Palambua ang Matuod nga Pagkamapainubuson

“Luwason mo ang mapainubuson nga katawhan.”​—⁠2 SAMUEL 22:28.

1, 2. Ano ang pagkaanggid sang madamo nga manuggahom sang kalibutan?

ANG mga piramid sang Egipto pamatuod sang mga tawo nga naggahom anay sa sadto nga pungsod. Ang iban pa nga nagbantog sa maragtas amo sanday Senaquerib sang Asiria, Alejandro nga Daku sang Gresya, kag si Julio Cesar sang Roma. Ini tanan nga manuggahom magkaanggid sa isa ka butang. Wala sila magpakita sing matuod nga pagkamapainubuson.​—⁠Mateo 20:​25, 26.

² Mahanduraw mo bala nga ang nasambit na nga mga manuggahom pirme nagapangita kon sin-o ang mga kubos sa ila mga sinakpan nga nagakinahanglan sing lugpay? Indi sa pagkamatuod! Indi mo man sila mahanduraw nga magkadto sa kubos nga mga puluy-an sang pinigos nga mga banwahanon agod palig-unon sila. Ang ila panimuot sa kubos nga mga tawo tuhay gid sa panimuot sang Supremo nga Manuggahom sang uniberso nga si Jehova nga Dios!

Ang Labing Daku nga Halimbawa sang Pagkamapainubuson

3. Paano ginatratar sang Supremo nga Manuggahom ang iya tawhanon nga mga sakop?

³ Indi matungkad ang pagkadaku kag pagkataas ni Jehova, apang “ang iya mga mata nagapanghulonghulong sa bug-os nga duta agod ipakita ang iya kusog para sa ila nga ang tagipusuon himpit sa iya.” (2 Cronica 16:9) Kag ano ang ginahimo ni Jehova kon makasapo sia sing kubos nga mga sumilimba nga ginapung-awan bangod sang nanuhaytuhay nga mga pagtilaw? Daw subong bala nga “nagapuyo” sia upod sa ila paagi sa iya balaan nga espiritu “agod ipasag-uli ang espiritu sang mga mapainubuson [ukon, kubos] kag agod ipasag-uli ang tagipusuon sang mga  ginapigos.” (Isaias 57:15) Gani, mas madali nga mapadayon liwat sang iya napasag-uli nga mga sumilimba ang ila pag-alagad sa iya nga may kalipay. Daw ano ini nga pagkamapainubuson sa bahin sang Dios!

4, 5. (a) Ano ang ginbatyag sang salmista tuhoy sa paggahom sang Dios? (b) Ano ang kahulugan sang ‘pagpaubos’ sang Dios nga ginbadbad halin sa Ingles nga tinaga nga “condescending” agod buligan “ang mapainubuson [ukon, kubos]”?

⁴ Wala sing bisan sin-o sa uniberso ang nagpaubos sang iya kaugalingon sa kasangkaron nga kaangay sa ginhimo sang Soberanong Ginuo agod buligan ang makasasala nga mga tawo. Amo kon ngaa, nagsulat ang salmista: “Si Jehova mataas labaw sa tanan nga pungsod; ang iya himaya labaw sa mga langit. Sin-o ang kaangay ni Jehova nga aton Dios, sia nga nagapuyo sa kahitaasan? Nagapaubos sia sa pagtulok sa langit kag duta, ginabangon niya ang kubos gikan sa yab-ok; ginabayaw niya ang imol gikan sa buho sang abo.”​—⁠Salmo 113:4-7.

⁵ Talupangda ang tinaga nga “nagapaubos” nga ginbadbad halin sa Ingles nga tinaga nga condescending. Kon nagapatuhoy sa tawo, ang Ingles nga tinaga nga condescending mahimo nga may malain nga kahulugan, ‘ang pagbatyag sing pagkalabaw sa isa nga kubos ukon makaluluoy.’ Ining matinaastaason nga panimuot indi gid masiling kay Jehova nga Dios, nga putli kag balaan kag gani indi gid ‘matinaastaason.’ (Marcos 7:​22, 23) Apang ang tinaga nga “condescend” mahimo man magkahulugan sing pagpasibu sang kaugalingon agod mangin katupong sang isa nga kubos ukon pagpanaug gikan sa mataas nga ranggo ukon posisyon kon nagapakig-angot sa isa nga manubo. Amo kon ngaa, ginabadbad sang iban nga Biblia ang Salmo 113:6 nga ang Dios nagapaubos sang iya kaugalingon. Sibu gid nga ginalaragway sini ang aton mapainubuson nga Dios nga mahigugmaon nga nagatalupangod kon ano ang mga kinahanglanon sang iya di-himpit nga tawhanon nga mga sumilimba!​—⁠2 Samuel 22:36.

