Bilif Mo Onagud Long God i Save Mekem Se Yumi No Fraet

“Tingting blong yu i mas strong . . . yu yu no mas fraet . . . mi [Jeova] bambae mi stap wetem yu.”—JOSUA 1:9.

1, 2. (a) ?Long tingting blong ol man, neson blong Isrel i save winim ol man Kenan, no nogat? (b) ?Wanem tok we Jeova i talem long Josua blong mekem tingting blong hem i strong?

 LONG yia 1473 B.K.T., neson blong Isrel i stap rere blong go insaed long Promes Lan. Nao Moses i toktok long olgeta long saed blong trabol we bambae oli fesem. Hem i se: “Bambae i no longtaem, yufala i gokros long Jodan Reva blong holem kantri ya narasaed. Ol man blong hem oli plante moa winim yufala, mo oli strong moa winim yufala. Ol taon blong olgeta oli bigbigwan, mo ol stonwol we oli goraon long olgeta oli hae we i hae, mo ol man blong ol taon ya oli longlongfala, mo oli strong tumas. Olgeta oli dabolbun. Yufala i . . . harem tok ya finis, se i no gat man i save winim olgeta.” (Dutronome 9:1, 2) !Tru ya, olgeta man oli save finis long ol bigbigfala dabolbun ya! Mo tu, sam laen blong Kenan, oli gat ol gudfala soldia blong olgeta, mo oli gat ol hos mo kat blong faet we ol naef blong faet oli raonem ol wil blong olgeta.—Jajes 4:13.

² Neson blong Isrel i no gat ol samting ya. Oli bin stap olsem ol slef nomo, mo oli jes pasem 40 yia long draeples. Taswe, long tingting blong ol man, oli no naf nating blong winim ol enemi blong olgeta. Be Moses i gat bilif, hem i “luk” we Jeova i stap lidim olgeta. (Hibrus 11:27) Moses i talem long ol man Isrel se: “[Jeova] i God blong yumi, mo hem bambae i go fastaem long yufala, . . . mo bambae i stap winim ol man ya, . . . mo kwiktaem nomo, bambae yufala i save spolemgud olgeta.” (Dutronome 9:3; Ol Sam 33:16, 17) Afta we Moses i ded, Jeova i talem bakegen long Josua se bambae Hem i givhan long hem, i se: “Naoia, yu wetem olgeta ya, yufala i mas mekemrere blong gokros long Jodan Reva, blong go long kantri ya we mi mi wantem givim long yufala. Mi mi talem long yu, oltaem long laef blong yu, bambae i no gat man i save winim yu. Mi bambae mi stap lukaot long yu, olsem we mi stap lukaot long Moses bifo. Mo bambae mi stap wetem yu oltaem.”—Josua 1:2, 5.

3. ?Wanem i givhan long Josua blong gat bilif mo blong no fraet?

³ Sipos Josua i wantem se Jeova i givhan long hem mo lidim hem, hem i mas ridim Loa blong God, tingting dip long Loa ya, mo folem long laef blong hem. Jeova i talem se: “Sipos yu mekem olsem, bambae ol wok blong yu i gat frut blong hem, mo bambae yu save win. Mi mi talem long yu finis. Tingting blong yu i mas strong, mo yu mas stanap strong oltaem. Yu yu no mas fraet, mo tingting blong yu i no mas foldaon, from we mi bambae mi stap wetem yu long weples bambae yu yu go long hem.” (Josua 1:8, 9) Ale Josua i lesin long God, nao hem i no fraet, hem i stanap strong, mo hem i win. Be bighaf blong ol man Isrel we oli laef long semtaem olsem Josua, oli no lesin. From samting ya, oli no win, mo oli ded long draeples.

Wan Neson We i No Gat Bilif Mo i Fraet

4, 5. (a) ?Olsem wanem ol ten spae oli defren long Josua mo Keleb? (b) ?Wanem tingting blong Jeova long ol man ya we oli no trastem hem?

⁴ Foti yia bifo long taem ya, Isrel i kam klosap long Kenan finis. Nao Moses i sanem 12 spae i go blong lukluk kantri ya. Ten long olgeta oli fraet. Taem oli kambak oli talem se: “Ol man ya we mifala i luk olgeta longwe, olgeta evriwan oli longlongfala [“ol Nefilim,” NW ], mo mifala i luk ol lariken man ya tu longwe, we oli laen blong Anak [“mo we oli kamaot long ol Nefilim,” NW ]. Taem we mifala i luk olgeta, mifala ya i smol tumas, mifala i olsem anis nomo.” ?Olsem wanem? ?I tru se ‘ol man we oli luk,’ olgeta evriwan oli bigbigfala man? Nogat, laen blong Anak nomo i olsem. ?I tru se laen blong Anak i kamaot long ol Nefilim we oli laef bifo we bigfala wota i draonem wol ya? !Nogat! Ol giaman tok ya i mekem ol man Isrel oli fraet. !Oli wantem gobak long Ijip, nating se oli bin stap olsem ol slef nomo long kantri ya!—Namba 13:31-14:4.

