Mahingpit Kamo nga Bug-os an Pagsarig
“[Hiya] ha gihapon naniguro gud tungod ha iyo ha iya mga pag-ampo,basi nga mahingpit kamo ngan mabug-os an iyo pagsarig ha ngatanan nga kaburut-on han Dios.”—KOLOSAS 4:12.
1, 2. (a) Ano an naobserbahan han mga tagagawas mahitungod han siyahan nga mga Kristiano? (b) Paonan-o an libro han Mga Taga-Kolosas nagpapakita hin mahigugmaon nga interes?
AN MGA sumurunod ni Jesus interesado gud ha mga igkasi-magsiringba. Hi Tertullian (parasurat han ikaduha ngan ikatulo ka siglo K.P.) nag-unabi mahitungod han kalooy nga iginpakita nira ha mga ilo, ha mga kablas, ngan ha mga lagas. Iton nga mga ebidensya han gugma nga nagios nakapadasig gud ha mga diri-tumuroo nga an iba nagsiring mahitungod ha mga Kristiano, ‘Kitaa kon mationan-o hira nahigugma ha usa kag usa.’
2 An libro han Mga Taga-Kolosas nagsasaysay han sugad mahigugmaon nga interes ni apostol Pablo ngan han iya kaupod nga hi Epapras para ha kabugtoan ha Kolosas. Hi Pablo nagsurat ha ira: Hi Epapras “ha gihapon naniguro gud tungod ha iyo ha iya mga pag-ampo, basi nga mahingpit kamo ngan mabug-os an iyo pagsarig ha ngatanan nga kaburut-on han Dios.” Durante han 2001, an mga Saksi ni Jehova magkakaada ha ira tinuig nga teksto hini nga mga pulong han Kolosas 4:12: “Mahingpit kamo ngan mabug-os an iyo pagsarig ha ngatanan nga kaburut-on han Dios.”
3. Ano an duha nga butang nga igin-ampo ni Epapras?
3 Nakita mo nga an mga pag-ampo ni Epapras para ha iya mga hinigugma mayada duha nga bahin: (1) nga hira ha kataposan “mahingpit” ngan (2) “mabug-os an [ira] pagsarig ha ngatanan nga kaburut-on han Dios.” Ini nga impormasyon igin-upod ha Kasuratan para han aton kapulsanan. Salit pakianhi an imo kalugaringon, ‘Ano an kinahanglan buhaton ko basi ha kataposan mahingpit ngan mabug-os an pagsarig ha ngatanan nga kaburut-on han Dios? Ngan samtang ginbubuhat ko ito, ano an magigin resulta?’ Kitaon naton.
Pangalimbasog nga “Mahingpit”
4. An mga taga-Kolosas kinahanglan “mahingpit” ha ano nga paagi?
4 Naghingyap gud hi Epapras nga an iya espirituwal nga kabugtoan ha Kolosas ha kataposan “mahingpit.” An termino nga ginamit ni Pablo, nga iginhubad dinhi nga “mahingpit,” mahimo mangahulogan hin hingpit, husto ha edad, o hamtong. (Mateo 19:21; Hebreo 5:14; Jakobo 1:4, 25) Bangin maaram ka nga an pagin bawtismado han usa sugad nga Saksi ni Jehova diri nangangahulogan nga awtomatiko nga hamtong na hiya nga Kristiano. Hi Pablo nagsurat ha mga taga-Efeso, nga nag-uukoy ha weste han Kolosas, nga an mga magbarantay ngan mga magturutdo nangangalimbasog ha pagbulig ha ‘ngatanan nga makadangat ha pagkaurosa ha pagtoo ngan ha husto nga kahibaro han Anak han Dios, ha hamtong nga pagkalalaki, ha suruklan han pagkahitaas han kabug-osan ni Kristo.’ Ha bisan diin ginsagda ni Pablo an mga Kristiano nga ‘magpakatigurang ha pagsabot.’—Efeso 4:8-13; 1 Korinto 14:20.
