Magdiretso sa kaundan

Magdiretso sa listahan sang kaundan

Si Jehova Nagaulikid sa Inyo

Si Jehova Nagaulikid sa Inyo

 Si Jehova Nagaulikid sa Inyo

‘Itugyan ninyo sa Dios ang tanan ninyo nga kabalaka, kay sia nagaulikid sa inyo.’​​—⁠1 PEDRO 5:7.

1. Sa anong importante nga butang magkatuhay gid si Jehova kag si Satanas?

MAGKATUHAY gid si Jehova kag si Satanas. Ginasalakay sang Yawa ang bisan sin-o nga nagapalapit kay Jehova. Ginapakita ini nga pagkatuhay sa isa ka kilala nga reperensia. Tuhoy sa ginahimo ni Satanas subong sang ginasambit sa tulun-an sang Job sa Biblia, ang Encyclopædia Britannica (1970) nagasiling: ‘Nagalibotlibot si Satanas sa duta nga ginapangita ang mga buhat ukon ang mga tawo nga masumbong niya; tuhay ini sa ginahimo sang “mga mata sang Ginuo,” nga nagapanghulonghulong sa duta agod palig-unon ang tanan nga maayo (II Cron. xvi, 9). Wala nagapati si Satanas sa di-makagod nga kaayo sang tawo kag ginatugutan sia sang Dios nga tilawan ini apang suno lamang sa itugot sang Dios.’ Huo, daw ano nga pagkatuhay!​​—⁠Job 1:​6-​12; 2:​1-7.

2, 3. (a) Paano ang kahulugan sang tinaga nga “Yawa” ginailustrar sing nagakaigo sa kon ano ang natabo kay Job? (b) Paano ginapakita sang Biblia nga ginasumbong gihapon ni Satanas ang mga alagad ni Jehova sa duta?

2 Ang tinaga nga “Yawa” naghalin sa isa ka Griegong tinaga nga nagakahulugan sing “butig nga manugsumbong,” “manugpasipala.” Ginapakita sang tulun-an sang Job nga ginsumbong ni Satanas ang matutom nga alagad ni Jehova nga si Job nga nagaalagad sia sa Iya bangod lamang sang interes sa kaugalingon nga kaayuhan, nga nagasiling: “Nahadlok bala si Job sa Dios sa wala sing pulos?” (Job 1:⁠9) Ginapakita sang kasaysayan sa tulun-an sang Job nga walay sapayan sang mga pagtilaw kay Job, labi pa nga nangin malapit sia kay Jehova. (Job  10:​9, 12; 12:​9, 10; 19:25; 27:⁠5; 28:28) Pagkatapos sang iya mabudlay nga inagihan, sia nagsiling sa Dios: “Sa hinuringhuring nakabati ako tuhoy sa imo, apang karon makita ka sang akon mata.”​​—⁠Job 42:⁠5.

3 Nag-untat bala si Satanas sa pagsumbong sa matutom nga mga alagad sang Dios halin sang tion ni Job? Wala. Ginapakita sang tulun-an sang Bugna nga sa sining tion sang katapusan, ginasumbong gihapon ni Satanas ang hinaplas nga mga kauturan ni Cristo kag ang ila man matutom nga mga kaupod. (2 Timoteo 3:​12; Bugna 12:​10, 17) Busa, subong matuod nga mga Cristiano dapat gid kita tanan magpasakop sa aton mainulikdon nga Dios, nga si Jehova, nga nagaalagad sa iya bangod sang aton daku nga gugma kag sa amo ginapamatud-an naton nga butig ang panumbungon ni Satanas. Kon himuon naton ini, mapahalipay naton ang tagipusuon ni Jehova.​​—⁠Hulubaton 27:11.

Nagatinguha si Jehova nga Buligan Kita

4, 5. (a) Tuhay sa ginahimo ni Satanas, ano ang ginapangita ni Jehova sa duta? (b) Agod maeksperiensiahan naton ang kahamuot ni Jehova, ano ang dapat naton himuon?

