Pagliaw Para han Masurub-on
“An bug-os nga binuhat naghaharoy ngan nasasakit tubtob yana.” (Roma 8:22) Daku an pag-antos han tawo han iginsurat ito sobra 1,900 ka tuig na an naglabay. Damu an masurub-on. Salit, an mga Kristiano ginsagda: “Rig-unon niyo an masurub-on nga mga kalag.”—1 Tesalonika 5:14.
Yana nga adlaw, darodaku pa gud an kasakit han tawo, ngan labaw kadamu nga mga tawo an masurub-on. Kondi sadang magpatingala ba ito ha aton? Diri gud, kay an Biblia nagpapakilala hini sugad nga “an kataposan nga mga adlaw” ngan tinatawag hira nga “magpakalilisang nga mga panahon nga makuri pakibagayan.” (2 Timoteo 3:1-5) Hi Jesu-Kristo nagtagna nga durante han kataposan nga mga adlaw, magkakaada ‘makaharadlok nga mga kiritaon.’—Lukas 21:7-11; Mateo 24:3-14.
Kon an mga tawo nakakaeksperyensya hin maiha nga pangarit, kahadlok, kasubo, o iba pa han sugad negatibo nga mga pagbati, agsob nga nagigin masurub-on hira. An hinungdan han kasubo o sobra nga kabidoan bangin an kamatayon han usa nga hinigugma, diborsiyo, kawad-i hin trabaho, o padayon nga sakit. An mga tawo nagigin masurub-on liwat kon inaabat nira an pagkawaray-kapulsanan, kon inaabat nira nga pakyas hira ngan napasubo nira an ngatanan. Bisan hin-o bangin manluya tungod han usa ka maguol nga kahimtang, kondi kon an usa ka tawo naabat hin kawaray-paglaom ngan diri nakikita an anoman nga paagi ha pakagawas ha usa ka maraot nga kahimtang, an resulta bangin daku nga kasubo.
An mga tawo ha kadaan nga mga panahon nakaeksperyensya hin pariho nga mga pagbati. Hi Job nag-antos hin sakit ngan personal nga kalamidad. Inabat hiya nga binayaan hiya han Dios, salit nagpahayag hiya hin kangalas ha kinabuhi. (Job 10:1; 29:2, 4, 5) Nasubo hi Jakob ha kamatay han iya anak nga lalaki, nagdumiri nga maliaw ngan karuyag nga mamatay. (Genesis 37:33-35) Nga inaabat an pagkasalaan tungod han seryoso nga sala, hi Hadi David nasubo: “Nagmasurub-on ako ha bug-os nga adlaw. Ako maluyahon.”—Salmo 38:6, 8; 2 Korinto 7:5, 6.
Yana nga adlaw, damu an nagin masurub-on tungod han sobra nga pagpakuri han ira kalugaringon, nangangalimbasog ha pagsunod han adlaw-adlaw nga rutina nga diri kaya han ira hunahuna, emosyon, ngan pisikal nga kusog. Matin-aw nga an kaguol, upod an negatibo nga mga hunahuna ngan mga emosyon, makakaapekto han lawas ngan makakaamot ha kemikal nga pagkadiri-timbang ha utok, salit nakakahimo hin kasubo.—Itanding an Proberbios 14:30.
Bulig nga Ira Ginkikinahanglan
Hi Epaprodito, usa ka siyahan-siglo nga Kristiano tikang ha Filipos, nagin “masurub-on tungod kay hinbatian [han iya mga sangkay] nga hiya masakit.” Hi Epaprodito nga nagmasakiton katapos nga ginsugo hiya ngadto ha Roma han iya mga sangkay dara an mga tagana para kan apostol Pablo, bangin inabat hiya nga napasubo niya an iya mga sangkay ngan nga gin-isip nira hiya nga usa nga kapakyasan. (Filipos 2:25-27; 4:18) Paonan-o binulig hi apostol Pablo?
Iya ginpauli hi Epaprodito dara an surat ngadto ha mga sangkay ha Filipos nga nagsiring: “Karawata niyo [hi Epaprodito] ha Ginoo hin bug-os nga kalipay; ngan tipigi niyo an sugad nga mga tawo nga may kadungganan.” (Filipos 2:28-30) An makaparig-on nga mga pulong ni Pablo mahitungod ha iya ngan an pagkarawat han mga taga-Filipos ha iya nga may kapaso ngan gugma, sigurado nga nakaliaw kan Epaprodito ngan nakabulig ha kawara han iya kasubo.