Kon Ngaa Mapainubuson si Jesus

6. Ano ang labing daku nga buhat sang pagkamapainubuson ni Jehova?

⁶ Ang labing daku nga buhat sang pagkamapainubuson kag gugma sang Dios amo ang pagpadala niya sang iya hinigugma nga panganay nga Anak agod mabun-ag sa duta kag padakuon subong isa ka tawo para sa kaluwasan sang katawhan. (Juan 3:16) Gintudlo sa aton ni Jesus ang kamatuoran tuhoy sa iya langitnon nga Amay kag pagkatapos, ginhalad niya ang iya himpit nga tawhanon nga kabuhi agod dulaon ang “sala sang kalibutan.” (Juan 1:29; 18:37) Sa pagpabanaag sing himpit sang larawan sang iya Amay, lakip ang pagkamapainubuson ni Jehova, kinabubut-on nga ginhimo ni Jesus ang ginpangabay sa iya sang Dios. Amo yadto ang labing daku nga halimbawa sang pagkamapainubuson kag gugma nga ginpakita sang isa sa mga tinuga sang Dios. Indi tanan nag-apresyar sa pagkamapainubuson ni Jesus, kay ginkabig pa gani sia sang iya mga kaaway nga “labing kubos sa katawhan.” (Daniel 4:17) Apang, narealisar ni apostol Pablo nga dapat ilugon sang iya mga masigkatumuluo si Jesus kag gani, dapat sila mangin mapainubuson sa isa kag isa.​—⁠1 Corinto 11:⁠1; Filipos 2:​3, 4.

7, 8. (a) Paano nakatuon si Jesus nga mangin mapainubuson? (b) Ano ang ginapangabay ni Jesus sa mga tawo nga mahimo mangin mga disipulo niya?

⁷ Ginpatalupangod gid ni Pablo ang talalupangdon nga halimbawa ni Jesus, sa pagsulat: “Hupti ninyo ining panimuot sang hunahuna nga yara man kay Cristo Jesus, nga, bisan pa nagluntad sia sa dagway sang Dios, wala maghunahuna nga mangagaw, buot silingon, nga mangin tupong sia sa Dios. Wala, kundi gin-uba niya ang iya kaugalingon kag nangin dagway sang ulipon kag nangin kaanggid sang mga tawo. Labaw pa sa sina, sang nakita niya ang iya kaugalingon sa bayhon sang tawo, nagpaubos sia kag nangin matinumanon tubtob sa kamatayon, huo, kamatayon sa usok sang pag-antos.”​—⁠Filipos 2:5-8.

⁸ Mahimo mamangkot ang iban, ‘Paano nakatuon si Jesus nga mangin mapainubuson?’ Amo ini ang daku nga benepisyo sang iya suod nga pagpakig-upod sa iya langitnon nga Amay sa sulod sang mga  dag-on, nga sa tion sini, nag-alagad sia subong “batid nga manugpangabudlay” sa pagtuga sang tanan nga butang. (Hulubaton 8:30) Pagkatapos sang pagrebelde sa Eden, nakita sang Panganay nga Anak sang Dios ang mapainubuson nga pagpakig-angot sang iya Amay sa makasasala nga mga tawo. Gani, sang sa duta na sia, ginpakita man ni Jesus ang pagkamapainubuson sang iya Amay kag nangabay: “Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kaumpawan sa inyo mga kalag.”​—⁠Mateo 11:29; Juan 14:9.

9. (a) Ano ang naluyagan ni Jesus sa mga kabataan? (b) Ano nga leksion ang gintudlo ni Jesus paagi sa isa ka bata?

