Lav i Mekem Se Yumi No Fraet
Lav i Mekem Se Yumi No Fraet
“Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo blong mekem yumi naf blong [“holem stret tingting long evri samting,” NW ].”—2 TIMOTI 1:7.
1, 2. (a) ?Lav i save gat bigfala paoa blong mekem wanem long man? (b) ?From wanem fasin blong Jisas blong no fraet i bigwan moa long hemia blong ol man?
WAN man mo woman we tufala i jes mared, tufala i stap daeva long solwota long is kos blong Ostrelia. Taem tufala i stat kam antap, wan bigfala waet sak i spid i go from woman ya. Man blong hem i no fraet. Hem i pusum woman blong hem i go long wan saed, mo i letem sak ya i kakae hem. Long sevis we oli mekem blong berem dedman ya, woman blong hem i talem se: “Hem i givim laef blong hem blong sevem mi.”
2 Yes, lav i gat bigfala paoa blong mekem man i no fraet. Jisas Kraes i talem se: “I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15:13) Twanti-fo aoa i no pas yet ale Jisas i givim laef blong hem, be i no blong sevem wan man nomo. Hem i wantem sevem olgeta man. (Matiu 20:28) Mo tu, Jisas i no tekem desisen ya blong givim laef blong hem long las minit nomo. Hem i save finis se bambae ol man oli jikim hem, mekem nogud long hem, jajem hem long fasin we i no stret, mo nilim hem long pos blong i ded. Hem i mekemrere tingting blong ol disaepol blong hem from samting ya, i se: “Naoia yumi stap go antap long Jerusalem, mo long ples ya, sam man bambae oli putum mi, mi Pikinini blong Man, mi go long han blong ol jif pris mo ol tija blong Loa. Olgeta ya bambae oli jajem mi, se bambae mi mas ded, mo bambae oli putum mi long han blong ol man we oli no laen blong Isrel. Nao olgeta ya bambae oli mekem plei long mi, mo oli spet long mi, mo oli wipim mi, mo bambae oli kilim mi mi ded.”—Mak 10:33, 34.
3. ?Wanem i mekem se Jisas i no fraet?
3 ?Wanem i mekem se Jisas i no fraet? Hem i bilif mo i onagud long God. Hemia nao tufala fasin we i givhan bigwan long hem. (Hibrus 5:7; 12:2) Be stamba samting we i mekem se Jisas i no fraet, hemia se hem i lavem God mo i lavem ol narafala man. (1 Jon 3:16) Sipos yumi gat lav ya, mo yumi bilif mo onagud long God, bambae yumi gat fasin blong no fraet olsem we Kraes i gat. (Efesas 5:2) ?Olsem wanem yumi save gat lav olsem Kraes? Fastaem, yumi mas luksave se lav ya i kamaot wea.
‘Lav i Kamaot Long God’
4. ?From wanem yumi save talem se Jeova i Stamba blong lav?
4 Jeova hem i fulap long lav, mo hem i Stamba blong fasin lav tu. Aposol Jon i raetem se: “Ol fren. Yumi mas lavlavem yumi, from we fasin ya blong lavem man, hem i kamaot long God. Olgeta we oli stap lavem narafala man, oli pikinini blong God, mo oli save God. Man we i no save lavem narafala man, hem i no save God, from we God [“hem i lav,” NW ].” (1 Jon 4:7, 8) Taswe, wan rod nomo blong yumi save gat lav ya we i kamaot long God, hemia blong kam klosap long Hem mo obei long Hem wetem fulhat blong yumi. Blong mekem olsem, yumi mas kasem stret save mo mekem save ya i wok long laef blong yumi.—Filipae 1:9; Jemes 4:8; 1 Jon 5:3.
5, 6. ?Wanem i givhan long ol faswan disaepol blong Jisas blong oli gat lav olsem hem?
5 Long laswan prea we Jisas i mekem wetem ol 11 aposol we oli stap tru long hem, hem i soemaot se sipos oli wantem lavlavem olgeta moa, oli mas savegud God. Hem i prea se: “Mi mi mekem olgeta ya oli save [“long nem blong,” NW ] yu. Mo bambae mi mekem olsem bakegen, blong oli save lavem mi olsem we yu yu lavem mi, mo blong laef blong mi i save joen gud long laef blong olgeta.” (Jon 17:26) Jisas i givhan long ol disaepol blong hem blong oli lavlavem olgeta olsem we hem mo Papa blong hem tufala i lavlavem tufala. Long ol toktok mo fasin blong hem, hem i soemaot mining blong nem blong God—ol nambawan fasin we oli joen wetem nem ya. From samting ya, Jisas i save talem se: “Man we i luk mi, hem i luk Papa blong mi.”—Jon 14:9, 10; 17:8.
