1, 2. Cinshi calenga mutemwe Yehova Lesa?

BUSHE mwalimutemwa Lesa? Nalimo mwalimutemwa sana ica kuti mwaliipeela kuli ena. Nalimo mumfwa ukuti ni Cibusa wenu sana. Lelo Yehova amutemenwe ninshi tamulamutemwa no kumutemwa. Baibolo itila: “Ifwe, tulatemwa, pantu Lesa e wabalilepo ukututemwa.”—1 Yohane 4:19.

² Tontonkanyeni pa fyo Yehova acita ifilanga ukuti alitutemwa. Alitupeela isonde ilisuma umo twikala kabili alitupeela na fyonse ifyo tukabila pa kuti tuleba ne nsansa. (Mateo 5:43-48; Ukusokolola 4:11) Yehova afwaya ukuti tube ifibusa fyakwe, kabili alitupeela ifingatwafwa ukusambilila pali ena. Nga tulebelenga Baibolo ninshi tulekutika kuli Yehova. Kabili nga twapepa kuli ena ninshi alekutika kuli ifwe. (Amalumbo 65:2) Yehova abomfya umupashi wa mushilo pa kututungulula no kutukosha. (Luka 11:13) Alitumine no Mwana wakwe uo atemwa sana ukwisa pano isonde ku kutulubula ku lubembu ne mfwa.—Belengeni Yohane 3:16; Abena Roma 5:8.

3. Finshi tufwile ukucita pa kuti tutwalilile ukuba ifibusa fya kwa Yehova?

 ³ Baleni tontonkanyeni pali cibusa wenu uo mwatemwana nankwe sana uumwafwa ilyo ifintu fili bwino na lintu fishili bwino. Mufwile ukucitapo fimo pa kuti mutwalilile ukuba ifibusa na uyo muntu. Ifi fine e fyo caba na kuli bucibusa bwesu na Yehova. Nga tulecita ifi Yehova kuti aba Cibusa wesu sana ukucila abantu banensu, kabili bucibusa bwesu na ena te kuti bupwe. E mulandu wine Baibolo itwebela aiti: “Ikalilileni mu kutemwa kwa kwa Lesa.” (Yuda 21) Finshi twingacita pa kuti twikalilile mu kutemwa kwa kwa Lesa? Baibolo itila: “Uku e kutemwa Lesa, ukuti tulekonka amafunde yakwe; kabili amafunde yakwe taya-afya.”—1 Yohane 5:3.

4, 5. (a) Bushe amashiwi ya kuti “ukutemwa Lesa” yalola mwi? (b) Bushe mwatendeke shani ukutemwa Yehova?

⁴ Bushe amashiwi ya mu Baibolo aya kuti “ukutemwa Lesa” yalola mwi? Yalola mu kutemwa uko twatemwa Lesa, tayalola mu kutemwa uko Lesa atutemwa. Bushe muleibukisha ilyo mwatendeke fye ukutemwa Yehova?

⁵ Ibukisheni ifyo mwaumfwile ilyo mwasambilile ukuti Yehova afwaya mukekale umuyayaya mwi sonde lipya. Mwalisambilile fyonse ifyo acita pa kuti mukekale umuyayaya, kabili mwalishibe ubupe ubwacindama ubo Yehova atupeele ilyo atumine Umwana wakwe pano isonde. (Mateo 20:28; Yohane 8:29; Abena Roma 5:12, 18) Ilyo mwalesambilila ifyo Yehova amutemwa, mwalyumfwile bwino, kabili  na imwe mwalitendeke ukumutemwa.—Belengeni 1 Yohane 4:9, 10.

6. Bushe calola mwi ukutemwa umuntu? Bushe ukutemwa mwatemwa Lesa kwalengele mwacita finshi?

⁶ Lelo ukutemwa mwamutemenwe kwali fye ni ntendekelo. Ku ca kumwenako, nga mwalitemwa umuntu tamupelela fye pa kumweba ukuti mwalimutemwa. Ukutemwa kulenga twalafwaya ukucitila umuntu twatemwa ifingalenga aba ne nsansa. E fyo caba na kuli Yehova, ukutemwa mwamutemwa kwalengele mwalafwaya ukulacita ifingalenga alasekelela. Ilyo mwamutemenwe sana, mufwile mwaliipeele kuli ena kabili mwalibatishiwe. Ilyo mwaipeele kuli Yehova, mwamulaile ukuti mwakulamubombela inshiku shonse. (Belengeni Abena Roma 14:7, 8.) Kuti mwacita shani pa kuti mufikilishe ifyo mwalaya Yehova?