Sigurado, an sagdon han Biblia nga “rig-unon an masurub-on nga mga kalag” amo an gimaopayi. “Kinahanglan hibaroan mo nga an iba nagtatagad ha imo sugad nga persona,” siring han usa ka babaye nga nag-antos hin kasubo. “Kinahanglan hibatian an usa nga nasiring, ‘Hinsasabtan ko; mag-oopay ka.’ ”
An tawo nga masurub-on agsob nga kinahanglan amo an mag-una pinaagi han pamiling hin mapinairon nga tawo nga susumatan han iya mga pagbati. Ini nga usa sadang magin maopay nga mamarati ngan mapailubon hinduro. Sadang likyan niya an pagsermon ha masurub-on nga tawo o paghimo hin naghuhukom nga mga pahayag, sugad han, ‘Diri ka sadang umabat hito’ o, ‘Iton an sayop nga paggios.’ Maluya an mga emosyon han masurub-on nga tawo, ngan an sugad kritiko nga mga komento maghihimo la ha iya nga umabat hin maraot mahitungod han iya kalugaringon.
An usa nga masurub-on bangin umabat nga hiya waray pulos. (Jonas 4:3) Kondi, sadang hinumduman han usa ka tawo nga an importante gud amo an kon paonan-o pinabibilhan han Dios an usa. An mga tawo nagtan-aw kan Jesu-Kristo “sugad nga waray bali,” kondi waray ini magbag-o han iya totoo nga bili ha Dios. (Isaias 53:3) Laomi, sugad la han paghigugma han Dios ha iya minahal nga Anak, nahigugma liwat hiya ha imo.—Juan 3:16.
Hi Jesus nalooy hadton nasasakit ngan nangalimbasog ha pagbulig ha ira nga makita an ira indibiduwal nga bili. (Mateo 9:36; 11:28-30; 14:14) Iya iginsaysay nga pinabibilhan han Dios bisan an gutiay, waray bili nga mga maya. “Waray usa ha ira an hinngalimtan ha atubangan han Dios,” siring niya. Labi pa gud nga pinabibilhan niya an mga tawo nga nangangalimbasog ha pagbuhat han iya kaburut-on! Mahitungod ha ira hi Jesus nagsiring: “Bisan an mga buhok han iyo mga ulo naihap na ngatanan.”—Lukas 12:6, 7.
Totoo, bangin makuri para han usa ka tawo nga masurub-on hinduro, nga natabonan han iya mga kaluyahan ngan mga sayop, an tumoo nga pinabibilhan gud hiya han Dios. Bangin umabat hiya nga diri hiya takos han gugma ngan pagtagad han Dios. “An aton mga kasingkasing bangin maghukom ha aton,” siring han Pulong han Dios. Kondi iton ba an nagsisiguro nga butang? Diri. Maaram an Dios nga an makasasala nga mga tawo bangin maghunahuna hin negatibo ngan bangin maghukom pa ngani ha ira kalugaringon. Salit an iya Pulong nagliliaw ha ira: “An Dios darodaku pa han aton kasingkasing ngan maaram han ngatanan nga mga bagay.”—1 Juan 3:19, 20.
Oo, nakikita han aton mahigugmaon langitnon nga Amay an labaw pa kay han aton mga sala ngan mga sayop. Maaram hiya han nagpapagaan nga mga kahimtang, han bug-os nga kurso han aton kinabuhi, han aton mga motibo ngan mga tuyo. Maaram hiya nga napanunod naton an sala, sakit, ngan kamatayon ngan salit mayada daku nga mga limitasyon. An aton kasubo ngan kabido ha aton kalugaringon amo an pamatuod mismo nga diri naton karuyag nga makasala ngan waray kita magbuhat hin sobra. An Biblia nasiring nga kita “nasakop ha kawaray-kapulsanan” kontra han aton pagbuot. Salit binabati han Dios an aton masurub-on nga kahimtang, ngan mapinairon nga nagpapakita hiya hin konsiderasyon ha aton mga kaluyahan.—Roma 5:12; 8:20.
“Hi Jehova maloloy-on ngan puno hin grasya,” an pasarig ha aton. “Sugad nga hirayo an sinirangan ha katundan, sugad kahirayo an pagpahimulag niya ha aton han aton mga pagtalapas. Kay hiya nakilala han aton panlawas, nahinunumdom hiya nga mga tapotapo kita.” (Salmo 103:8, 12, 14) Tinuod, hi Jehova amo “an Dios han ngatanan nga pagliaw, nga nagliliaw ha aton ha ngatanan nga aton mga kagol-anan.”—2 Korinto 1:3, 4.