⁹ Bangod matuod nga mapainubuson si Jesus, wala mahadlok sa iya ang mga kabataan. Sa baylo, nagapalapit sila sa iya. Si Jesus naman, mapinalanggaon sa mga kabataan kag gin-asikaso niya sila. (Marcos 10:13-16) Ano ang naluyagan ni Jesus sa mga kabataan? May yara sila maayo nga mga kinaiya nga wala kon kaisa sa pila sang iya mga disipulo. Nahibaluan gid naton nga ginatamod sang mga kabataan ang mga adulto subong labaw sa ila. Makita mo ini sa ila pagkapalapamangkot. Huo, kon ipaanggid sa madamo nga adulto, mas madali tudluan ang mga kabataan kag indi bugalon. Sang isa ka higayon, ginpili ni Jesus ang isa ka bata kag nagsiling sa Iya mga sumulunod: “Kon indi kamo magliso kag mangin kaangay sang mga bata, indi kamo nga mas-a makasulod sa ginharian sang langit.” Nagpadayon pa sia: “Ang bisan sin-o nga magpaubos sang iya kaugalingon subong sini nga bata amo ang labing daku sa ginharian sang langit.” (Mateo 18:​3, 4) Ginhatag ni Jesus ang talaksan: “Ang tagsatagsa nga nagapakataas sang iya kaugalingon paubson kag sia nga nagapaubos sang iya kaugalingon pataason.”​—⁠Lucas 14:11; 18:14; Mateo 23:12.

10. Ano nga mga pamangkot ang binagbinagon naton?

¹⁰ Ina nga kamatuoran nagapautwas sing importante nga mga pamangkot. Ang isa sa mga basehan agod makatigayon kita sing kabuhi nga walay katapusan amo ang aton pagpalambo sing matuod nga pagkamapainubuson, apang ngaa nabudlayan kon kaisa ang mga Cristiano nga mangin mapainubuson? Ngaa nabudlayan kita nga tunlon ang aton bugal, kon sa aton pa, kag atubangon ang mga pagtilaw sing mapainubuson? Kag ano ang makabulig sa aton agod magmadinalag-on kita sa pagpalambo sing matuod nga pagkamapainubuson?​—⁠Santiago 4:​6, 10.

Kon Ngaa Mabudlay Mangin Mapainubuson

11. Ngaa indi makapakibot nga nagapanikasog kita nga mangin mapainubuson?

¹¹ Kon nabudlayan ka nga mangin mapainubuson, wala ikaw nagaisahanon. Sadto sang 1920, ginbinagbinag sini nga magasin ang laygay sang Biblia tuhoy sa pagkakinahanglanon sang pagkamapainubuson, kag nagkomento: “Gani, bangod nakita naton kon daw ano kadaku ang pagpabalor sang Ginuo sa pagkamapainubuson dapat ini magpalig-on sa tanan matuod nga mga disipulo nga palambuon ini nga kinaiya adlaw-adlaw.” Nian prangka ini nga nagbaton: “Walay sapayan sini tanan nga laygay sang Kasulatan daw kadaku gid sang pagkadihimpit sang tawhanon nga kinaugali amo kon ngaa ang mga nangin katawhan sang Ginuo kag nagpamat-od nga sundon ang dalanon sang Ginuo daw mas nabudlayan, mas nagapakigbato, sa sini sangsa iban nga kinaiya.” Ginapadaku sina ang isa ka rason kon ngaa dapat gid magpanikasog ang matuod nga mga Cristiano nga mangin mapainubuson​—⁠ang aton makasasala nga tawhanon nga kinaugali nagahandum sang indi nagakaigo nga himaya. Amo sini bangod mga kaliwat kita sang makasasala nga mag-asawa nga sanday Adan kag Eva, nga nadaug sang makagod nga mga handum.​—⁠Roma 5:12.

12, 13. (a) Paano ang kalibutan isa ka sablag sa Cristianong pagkamapainubuson? (b) Sin-o ang kabangdanan kon ngaa labi pa kita nga nabudlayan sa pagpalambo sing pagkamapainubuson?

