Fetela kwa tshedimosetsong

Fetela go diteng

 KGAOLO 12

O ka Dira Eng go Nna Tsala ya Modimo?

O ka Dira Eng go Nna Tsala ya Modimo?

1, 2. Ke bomang ba e neng e le ditsala tsa ga Jehofa?

O BATLA go nna tsala le motho yo o ntseng jang? Mongwe yo o mo ratang le yo o utlwanang thata le ene. Motho yo o nang le botho jo o bo ratang.

2 Go na le batho bangwe ba Jehofa Modimo a ba tsayang e le ditsala tsa gagwe. Ka sekai, Aborahame e ne e le tsala ya ga Jehofa. (Isaia 41:8; Jakobe 2:23) Gape Jehofa o ne a rata Dafide. O ne a mmitsa a re ke ‘monna yo o amogelwang ke pelo ya gagwe.’ (Ditiro 13:22) Mme Daniele ene e ne e le “mongwe yo o rategang” mo go Jehofa.—Daniele 9:23.

3. Go tlile jang gore Aborahame, Dafide le Daniele e nne ditsala tsa ga Jehofa?

3 Go tlile jang gore Aborahame, Dafide le Daniele e nne ditsala tsa ga Jehofa? Jehofa o ne a raya Aborahame a re: “O reeditse lentswe la me.” (Genesise 22:18) Jehofa o nna tsala le batho ba ba sa ikgogomoseng e bile ba mo ikobela. A go a kgonega gore setšhaba sotlhe se nne tsala ya Modimo? Ee. Jehofa o ne a raya setšhaba sa Iseraele a re: “Utlwang lentswe la me, mme ke tla nna Modimo wa lona, mme lona lo tla nna batho ba me.” (Jeremia 7:23) Ka jalo, le wena o tshwanetse go ikobela Jehofa fa o batla go nna tsala ya gagwe.

JEHOFA O SIRELETSA DITSALA TSA GAGWE

4, 5. Jehofa o sireletsa jang ditsala tsa gagwe?

4 Baebele ya re Jehofa o batlana le ditsela tsa go bontsha  “ba pelo ya bone e feletseng mo go ene nonofo ya gagwe.” (2 Ditiragalo 16:9) Mo go Pesalema 32:8, Jehofa o raya ditsala tsa gagwe a re: “Ke tla dira gore o nne le temogo ke bo ke go rute tsela e o tshwanetseng go tsamaya mo go yone. Ke tla naya kgakololo ke go beile leitlho.”

5 Go na le mongwe yo o batlang go re thibela gore re se ka ra nna ditsala tsa Modimo. Mme Jehofa o batla go re sireletsa. (Bala Pesalema 55:22.) Re direla Jehofa ka pelo yotlhe ka gonne ke tsala ya rona. Ga re mo latlhe le fa go ka nna thata jang. Re ikutlwa jaaka mopesalema fa a ne a bua jaana ka Jehofa: “Ka gonne o kafa seatleng sa me sa moja, ga ke na go reketlisiwa.” (Pesalema 16:8; 63:8) Satane o leka jang go re thibela go nna ditsala tsa Modimo?

TATOFATSO YA GA SATANE

6. Satane a reng ka batho?

6 Mo Kgaolo 11, re ithutile gore Satane o ne a pega Jehofa molato a re Jehofa o maaka e bile o a tsietsa ka gonne o thibela Adame le Efa go itirela tshwetso ya gore ke eng se se siameng le se se sa siamang. Gape buka ya Baebele ya Jobe ya re Satane o latofatsa batho ba ba batlang go nna ditsala tsa Modimo. Satane a re batho ba direla Modimo ka gonne a ba naya sengwe e seng ka gonne ba mo rata. Gape Satane a re a ka kgona go kgaoganya batho le Modimo. Mma re bone gore re ka ithuta eng mo go Jobe le tsela e Jehofa a neng a mo sireletsa ka yone.

7, 8. (a) Jehofa o ne a ikutlwa jang ka Jobe? (b) Satane o ne a reng ka Jobe?