5. Paonan-o naton mahihimo nga usa ka importante nga tumong an magin hingpit?
5 Kon an iba ha Kolosas diri pa hamtong ha espirituwal, ito an ira kinahanglan magin tumong. Diri ba sadang magin totoo ito yana nga panahon? Bawtismado man kita hin mga dekada na o bag-o la, matin-aw ba nga nakikita naton nga nag-uuswag kita ha aton abilidad ha pangatadongan ngan mga panhunahuna? Gintatagad ba naton an mga prinsipyo han Biblia antes maghimo kita hin mga desisyon? An mga butang nga may kalabotan ha Dios ngan ha kongregasyon mas importante ba ha aton kinabuhi, imbes nga magin diri-importante? Diri naton mahimo iilustrar dinhi an ngatanan nga paagi nga mahimo naton ipakita an sugad nga pagtubo ngadto ha pagkahingpit, kondi tagda an duha nga ehemplo.
6. Ano an bahin nga mahimo mag-uswag an usa ha pagin hingpit, sugad kan Jehova?
6 Siyahan nga ehemplo: Pananglitan nagtubo kita ha palibot nga may pagpasulabi o nakontra ha mga tawo nga iba an rasa, nasyonalidad, o rehiyon. Maaram na kita yana nga an Dios diri nagpapasulabi ngan sadang magin sugad kita hito. (Buhat 10:14, 15, 34, 35) Ha aton kongregasyon o sirkito, mayada mga tawo nga iba an gintikangan, salit kaupod naton hira. Kondi, ha ano nga sukol gintitipigan naton an negatibo nga mga pagbati o mga pagtahap ha mga tawo nga mayada hito nga gintikangan? Kita ba ‘makiaawayon,’ madagmit maghunahuna hin negatibo kon an usa nga mayada hito nga gintikangan nagsayop o nakahimo ha aton hin gutiay nga sala? Pakianhi an imo kalugaringon, ‘Kinahanglan ko ba mag-uswag pa ha pagkaada han diri-nagpapasulabi nga panhunahuna han Dios?’
7. An pagin hingpit sugad nga Kristiano mahimo mag-upod han pagkaada ano nga panhunahuna mahitungod han iba?
7 Ikaduha nga ehemplo: Sumala ha Filipos 2:3, diri kita sadang magbuhat ‘hin bisan ano tungod ha pakiglantugi o tungod ha egotismo, kondi ha pagpaubos ha hunahuna gintatagad an iba nga mas labaw.’ Mationan-o kita nag-uuswag hini nga bahin? An tagsa nga tawo mayada mga kaluyahan ngan mga kaopayan. Kon ha naglabay madagmit kita makatigaman han mga kaluyahan han iba, nag-uswag na ba kita, diri naglalaom ha ira nga magin haros “hingpit”? (Jakobo 3:2) Yana, labaw kay ha kan-o pa man, nakakakita ba kita—namimiling pa ngani—hin mga paagi nga an iba mas labaw ha aton? ‘Kinahanglan karawaton ko nga ini nga bugto mas mapailubon kay ha akon.’ ‘Iton nga tawo mas marig-on an pagtoo.’ ‘Ha pagkamatuod, maoroopay hiya nga magturutdo kay ha akon.’ ‘Mas labaw nga nakakapugong hiya han iya kasina.’ Bangin an pipira nga mga taga-Kolosas nagkinahanglan hin pag-uswag hini nga bahin. Kinahanglan ba naton?
8, 9. (a) Ha ano nga paagi nag-ampo hi Epapras para han mga taga-Kolosas nga “mahingpit”? (b) An “mahingpit” nagpapasabot hin ano mahitungod han tidaraon?
8 Hi Epapras nag-ampo nga an mga taga-Kolosas “mahingpit.” Matin-aw, hi Epapras nag-inampo ha Dios nga ha paagi nga an mga taga-Kolosas hingpit, hamtong nga mga Kristiano, hira ‘mahihingpit,’ o magpapabilin nga hamtong.
