Itẹ 10:1-32
10 Itẹ Solomọn.+
Ọmọ nọ o wo areghẹ o re ru ọsẹ riẹ ghọghọ,+Rekọ ọmọ ogheghẹ ọ rẹ wha uweri se oni riẹ.
2 Efe nọ a rọ edhere omuomu wo o te wha erere ọvo ze he,Rekọ ẹrẹreokie o re siwi ohwo no uwhu.+
3 Jihova o ti ru re ohọo u kpe ohwo* okiẹrẹe he,+Rekọ ọ te rehọ oware nọ u bi si orumuomu na urru gbọe ogbọ.
4 Oyẹlẹ o rẹ wha uvuhu ze,+Rekọ ohwo nọ o kru obọ ga o re fe.+
5 Ọmọ* nọ o wo areghẹ* o re vu ekakọ riẹ kokohọ evaọ ezi ivo,Rekọ ọmọ nọ ọ rẹ wha omovuọ ze, owezẹ ọvo ọ rẹ wezẹ evaọ ezi ivuẹvu.+
6 Eghale e rrọ uzou okiẹrẹe na,+Rekọ unu ohwo omuomu o rẹ ko ozighi dhere.
7 Emamọ odẹ* ohwo okiẹrẹe o rẹ wha eghale sei,+Rekọ odẹ orumuomu u ti vru* kufiẹ.+
8 Ohwo nọ o wo areghẹ ọ rẹ jẹ ithubro* rehọ,+Rekọ a ti thihi ọnọ ọ rẹ ta eme igheghẹ nyaotọ.+
9 Ọnọ o bi kru ẹgbakiete riẹ o ti wo omofọwẹ,+Rekọ a te fere ọnọ idhere riẹ e liọ họ via.+
10 Ọnọ ọ rẹ mahe ẹro eviẹhọ ọ rẹ wha uweri ze,+Yọ a ti thihi ọnọ ọ rẹ ta eme igheghẹ nyaotọ.+
11 Unu ohwo okiẹrẹe o rẹ kẹ uzuazọ,*+Rekọ unu ohwo omuomu o rẹ ko ozighi dhere.+
12 Omukpahọ ọ rẹ wha ẹwhọ ze,Rekọ uyoyou u re ruru iruthọ kpobi.+
13 Ohwo nọ o re rri oware mu ọ rẹ rọ igbenu riẹ ta eme areghẹ,+Rekọ ọkpọ ọ rrọ kẹ uke ọnọ ọ kare areghẹ.*+
14 Ahwo nọ a wo areghẹ a re rri eriariẹ ghaghae,+Rekọ ohwo ogheghẹ ọ rẹ rọ unu riẹ zizie ọraha.+
15 Efe* ọdafe họ okpẹwho riẹ nọ a di ogba wariẹ họ.*
Uvuhu oyogbe o rẹ wha ọraha sei.+
16 Iruẹru ohwo okiẹrẹe i re su kpohọ uzuazọ;Rekọ eware nọ orumuomu o bi ru i re su kpohọ uzioraha.+
17 Ohwo nọ ọ rẹ kezọ kẹ uthubro* yọ edhere uzuazọ,*Rekọ ohwo nọ ọ rẹ jẹ ọwhọkuo fiẹ o re su amọfa thọ.
18 Ohwo nọ ọ rẹ ko omukpahọ nọ ọ rrọ eva riẹ dhere ọ rẹ ta erue,+Yọ ohwo nọ ọ rẹ ta ahwo raha* ọ rrọ gheghẹ.
19 Nọ ohwo ọ tẹ be ta eme buobu, ọ rẹ seba ẹta thọ* họ,+Rekọ ohwo kpobi nọ ọ rẹ kpọ ẹrọo riẹ o bi ru oware areghẹ.+
20 Ẹrọo ohwo okiẹrẹe ọ wọhọ isiliva nọ e mai woma,+Rekọ iroro nọ e rrọ udu orumuomu i wo aghare tere he.
21 Igbenu ohwo okiẹrẹe e rẹ bọ ahwo buobu ga,*+Rekọ ogheghẹ na o re whu keme ọ kare areghẹ.+
22 Oghale Jihova oye u re ru ohwo fe,+Yọ o re fi edada evuevo* bae he.
23 Ohwo ogheghẹ ọ rẹ rehọ uruemu omovuọ nọ o bi ru wọhọ arozaha,Rekọ ohwo nọ o wo orimuo o re ru oware areghẹ.+
24 Oware nọ orumuomu ọ be dhozọ riẹ o te via kẹe;Rekọ a ti ru ẹgwọlọ ohwo okiẹrẹe na kẹe.+
25 Nọ ofou ọwhibo na o te fou vrẹ no, orumuomu ọ gbẹ te jọ họ,+Rekọ ohwo okiẹrẹe na yọ otọhotọ nọ o rẹ jọ bẹdẹ bẹdẹ.+
26 Wọhọ epanọ iviniga* i re ru ibiakọ gbe epanọ iwiri i re ru ibiaro na,Ere ọyẹlẹ ọ rrọ kẹ ọnọ o vi rie uwou.*
27 Ozodhẹ Jihova u re ru ohwo tọ,+Rekọ a ti bru ikpe uzuazọ orumuomu kpẹre.+
28 Irẹro* ohwo okiẹrẹe e rẹ wha oghọghọ ze,+Rekọ ẹruore orumuomu ọ te raha kufiẹ.+
29 Edhere Jihova yọ oria omofọwẹ rọkẹ ohwo nọ ọ kare afuẹwẹ,+Rekọ o te wha ọraha se irumuomu.+
30 A ti gele ohwo okiẹrẹe na kie vievie he,+Rekọ irumuomu a te gbẹ rria otọakpọ na ha.+
31 Unu ohwo okiẹrẹe o rẹ ta eme* areghẹ,Rekọ a ti kpe enọ e rẹ rọ ẹrọo rai ta ogbẹta.*
32 Ohwo okiẹrẹe ọ riẹ oware uwoma nọ ọ rẹ rọ igbenu riẹ ta,Rekọ unu ohwo omuomu o rẹ ta ogbẹta.
Eme-Obotọ
^ Evaọ Hibru, “Ọmọzae.”
^ Hayo “otoriẹ udidi.”
^ Hayo “Ekareghẹhọ.”
^ Hayo “gbo.”
^ Evaọ Hibru, “izi.”
^ Hayo “yọ ehri uzuazọ.”
^ Evaọ Hibru, “ọ kare ubiudu.”
^ Hayo “o rẹ bẹ ẹvẹruọ.”
^ Hayo “Oware oghaghae.”
^ Hayo “ọwhọkuo.”
^ Hayo o sae jọ nọ, “ọ rrọ edhere uzuazọ.”
^ Hayo “vaha eme atanọ.”
^ Hayo “eruthọ.”
^ Hayo “kpọ ahwo buobu.”
^ Hayo “uweri ovuovo; ẹgaga ọvuọvo.”
^ Hayo “udi ogho.” Koyehọ udi nọ o ga no.
^ Hayo “ọnọ ọ rehọ e riẹ iruo.”
^ Hayo “Ẹruore.”
^ Hayo “mọ ubi.”
^ Hayo “a ti bru ẹrọo nọ ọ rẹ ta ogbẹta kufiẹ.”