4 Ang Yawa nagalibotlibot sa duta, nga nagapangita sang iya masumbong kag matukob. (Job 1:​7, 9; 1 Pedro 5:⁠8) Sa kabaliskaran, nagatinguha si Jehova nga buligan ang mga nagakinahanglan sang iya kusog. Ginsilingan ni manalagna Hanani si Hari Asa: “Tuhoy kay Jehova, ang iya mga mata nagapanghulonghulong sa bug-os nga duta agod ipakita ang iya kusog para sa ila nga ang tagipusuon himpit sa iya.” (2 Cronica 16:⁠9) Magkatuhay gid ang madinumtanon nga pagpamantay ni Satanas kag ang mahigugmaon nga pag-ulikid ni Jehova!

5 Wala kita ginaespiyahan ni Jehova agod mahibal-an ang tanan naton nga sala kag sayop. Ang salmista nagsulat: “Kon ang mga sayop amo ang imo ginabantayan, O Jah, O Jehova, sin-o bala ang makatindog?” (Salmo 130:⁠3) Ang sabat: wala gid sing makatindog. (Manugwali 7:20) Kon magpalapit kita kay Jehova sing bug-os tagipusuon, ang iya mga mata magatulok sa aton, indi agod pakamalauton kita, kundi agod tan-awon ang aton mga panikasog kag sabton ang aton mga pangamuyo nga nagapangayo sing bulig kag kapatawaran. Si apostol Pedro nagsulat: “Ang mga mata ni Jehova nagatamod sa mga matarong, kag ang iya mga dulunggan bukas sa ila pangamuyo; apang ang nawong ni Jehova batok sa mga nagahimo sing malaut nga mga butang.”​​—⁠1 Pedro 3:⁠12.

6. Paano ang kaso ni David isa ka lugpay kag paandam sa aton?

6 Si David di-himpit kag nakahimo sing daku nga sala. (2 Samuel 12:​7-9) Apang ginbubo niya ang iya tagipusuon kay Jehova kag nagpalapit sa iya paagi sa hugot nga pangamuyo. (Salmo 51:​1-​12, superskripsion) Ginpamatian ni Jehova ang iya pangamuyo kag ginpatawad sia, apang wala malikawan ni David ang di-makalilipay nga mga resulta sang iya sala. (2 Samuel 12:​10-​14) Dapat ini mangin lugpay kag paandam sa aton. Makalulugpay ang mahibaluan nga handa si Jehova sa pagpatawad sang aton mga sala kon nagahinulsol gid kita, apang dapat naton marealisar nga ang mga sala masami nga may malain nga mga resulta. (Galacia 6:​7-9) Kon luyag naton mangin suod kay Jehova, dapat kita magpalayo sa bisan ano nga wala nagapahamuot sa iya.​​—⁠Salmo 97:⁠10.

Ginabuyok ni Jehova ang Iya Katawhan sa Iya

7. Ano nga sahi sang mga tawo ang ginabantayan ni Jehova, kag paano niya ginabuyok sila nga magpalapit sa iya?

7 Si David nagsulat sa isa sang iya mga salmo: “Si Jehova mataas, pero makita niya ang mapainubuson; apang ang matinaastaason kilala lamang niya sa malayo.” (Salmo 138:⁠6) Sing kaanggid, ang isa pa ka salmo nagasiling: “Sin-o ang kaangay ni Jehova nga aton Dios, sia nga nagapuyo sa kahitaasan? Nagapaubos sia sa pagtulok sa langit kag duta, ginabangon niya ang kubos gikan sa yab-ok.” (Salmo 113:​5-7) Huo, nagapaubos ang labing gamhanan nga Manunuga sang uniberso agod magtulok sa duta, kag ginatan-aw sang iya mga mata “ang mapainubuson,” “ang kubos,” ang mga tawo nga “nagapanghayhay kag nagabakho sa tanan nga kalangil-aran nga ginahimo.” (Ezequiel 9:⁠4) Ginabuyok niya ini sila nga magpalapit sa iya paagi sa iya Anak. Sang diri si Jesus sa duta, sia nagsiling: “Wala sing tawo nga makakari sa akon luwas kon buyukon sia sang Amay, nga nagpadala sa akon . . . Wala sing isa nga makakari sa akon luwas kon itugot ini sa iya sang Amay.”​​—⁠Juan 6:​44, 65.