6 Lav ya we Kraes i gat, hem i wan frut blong tabu spirit. (Galesia 5:22) Long Pentekos long 33 K.T., ol faswan Kristin oli kasem tabu spirit olsem Jisas i bin promes long olgeta. From samting ya, oli tingbaot bakegen plante samting we Jisas i bin tijim olgeta long hem, mo oli kasem save moa long mining blong ol tok blong Baebol. I klia se dip save ya we oli kasem i mekem se oli lavem God moa. (Jon 14:26; 15:26) ?Wanem i kamaot from? Nating se ol man oli wantem kilim olgeta i ded, be oli no fraet blong gohed strong blong talemaot gud nius.—Ol Wok 5:28, 29.
Oli Soemaot Se Oli No Fraet Mo Oli Gat Lav
7. ?Wanem trabol we Pol mo Banabas i kasem long misinari trip blong tufala?
7 Aposol Pol i raetem se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo blong mekem yumi naf blong [“holem stret tingting long evri samting,” NW ].” (2 Timoti 1:7) Pol i luk we samting ya i kamtru long laef blong hem. Tingbaot trabol we hem mo Banabas i kasem long misinari trip blong tufala. Tufala i prij long plante taon, olsem Antiok, Ikoniam, mo Listra. Long evri taon, samfala oli bilif long trutok. Be sam narafala oli agensem tufala strong. (Ol Wok 13:2, 14, 45, 50; 14:1, 5) !Long Listra, wan grup blong man we oli kros tumas, oli girap oli stonem Pol gogo oli ting se hem i ded, nao oli livim hem i stap olsem nomo! “Be taem ol man we oli bilif long Jisas oli kam stanap raonabaot long [Pol], hem i girap, i go insaed long taon bakegen. Nao long nekis dei, hem mo Banabas, tufala i go long Debe.”—Ol Wok 14:6, 19, 20.
8. ?Wanem samting we Pol mo Banabas i no fraet blong mekem, we i soemaot se tufala i lavem ol man?
8 ?Olsem wanem? ?Trabol ya we klosap Pol i ded from, i mekem se hem mo Banabas i fraet blong gohed blong prij? !Nogat! Long taon ya Debe, “tufala i pulum plante man oli kam man blong Jisas.” Afta, tufala i “tanemraon, tufala i kambak long Listra, nao biaen, tufala i aot long ples ya, tufala i kambak long Ikoniam, nao biaen bakegen, tufala i kambak long Antiok.” ?From wanem tufala i mekem olsem? Tufala i wantem givhan long ol niufala disaepol ya blong oli holem strong bilif. Pol mo Banabas i talem se: “Long rod blong go insaed long niufala wol ya we God i king long hem, yumi save kasem plante trabol.” I klia se lav we tufala i gat long ol “smol sipsip” blong Kraes i mekem se tufala i no fraet. (Ol Wok 14:21-23; Jon 21:15-17) Tufala i putumap sam elda long ol niufala kongregesen, nao tufala i prea blong “putum olgeta man we oli bilif finis long [“Jeova,” NW ], oli stap long han blong hem.”
9. ?Lav we Pol i gat long ol elda long Efesas i mekem wanem long olgeta?
9 From we Pol i tingbaot narafala oltaem mo i no fraet, plante long ol faswan Kristin oli lavem hem tumas. Tingbaot wanem i hapen long wan miting we Pol i mekem wetem ol elda long Efesas, ples ya we hem i bin stap tri yia long hem mo i bin fesem plante trabol. (Ol Wok 20:17-31) Pol i leftemap tingting blong ol elda ya blong oli lukaotgud long ol sipsip we God i putum long han blong olgeta. Nao hem i nildaon, i prea wetem olgeta. Biaen, ol brata ya “oli stap krae tumas, oli stap holem Pol, oli kis long hem blong talem tata long hem. Olgeta oli stap harem nogud tumas, from tok ya we hem i talem, se bambae oli no moa save luk fes blong hem bakegen.” !Tru ya, ol brata ya oli lavem Pol tumas! Yes, taem Pol mo ol fren blong hem oli mas aot, ol elda ya oli no wantem nating se oli go. Pol mo ol fren blong hem oli mas ‘fosem ol elda ya blong lego olgeta.’—Ol Wok 20:36–21:1.