⁵ Tu long ol spae ya, Josua mo Keleb, tufala i gat  defren tingting. Tufala i wantem tumas blong go long Promes Lan. Tufala i talem se: “![Ol man Kenan] oli no naf long yumi ya! !Bambae yumi flatem olgeta ya! Hae God i stap wetem yumi, mo hem i winim finis ol god ya blong olgeta . . . !From samting ya, yumi no mas fraet!” (Namba 14:9) ?Olsem wanem? ?Josua mo Keleb tufala i stap toktok olbaot nomo olsem we tufala i no tingting gud? !Nogat! Tufala i bin stap wetem ol man Isrel taem Jeova i mekem Ten Panis i kam long ol man Ijip, mo i daonemgud flas blong ol haeman blong kantri ya mo ol god blong olgeta. Biaen, tufala i luk we Jeova i draonem Fero mo ol soldia blong hem long Red Si. (Ol Sam 136:15) I klia se ol ten spae mo ol narafala man oli no gat risen blong fraet. Jeova i harem nogud long fasin blong olgeta, i talem se: “?Olgeta ya bambae oli stap tanem baksaed long mi gogo kasem wetaem? !Yu luk! Mi mi mekem plante merikel finis long fes blong olgeta, be no yet. ?Wetaem bambae oli tanem tingting blong olgeta blong trastem mi?”—Namba 14:11.

6. ?Olsem wanem bilif i joen wetem fasin blong no fraet? ?Olsem wanem yumi luk samting ya long taem blong yumi?

⁶ Jeova i go stret long stamba blong problem ya. Ol man Isrel oli no gat bilif. From samting ya nao oli fraet. Yes, blong no fraet, man i mas gat bilif. Taswe, long leta blong aposol Jon, hem i tokbaot Kristin kongregesen mo faet we ol memba blong hem oli stap mekem blong stap strong, i se: “Yumi save winim . . . wol ya. . . . Yumi stap win from we yumi bilif.” (1 Jon 5:4) Tede, bilif we i sem mak long hemia blong Josua mo Keleb i pulum moa long sikis milian Witnes blong Jeova, blong oli talemaot gud nius blong Kingdom long olgeta ples blong wol. Sam long olgeta oli yangfala, sam oli olfala, samfala, bodi blong olgeta i strong, mo sam narawan oli no strong. I no gat wan enemi we i save satem maot blong bigfala grup ya blong ol soldia blong God, we oli no save fraet.—Rom 8:31.

Yumi No Mas “Tanemraon Blong Gobak”

7. ?Wanem mining blong tok ya “tanemraon blong gobak”?

⁷ Ol man blong Jeova tede oli no fraet blong talemaot gud nius. Oli gat sem tingting olsem aposol Pol, we i talem se: “Yumi no save tanemraon blong gobak, nao yumi lus, nogat. Yumi man blong bilif long God, mo hem bambae i sevem yumi.” (Hibrus 10:39) Taem Pol i yusum tok ya “tanemraon blong gobak,” hem i no stap tokbaot wanwan taem we yumi fraet smol, nogat. Plante gudfala man blong God, oli bin fraet samtaem. (1 Samuel 21:12; 1 King 19:1-4) Wan diksonari we i eksplenem ol wod long Baebol, i talem se tok ya blong Pol i minim “fraet blong gohed strong long wan rod, tanem i go long saed,” mo “no moa holemstrong long trutok.” Buk ya i talem tu se long olfala lanwis, oli yusum tok ya “tanemraon blong gobak” long saed blong ol man blong solwota we oli “slakem sel blong sip blong mekem se sip i no moa ron strong.” Ating Pol i yusum tok ya olsem wan pijatok long saed blong ol man we oli kam slak long wok blong God. I tru, taem ol man blong God we oli gat strong bilif oli fesem trabol, oli no save tingbaot blong “no moa ron strong,” nating  se trabol ya i kamaot from we ol man oli mekem i nogud long olgeta, from we oli sik, no from wan narafala traem bakegen. Olgeta ya oli gohed nomo long wok blong Jeova, oli save se hem i tingbaot olgeta oltaem mo hem i save ol samting we oli no naf blong winim. (Ol Sam 55:22; 103:14) ?Olsem wanem? ?Yu tu yu gat bilif olsem?