8, 9. (a) Ngaa dapat kita tanan magpalapit kay Jesus? (b) Ano ang talalupangdon gid tuhoy sa gawad nga kahimusan?

8 Ang tanan nga tawo dapat magpalapit kay Jesus  kag magtuo sa halad nga gawad bangod natawo sila nga mga makasasala kag nahamulag sa Dios. (Juan 3:36) Dapat sila makapasag-uli sa Dios. (2 Corinto 5:20) Wala paghulata sang Dios ang mga makasasala nga makitluoy pa sa iya agod himuan sila sing kahimusan nga makapakighidait sila sa iya. Si apostol Pablo nagsulat: “Ginarekomendar sang Dios ang iya mismo nga gugma sa aton amo nga, samtang mga makasasala pa kita, si Cristo napatay tungod sa aton. . . . Kay kon, sang mga kaaway pa kita, ginpasag-uli kita sa Dios paagi sa kamatayon sang iya Anak, karon nga napasag-uli na kita, labi pa nga pagaluwason kita paagi sa iya kabuhi.”​​—⁠Roma 5:​8, 10.

9 Ginpamatud-an ni apostol Juan ang dungganon nga kamatuoran nga ginapasag-uli sang Dios ang katawhan sa iya kaugalingon, sa pagsulat: “Sa sini ang gugma sang Dios ginpahayag sa aton kahimtangan, bangod ginpadala sang Dios ang iya bugtong nga Anak sa kalibutan agod maagom naton ang kabuhi paagi sa iya. Sa sini ang gugma amo, indi nga ginhigugma naton ang Dios, kundi nga ginhigugma niya kita kag ginpadala ang iya Anak subong nagatumbas nga halad sang aton mga sala.” (1 Juan 4:​9, 10) Ang Dios ang naghimo sang una nga tikang, indi ang tawo. Wala bala nagalapit ang imo buot sa isa ka Dios nga nagpakita sing daku gid nga gugma sa mga tawo nga indi lamang “mga makasasala” kundi “mga kaaway” pa?​​—⁠Juan 3:⁠16.

Dapat Naton Pangitaon si Jehova

10, 11. (a) Ano ang dapat naton himuon sa pagpangita kay Jehova? (b) Paano naton dapat tamdon ang sistema sang mga butang ni Satanas?

10 Sa pagkamatuod, wala kita ginapilit ni Jehova nga magpalapit sa iya. Dapat naton sia pangitaon, ‘kapkapon kag makita gid naton sia, bisan pa, sa kamatuoran, indi sia malayo sa tagsatagsa sa aton.’ (Binuhatan 17:27) Dapat naton kilalahon ang kinamatarong ni Jehova nga obligahon kita nga magpasakop sa iya. Ang disipulo nga si Santiago nagsulat: “Magpasakop kamo sa Dios; apang pamatuki ang Yawa, kag magapalagyo sia sa inyo. Magpalapit kamo sa Dios, kag magapalapit sia sa inyo. Tinlui ang inyo mga kamot, kamo nga mga makasasala, kag putlia ang inyo tagipusuon, kamo nga mga indi makapamat-od.” (Santiago 4:​7, 8) Indi kita dapat magpangalag-ag nga magtindog sing malig-on batok sa Yawa kag dampig kay Jehova.

11 Nagakahulugan ini nga dapat kita magpalayo sa malaut nga sistema sang mga butang ni Satanas. Si Santiago nagsulat man: “Wala bala kamo makahibalo nga ang pagpakig-abyan sa kalibutan pagpakig-away sa Dios? Busa, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Santiago 4:⁠4) Sa pihak nga bahin, kon luyag naton mangin mga abyan ni Jehova, dapat naton paabuton nga dumtan kita sang kalibutan ni Satanas.​​—⁠Juan 15:19; 1 Juan 3:⁠13.

12. (a) Anong makalulugpay nga mga pulong ang ginsulat ni David? (b) Ano nga paandam ang ginhatag ni Jehova paagi kay manalagna Azarias?