10. ?Olsem wanem ol Witnes blong Jeova tede oli soemaot se oli no fraet mo oli lavlavem olgeta?
10 Tede ol Kristin brata mo sista oli lavem ol seket elda, ol elda long kongregesen, mo plante narafala we oli no fraet blong gohed blong givhan long ol sipsip blong Jeova. Olsem nao, long plante kantri we faet i stap gohed, mo long plante kantri we gavman i putum tabu long wok blong ol Witnes, sam seket elda mo waef blong olgeta oli fesem bigfala denja taem oli go luk ol brata mo sista long ol kongregesen. Be nating, oli rere blong go long kalabus mo lusum laef blong olgeta from ol brata sista ya. Long sam kantri, plante haeman mo olgeta we oli wok blong olgeta, oli mekem i nogud tumas long plante Witnes. Hemia from we ol Witnes ya oli no wantem talemaot nem blong ol narafala Witnes mo talemaot weples oli stap kasem ol kakae long saed blong spirit long hem. Oli mekem nogud long plante taosen narafala Witnes tu, we oli no wantem stop blong talemaot gud nius mo oli no wantem stop blong joen wanples wetem ol narafala Kristin long ol miting. Oli mekem ol Witnes ya oli harem nogud long bodi blong olgeta, mo oli kilim samfala i ded. (Ol Wok 5:28, 29; Hibrus 10:24, 25) !I gud yumi folem fasin blong bilif mo lav blong ol brata sista ya we oli no fraet nating!—1 Tesalonaeka 1:6.
Yu No Mas Lusum Lav Blong Yu
11. ?Wanem ol rod we Setan i yusum blong agensem ol man blong Jeova? ?Taswe yumi nidim wanem?
11 Taem oli sakemaot Setan long heven i kamdaon long wol, hem i kros tumas long ol man blong Jeova we oli ‘obei long ol tok blong [hem], mo holem ol tok we Jisas i talemaot se i tru.’ (Revelesen 12:9, 17) Wan rod we Setan i yusum, hemia blong pusum ol man blong girap agensem ol man blong God. Be plante taem, fasin ya i no karem frut olsem Setan i wantem, from we trabol olsem i mekem ol man blong God oli lavlavem olgeta moa, mo i pulum olgeta blong oli wok strong moa long wok blong God. Wan narafala rod we Setan i yusum, hem i traem pulum yumi blong mekem ol nogud fasin we tingting blong yumi nomo i wantem. Trik ya i defren long narawan, be i nidim yet we yumi no fraet, blong yumi save faet agensem tingting blong yumi we ‘i stap giaman long yumi bakegen, mo i nogud we i nogud olgeta.’—Jeremaea 17:9; Jemes 1:14, 15.
12. ?Olsem wanem Setan i yusum “spirit we i kamaot long wol” blong traem pulum yumi blong no moa lavem God?
12 I gat wan narafala tul we Setan i stap yusum—“spirit we i kamaot long wol.” Hemia i minim ol tingting we oli lidim no oli pulum ol man blong wol, mo we oli agensem tabu spirit blong God. (1 Korin 2:12) Spirit we i kamaot long wol i lidim ol man blong wantem kasem plante samting mo blong gohed blong wantem moa oltaem. Yes, ‘oli wantem tumas ol samting we ae blong olgeta i luk.’ (1 Jon 2:16; 1 Timoti 6:9, 10) I tru, i no rong blong gat mane mo olting. Be sipos yumi lavem ol samting ya bitim we yumi lavem God, Setan i winim yumi finis. From we yumi sinman, spirit blong wol i save gat “paoa” long yumi isi nomo, mo yumi no luksave se wol i stap pulum yumi. Spirit ya i stap wok oltaem blong pulum yumi, i no save stop, mo hem i stap long evri ples olsem win we yumi pulum. !Yu no mas letem spirit ya we i kamaot long wol i spolem hat mo tingting blong yu!—Efesas 2:2, 3, NW; Ol Proveb 4:23.
13. ?Yumi no mas fraet blong mekem wanem samting, blong yumi save winim ol traem long saed blong klin fasin?