7. Finshi tulingile ukucita nga twalitemwa Yehova? Mafunde nshi yamo ayo Lesa atupeela?

⁷ Apo twalitemwa Yehova, ‘tulakonka amafunde yakwe.’ Bushe tukonka shani amafunde yakwe? Tulamumfwila. Tulasambilila mu Baibolo ifyo Yehova afwaya tuleikala. Ku ca kumwenako, Yehova atweba ukuti tatulingile ukukolwa, ukwiba nelyo ukubepa, ukusendama no ushili mwina mwesu, nelyo ukucindikisha umuntu nelyo ukupepa icintu kano fye ena.—1 Abena Korinti 5:11; 6:18; 10:14; Abena Efese 4:28; Abena Kolose 3:9.

8, 9. Kuti twaishiba shani ifyo Yehova alefwaya tucite nga ca kuti mu Baibolo tamwaba ifunde ililanda pali ifyo fintu? Langilileni.

⁸ Lelo pa kuti tulecita ifingalenga Yehova alesekelela, tatufwile ukupelela fye pa kulakonka amafunde yakwe.  Yehova tatupeela amafunde ayo tulingile ukulakonka muli fyonse fye. Kanshi kulaba ifintu fimo ifyo Baibolo ishatweba mu kulungatika ifyo tufwile ukucita. Kuti twacita shani pa kuti tulesala bwino ifya kucita? (Abena Efese 5:17) Mu Baibolo mwaliba amashinte ya mafunde, ayalenga twaishiba ifyo Yehova amona ifintu. Ilyo tulebelenga Baibolo, tuleshiba ifyo Yehova aba. Tuleshiba ifyo atontonkanya, ifyo atemwa ne fyo apata.—Belengeni Amalumbo 97:10; Amapinda 6:16-19; moneni Ifyebo na Fimbi pa 1.

⁹ Ku ca kumwenako, bushe tucita shani pa kusala ifya kutamba pa TV nelyo ifyo tulefwaya ukumona pa intaneti? Yehova tatweba mu kulungatika ifyo tulingile ukucita. Lelo amashinte ya mafunde ayo atupeela kuti yatwafwa ukulasala bwino. Mu fya kuleseshamo icitendwe ifingi mulaba ubunkalwe no bulalelale. Yehova alitweba muli Baibolo ati “onse uwatemwa ubunkalwe alimupata,” no kuti “aba bulalelale na bacende Lesa akabakanda.” (Amalumbo 11:5; AbaHebere 13:4) Bushe aya amashinte ya mafunde kuti yatwafwa shani ukusala bwino ifya kucita? Nga twaishiba ukuti Yehova alipata fimo, nelyo afimona ukuti fyalibipa, tatulingile ukulaficita.

10, 11. Cinshi cilenga tuleumfwila Yehova?

¹⁰ Cinshi cilenga tuleumfwila Yehova? Tatumfwila Yehova pa kuti fye e latukanda nelyo pa kuti twilacita ifingatuletelela. (Abena Galatia 6:7) Lelo icilenga tulemumfwila ni co twalimutemwa. Nga filya fine abana bafwaya ukucita ifingalenga bashibo baba ne nsansa, na ifwe bene tufwaya ukulenga Shifwe wa ku muulu aba ne nsansa. Takuli icingalenga twaba ne nsansa  ukucila pa kwishiba ukuti ifyo tulecita filelenga Yehova atutemwa!—Amalumbo 5:12; Amapinda 12:2; moneni Ifyebo na Fimbi pa 2.

¹¹ Tatumfwila fye Yehova ilyo ifintu fili bwino nelyo ilyo tushikwete mwakulosha. Kabili tatusala amafunde ya kwa Lesa ayo tulingile ukukonka na yo tushilingile ukukonka. (Amalango 12:32) Lelo tulamumfwila muli fyonse nga filya fine uwaimbile amalumbo alecita, uwatile: “Amafunde yenu naliyatemwa icine cine!” (Amalumbo 119:97; Abena Roma 6:17) Tufwaya ukuba nga Noa uwalangile ukuti alitemenwe Yehova ilyo acitile fyonse ifyo amwebele ukucita. Baibolo ilanda ukuti Noa acitile “filya fine fye.” (Ukutendeka 6:22) Bushe mulefwaya Yehova akalande ifi pali imwe?

12. Finshi twingacita pa kuti tulelenga Yehova alesekelela?

¹² Bushe Yehova omfwa shani nga tulemumfwila? ‘Tulalenga umutima wakwe ukusekelela.’ (Amapinda 11:20; 27:11) Taleni tontonkanyeni pali ici! Nga twaumfwila Kabumba wa muulu ne sonde, alasekelela. Na lyo line, tatupatikisha ukumumfwila. Alitupeela amaka ya kuisalila. Ici cilolele mu kuti twalikwata ubuntungwa bwa kusalapo ukucita ifisuma nelyo ifyabipa. Yehova afwaya ukuti ukutemwa twamutemwa kulelenga tulesala bwino ifya kucita pa kuti tuleba ne nsansa.—Amalango 30:15, 16, 19, 20; moneni Ifyebo na Fimbi pa 3.