8, 9. (a) ?Olsem wanem Jeova i mekem bilif blong ol faswan Kristin i kam strong moa? (b) ?Yumi save mekem wanem blong kam strong moa long bilif?

⁸ I gat wan taem we ol aposol oli bin harem se bilif blong olgeta i slak, ale oli askem long Jisas se: “Plis yu mekem bilif blong mifala i kam strong moa.” (Luk 17:5) Oli kasem samting ya we oli askem wetem fulhat blong olgeta, speseli long 33 K.T. * long Pentekos, taem tabu spirit i kamdaon long ol disaepol mo i givim moa save long olgeta long saed blong Tok blong God mo plan blong hem. (Jon 14:26; Ol Wok 2:1-4) Ale, bilif blong ol disaepol ya i kam strong moa. Nating se plante man oli agensem olgeta, oli statem wan wok blong prij we i karem gud nius i go long “olgeta man long wol.”—Kolosi 1:23; Ol Wok 1:8; 28:22.

⁹ Sipos yumi wantem kam strong moa long bilif mo gohed strong long wok blong prij, yumi tu yumi mas stadi long Baebol, tingting dip long hem, mo prea blong kasem tabu spirit. Yumi mas makemgud trutok blong God long tingting mo hat blong yumi, olsem Josua, Keleb, mo ol faswan Kristin oli bin mekem. Long rod ya nomo, bambae yumi save kasem bilif we i mekem se yumi no fraet. Nao bambae yumi naf blong gohed blong faet long saed blong spirit mo winim faet ya.—Rom 10:17.

I No Naf Blong Bilif Nomo Se God i Stap

10. ?Wanem i joen wetem trufala bilif?

¹⁰ Taem yumi tingting gud long laef blong olgeta we oli holemstrong long God long taem bifo, yumi luksave se bilif nao i mekem se oli stanap strong longtaem mo oli no fraet. Be i no naf we yumi bilif nomo se God i stap. (Jemes 2:19) Blong gat trufala bilif, yumi mas savegud Jeova olsem we hem i wan trufala man, mo yumi mas trastem hem fulwan. (Ol Sam 78:5-8; Ol Proveb 3:5, 6) Yumi mas bilif wetem fulhat blong yumi se sipos yumi obei long ol loa mo rul blong God, bambae oli givhan gud long laef blong yumi. (Aesea 48:17, 18) Mo tu, man we i gat trufala bilif i trastem Jeova fulwan se bambae hem i mekem ol promes blong hem oli kamtru, mo bambae hem i “mekem i gud long olgeta we oli stap traem faenem hem.”—Hibrus 11:1, 6; Aesea 55:11.

11. ?Wanem ol blesing we Josua mo Keleb i kasem from we tufala i gat bilif mo tufala i no fraet?

¹¹ Trufala bilif ya i no stap sem mak nomo, be hem i stap gru. Taem yumi folem trutok long laef blong yumi, mo yumi kasem blesing from we yumi “trastem” Jeova, mo yumi “faenemaot” ansa blong ol prea blong yumi, mo yumi haremsave se Jeova i stap lidim laef blong yumi long sam narafala rod, ale bilif blong yumi i kam strong moa. (Ol Sam 34:8; 1 Jon 5:14, 15) Yumi save se bilif blong Josua mo Keleb i mas kam strong moa taem tufala i luk olsem wanem God i mekem i gud long tufala. (Josua 23:14) Tingbaot: Jeova i promes se bambae tufala i laef tru long  40 yia ya we ol man Isrel oli wokbaot long draeples, mo promes ya i kamtru. (Namba 14:27-30; 32:11, 12) Blong sikis yia, tufala i joen long wok ya blong winim ol taon long Kenan. Biaen, tufala i laef longtaem, bodi blong tufala i stap strong, mo tufala i kasem prapa graon blong tufala. !Tru ya, Jeova i stap blesem olgeta we oli gat bilif mo oli no fraet blong mekem wok blong hem!—Josua 14:6, 9-14; 19:49, 50; 24:29.

12. ?Olsem wanem Jeova i ‘soemaot we tok blong hem i hae we i hae’?