9 Diri kita makakasiguro nga an kada usa nga nagigin Kristiano, bisan an usa nga hamtong, magpapadayon nga hamtong. Hi Jesus nagsiring nga an usa nga anghel nga anak han Dios ‘waray magpadayon ha kamatuoran.’ (Juan 8:44) Ngan ginpahinumdom ni Pablo an mga taga-Korinto mahitungod han pipira han naglabay nga nag-alagad kan Jehova ha usa ka panahon kondi waray magpadayon. Ginpahamangnoan niya an dinihogan-ha-espiritu nga kabugtoan: “An naghuhunahuna nga natindog hiya magmatngon bangin mapukan hiya.” (1 Korinto 10:12) Nagdudugang ini hin puwersa ha pag-ampo nga an mga taga-Kolosas ha kataposan “mahingpit.” Ha panahon nga hira nagin hingpit, hamtong, kinahanglan magpadayon hira, diri naisol, diri nanluluya, o diri nagpapahirayo. (Hebreo 2:1; 3:12; 6:6; 10:39; 12:25) Salit hira magigin “hingpit” ha adlaw han pag-usisa ha ira ngan ha kataposan nga paghukom.—2 Korinto 5:10; 1 Pedro 2:12.
10, 11. (a) Hi Epapras nagpakita hin ano nga susbaranan para ha aton mahitungod han pag-ampo? (b) Uyon han ginbuhat ni Epapras, ano nga determinasyon an karuyag mo buhaton?
10 Ginhisgotan na naton an bili han pag-ampo para ha iba nga gin-uunabi an ngaran, nga espisipiko ha paghangyo kan Jehova nga buligan hira, liawon hira, bendisyonan hira, ngan hatagan hira han baraan nga espiritu. Sugad hito an mga pag-ampo ni Epapras para ha mga taga-Kolosas. Ngan mahihimo naton ito—ha pagkamatuod sadang buhaton naton—nga mabilngan dida hito nga mga pulong an birilhon nga suhestyon kon ano an ig-aampo naton kan Jehova mahitungod han aton kalugaringon. Sigurado, sadang maghangyo kita han bulig ni Jehova nga an kada usa ha aton ha kataposan “mahingpit.” Igin-aampo mo ba ito?
11 Kay ano nga diri unabihon an imo kahimtang ha pag-ampo? Pakiistorya ha Dios mahitungod han sukol han imo igin-uswag ha pagin ‘hingpit,’ hamtong. Pakimalooy ha iya nga buligan ka nga hibaroan an mga bahin nga kinahanglan magtubo ka pa ha espirituwal. (Salmo 17:3; 139:23, 24) Sigurado, mayada ka han sugad nga mga bahin. Niyan, imbes nga manluya tungod hini, pakimalooy ha Dios hin matin-aw, marig-on para han bulig basi mag-uswag. Buhata ini hin damu ka beses. Ha pagkamatuod, kay ano nga diri buhaton nga hinin tiarabot nga semana mag-aampo ka hin hiruhilawig nga ikaw ha kataposan “mahingpit.” Ngan planoha nga buhaton ito hin agsob samtang ginhuhunahuna mo an tinuig nga teksto. Ha imo mga pag-ampo, isentro ito ha mga hilig nga bangin umisol ka, manluya, o magpahirayo ha pag-alagad ha Dios ngan kon paonan-o mo malilikyan an pagbuhat hito.—Efeso 6:11, 13, 14, 18.
Pag-ampo nga Mabug-os an Pagsarig
12. Kay ano nga an mga taga-Kolosas labi nga nagkinahanglan hin ‘bug-os nga pagsarig’?
12 Hi Epapras nag-ampo liwat para han iba nga butang nga importante basi an mga taga-Kolosas hiagian ha kataposan nga natindog nga inuuyonan han Dios. Kinahanglanon liwat ito para ha aton. Ano ito? Nag-ampo hiya nga hira ‘mabug-os an pagsarig ha ngatanan nga kaburut-on han Dios.’ Ginpalibotan hira han sayop nga mga doktrina ngan nakakadaot nga mga pilosopiya, an iba hito kon kikitaon baga in totoo nga pagsingba. Pananglitan, gin-ipit hira ha pagsaurog han espesyal nga mga adlaw pinaagi han pagpuasa, pagpiyesta, sugad han ginkinahanglan hadto ha Judio nga pagsingba. An palso nga mga magturutdo nagsentro ha mga anghel, adton gamhanan nga mga espiritu nga ginamit ha paghatag han Balaud kan Moises. Hunahunaa an pagin sakop han sugad nga klase hin mga pag-ipit! Damu an nakakawurok nga klase han nagkakasumpaki nga mga ideya.—Galasia 3:19; Kolosas 2:8, 16-18.
