Itẹ 27:1-27
27 Who seha kpahe odẹnotha ha,Keme whọ riẹ oware nọ okpẹdoke na o te wha ze he.*+
2 Jọ omọfa* o jiri owhẹ, orọnikọ unu obọra ha;Amọfa,* orọnikọ igbenu obọra ha.+
3 Utho o rrọ gbẹgbẹdẹ, yọ ẹkpẹ ọ rrọ gbẹgbẹdẹ re,Rekọ evedha nọ ohwo ogheghẹ ọ rẹ wha ze o gbẹdẹ vi ivẹ na.+
4 Ofu ọ rrọ yoyoma, yọ evedha ọ wọhọ owhe,Rekọ ono ọ rẹ sae rọ oma za ihri-eriọ?+
5 Ọwhọkuo nọ a kẹ via u woma vi uyoyou nọ a ko dhere.+
6 Omonwa nọ ogbẹnyusu ọ wha ze yọ emamọ omonwa,+Rekọ ọwegrẹ ọ rẹ viọlọ ohwo unuẹse buobu.*
7 Ọnọ* ọ re eva vọ no ọ rẹ siọ ọnyọ nọ o no othuzou-ọnyọ ze,*Rekọ ohwo* nọ ohọo u bi kpe, makọ oware oyayare dede o rẹ mere iẹe unu.
8 Wọhọ ọvra nọ o ghoro no uwou riẹ*Ere ohwo nọ o ghoro no uwou riẹ no ọ rrọ.
9 Ewhri avọ insẹnse i re ru udu na ghọghọ;Ere emamọ usu nọ emamọ ohrẹ* o wha ze o rrọ.+
10 Whọ nyasiọ ogbẹnyusu ra hayo ogbẹnyusu ọsẹ ra ba ha,Yọ whọ ruọ eva uwou oniọvo ra ha evaọ ẹdẹ nọ okpẹtu o te owhẹ oma;Ohwo nọ ọ be rria kẹle ohwo o woma vi oniọvo nọ ọ rrọ ugbothabọ.+
11 Wo areghẹ, ọmọzae mẹ, re who ru udu mẹ ghọghọ,+Re mẹ sae kẹ ọnọ ọ be poviẹ omẹ na uyo.+
12 Ohwo nọ o wo areghẹ* ọ rẹ ruẹ oware enwoma, o ve siomano,+Rekọ ogbori ọ rẹ nyaruọ ẹe, ọ vẹ reoja oware* nọ u re noi ze.
13 Mi ohwo ewu riẹ otẹrọnọ o dikihẹ esalobọ kẹ ọrara;Gboro oware nọ o ro viowa mi ei otẹrọnọ o dikihẹ esalobọ kẹ aye orẹwho ọfa.*+
14 Nọ ohwo ọ tẹ rọ urru oruarua lẹ ẹro eghale kẹ ọrivẹ riẹ evaọ irioke frifri,A rẹ rehọ iẹe nọ ehao ọ be bọwo iẹe na.
15 Aye nọ ọ rẹ whọ ẹwhọ gaga* ọ wọhọ idhe uwou nọ i re fi kẹse kẹse evaọ ẹdẹ nọ oso ọ be rrọ.+
16 Ohwo kpobi nọ ọ rẹ sai kru ei ọ rẹ sai kru ofouJẹ sae rọ obọze riẹ kru ewhri daji.
17 Wọhọ epanọ ayọno ọ rẹ thọ ayọno da na,Ere ohwo o re fiobọhọ kẹ ogbẹnyusu riẹ.*+
18 Ohwo nọ ọ rẹ rẹrote ure ifigi ọ te re ubi riẹ,+Yọ a te kẹ ohwo nọ ọ rẹrote olori riẹ ọghọ.+
19 Wọhọ epanọ ohwo ọ rẹ ruẹ ovao riẹ evaọ ame na,Ere ohwo ọ rẹ jọ udu omọfa ruẹ ọkpọ oware nọ o rrọ udu riẹ.
20 Eva e rẹ vọ Uki avọ oria ọraha* vievie he,+Yọ ere ughe o rẹ bẹ ibiaro ohwo vievie he.
21 Wọhọ epanọ a rẹ rọ ẹbẹro ghra isiliva nọ a te bi ru ei fo, igoru kọ eva umuwou-erae na,+Ere ujiro nọ a kẹ ohwo o rẹ dawo iẹe.*
22 Whọ tẹ make rọ uru duwu ohwo ogheghẹWọhọ ibi ekakọ nọ a duwu no evaọ udo,Ugheghẹ riẹ u re noi oma ha.
23 U fo nọ whọ rẹ riẹ oghẹrẹ nọ oma uthuru ra o rrọ ziezi.
Rẹrote* igodẹ ra ziezi,+
24 Keme efe ọ rẹ jọ bẹdẹ bẹdẹ hẹ,+Yọ etu-uvie* ọ rẹ jọ te ige kpobi hi.
25 Ẹbe ọrọrọ o re lo no, ẹbe ọkpokpọ ọ vẹ dhẹ ze,Yọ a re bru ẹbe obọ igbehru na ze.
26 Igbo* i re ru owhẹ wo iwu,Yọ ikri i re ru owhẹ wo osa nọ whọ rẹ hwa fihọ otọ nọ whọ dẹ.
27 Yọ ame-ivie ẹwe o te jariẹ nọ u ti te owhẹ kuọ oma,Nọ whọ te rọ ko ekru ra jẹ ko idibo emetẹ ra.
Eme-Obotọ
^ Evaọ Hibru, “o ti yẹ hẹ.”
^ Evaọ Hibru, “ọrara.”
^ Evaọ Hibru, “Ohwo orẹwho ọfa.”
^ Hayo o sae jọ nọ, “ẹviọlọ nọ o no eva ze he; ẹviọlọ ọgbahọ.”
^ Evaọ Hibru, “o re thihi ọnyọ nọ o no othuzou-ọnyọ ze nyaotọ.”
^ Hayo “nọ ọ be rra no oria.”
^ Hayo “uye.”
^ Hayo “Ohwo nọ ọ rẹ kaki rri otọ mu.”
^ Hayo “ohwo orẹwho ọfa.”
^ Hayo “nọ o re si ivri; nọ o re si ikẹ.”
^ Evaọ Hibru, “ọ rẹ thọ ovao ogbẹnyusu riẹ da.”
^ Hayo “Sheol gbe Abadọn.”
^ Hayo “u re ru ei.”
^ Hayo “Fi udu (iroro) ra họ; Muẹrohọ.”
^ Hayo “etu-ọkwa.”
^ Hayo “Igodẹ.”