13 Blong blokem mo tanem baksaed long nogud spirit ya we i kamaot long wol, i nidim we yumi no fraet blong folem ol klin fasin. Olsem nao, yumi no mas fraet blong girap mo aot long wan sinema, no blong ofem kompiuta no televisin, taem ol rabis pija oli kam long hem. Yumi no mas fraet blong stanap strong agensem ol fren we oli traem pulum yumi blong mekem nogud fasin, mo blong sakemaot ol fren ya. Mo yumi no mas fraet blong holemstrong long ol loa mo rul blong God, taem ol fren long skul mo long wok, ol man raonabaot long yumi, mo ol famle, oli jikim yumi.—1 Korin 15:33; 1 Jon 5:19.
14. ?Yu mas mekem wanem sipos spirit blong wol ya i stap gat paoa long yu?
14 !Taswe, i impoten tumas we yu mekem lav blong yu long God mo ol Kristin brata sista blong yu, i kam strong moa! Yu mas tektaem blong tingting gud long ol mak we yu wantem kasem long laef blong yu, mo long fasin blong laef we yu stap folem. Traem luk sipos spirit blong wol i stap gat paoa long yu. Sipos yu luk se yes, nating se maet i smol nomo, be yu mas prea long Jeova blong i givim strong tingting long yu blong sakemaot spirit blong wol ya mo blong stap longwe long hem. Jeova i no save satem sora blong hem long prea olsem we yu askem wetem fulhat blong yu. (Ol Sam 51:17) Mo tu, spirit blong Jeova i gat moa paoa i winim spirit blong wol ya.—1 Jon 4:4.
No Fraet Taem Yu Fesem Traem
15, 16. ?Olsem wanem lav olsem Kraes i bin soemaot i save givhan long yumi wanwan blong stanap strong tru long ol traem? Talem stori blong wan Kristin sista blong yumi.
15 I gat plante narafala traem we ol man blong Jeova oli kasem. Maet oli sik, handikap, tingting i foldaon, no oli kasem wan narafala trabol bakegen we i kamaot from sin we yumi evriwan i gat no from we yumi kam olfala. (Rom 8:22) Lav olsem Kraes i bin soemaot, i save givhan long yumi blong stanap strong tru long ol traem ya. Tingbaot wan woman, nem blong hem Namangolwa, we i gruap long wan Kristin famle long Sambia. Taem hem i gat tu yia nomo, hem i kam handikap. Hem i se: “Mi bin ting se bambae ol man oli sek nogud taem oli luk bodi blong mi. Mi sem we mi sem. Be ol Kristin brata mo sista oli givhan long mi blong gat defren tingting. Ale, mi winim sem ya mo mi tekem baptaes.”
16 Namangolwa i gat wan wiljea blong hem, be plante taem hem i no save yusum wiljea long ol rod we oli sanbij no graon nomo. Ale hem i wokbaot long fo leg. Nating se hem i mas traehad olsemia, hem i mekem wok blong haftaem paenia tu manis evri yia. Wan dei, Namangolwa i stap prij long wan woman, nao woman ya i stat krae. ?From wanem? From we bilif blong Kristin sista ya blong yumi mo strong tingting blong hem, i tajem hat blong woman ya. Samting we i soemaot se Jeova i blesem Namangolwa bigwan, hemia se faef long ol Baebol studen blong hem oli tekem baptaes finis, mo naoia wan long olgeta i mekem wok blong elda long kongregesen. Namangolwa i talem se: “Plante taem, tufala leg blong mi i soa we i soa. Be mi no letem samting ya i blokem mi.” Kristin sista ya i wan nomo long plante Witnes long olgeta ples blong wol we oli no gat strong bodi nating, be tingting blong olgeta i strong gud from we oli lavem God mo oli lavem ol man raonabaot long olgeta. !Jeova i luk olgeta olsem ol gudgudfala samting!—Hagae 2:7.
17, 18. ?Wanem i stap givhan long plante Kristin blong oli stanap strong tru long ol sik mo ol narafala traem? Storian long saed blong samfala long ples blong yu.