13. An pagkilala ha ano nga butang an makakabulig ha mga taga-Kolosas, ngan paonan-o ito makakabulig ha aton?
13 Ginsagang ito ni Pablo pinaagi han pagpabug-at han bahin ni Jesu-Kristo. “Tungod nga iyo kinarawat hi Kristo Jesus nga Ginoo, busa magsunod kamo ha iya, Nga nanggamot ngan natukdaw kamo ha iya, ngan magrig-on ha iyo pagtoo, sugad han igintutdo ha iyo.” Oo, ginkikinahanglan (han mga taga-Kolosas ngan naton) an bug-os nga pagsarig mahitungod han bahin ni Kristo ha katuyoan han Dios ngan ha aton kinabuhi. Hi Pablo nagsaysay: “Ha iya nag-uukoy an ngatanan nga kabug-osan han pagkadiosnon ha lawas, Ngan napun-an kamo ha iya, nga amo an ulo han ngatanan nga punoan ngan kagamhanan.”—Kolosas 2:6-10.
14. Kay ano nga totoo an paglaom para han mga taga-Kolosas?
14 An mga taga-Kolosas mga Kristiano nga dinihogan han espiritu. Naiiba an ira paglaom, kinabuhi ha langit, ngan mayada hira han ngatanan nga hinungdan nga tipigan nga malamrag ito nga paglaom. (Kolosas 1:5) Ito an “kaburut-on han Dios” nga mabug-os an ira pagsarig mahitungod han pagkasigurado han ira paglaom. Sadang ba magruhaduha an bisan hin-o ha ira hito nga paglaom? Diri gud! Sadang ba ito magin naiiba yana nga panahon para ha ngatanan nga mayada hatag-han-Dios nga paglaom han kinabuhi ha tunan-on nga paraiso? Diri gud! Ito nga paglaom an matin-aw nga bahin han “kaburut-on han Dios.” Yana tagda ini nga mga pakiana: Kon nangangalimbasog ka nga magin usa han “daku nga kadam-an” nga matatalwas ha “daku nga kagol-anan,” mationan-o katotoo an imo paglaom? (Pahayag 7:9, 14) Bahin ba ito han imo ‘bug-os nga pagsarig ha ngatanan nga kaburut-on han Dios’?
15. Iginsaysay ni Pablo an ano nga serye nga nag-upod han paglaom?
15 Pinaagi han “paglaom” diri naton iginpapasabot an diri-matin-aw nga paghandom o imahinasyon. Makikita naton ini tikang ha serye han mga punto nga iginpresentar ni Pablo siyahan ha mga taga-Roma. Hito nga serye, an tagsa nga butang nga gin-unabi kadugtong o may kalabotan ha masunod. Tagda kon diin iginbutang ni Pablo an “paglaom” ha iya pangatadongan: “Naghihimaya man kita ha aton mga kasakitan: Kay hibaroan ta nga an kasakitan nabunga hin pagkamarig-on; Ngan an pagkamarig-on, ha pagsulay; ngan an pagsulay, ha paglaom: Ngan an paglaom diri nahatag hin kaawod; kay an gugma han Dios iginbisibis ha aton mga kasingkasing tungod ha [baraan nga espiritu] nga iginhatag ha aton.”—Roma 5:3-5.
16. Samtang hinbabaroan mo an kamatuoran han Biblia, ano nga paglaom an imo nakarawat?
16 Han siyahan nga iginpaangbit ha imo han mga Saksi ni Jehova an mensahe han Biblia, an usa nga kamatuoran bangin nakadani ha imo, sugad han kahimtang han mga patay o han pagkabanhaw. Para ha damu, an importante bag-o nga kamatuoran amo an basado-ha-Biblia nga paglaom han kinabuhi ha tunan-on nga paraiso. Hinumdumi han siyahan nga hinbatian mo ito nga katutdoan. Pagkaurusahon nga paglaom—mawawaray na an sakit ngan kalagas, padayon nga mabubuhi ka basi magpahimulos han mga bunga han imo kabudlay, ngan magkakaada kamurayawan ha mga hayop! (Eklesiastes 9:5, 10; Isaias 65:17-25; Juan 5:28, 29; Pahayag 21:3, 4) Nagkaada ka urusahon nga paglaom!