¹² Ang isa pa ka rason kon ngaa nabudlayan kita nga mangin mapainubuson amo nga ginalibutan  kita sang isa ka kalibutan nga nagahaylo sa mga tawo sa pagtinguha nga mangin labaw sa iban. Isa sa kinaandan nga tulumuron sini nga kalibutan amo ang handum nga mapaayawan “ang kailigbon sang [makasasala nga] unod kag ang kailigbon sang mga mata kag ang pagpadayawdayaw sang palangabuhian sang isa.” (1 Juan 2:16) Sa baylo nga magpadaug sa sining kalibutanon nga mga kailigbon, dapat magtinguha ang mga disipulo ni Jesus nga mangin simple ang ila mata kag magkonsentrar sa paghimo sang kabubut-on sang Dios.​—⁠Mateo 6:22-24, 31-33; 1 Juan 2:17.

¹³ Ang ikatlo nga rason kon ngaa mabudlay palambuon kag ipakita ang pagkamapainubuson amo nga ang kalibutan karon ginagamhan sang una gid nga nagpakita sing pagkamatinaastaason, si Satanas nga Yawa. (2 Corinto 4:⁠4; 1 Timoteo 3:6) Ginapasanyog ni Satanas ang iya malaut nga mga kinaiya. Halimbawa, nagtinguha sia nga sulayon si Jesus sa pagsimba sa iya kabaylo sang paghatag sa iya sang ‘tanan nga ginharian sang kalibutan kag sang ila himaya.’ Bangod mapainubuson gid sia, malig-on nga ginsikway ni Jesus ang gintanyag sang Yawa. (Mateo 4:​8, 10) Nagatinguha man karon si Satanas nga sulayon ang mga Cristiano nga handumon ang himaya para sa ila kaugalingon. Apang, nagapanikasog ang mapainubuson nga mga Cristiano nga sundon ang halimbawa ni Jesus, nga ginahatag ang himaya kag kadungganan sa Dios.​—⁠Marcos 10:​17, 18.

Pagpalambo kag Pagpakita sing Matuod nga Pagkamapainubuson

14. Ano ang “salimpapaw nga pagkamapainubuson”?

¹⁴ Sa iya sulat sa mga taga-Colosas, nagpaandam si apostol Pablo batok sa pakunokuno nga pagkamapainubuson agod dayawon sang mga tawo. Ginlaragway ini ni Pablo subong “salimpapaw nga pagkamapainubuson.” Ang mga nagapakunokuno nga mapainubuson indi espirituwal nga mga tawo. Sa baylo, ginapakita nila nga ‘nagahabok’ sila sa bugal. (Colosas 2:​18, 23) Ginsambit ni Jesus ang mga halimbawa sining di-matuod nga pagkamapainubuson. Ginkondenar niya ang mapakitakitaon nga mga pangamuyo kag pagpuasa sang mga Fariseo nga nagapakita sing masubo kag nagakurisong nga mga nawong agod lamang makita sang mga tawo. Sa kabaliskaran, agod pabaloran sang Dios ang aton personal nga mga pangamuyo, dapat ini ipautwas sing mapainubuson.​—⁠Mateo 6:​5, 6, 16.

15. (a) Ano ang mahimo naton agod padayon kita nga magpakita sing mapainubuson nga panghunahuna? (b) Sin-o ang pila ka maayong halimbawa sa pagkamapainubuson?