17 Taem man i siksik oltaem, tingting blong hem i save kam slak, no maet tingting i foldaon olgeta. Wan elda i talem se: “Long buk stadi blong mi, wan sista i gat sik blong suga mo tufala kidni blong hem oli no wokgud, wan narafala sista i gat kansa, tu bakegen tufala i stap soa long ol joen blong tufala, mo wan moa i gat sik blong skin mo sobodi tugeta. Sam samtaem tingting blong olgeta i foldaon. Nating se i olsem, oli no save mestem miting. Taem oli sik tumas no oli stap slip long hospital, long taem ya nomo oli mestem. Oli no mestem wok blong prij tu. Oli mekem mi mi tingbaot Pol we i talem se: ‘Taem we mi mi no gat paoa, long taem ya nao, mi mi gat paoa.’ Mi mi tinghae long ol sista ya from lav mo strong tingting we oli soemaot. Ating sik we oli gat i mekem se tingting blong olgeta i klia moa long saed blong samting we i moa impoten long laef.”—2 Korin 12:10.
18 Sipos yu yu harem nogud from we yu olfala, yu sik, no yu gat wan narafala trabol olsem, yu mas ‘prea oltaem’ mo yu mas askem long Jeova blong i givhan long yu blong yu no letem tingting blong yu i foldaon. (1 Tesalonaeka 5:14, 17) I tru, bambae i mas gat sam taem we yu harem nogud. Be yu mas traem tingting long ol gudfala samting, ol samting long saed blong spirit, antap moa, ol nambawan blesing blong Kingdom long fiuja. Wan Kristin woman i talem se: “Wok blong prij i olsem meresin blong mi.” Taem hem i talemaot gud nius long ol narafala, samting ya i givhan long hem blong holem wan gudfala tingting.
Lav i Givhan Long Man Blong i Kambak Long Jeova
19, 20. (a) ?Wanem i save givhan long olgeta we oli foldaon long sin, blong oli no fraet blong kambak long Jeova? (b) ?Long nekis stadi, bambae yumi tokbaot wanem?
19 Plante we oli kam slak long trutok no we oli foldaon long wan bigfala sin, oli faenem se i no isi blong kambak long Jeova. Be sipos oli rili tanem tingting blong olgeta from sin blong olgeta mo oli mekem lav blong God i kam strong bakegen, bambae oli no fraet blong kambak. Tingbaot Mario we i stap long Yunaeted Stet. * Mario i seraot long Kristin kongregesen, nao i kam wan alkolik, i tekem drag, mo 20 yia biaen, hem i go long kalabus. Mario i talem se: “Mi stat blong tingting dip long fiuja blong mi, mo mi ridim Baebol bakegen. Sloslo, mi gat tangkiu from ol gudfala fasin blong Jeova, antap moa, fasin sore blong hem we mi stap prea from oltaem. Taem mi mi kamaot long kalabus, mi no moa joen wetem ol fren we mi gat bifo, be mi go joen long ol Kristin miting. Biaen, kongregesen i tekembak mi. Naoia, long bodi blong mi, mi stap kakae frut blong sid we mi bin planem. Be samting we i gud se, mi mi gat janis blong kasem wan nambawan laef long fiuja. Mi talem bigfala tangkiu long Jeova from we hem i sore long mi mo i fogivim mi.”—Ol Sam 103:9-13; 130:3, 4; Galesia 6:7, 8.
20 I tru, olgeta we oli gat sem problem olsem Mario, oli mas wok had blong kambak long Jeova. Be sipos oli stadi Baebol, prea, mo tingting dip, lav blong olgeta bambae i kam strong bakegen, nao bambae oli kasem strong tingting mo oli no moa fraet. Promes blong ol blesing blong Kingdom tu i givim paoa long Mario. Yes, antap long lav, bilif, mo fraet long God, fasin ya blong putum tingting blong yumi i stap strong long ol blesing long fiuja i save gat paoa blong mekem laef blong yumi i kam moagud. Long nekis stadi, bambae yumi lukluk moa long gudfala presen ya we God i givim.
[Futnot]
^ Hemia i no stret nem blong hem.
?Yu Yu Save Ansa?
• ?Olsem wanem lav i givhan long Jisas blong i no fraet?
• ?Olsem wanem lav we Pol mo Banabas i gat long ol Kristin brata blong tufala, i givhan long tufala blong no fraet?
• ?Setan i yusum wanem rod blong traem spolem lav blong ol Kristin?
• ?Sipos yumi lavem Jeova, bambae yumi no fraet blong fesem wanem traem?
[Kwestin]
[Tok blong pija long pej 23]
Pol i lavem ol man, mo samting ya i mekem se hem i no fraet blong gohed
[Tok blong pija long pej 24]
Blong folem ol rul blong God, yumi nidim fasin blong no fraet
[Tok blong pija long pej 24]
Namangolwa Sututu