Panalambiton 2:1-22
א [Aleph]
2 Sa daku nga kaakig ni Jehova gintabunan niya sing gal-um ang anak nga babayi sang Sion!
Halin sa langit ginhaboy niya sa duta ang katahom sang Israel.+
Wala niya gindumdom ang palatungan sang iya tiil+ sa adlaw sang iya kaakig.
ב [Beth]
2 Ginlaglag ni Jehova ang tanan nga puluy-an ni Jacob, wala sia maluoy sa ila.
Sa iya kaakig ginguba niya ang mga pamakod sang mga anak nga babayi ni Juda.+
Ginpukan niya sa duta kag ginpasipalahan ang ginharian+ kag ang iya mga prinsipe.+
ג [Gimel]
3 Sa kasingkal sang iya kaakig gin-utod niya ang tanan nga gahom* sang Israel.
Wala niya kami ginbuligan sang ginsalakay sang kaaway ang Israel,+Kag ang iya nagadabdab nga kaakig kay Jacob daw kaangay sang kalayo nga nagapanglamon sang tanan nga yara sa palibot sini.+
ד [Daleth]
4 Daw subong sia sang kaaway nga nagbingat* sang iya pana; ang iya tuo nga kamot nagpangaman kaangay sang kasumpong;+Ginpamatay niya ang tanan namon nga pinalangga.+
Kag ginbubo niya ang iya daku nga kaakig nga daw kaangay sang kalayo+ sa tolda sang anak nga babayi sang Sion.+
ה [He]
5 Si Jehova nangin kaangay sang kaaway;+Ginlaglag niya ang Israel.
Ginlaglag niya ang tanan nga torre sini;Ginguba niya ang napamakuran nga mga duog sini.
Kag gindugangan niya ang kalisod kag panalambiton sang anak nga babayi sang Juda.
ו [Waw]
6 Ginguba niya ang iya payagpayag+ nga daw kaangay lang sang payag sa hardin.
Gin-untat* niya ang iya kapiestahan.+
Ginpahanabo ni Jehova nga malimtan ang kapiestahan kag ang adlaw nga inugpahuway sa Sion,Kag sa iya daku nga kaakig ginsikway niya ang hari kag ang saserdote.+
ז [Zayin]
7 Ginsikway ni Jehova ang iya halaran;Ginbiyaan niya ang iya santuaryo.+
Gintugyan niya sa kamot sang kaaway ang mga pader sang iya napamakuran nga mga torre.+
Sa balay ni Jehova nagsininggit sila sing mabaskog+ nga daw nagasaulog sila sang kapiestahan.
ח [Heth]
8 Gintuyo ni Jehova nga gub-on ang pader sang anak nga babayi sang Sion.+
Gin-untay niya ang pisi nga inugtakus.+
Wala niya ginpunggan ang iya kamot sa paglaglag.*
Ginpalalaw niya ang pamakod kag pader.
Naghuyang sila tanan.
ט [Teth]
9 Ang iya mga gawang nagsalop sa duta.+
Ginguba kag ginbali sang Dios ang iya mga pintal.
Ang iya mga hari kag ang iya mga prinsipe yara sa mga pungsod.+
Wala sing kasuguan;* bisan ang iya mga manalagna wala na sing nabaton nga palanan-awon kay Jehova.+
י [Yod]
10 Ang mga gulang nga lalaki sang anak nga babayi sang Sion nagapungko sing mahipos sa duta.+
Nagsabwag sila sing yab-ok sa ila ulo kag nagsuksok sing sako.+
Ang mga birhen sang Jerusalem nagduko sang ila ulo sa duta.
כ [Kaph]
11 Ang akon mga mata nagpalangharok sa paghibi.+
Daw ginalabugay ang akon tiyan.*
Ang akon atay daw ginbubo sa duta, bangod sa pagkapukan sang anak nga babayi* sang akon katawhan,+Bangod nagakalipong sa mga dalan sang banwa ang mga bata kag ang mga lapsag.+
ל [Lamed]
12 Nagapamangkot sila sa ila mga iloy, “Diin ang uyas kag ang alak?”+
Samtang nagakalipong sila kaangay sang napilasan sa mga dalan sang siudad,Samtang ang ila kabuhi* nagataliwan sa mga butkon sang ila iloy.