¹⁵ Mabuligan ang mga Cristiano sa padayon nga pagpakita sing matuod nga mapainubuson nga panghunahuna paagi sa pagdumdom pirme kay Jehova nga Dios kag kay Jesucristo, ang labing maayo nga mga halimbawa sa pagkamapainubuson. Agod mahimo ini, kinahanglan ang regular nga pagtuon sa Biblia kag sa mga bulig sa pagtuon sa Biblia nga ginaaman paagi sa “matutom kag mainandamon nga ulipon.” (Mateo 24:45) Importante gid ini para sa Cristianong mga manugtatap, “agod ang [ila] tagipusuon indi magpakataas sa [ila] mga utod.” (Deuteronomio 17:​19, 20; 1 Pedro 5:1-3) Binagbinaga ang mga halimbawa nanday Rut, Ana, Elisabet, kag sang madamo pa, nga ginpakamaayo bangod sang ila pagkamapainubuson. (Rut 1:​16, 17; 1 Samuel 1:​11, 20; Lucas 1:41-43) Hunahunaa man ang maayong mga halimbawa sang prominente nga mga tawo nga padayon nga nag-alagad sing mapainubuson kay Jehova, subong nanday David, Josias, Juan Bautista, kag ni apostol Pablo. (2 Cronica 34:​1, 2, 19, 26-28; Salmo 131:⁠1; Juan 1:​26, 27; 3:26-30; Binuhatan 21:20-26; 1 Corinto 15:9) Kag kamusta naman ang madamo nga halimbawa sang pagkamapainubuson nga masapwan naton karon sa Cristianong  kongregasyon? Paagi sa pagbinagbinag sini nga mga halimbawa, mabuligan ang matuod nga mga Cristiano sa pagpakita sing “mapainubuson nga panghunahuna sa isa kag isa.”​—⁠1 Pedro 5:5.

16. Paano ang Cristianong ministeryo nagabulig sa aton nga mangin mapainubuson?

¹⁶ Ang regular nga pagpakigbahin sa Cristianong ministeryo makabulig man agod mangin mapainubuson kita. Makabulig ang mapainubuson nga panghunahuna agod mangin epektibo kita kon nagapalapit sa mga dumuluong nga masalapuan naton sa aton pagpamalaybalay kag sa iban pa nga mga duog. Kinahanglan gid ini ilabi na kon sa primero indi magsapak ukon indi maabiabihon ang mga tagbalay sa mensahe sang Ginharian nga aton ginabantala. Ang aton mga pagtuluuhan pirme ginaduhaduhaan, gani makabulig sa mga Cristiano ang pagkamapainubuson agod masabat nila ang mga pamangkot “nga may malulo nga buot kag daku nga pagtahod.” (1 Pedro 3:15) Ang mapainubuson nga mga alagad sang Dios nagasaylo sa bag-o nga mga teritoryo kag nagabulig sa mga tawo nga may tuhay nga mga kultura kag pagkabuhi. Mahimo nga kinahanglan nga batason sing mapainubuson sini nga mga ministro ang mabudlay nga pagtuon sing bag-o nga lenguahe agod mabuligan ang mga tawo nga luyag nila paambitan sing maayong balita. Dalayawon gid ini!​—⁠Mateo 28:​19, 20.

17. Anong Cristianong mga responsibilidad ang nagakinahanglan sing pagkamapainubuson?

¹⁷ Bangod sang pagkamapainubuson, madamo ang nagahimo sang ila Cristianong mga katungdanan, nga ginauna ang mga intereses sang iban sangsa ila kaugalingon. Halimbawa, dapat mangin mapainubuson ang isa ka Cristiano nga amay agod magtigana sia sing tion gikan sa iya personal nga mga paghimud-os para makahanda kag makahiwat sing epektibo nga pagtuon sa Biblia upod sa iya mga anak. Makabulig man ang pagkamapainubuson agod tahuron kag tumanon sang mga kabataan ang ila mga ginikanan, nga indi himpit. (Efeso 6:1-4) Ang mga asawa nga may di-tumuluo nga mga bana pirme nagapangatubang sing mga sitwasyon nga kinahanglan sila magpakita sing pagkamapainubuson agod madaug nila ang ila tiayon paagi sa “putli nga paggawi nga may tudok nga pagtahod.” (1 Pedro 3:​1, 2) Mapuslanon man ang pagkamapainubuson kag masinakripisyuhon nga gugma kon mahigugmaon nga ginaatipan naton ang mga kinahanglanon sang aton nagabalatian kag nagatigulang nga mga ginikanan.​—⁠1 Timoteo 5:4.

