Itẹ 26:1-28
26 Wọhọ ekpalekpa-ame evaọ ezi ivo jẹ wọhọ oso evaọ oke ivuẹvu,Ere ọghọ o fo kẹ ohwo ogheghẹ hẹ.+
2 Nwane wọhọ epanọ oware jọ o rẹ lẹliẹ ọvra rra no oria, jẹ lẹliẹ arata rra vrẹ na,Ere a re mu bọwo ohwo ehao ho.*
3 Oviaviẹ o rrọ kẹ anyenya, ufi nọ a rẹ rọ gba unu arao o rrọ kẹ eketekete,+Yọ ọkpọ ọ rrọ kẹ uke ahwo ogheghẹ.+
4 Whọ kẹ ohwo ogheghẹ uyo wọhọ epaọ ugheghẹ riẹ hẹ,Re who gbe ru oma ra fihọ epanọ ọ rrọ họ.*
5 Kẹ ohwo ogheghẹ uyo wọhọ epaọ ugheghẹ riẹ,Re o gbe roro nọ o wo areghẹ hẹ.+
6 Wọhọ ohwo nọ o ru awọ obọriẹ ko hayo nwa omobọ riẹ oma*Ere ohwo nọ o mu eware họ ohwo ogheghẹ obọ ọ rrọ.
7 Wọhọ awọ ọmo nọ ọ be nya segbe segbe,*Ere ohare o rrọ evaọ unu ahwo ogheghẹ.+
8 Wọhọ ubiutho nọ a be gba fihọ udeme.Ere orro nọ a rẹ kẹ ohwo ogheghẹ o rrọ.+
9 Wọhọ ure inwe nọ ohwo nọ ọ da idi bẹ ọ rọ obọ kru,Ere ohare o rrọ evaọ unu ahwo ogheghẹ.
10 Wọhọ epanọ ọnọ ọ rẹ sa ose nọ o bi mu sa kpenẹ avọ enẹ ọ rẹ nwa ahwo oma* na,Ere ọnọ ọ rehọ ohwo ogheghẹ iruo hayo rehọ enọ e be nyavrẹ iruo ọ rrọ.
11 Wọhọ arakọ nọ o zihe nyae re eware nọ ọ kpa ze,Ere ohwo ogheghẹ ọ rẹ wariẹ eware igheghẹ riẹ.+
12 Kọ whọ ruẹ ohwo nọ o roro nọ o wo areghẹ no?+
Ẹruore ọ rrọ kẹ ohwo ogheghẹ vi ei.
13 Ọyẹlẹ ọ rẹ ta nọ: “Okpohrokpo ọgaga ọ rrọ obọ edhere na,Okpohrokpo ọ rrọ obọ oko-ore na!”+
14 Ẹthẹ o re dhe ererovie evaọ ikeleku riẹ,*Ere ọyẹlẹ ọ rẹ jọ ehru ehwa riẹ ghelie ọvo.+
15 Ọyẹlẹ o re duwu ẹkuobọ soso họ udo emu,*Rekọ oma o rrọ riẹ vi epanọ ọ sai ro si ei noi ze fihọ unu riẹ.+
16 Ọyẹlẹ o re roro nọ o wo areghẹVi imahrẹ nọ e kẹ emamọ uyo.
17 Wọhọ ohwo nọ ọ be duọ ezọ arakọEre ọnọ ọ be nyavrẹ nọ o bi mu ofu kpahe* ẹwhọ nọ o te rie he ọ rrọ.+
18 Wọhọ ọruẹ nọ ọ be sa eware epiọpiọ nọ e be ware erae, te ese, gbe uwhu*
19 Ere ohwo nọ ọ rẹ viẹ ọrivẹ riẹ họ kẹsena ọ vẹ ta nọ, “Aroza* gheghe mẹ jọ,” ọ rrọ.+
20 Nọ ire e gbẹ riẹ hẹ, erae i re fu no,Yọ oria nọ ohwo ọtaraha ọ rrọ họ, ẹwhọ o re kuhọ.+
21 Wọhọ epanọ iwowo-erae e rrọ kẹ enyerae na, gbe epanọ ire e rrọ kẹ erae na,Ere ọgwọlọ-ẹme ọ rẹ wha ẹwhọ ze.+
22 Eme ohwo ọtaraha e wọhọ emu ọwewere;*A rẹ rọ ovovẹrẹ si rai lọ kpobọ eva.+
23 Wọhọ isiliva nọ a nabe rọ ralọ omothẹ ọviẹEre eme uyoyou nọ i no udu umuomu ze e rrọ.*+
24 Ọnọ o mukpahe ahwo ọ rẹ rọ igbenu riẹ ko ẹe dhere,Yọ eviẹhọ e da riẹ eva fia.
25 Dede nọ ọ be ta eme iwoma, who fievahọ iẹe he,Keme eware etọtọ ihrẹ e rrọ udu riẹ.*
26 Dede nọ ọ be rọ eviẹhọ ko omukpahọ riẹ dhere,A te fere umuomu riẹ via evaọ ukoko na.
27 Ọnọ ọ tọ ọgọdọ o ti kie fihọ iẹe,Yọ ohwo kpobi nọ o ghelie utho no oria, u ti ghelie zihe bru ei ze.+
28 Ẹrọo ọrue o mukpahe enọ ọ be guọghọ fihọ otọ,Yọ unu nọ u re jiri ohwo ujiro igbenu o rẹ wha ọraha ze.+
Eme-Obotọ
^ Hayo o sae jọ nọ, “Ere ehao nọ a bọwo ohwo gheghe gheghe i re rugba ha.”
^ Hayo “Re who gbe ru re whẹ avọ iẹe wha jọ ẹrẹrẹe he.”
^ Evaọ Hibru, “nọ ọ rẹ da ozighi.”
^ Hayo “awọ ọmo nọ e rrọ yọlọ yọlọ.”
^ Hayo “nọ ọ rẹ nwa ahwo kpobi oma.”
^ Hayo “oria nọ o rẹ rọ thahe.”
^ Hayo “omodhe emu okokodo.”
^ Hayo “dhomahọ.”
^ Hayo “ese nọ i re kpe.”
^ Hayo “Emiehwẹ.”
^ Hayo “e wọhọ eware nọ a rẹ rọ ọwhọwhọ si lọ.”
^ Evaọ Hibru, “Ere igbenu nọ i bi nuhu kpakpakpa avọ udu umuomu e rrọ.”
^ Hayo “Keme udu riẹ kpobi o rrọ tọtọtọ.”