¹² Lav mo kaen fasin we God i soem long Josua mo Keleb, i mekem yumi tingbaot tok blong man we i raetem Sam ya, se: “Yu yu bin soemaot we nem blong yu mo ol tok we yu yu putum, tufala i hae we i hae, i winim ol narafala samting.” (Ol Sam 138:2) Taem Jeova i yusum nem blong hem blong mekem promes blong hem i strong, promes ya “i hae we i hae,” i min se, taem promes ya i kamtru bambae i bitim olgeta samting we yumi stap tingbaot. (Efesas 3:20) Yes, man we i ‘luk long Jeova blong mekem hem i glad,’ Jeova i no save mekem hem i harem nogud.—Ol Sam 37:3, 4.

Wan Man We ‘God i Glad Tumas Long Hem’

13, 14. ?From wanem Inok i nidim bilif mo fasin blong no fraet?

¹³ Wan narafala witnes we i laef bifo long taem blong Kraes, nem blong hem Inok. Stori blong Inok i tijim yumi long plante samting long saed blong bilif mo fasin blong no fraet. Bifo we Inok i statem wok blong profet, ating hem i save finis se bambae hem i fesem trabol we i save mekem hem i fraet mo i traem bilif blong hem. ?Hem i save olsem wanem? Long Iden, Jeova i talem finis se ol man blong Setan bambae oli no laekem nating ol man we oli mekem wok blong God. (Jenesis 3:15) Inok i save se fasin agens ya i kamaot finis taem Ken i kilim i ded brata blong hem Ebel. Yes, Adam we i papa blong tufala, i laef yet taem Inok i bon, mo hem i stap laef go kasem we Inok i gat klosap 310 yia blong hem.—Jenesis 5:3-18.

¹⁴ Nating se ol man oli agensem Inok, Inok i no fraet blong gohed blong “fren gud wetem God.” Hem i talemaot ol tok panis long ol man we oli sakem ‘ol rabis tok’ agens long Jeova. (Jenesis 5:22; Jud 14, 15) From we Inok i no fraet blong mekem wosip long trufala God, hem i gat plante enemi we oli wantem kilim hem i ded. Be Jeova i mekem se profet ya i no ded long fasin we i harem nogud. Fastaem Jeova i soemaot long Inok se “hem i glad tumas” long hem, nao biaen, Jeova i “tekemaot” laef blong hem. Maet Jeova i mekem samting ya taem Inok i stap luk wan drim blong wan profet tok.—Hibrus 11:5, 13; Jenesis 5:24.

15. ?Wanem gudfala eksampol we Inok i soemaot long ol man blong Jeova tede?

¹⁵ Jes afta we Pol i talem se God i tekemaot laef blong Inok, hem i makem bakegen se bilif i impoten. Hem i se: “Sipos man i no bilif strong long God, hem i no save mekem God i glad long hem.” (Hibrus 11:6) Yes, bilif i mekem se Inok i no fraet blong wokbaot wetem Jeova mo talemaot jajmen long ol man we oli no wantem obei long God. Long rod ya, Inok i soemaot wan gudfala eksampol long yumi. Tede, wol ya i fulap bakegen long rabis fasin mo ol man oli agensem tru wosip. Mo tu, yumi gat wan wok blong mekem we i klosap sem mak long wok we Inok i bin mekem.—Ol Sam 92:8; Matiu 24:14; Revelesen 12:17.

Man We i Onagud Long God i No Save Fraet

16, 17. ?Hu ya Obadaea, mo hem i stap wea?

¹⁶ Antap long bilif, i gat wan narafala fasin we yumi nidim blong yumi no fraet. Yumi mas onagud long God. Bambae yumi tokbaot wan man we i givim nambawan eksampol long fasin ya blong onagud long God. Man ya i laef long taem ya we King Ehab i stap rul long ol laen blong Isrel long not mo Elaeja i stap talemaot ol profet tok blong God. Taem Ehab i stap rul long ol laen ya, wosip blong Bal i kam  antap bitim olgeta taem bifo. Mo tu, “Kwin Jesebel i stap lukaot long” 450 profet blong Bal mo 400 profet blong woman god ya Asera.—1 King 16:30-33; 18:19.

¹⁷ Jesebel i wan strong enemi blong Jeova. From samting ya, hem i traehad blong spolem tru wosip. Hem i kilim i ded sam profet blong Jeova mo i traem blong kilim Elaeja i ded tu. Be God i talem long Elaeja blong i ronwe i go long narasaed blong Jodan Reva. (1 King 17:1-3; 18:13) Traem tingbaot: !I had we i had blong mekem wosip long trufala God long not blong Isrel long taem ya! !Mowas sipos yu wok long haos blong king, olsem Obadaea! * Yes, Obadaea, we i stap lukaot long haos blong Ehab, hem i wan man we i onagud long God.—1 King 18:3.

18. ?Wanem i mekem se Obadaea i givim wan nambawan eksampol long saed blong wosip blong Jeova?