7 Jobe e ne e le mang? E ne e le monna yo o siameng yo o neng a tshela dingwaga di le 3 600 tse di fetileng. Jehofa o ne a bolelela Satane gore ga go ope yo o neng a  tshwana le Jobe ka nako eo. Jobe o ne a tlotla Modimo fela thata e bile a tlhoile se se bosula. (Jobe 1:8) Jobe e ne e le tsala ya ga Jehofa.

8 Satane o ne a re Jobe o direla Modimo ka gonne a mo naya sengwe. Satane o ne a raya Jehofa a re: “A wena ka bowena ga wa tlhoma legora go mo dikologa le go dikologa ntlo ya gagwe le go dikologa sengwe le sengwe se a nang le sone gotlhe fela? O segofaditse tiro ya diatla tsa gagwe, le diruiwa tsa gagwe di anametse kgakala mo lefatsheng. Mme, go na le moo, ntsha seatla sa gago, tsweetswee, o ame sengwe le sengwe se a nang le sone mme o bone gore a ga a na go go tlhapatsa fa pele ga gago.”—Jobe 1:10, 11.

9. Jehofa o ne a letla Satane gore a dire eng?

9 Satane o ne a latofatsa Jobe gore o direla Jehofa fela ka gonne a gabile sengwe. Gape Satane o ne a re a ka kgona go dira gore Jobe a emise go direla Jehofa. Le fa Jehofa a ne a sa dumalane le Satane, o ne a mo letla gore a leke Jobe go bona gore o ne a rata Jehofa go le kana jang.

SATANE O TLHASELA JOBE

10. Satane o ne a tlhasela Jobe jang, mme Jobe o ne a tsiboga jang?

10 Satane o ne a simolola ka go utswa kgotsa go bolaya leruo lotlhe la ga Jobe. Go tswa foo, a bolaya batlhanka ba bantsi ba ga Jobe. Jobe o ne a sala a iphotlhere. La bofelo Satane o ne a dirisa setsuatsue go bolaya bana botlhe ba ga Jobe. Mme Jobe ga a ka a itatola Jehofa. “Mo go seno sotlhe Jobe ga a ka a leofa kgotsa a kaya fa Modimo a dirile sepe se se sa tshwanelang.”—Jobe 1:12-19, 22.

Jehofa o ne a duela Jobe ka gonne e ne e le tsala e e ikanyegang

11. (a) Ke eng se sengwe gape se Satane a neng a se dira Jobe? (b) Jobe o ne a tsiboga jang?

11 Satane ga a ka a itlhoboga. O ne a raya Modimo a  re: “Ntsha seatla sa gago, . . . mme o mo ame go fitlha kwa lerapong la gagwe le nama ya gagwe mme o bone gore a ga a na go go tlhapatsa fa pele ga gago.” Satane o ne a dira gore Jobe a tsenwe ke bolwetse jo bo botlhoko. (Jobe 2:5, 7) Le mo lekgetlong leno, Jobe ga a ka a itatola Jehofa. O ne a re: “Nka se tlose bothokgami jwa me mo go nna go fitlha ke swa!”—Jobe 27:5.

12. Jobe o bontshitse jang gore Satane o ne a bua maaka?

12 Jobe o ne a sa tlhaloganye gore go direga eng le gore ke eng a ne a boga botlhoko jaana. O ne a tsaya gore Jehofa ke ene a mmakelang mathata. (Jobe 6:4; 16:11-14) Le fa go ntse jalo, Jobe o ne a nna a ikanyega mo go Jehofa. Go ne go bonala sentle gore Jobe o ne a se pelotshetlha. E ne e le tsala ya Modimo ka gonne a mo rata. Satane o ne a bua maaka a matala!

13. E re ka Jobe e ne e le tsala ya mmatota, Jehofa o ne a mo direla eng?

13 Le fa Jobe a ne a sa itse gore go direga eng kwa legodimong, o ne a ikanyega mo Modimong mme a bontsha gore Satane o bosula. Jehofa o ne a duela Jobe ka gonne e ne e le tsala ya mmatota.—Jobe 42:12-17.

SATANE O GO LATOFATSA JANG?

14, 15. Satane o latofatsa batho botlhe ka eng?