מ [Mem]
13 Ano ang mapakita ko sa imo subong pamatuod?Ano ang ipaangay ko sa imo, O anak nga babayi sang Jerusalem?
Ano ang ipaanggid ko sa imo, agod malugpayan ka, O birhen nga anak nga babayi sang Sion?
Kay ang imo pilas subong kadalom sang dagat.+ Sin-o ang makapaayo sa imo?+
נ [Nun]
14 Ang mga palanan-awon nga ginsugid sa imo sang imo mga manalagna wala sing pulos kag indi matuod,+Kag wala nila ginpatalupangod ang imo sala agod indi ka mabihag,+Sa baylo padayon sila nga nagasugid sa imo sing wala sing pulos kag indi matuod nga mga palanan-awon.+
ס [Samekh]
15 Ginpalakpakan ka nga may pagyaguta sang tanan nga nagalabay sa dalan.+
Nagpanagutsot sila sa katingala+ kag naglungolungo sa anak nga babayi sang Jerusalem, nga nagasiling:
“Amo bala ini ang siudad nga ginasiling nila, ‘Himpit ang katahom sini, ang kalipay sang bug-os nga duta’?”+
פ [Pe]
16 Ang tanan mo nga kaaway nagyaguta sa imo.
Nagpanagutsot sila kag nagpabagrot sang ila mga ngipon. Nagsiling sila: “Nalaglag naton sia.+
Amo ini ang adlaw nga aton ginahulat!+ Nag-abot na ini, kag nakita naton!”+
ע [Ayin]
17 Ginhimo ni Jehova ang iya gintuyo;+ gintuman niya ang iya ginsiling,+Ang iya ginsugo sang una pa.+
Nagpangguba sia nga wala sing kaluoy.+
Gintugutan niya nga magkasadya ang imo kaaway; ginpabaskog niya ang kusog* sang imo mga kasumpong.
צ [Tsade]
18 Ang ila tagipusuon nagsinggit kay Jehova, O pader sang anak nga babayi sang Sion.
Pailiga ang mga luha kaangay sang suba sa adlaw kag gab-i.
Indi pagpaumpawi ang imo kaugalingon, indi pagpapahuwaya ang imo mata.*
ק [Qoph]
19 Tindog ka! Magsinggit ka sa kagab-ihon sa pagsugod sang pagbantay.
Ibubo ang imo balatyagon sa atubangan ni Jehova kaangay sang tubig.
Ibayaw ang imo mga kamot sa iya tungod sa kabuhi* sang imo mga anak,Nga nagakalipong bangod sa gutom sa pamusod sang tagsa ka dalan.+
ר [Resh]
20 O Jehova, tan-awa ang isa nga ginsilutan mo sing tuman.
Kaunon bala sang mga babayi ang mga anak* nga ila ginbun-ag,+Ukon patyon bala ang saserdote kag ang manalagna sa santuaryo ni Jehova?+
ש [Shin]
21 Ang bata kag tigulang nagahamyang sa mga dalan.+
Ang akon mga birhen* kag mga pamatan-on nga lalaki nagkalapukan sa espada.+
Nagpamatay ka sa adlaw sang imo kaakig; nagpamatay ka nga wala sing kaluoy.+
ת [Taw]
22 Subong nga sa adlaw sang kapiestahan,+ gintipon mo ang mga kaaway sa akon palibot.
Sa adlaw sang kaakig ni Jehova wala sing nakapalagyo ukon nakaluwas;+Ginpamatay sang akon kaaway ang akon mga anak nga ginbun-ag* kag ginpadaku.+
Footnote
^ Sa literal, “ang kada sungay.”
^ Sa literal, “nagtasak.”
^ Ukon “Ginlaglag.”
^ Sa literal, “pagpanglamon.”
^ Ukon “instruksion.”
^ Mabinalaybayon nga personipikasyon, ayhan nagapabutyag sing kaluoy ukon simpatiya.
^ Sa literal, “tinai.”
^ Ukon “kalag.”
^ Sa literal, “sungay.”
^ Sa literal, “ang anak nga babayi sang imo mata.”
^ Ukon “kalag.”
^ Ukon “bunga.”
^ Ukon “mga pamatan-on nga babayi.”
^ Ukon “ginbun-ag nga mapagros.”