Nagalubad sing mga Problema ang Pagkamapainubuson

18. Paano ang pagkamapainubuson makabulig sa aton sa paglubad sang mga problema?

¹⁸ Ang tanan nga tawhanon nga mga alagad sang Dios indi himpit. (Santiago 3:2) Kon kaisa, mahimo nga magtuhaw ang mga problema ukon indi paghangpanay sa ulot sang duha ka Cristiano. Mahimo nga may rason ang isa sa pagreklamo batok sa isa. Masami nga malubad ini nga mga kahimtangan kon iaplikar ini nga laygay: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong  batok sa isa. Subong nga si Jehova hilway nga nagapatawad sa inyo, amo man ang himuon ninyo.” (Colosas 3:13) Matuod, indi mahapos sundon ini nga laygay, apang mabuligan kita sang pagkamapainubuson nga himuon ini.

19. Ano ang dapat naton dumdumon kon nagapakighambal kita sa isa nga nakasala sa aton?

¹⁹ Mahimo batyagon kon kaisa sang isa ka Cristiano nga ang iya reklamo serioso gid nga indi dapat paligaron lang. Kon amo, ang pagkamapainubuson magabulig sa iya nga palapitan ang isa nga sa banta niya nakasala sa iya sa tuyo nga mapasag-uli ang paghidait. (Mateo 18:15) Ang isa ka rason kon ngaa nagadugay kon kaisa ang mga problema sa ulot sang mga Cristiano amo nga ang isa ukon ayhan ang duha ka partido may tuman nga bugal sa pagbaton kon sin-o ang salaon sa ila nga duha. Ukon mahimo nga ang isa nga nagauna sa pagpalapit nagainsister nga indi sia ang may sala kag nagapamasol pa. Sa pihak nga bahin, mangin epektibo gid ang mapainubuson nga panimuot sa paglubad sang madamo nga indi paghangpanay.

20, 21. Ano ang isa sa labing daku nga bulig agod mangin mapainubuson?

²⁰ Ang isa ka importante nga tikang agod mapalambo ang pagkamapainubuson amo ang pagpangayo sang bulig kag espiritu sang Dios paagi sa pangamuyo. Apang dumduma, ang ‘Dios nagahatag sing di-bagay nga kaayo [lakip ang iya balaan nga espiritu] sa mga mapainubuson.’ (Santiago 4:6) Gani kon may indi paghangpanay kamo sang isa ka masigkatumuluo, mangamuyo kay Jehova nga buligan ka nga batunon sing mapainubuson ang imo sala nga ginbangdan sang problema, diutay man ini ukon daku. Kon nasaklaw ka kag ang nakasala mapainubuson nga magsiling, “Pasayluha ako,” nian mapainubuson nga pasayluha sia. Kon mabudlay ini himuon, mangamuyo kay Jehova nga buligan ka nga madula sa imo tagipusuon ang nagapabilin gihapon nga pagkamatinaastaason.

²¹ Kon mahangpan naton ang madamo nga benepisyo sang pagkamapainubuson, mapahulag gid kita nga palambuon kag huptan ining hamili nga kinaiya. Sa sini nga katuyuan, dalayawon gid nga halimbawa sa aton si Jehova nga Dios kag si Jesucristo! Indi gid pagkalimti ang pasalig sang Dios: “Ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi.”​—⁠Hulubaton 22:4.

Mga Punto nga Mapamalandungan

• Sin-o ang labing maayo nga mga halimbawa sa pagkamapainubuson?

• Ngaa mabudlay palambuon ang pagkamapainubuson?

• Ano ang makabulig agod mangin mapainubuson kita?

• Ngaa importante gid nga magpabilin nga mapainubuson?

[Mga Pamangkot sa Pagtinuon]

[Retrato sa pahina 26]

Mapainubuson gid si Jesus

[Retrato sa pahina 28]

Ginahaylo sang kalibutan ang mga tawo sa pagtinguha nga mangin labaw sa iban

[Credit Line]

WHO photo by L. Almasi/K. Hemzǒ

[Retrato sa pahina 29]

Ang pagkamapainubuson nagabulig sa aton nga palapitan ang mga dumuluong sa aton ministeryo

[Mga retrato sa pahina 30]

Masami nga malubad ang mga problema kon mapainubuson nga tabunan naton ini sing gugma

[Mga retrato sa pahina 31]

Makapakita ang mga Cristiano sing pagkamapainubuson sa madamo nga paagi