12 Kon ginapamatukan kita sang kalibutan ni Satanas sa isa ka partikular nga paagi, dapat gid kita mangayo sing bulig kay Jehova paagi sa pangamuyo. Si David, nga nakaeksperiensia sang pagluwas ni Jehova sing madamo gid nga beses, nagsulat para sa aton kalugpayan: “Si Jehova malapit sa tanan nga nagapanawag sa iya, sa tanan nga nagapanawag sa iya sa kamatuoran. Tumanon niya ang handum sang mga nagakahadlok sa iya, kag pamatian niya ang ila pagpangayo sing bulig, kag luwason niya sila. Ginabantayan ni Jehova ang tanan nga nagahigugma sa iya, apang ang tanan nga malauton laglagon niya.” (Salmo 145:​18-​20) Ginapakita sini nga salmo nga sarang kita maluwas ni Jehova subong mga indibiduwal kon ginatilawan kita kag nga luwason man niya ang iya  bug-os nga katawhan sa tion sang “dakung kapipit-an.” (Bugna 7:14) Magapabilin si Jehova nga suod sa aton kon magpabilin man kita nga suod sa iya. Ginatuytuyan sang “espiritu sang Dios,” ginsiling ni manalagna Azarias ang sarang naton makabig subong isa ka kabilugan nga kamatuoran: “Si Jehova nagaupod sa inyo samtang kamo nagaupod sa iya; kag kon pangitaon ninyo sia, itugot niya nga makita ninyo sia, apang kon bayaan ninyo sia bayaan man niya kamo.”​​—⁠2 Cronica 15:​1, 2.

Dapat Mangin Matuod si Jehova sa Aton

13. Paano naton mapakita nga si Jehova matuod sa aton?

13 Tuhoy kay Moises, si apostol Pablo nagsulat nga “nagpabilin sia nga mabakod subong nga nagatan-aw sa Isa nga di-makita.” (Hebreo 11:27) Sa pagkamatuod, wala gid makita ni Moises si Jehova. (Exodo 33:20) Apang nangin matuod gid si Jehova sa iya nga daw nakita niya si Jehova. Sing kaanggid man, pagkatapos sang mga pagtilaw kay Job, nakita niya sing mas maathag si Jehova paagi sa iya mga mata sang pagtuo, subong isa ka Dios nga nagatugot sa iya matutom nga mga alagad nga makaeksperiensia sing mga pagtilaw apang wala gid nagabiya sa ila. (Job 42:⁠5) Tuhoy kay Enoc kag kay Noe, ginsiling nga sila ‘naglakat upod sa Dios.’ Ginhimo nila ini paagi sa pagtinguha nga pahamut-an ang Dios kag tumanon sia. (Genesis 5:​22-​24; 6:⁠9, 22; Hebreo 11:​5, 7) Kon si Jehova matuod sa aton subong nga nangin matuod sia kay Enoc, kay Noe, kay Job, kag kay Moises, ‘talupangdon naton sia’ sa tanan naton nga mga dalanon, kag “tadlungon niya ang [aton] mga banas.”​​—⁠Hulubaton 3:​5, 6.

14. Ano ang buot silingon sang “manguyapot” kay Jehova?

14 Sang manugsulod na ang mga Israelinhon sa Ginsaad nga Duta, ginlaygayan sila ni Moises: “Magsunod kamo kay Jehova nga inyo Dios, kag magkahadlok kamo sa iya, kag tumana ninyo ang iya mga sugo, kag pamatii ninyo ang iya tingog, kag mag-alagad kamo sa iya, kag manguyapot kamo sa iya.” (Deuteronomio 13:⁠4) Dapat nila sundon si Jehova, kahadlukan sia, tumanon  sia, kag manguyapot sa iya. Tuhoy sa tinaga diri nga ginbadbad nga “manguyapot,” ang isa ka iskolar sa Biblia nagsiling nga “ang tinaga nagapakita sing malapit kag suod nga kaangtanan.” Ang salmista nagsiling: “Ang pagpakigsuod kay Jehova ila sang mga nahadlok sa iya.” (Salmo 25:14) Matigayon naton ining hamili kag suod nga kaangtanan kay Jehova kon sia mangin matuod sa aton kag kon ginahigugma gid naton sia amo nga nahadlok kita nga indi sia mapahamut-an sa bisan anong paagi.​—⁠Salmo 19:​9-​14.