An bulig nga ginkikinahanglan gud han masurub-on amo an paghirani nga duok ha ira maloloy-on nga Dios ngan pagkarawat han iya pagdapit nga ‘ibutang an ira dinara ha bawbaw niya.’ Tinuod nga mahihimo niya an “pagpaabtik han kasingkasing han mga naipit.” (Salmo 55:22; Isaias 57:15) Salit an Pulong han Dios nagdadasig han pag-ampo, nasiring: “Ibutang niyo [kan Jehova] an ngatanan niyo nga pangarit, kay hiya nagtatagad ha iyo.” (1 Pedro 5:7) Oo, pinaagi han pag-ampo ngan pangamuyo an mga tawo makakahirani nga duok ha Dios ngan magpapahimulos han “kamurayawan han Dios nga nalabaw han ngatanan nga hibabroan.”—Filipos 4:6, 7; Salmo 16:8, 9.
An praktikal nga mga pagbag-o ha estilo-han-kinabuhi mahimo makabulig liwat ha usa basi malamposan an masurub-on nga kahimtang. Importante an pisikal nga ehersisyo, pagkaon hin maopay nga pagkaon, pagkaada presko nga hangin ngan igo nga pagpahuway, ngan paglikay han sobra nga pagtan-aw ha TV. An usa nga babaye nakabulig ha mga masurub-on pinaagi han pag-aghat ha ira nga magbuhat hin aktibo nga paglakat. Han an usa ka masurub-on nga daraga nagsiring: “Diri ko karuyag maglakat,” an babaye malumo kondi marig-on nga binaton: “Oo, maglalakat ka.” An babaye nagsumat: ‘Naglakat kami hin unom ka kilometro. Han pagbalik namon, nakapoy hiya, kondi maoroopay an inabat niya. Diri ka matoo nga makakabulig an aktibo nga ehersisyo tubtob nga sarihan mo ito.’
Kondi, usahay imposible nga madaog hin bug-os an kasubo, bisan kon ginsarihan na an ngatanan, upod na an medikal nga mga tambal. “Ginsarihan ko an ngatanan,” siring han usa ka babaye nga mga kuwarenta anyos na an edad, “kondi nagpapabilin an kasubo.” Sugad man, agsob nga imposible yana an pagtambal han buta, han bungol, o han piang. Kondi, an mga masurub-on makakaagi hin pagliaw ngan paglaom pinaagi han regular nga pagbasa han Pulong han Dios, nga naghahatag hin usa ka paglaom han permanente nga katalwasan tikang ha ngatanan nga mga sakit han tawo.—Roma 12:12; 15:4.
Kon Waray Na Usa nga Masurub-on
Han iginsaysay ni Jesus an makaharadlok nga mga butang nga maabot ha bawbaw han tuna ha kataposan nga mga adlaw, hiya nagdugang: “Kon ini nga mga bagay magtikang paghinabo, kulaw ha igbaw ngan ihangad niyo an iyo mga ulo, kay an iyo katalwasan nagtitikahirani na.” (Lukas 21:28) Ginyayakan ni Jesus an mahitungod han katalwasan ngadto ha matadong bag-o nga kalibotan han Dios, diin “an mga binuhat ngahaw magkakaluwas tikang ha pagkauripon ha pagkamadinunuton ngan magkaada han mahimayaon nga kaluwasan han mga anak han Dios.”—Roma 8:21.
Daw ano nga katalwasan ito para han katawohan an maluwas ha mga pinas-an han naglabay ngan magmata ha tagsa nga adlaw nga mayada sugad-kristal an katin-aw nga mga hunahuna, nga disidido ha pagbuhat han buruhaton han adlaw! An bisan hin-o diri na madadaot han dampog han kasubo. An sigurado nga saad ha katawohan amo nga an Dios “magpapahid han ngatanan nga luha tikang ha ira mga mata, ngan mawawaray na an kamatayon ngan mawawaray na an kabidoan, bisan pagtangis bisan kasakit pa gud. An siyahan nga mga bagay nag-agi na.”—Pahayag 21:3, 4.
Kon waray iba nga ipinakita, an ngatanan nga mga kotasyon han Biblia tikang ha New World Translation of the Holy Scriptures.