¹⁸ Yumi save se Obadaea i mas waes mo i mas lukaotgud taem i stap mekem wosip long Jeova. Nating se i had, hem i neva lego Jeova blong agri wetem ol man we oli mekem giaman wosip. Fas King 18:3 i talem se: “Man ya [Obadaea] i wan man blong prea we oltaem i stap mekem wosip long Hae God.” !Yes, Obadaea i nambawan long fasin ya blong onagud long God! Mo gudfala fasin ya i mekem se hem i no fraet long ol man, olsem hem i soemaot jes afta we Jesebel i kilim sam profet blong Jeova i ded.

19. ?Obadaea i mekem wanem we i soemaot se hem i no fraet?

¹⁹ Baebol i talem se: “Long taem ya we Kwin Jesebel i stap kilim ol profet blong Hae God, [Obadaea] i tekem wan handred long olgeta, i go haedem olgeta long tu hol blong ston. Hem i putum fifti long wan, fifti long wan, mo i stap givim kakae mo wota long olgeta.” (1 King 18:4) Traem tingbaot. Obadaea i stap karem kakae i go long wan handred man long fasin haed. Hemia wan wok we i denja tumas. ?Olsem wanem sipos Ehab mo Jesebel tufala i faenemaot hem? Mo i gat ol 850 giaman profet we oli stap kam oltaem long haos blong king. Hem i mas haed long olgeta tu. Mo i gat plante narafala man bakegen we oli stap mekem wosip long ol giaman god long kantri ya, samfala oli haeman mo samfala oli man nating nomo. Olgeta ya oli stap lukaot janis oltaem blong faenem poen long Obadaea. Sipos oli ripotem hem long king mo kwin, bambae tufala i glad tumas long olgeta. Be Obadaea i no fraet. Hem i gohed blong lukaot long ol profet blong Jeova, stret long fored blong ol man ya blong mekem wosip long ol giaman god. !Tru ya, man we i onagud long God i kasem bigfala paoa!

20. ?Olsem wanem fasin blong onagud long God i givhan long Obadaea? ?Olsem wanem eksampol blong hem i givhan long yu?

²⁰ From we Obadaea i onagud long God, hem i no fraet. Samting ya i mekem se Jeova i blokem hem long ol enemi blong hem. Ol Proveb 29:25 i talem se: “Fasin ya we man i fraet tumas long ol narafala man, hem i olsem trap nomo, mo i nogud yu yu foldaon long hem. Sipos yu stap trastem Hae God, bambae yu save stap gud oltaem.” Obadaea i wan man olsem yumi nomo, hem i mas fraet se bambae oli holem hem mo kilim hem i ded. (1 King 18:7-9, 12) Be from we hem i onagud long God, hem i winim fraet ya we hem i gat long ol man. Obadaea i soemaot wan gudfala eksampol long yumi evriwan, antap moa, long olgeta we oli stap mekem wok blong Jeova long ples we i gat fasin agens, mo maet oli mas rere blong go long kalabus no lusum laef blong olgeta from. (Matiu 24:9) Yes, yumi evriwan i mas traehad blong mekem wok blong Jeova ‘we yumi ona long hem mo fraet long hem.’—Hibrus 12:28.

21. ?Bambae yumi tokbaot wanem long nekis stadi?

²¹ Blong no fraet, yumi nidim bilif mo fasin blong onagud long God. Be i no hemia nomo. Lav i save givim paoa we i bigwan moa, blong mekem se yumi no fraet. Pol i raetem se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo blong mekem yumi naf blong [“holem stret tingting long evri samting,” NW ].” (2 Timoti 1:7) Long nekis stadi, bambae yumi luk olsem wanem lav i save givhan long yumi blong no fraet blong mekem wok blong Jeova, long ol las dei ya we laef i strong.—2 Timoti 3:1.

[Ol Futnot]

?Yu Yu Save Ansa?

• ?Wanem i givhan long Josua mo Keleb blong tufala i no fraet?

• ?Trufala bilif i olsem wanem?

• ?From wanem Inok i no fraet blong talemaot jajmen blong God long ol man?

• ?Olsem wanem fasin blong onagud long God i save mekem se yumi no fraet?

[Kwestin]

[Tok blong pija long pej 17]

Jeova i talem long Josua se: “Tingting blong yu i mas strong . . . yu yu no mas fraet”

[Tok blong pija long pej 18]

Obadaea i lukaotgud long ol profet blong God mo i protektem olgeta

[Tok blong pija long pej 19]

Inok i no fraet blong talemaot tok blong God