Nahibaluan Mo Bala nga Nagaulikid si Jehova?

15, 16. (a) Paano ginapakita sang Salmo 34 nga si Jehova nagaulikid sa aton? (b) Ano ang dapat naton himuon kon indi naton madumduman ang maayo nga mga buhat ni Jehova sa aton?

15 Ang isa sang malalangon nga mga buhat ni Satanas amo ang pagtinguha nga malimtan naton ang katunayan nga ang aton Dios, nga si Jehova, pirme nagaulikid sa iya matutom nga mga alagad. Nahibaluan gid ni Hari David sang Israel ang maamligon nga kamot ni Jehova bisan sang naatubang niya ang makatalagam gid nga tinion. Sang napilitan sia nga magpakunokuno nga buang sa atubangan ni Hari Aquis sang Gat, nagkomposo sia sing isa ka ambahanon, isa ka matahom gid nga salmo, nga naglakip sini nga mga pulong sang pagtuo: “O pakadakua ninyo si Jehova upod sa akon, kag pakataason naton sing tingob ang iya ngalan. Nagpamangkot ako kay Jehova, kag ginsabat niya ako, kag ginluwas niya ako gikan sa tanan ko nga kahadlok. Ang anghel ni Jehova nagakampo sa palibot sang mga nagakahadlok sa iya, kag ginaluwas niya sila. Tilawi ninyo kag tan-awa nga si Jehova maayo; malipayon ang mabukod nga tawo nga nagadangop sa iya. Si Jehova malapit sa mga buong sing tagipusuon; kag ginaluwas niya ang mga nadugmok sa espiritu. Madamo ang mga kalamidad sang matarong, apang gikan sa sini tanan ginaluwas sia ni Jehova.”​​—⁠Salmo 34:​3, 4, 7, 8, 18, 19; 1 Samuel 21:10-​15.

16 Kumbinsido ka bala sa gahom ni Jehova sa pagluwas? Nahibaluan mo bala ang pag-amlig sang iya mga anghel? Natilawan mo bala mismo kag nakita nga maayo si Jehova? San-o ang katapusan nga tion nga nahibaluan mo gid nga si Jehova maayo sa imo? Panumduma ina. Sang didto ka bala sa katapusan nga balay nga ginduaw  mo sa ministeryo, sang mabatyagan mo nga daw wala na ikaw sing mahimo? Mahimo nga nangin maayo gid ang paghambalanay ninyo sang tagbalay. Wala ka bala malipat sadto nga pasalamatan si Jehova nga ginhatagan ka niya sing dugang nga kusog nga kinahanglan mo kag nga ginpakamaayo ka niya? (2 Corinto 4:⁠7) Sa pihak nga bahin, ayhan indi mo madumduman ang partikular nga kaayo nga ginpakita sa imo ni Jehova. Mahimo nga kinahanglan mo pa nga pamensaron ang nagligad nga semana, bulan, tuig, ukon kapin pa. Kon amo sini, ngaa indi pagtinguhaan gid nga mangin suod pa kay Jehova kag tan-awa kon paano niya ikaw ginagiyahan kag ginatuytuyan? Si apostol Pedro naglaygay sa mga Cristiano: “Magpaubos kamo sang inyo kaugalingon sa idalom sang gamhanan nga kamot sang Dios . . . samtang ginatugyan ninyo sa iya ang tanan ninyo nga kabalaka, kay sia nagaulikid sa inyo.” (1 Pedro 5:​6, 7) Sa pagkamatuod, makibot ikaw kon daw ano gid ang pag-ulikid niya sa imo!​​—⁠Salmo 73:28.