17, 18. (a) Paonan-o an serye nga iginpresentar ni Pablo ha mga taga-Roma nagtugway ngadto ha paglaom? (b) Ano nga klase hin paglaom an iginpapasabot ha Roma 5:4, 5, ngan mayada ka ba hito?
17 Inabot an panahon, bangin inatubang mo an pipira nga pagkontra o pagtimaraot. (Mateo 10:34-39; 24:9) Bisan ha bag-o la nga mga panahon, an mga Saksi ha magkalainlain nga mga nasud ginkuhaan han ira mga balay o ginpirit nga pumalagiw. An iba ginkastigo, ginkompiskar an ira literatura han Biblia, o nagin puntirya han buwa nga mga sumat ha media. Anoman nga porma han pagtimaraot an imo atubangon, sugad han ginsisiring han Roma 5:3, mahimo ka maghimaya ha kagol-anan, ngan nagdara ito hin maopay nga resulta. Sugad la han iginsurat ni Pablo, an kagol-anan nagbunga ha imo hin pagpailob. Ngan an pagpailob nagtugway ha inuyonan nga kahimtang. Maaram ka nga ginbuhat mo an husto, ginbubuhat an kaburut-on han Dios, salit inabat mo nga sigurado ka han iya pag-uyon ha imo. Ha mga pulong ni Pablo, inabat mo nga aada ka ha ‘inuyonan nga kahimtang.’ Ha pagpadayon, hi Pablo nagsurat nga ‘an inuyonan nga kahimtang, ha baylo nagbubunga hin paglaom.’ Baga in urusahon ito. Kay ano nga iginlista ni Pablo an “paglaom” ha urhi gud? Waray ka ba paglaom hadto pa, han siyahan nga hinbatian mo an maopay nga sumat?
18 Matin-aw, diri gin-uunabi dinhi ni Pablo an aton siyahan nga pagbati han paglaom han hingpit nga kinabuhi. An gin-uunabi niya linahos pa hito; hiruhilarom ito, mas nagpapagios. Kon matinumanon nga nag-iilob kita ngan salit maaram nga mayada kita han pag-uyon han Dios, mayada ito hilarom nga epekto han pagdugang ngan pagparig-on han aton siyahan nga paglaom. An aton paglaom yana nagigin mas totoo, mas marig-on, mas personal. Inin naparig-on nga paglaom nagigin mas malamrag. Nalalamragan hito an aton personalidad, an aton tagsa nga bahin. “Ngan an paglaom diri nahatag hin kaawod; kay an gugma han Dios iginbisibis ha aton mga kasingkasing tungod han [baraan nga espiritu] nga iginhatag ha aton.”
19. Paonan-o sadang magin bahin han imo regular nga mga pag-ampo an imo paglaom?
19 Sinsero an pag-ampo ni Epapras nga an iya kabugtoan ha Kolosas magpabilin nga napapagios ngan kombinsido han aada ha ira atubangan, nga ‘bug-os an pagsarig ha ngatanan nga kaburut-on han Dios.’ An kada tagsa ha aton sadang mag-ampo liwat pirme ha Dios ha pariho nga paagi mahitungod han aton paglaom. Ha imo pribado nga mga pag-ampo, iupod an imo paglaom mahitungod han bag-o nga kalibotan. Isumat kan Jehova kon mationan-o an imo paghingyap hito, nga bug-os an pagsarig nga maabot ito. Pakimalooy ha iya para han bulig basi maghilarom ngan maghaluag an imo pagsarig. Sugad han igin-ampo ni Epapras nga ‘mabug-os an pagsarig ha ngatanan nga kaburut-on han Dios,’ han mga taga-Kolosas, buhata an pariho. Buhata ito hin agsob.