13, 14. Twaishiba shani ukuti amafunde ya kwa Yehova tayayafya ukukonka? Langilileni.

¹³ Inga nga ca kutila tumona ukuti amafunde ya kwa Yehova yalikosesha ica kuti te kuti tukumemo ukuyakonka  nelyo nga tumona ukuti yalalenga twafilwa ukuba no buntungwa? Baibolo tayapita na mumbali, yatila: “Amafunde yakwe taya-afya.” (1 Yohane 5:3) Baibolo ya New English Translation, itila: “Amafunde yakwe tayatutitikisha.” Amafunde ya kwa Yehova “tayafina,” e kuti tayayafya ica kuti te kuti tukumemo ukuyakonka. Fyonse ifyo Yehova atweba kuti twaficita.

¹⁴ Natulangilile, elenganyeni ukuti muleyafwa umunenu uulekuuka. Nabika ifintu ifyo alekuusha mu fibokoshi. Ifibokoshi fimo nafyanguka kabili tafyafishe ukwimya, lelo fimbi nafifina ica kuti abantu babili e bengafimya. Bushe umunenu kuti amweba ukwimya icibokoshi icafina mweka? Awe! Mulandu nshi? Pantu te kuti afwaye muicene nelyo muifune. Ifi fine e fyo Yehova aba, te kuti atwebe ukucita ifyo tushingaba na maka ya kucita. (Amalango 30:11-14) Yehova alishiba ifyo twaba. “Alishiba bwino ifyo twapangwa, alebukisha ukuti tuli lukungu.”—Amalumbo 103:14.

15. Cinshi cingalenga twashininkisha ukuti amafunde ya kwa Yehova yabelako pa kuti ifintu filetuwamina?

¹⁵ Mose aebele uluko lwa bena Israele ukuti amafunde ya kwa Yehova yali no kulenga ‘balemwenamo lyonse,’ kabili nga baleyakonka yali no kulenga ‘baba no mweo.’ (Amalango 5:28-33; 6:24) Ifi fine e fyo caba na muno nshiku. Fyonse ifyo Yehova atweba ukucita filalenga tuleba ne nsansa. (Belengeni Esaya 48:17.) Shifwe Yehova alishiba ifingatuwamina. (Abena Roma 11:33) Baibolo itweba ati: “Lesa kutemwa.” (1 Yohane 4:8) Ici cilolele mu kuti ukutemwa e kulenga Yehova alelanda fyonse ifyo alanda kabili alecita fyonse ifyo acita.

16. Twaishiba shani ukutila kuti twaumfwila Lesa nangu ca kuti tatwapwililika kabili twikala mu calo cabipa?

 ¹⁶ Kwena te lyonse citwangukila ukumfwila Lesa. Twikala mu calo icabipa icitekwa na Satana Kaseebanya. Satana alatunka abantu ukucita ifyabipa. (1 Yohane 5:19) Na kabili apo tatwapwililika tulalwishanya na matontonkanyo yabipa ne fyo tumfwa, na kuba ifi kuti fyalenga twafilwa ukumfwila Lesa. (Abena Roma 7:21-25) Lelo ukutemwa twatemwa Yehova kulalenga twalafwaisha ukucita ifisuma. Alamona ifyo tubombesha pa kuti tulemumfwila, kabili alatupeela umupashi wa mushilo pa kutwafwa. (1 Samwele 15:22, 23; Imilimo 5:32) Umupashi wa mushilo ulatwafwa ukuba ne mibele iingalenga calatwangukila ukumumfwila.—Abena Galatia 5:22, 23.

17, 18. (a) Finshi tukasambilila muli cino citabo? (b) Finshi tukasambilila mu cipandwa cikonkelepo?

¹⁷ Muli cino citabo, tukasambilila ifyo twingalaikala ukulingana ne fyo Yehova afwaya. Tukasambilila ne fyo twingalakonka amashinte ya mafunde aya mu Baibolo na mafunde yakwe. Muleibukisha ukuti Yehova tatupatikisha ukumumfwila. Nga twasalapo ukumumfwila, tukaba ne nsansa kabili ku ntanshi tukapaalwa. Ne cacilapo ukucindama ca kuti, nga tuleumfwila Lesa ninshi tulelanga ukuti twalimutemwa.—Moneni Ifyebo na Fimbi pa 4.

¹⁸ Yehova alitupeela kampingu pa kuti tulelekanya icalungama ne calubana. Nga twasambilisha kampingu, kuti yatwafwa ‘ukulakonka amafunde yakwe.’ Nomba bushe kampingu yesu e cinshi, kabili kuti twaisambilisha shani? Natumone.