Padayon nga Pangitaa si Jehova

17. Ano ang kinahanglan agod padayon nga ginapangita naton si Jehova?

17 Dapat naton padayon nga huptan ang aton maayo nga kaangtanan kay Jehova. Si Jesus nagsiling sa pangamuyo sa iya Amay: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:⁠3) Ang pagkuha sing ihibalo tuhoy kay Jehova kag sa iya Anak nagakinahanglan sing padayon nga panikasog. Kinahanglan naton ang bulig sang pangamuyo kag sang balaan nga espiritu agod mahangpan naton ang “madalom nga mga butang sang Dios.” (1 Corinto 2:​10; Lucas 11:13) Kinahanglan man naton ang pagtuytoy sang “matutom kag mainandamon nga ulipon” agod pakan-on ang aton hunahuna sing espirituwal nga pagkaon nga ginahatag sa “nagakaigo nga tion.” (Mateo 24:45) Paagi sa sini nga alagyan, ginalaygayan kita ni Jehova nga basahon ang iya Pulong sa adlaw-adlaw, magtambong sa aton Cristianong mga miting sing regular, kag magpakigbahin sing tinagipusuon sa pagbantala sing “maayong balita sang ginharian.” (Mateo 24:14) Paagi sa paghimo sini, padayon nga ginapangita naton ang aton mainulikdon nga Dios, nga si Jehova.

18, 19. (a) Dapat kita mangin determinado nga himuon ang ano? (b) Kon magtindog kita sing malig-on batok sa Yawa kag padayon nga pangitaon naton si Jehova, paano kita pakamaayuhon?

18 Ginahimo ni Satanas ang tanan nga masarangan niya agod magpautwas sing paghingabot, pagpamatok, kag pag-ipit gikan sa tanan nga bahin batok sa katawhan ni Jehova. Nagatinguha sia nga tublagon ang aton paghidait kag laglagon ang aton maayo nga tindog sa aton Dios. Indi niya luyag nga padayunon naton ang aton hilikuton sa pagpangita sa mga bunayag sing tagipusuon kag buligan sila nga magdampig sa bahin ni Jehova sa hulusayon sang bug-os uniberso nga pagkasoberano. Apang dapat kita mangin determinado nga magpabilin nga matutom kay Jehova, nagasalig nga luwason niya kita gikan sa isa nga malauton. Paagi sa pagtugot sa Pulong sang Dios nga magtuytoy sa aton kag paagi sa pagpabilin nga aktibo upod sa iya kitaon nga organisasyon, mapat-od naton nga yara sia pirme agod sakdagon kita.​​—⁠Isaias 41:​8-​13.

19 Busa, kabay nga kita tanan magtindog sing malig-on batok sa Yawa kag sa iya malalangon nga mga buhat, nga pirme ginapangita ang aton mahal nga Dios, si Jehova, nga indi mapaslawan sa ‘pagpalig-on sa aton, sa pagpabakod sa aton.’ (1 Pedro 5:​8-​11) Nian, ‘mahuptan naton ang aton kaugalingon sa gugma sang Dios, samtang ginahulat naton ang kaluoy sang aton Ginuong Jesucristo nga ginahunahuna ang kabuhi nga walay katapusan.’​​—⁠Judas 21.

Paano Mo Sabton?

• Ano ang kahulugan sang tinaga nga “Yawa,” kag paano ang Yawa nagakabagay sa sini nga ngalan?

• Paano si Jehova tuhay sa Yawa sa Iya pagtan-aw sa mga pumuluyo sang duta?

• Ngaa dapat batunon sang isa ka tawo ang gawad kon nagapalapit kay Jehova?

•Ano ang buot silingon sang ‘pagpanguyapot’ kay Jehova, kag paano naton sia mapangita sing padayon?

[Mga Pamangkot sa Pagtinuon]

[Retrato sa pahina 15]

Walay sapayan sang mga pagtilaw sa iya, nahibaluan ni Job nga si Jehova nag-ulikid sa iya

[Mga retrato sa pahina 16, 17]

Ang adlaw-adlaw nga pagbasa sing Biblia, regular nga pagtambong sa Cristianong mga miting, kag ang makugi nga pagpakigbahin sa pagbantala nga hilikuton nagapahanumdom sa aton nga si Jehova nagaulikid sa aton