20. Kon an pipira nagpapahirayo ha Kristiano nga dalan, kay ano nga diri ini hinungdan ha panluya?
20 Diri ka sadang manluya ha kamatuoran nga diri ngatanan mahihingpit ngan mabubug-os an pagsarig. An iba bangin mapakyas, magpahirayo, o humunong na la. Nahitabo ito hadton pinakaduok kan Jesus, an iya mga apostol. Kondi han nagin traydor hi Judas, nanluya ba an iba nga mga apostol o hinmunong? Waray gud! Inaplikar ni Pedro an Salmo 109:8 ha pagpakita nga mayada iba nga masaliwan ha lugar ni Judas. Ginpili an kasaliwan, ngan an mga maunungon ha Dios aktibo nga nagpadayon ha ira toka nga pagwali. (Buhat 1:15-26) Determinado hira nga mahingpit nga bug-os an pagsarig.
21, 22. Ha ano nga paagi makikita nga nahingpit ka nga bug-os an pagsarig?
21 Makakasiguro ka gud nga an imo pagkahingpit ngan bug-os nga pagsarig ha ngatanan nga kaburut-on han Dios diri makakawang. Maoobserbahan ito ngan aapresyaron. Nin-o?
22 Bueno, an imo kabugtoan, nga nakilala ngan nahigugma ha imo, makakakita hito. Bisan kon an kadam-an diri nagpapahayag hito ha mga pulong, an epekto magigin pariho han aton mababasa ha 1 Tesalonika 1:2-6: “Nagpapasalamat kami gihapon ha Dios tungod ha iyo ngatanan, nga ginngangaranan kamo namon ha amon mga pag-ampo; Ha atubangan han aton Dios ngan Amay nahinunumdom kami gihapon han iyo buhat ha pagtoo ngan kabudlay han paghigugma ngan pag-ilob han paglaom, ha aton Ginoo Jesu-Kristo; . . . Kay an amon Maopay nga Sumat waray umabot ha iyo ha pulong la, kondi sugad man ha gahum, ngan ha [baraan nga espiritu], ngan hin daku gud nga karig-onan; . . . Ngan nagsubad kamo ha amon, ngan ha Ginoo.” An maunungon nga mga Kristiano ha imo palibot maabat hin pariho samtang naoobserbahan nira nga ikaw ‘nahingpit ngan bug-os an pagsarig ha ngatanan nga kaburut-on han Dios.’—Kolosas 1:23.
23. Durante hinin tiarabot nga tuig, ano an sadang magin determinasyon mo?
23 Sigurado gud, makikita ngan malilipay hito an imo langitnon nga Amay. Sarig hito. Kay ano? Tungod kay nahingpit ka ngan bug-os an imo pagsarig “ha ngatanan nga kaburut-on han Dios.” Hi Pablo nagsurat ha pagdasig ha mga taga-Kolosas mahitungod han ira paglakat nga ‘takos kan Jehova basi makalipay ha iya.’ (Kolosas 1:10) Oo, posible para han diri-hingpit nga mga tawo nga lipayon hiya hin bug-os. Ginbuhat ito han imo kabugtoan ha Kolosas. An mga Kristiano ha imo palibot yana mismo nagbubuhat hito. Ikaw liwat makakahimo hito! Salit, durante hinin tiarabot nga tuig, pamatud-i pinaagi han imo adlaw-adlaw nga mga pag-ampo ngan han imo regular nga mga buhat nga determinado ka nga ha kataposan ‘mahingpit ka ngan mabug-os an imo pagsarig ha ngatanan nga kaburut-on han Dios.’
Nahinunumduman Mo Ba?
• Ano an nahiuupod ha imo ‘kahingpit’?
• Ano nga mga butang mahitungod han imo kalugaringon an sadang iupod mo ha pag-ampo?
• Sugad han iginsugyot ha Roma 5:4, 5, ano nga klase hin paglaom an karuyag mo pagtag-iyahon?
• An aton pag-aram nagpaparig-on ha imo nga magkaada ano nga tumong ha tiarabot nga tuig?
[Mga Pakiana]
[Retrato ha pahina 20]
Hi Epapras nag-ampo nga an iya kabugtoan mahingpit, nga bug-os an pagsarig mahitungod kan Kristo ngan ha ira paglaom
[Mga Retrato ha pahina 23]
Minilyon han iba pa an mayada han imo sigurado nga paglaom ngan bug-os nga pagsarig
