekọ evaọ ukuhọ riẹ u re su kpohọ uwhu.+
13 Ohwo ọ tẹ be make hwẹ dede ọ sai wo edada evaọ udu riẹ.Yọ oghọghọ o sae rọ uweri kuhọ.
14 Ohwo nọ o wo uruemu* owhọwhọhọ ọ rẹ ruẹ uye eware nọ o bi ru,+Rekọ emamọ ohwo o re wo osohwa iruẹru riẹ.+
15 Ogbori* ọ rẹ rọwo ẹme kpobi,Rekọ ọnọ o wo orimuo o re rri otọ mu re ọ tẹ te jowọ.+
16 Ohwo nọ o wo areghẹ ọ rẹ yọroma jẹ kẹnoma kẹ oware uyoma,Rekọ ohwo ogheghẹ o re mu ru* je fievahọ omobọ riẹ ga hrọ.
17 Ohwo nọ ọ rẹ kaki mu ofu o re ru oware ugheghẹ,+Rekọ a re mukpahe ohwo nọ o re roro oware te.*
18 Igbori* e te rọ ugheghẹ reuku,Rekọ a te rọ etu eriariẹ tu ahwo orimuo.+
19 Ahwo oyoma a ti guzou kpotọ kẹ emamọ ahwo,Yọ ahwo omuomu a ti guzou kpotọ evaọ unuẹthẹ ahwo okiẹrẹe.
20 Oyogbe ọ rẹ dha ahwo eva, makọ enọ e be rria kẹle iẹe dede,+Rekọ ọdafe o re wo egbẹnyusu buobu.+
21 Ọnọ o rri ọrivẹ riẹ vo ọ raha uzi,Rekọ ohwo kpobi nọ o wo ọdawẹ kẹ oruori o re wo evawere.+
22 Kọ enọ e rẹ gba ẹgwae omuomu a gbẹ te nyathọ?
Rekọ a re dhesẹ uyoyou nọ o rẹ hiẹ hẹ gbe ọtẹruo kẹ enọ e gba riẹ mu nọ a re ru ewoma.+
23 Erere o re no oghẹrẹ iruo egaga kpobi ze,Rekọ otẹrọnọ ẹme ọvo ohwo ọ rẹ ta, uvuhu u re kpei.+
24 Efe ahwo owareghẹ họ etu-uvie rai;Rekọ eware igheghẹ ọvo ahwo ogheghẹ a re ru.+
25 Osisẹri uzẹme o re siwi uzuazọ* ahwo,Rekọ ọrọ eviẹhọ ọ rẹ ta ọrue ẹsikpobi.*
26 Ọnọ ọ be dhozọ Jihova udu u re kpoho iei hi,+Yọ oyena o te jọ oria adhẹzọ kẹ emọ riẹ.+
27 Ozodhẹ Jihova yọ eyeri-ame uzuazọ,O rẹ thọ ohwo no egbefẹ uwhu.
28 Ogbotu ahwo họ oruaro ovie,+Rekọ osu o gbe wo ahwo nọ o re su hu yọ akpọ ọ bẹ riẹ no.
29 Ohwo nọ ọ rẹ kaki mu ofu hu yọ ohwo nọ o wo orimuo gaga,+Rekọ ọnọ o wo odiri hi o re dhesẹ ugheghẹ riẹ via.+
30 Udu odhedhẹ o rẹ kẹ uzuazọ,*Rekọ ihri-eriọ yọ egbogbo evaọ igbenwa.+
31 Ọnọ o fi oruori iwhayo ọ la Ọnọ ọ ma riẹ eka,+Rekọ ohwo kpobi nọ o wo ọdawẹ kẹ oyogbe ọ be kẹ Ọghẹnẹ orro.+
32 Imuomu obọriẹ eye i ti gele orumuomu kie,Rekọ ẹgbakiete ohwo okiẹrẹe o te jọ oria adhẹzọ riẹ.+
33 Ohwo nọ o wo otoriẹ o re gogo areghẹ riẹ hẹ,+Rekọ ohwo ogheghẹ o re dhesẹ omariẹ via.*
34 Ẹrẹreokie ọ rẹ kpare orẹwho kpehru,+Rekọ uzioraha o rẹ wha omovuọ se ahwo.
35 Ovie ọ rẹ wereva kugbe odibo nọ o wo otoriẹ udidi,+Rekọ eva e rẹ dhae gaga kẹ ọnọ o re ru oware omovuọ.+
Eme-Obotọ
^ Hayo “eviẹhọ.”
^ Hayo “ọ rẹ rọ ẹwẹ-okuo kpobi ta ọrue.”
^ Hayo o sae jọ nọ, “ahwo ogheghẹ a rẹ viẹ amọfa họ.”
^ Hayo “a rẹ rọwo ruẹrẹhọ kugbe amọfa ha.”
^ Hayo “enọ i kiete na a wo emamọ eva kẹ ohwohwo.”
^ Hayo “udu.”
^ Hayo “Ohwo nọ ọ riẹ oware ovo ho.”
^ Hayo “o re mu ofu.”
^ Hayo “riẹ epanọ a re roro oware te ziezi.”
^ Hayo “Ahwo nọ a riẹ oware ovo ho.”
^ Hayo “ọ rẹ rọ ẹwẹ-okuo kpobi ta ọrue.”
^ Hayo “omokpokpọ.”
^ Hayo “areghẹ o re dhesẹ oma via evaọ udevie igheghẹ.”