14 O ka ithuta go le gontsi mo go se se diragaletseng Jobe. Gompieno le rona Satane o re latofatsa ka go re re direla Jehofa re gabile sengwe. Mo go Jobe 2:4, Satane a re: “Sengwe le sengwe se monna [kgotsa motho] a nang le sone o tla se ntsha mo boemong jwa moya wa gagwe.” Ka jalo, Satane a re batho botlhe ba pelotshetlha. Dingwaga di le dintsi morago ga loso lwa ga Jobe, Satane o ne a sa ntse a tlhapatsa Jehofa e bile a latofatsa batlhanka ba gagwe. Ka sekai, Diane 27:11 ya re: “Tlhalefa  morwaaka, mme o ipedise pelo ya me, gore ke tle ke fetole ene yo o nkgobang [kgotsa yo o ntlhapatsang].”

15 O ka bontsha gore Satane o maaka fa o tlhopha go ikobela Jehofa le go nna tsala ya Gagwe. Le fa o ka latlhegelwa ke dilo tse dintsi ka gonne o batla go nna tsala ya Modimo, itse gore eo ke tshwetso e e molemo e e di gaisang tsotlhe! Tshwetso eo ga se kgetsi e potlana. Satane a re o tlile go latlha Modimo fa o na le mathata. O leka go re tsietsa gore re se ka ra ikobela Modimo. O dira seo jang?

16. (a) Satane o dirisa maano afe go leka go kgaoganya batho le Jehofa? (b) Diabolo a ka leka jang go go thibela go ikobela Jehofa?

16 Satane o dirisa maano a le mantsi go leka go re kgaoganya le Modimo. O tlhasela jaaka “tau e e kurutlang, e e batlang go kometsa mongwe.” (1 Petere 5:8) O se ka wa gakgamala fa o bona ditsala le ba masika kgotsa batho ba bangwe ba leka go go tlogedisa go ithuta Baebele le go dira se se siameng. O ka nna wa bona e kete o a tlhaselwa. * (Johane 15:19, 20) Gape Satane o itira jaaka e kete ke “moengele wa lesedi.” Ka jalo, a ka nna a re tsietsa gore re se ka ra ikobela Jehofa. (2 Bakorintha 11:14) Leano le lengwe le Satane a le dirisang go re thibela go ikobela Jehofa ke go dira gore re ikutlwe re sa tshwanelege go direla Modimo.—Diane 24:10.

IKOBELE DITAELO TSA GA JEHOFA

17. Ke eng fa re ikobela Jehofa?

17 Fa re ikobela Jehofa re bontsha gore Satane o  maaka. Ke eng se se ka re thusang go ikobela Jehofa? Baebele ya re: “O rate Jehofa Modimo wa gago ka pelo yotlhe ya gago le ka moya otlhe wa gago le ka maatla otlhe a gago.” (Duteronome 6:5) Re ikobela Jehofa ka gonne re a mo rata. Fa nako e ntse e ya, re tla rata Jehofa le go feta mme re tla dira sepe fela se a re kopang gore re se dire. Moaposetoloi Johane o ne a re: “Seno ke se lorato lwa Modimo lo se kayang, gore re boloke ditaelo tsa gagwe; mme ditaelo tsa gagwe ga di imele.”—1 Johane 5:3.

18, 19. (a) Dingwe tsa dilo tse Jehofa a di tsayang di sa siama ke dife? (b) Re itse jang gore Jehofa ga a ka ke a re kopa go dira dilo tse re ka se kang ra di kgona?

18 Ke dilo dife tse Jehofa a reng ga di a siama? Go na le dikai mo lebokosong le le reng, “ Tlhoa se Jehofa a se Tlhoileng.” Go ka nna ga lebega e kete dilo tseno ga di phoso go le kalo. Mme fa o bala Baebele mme o akanya  thata ka se o se balang o tla tlhaloganya mosola wa go ikobela melao ya ga Jehofa. O ka nna wa bona o tshwanelwa ke go fetola dilo dingwe mo botshelong jwa gago. Le fa ka dinako tse dingwe go ka nna thata, fa o dira diphetogo tseo, o tla nna le kagiso e bile o tla itumelela go nna tsala ya Modimo. (Isaia 48:17, 18) Re itse jang gore go a kgonega go dira diphetogo tseo?

19 Jehofa ga a ka ke a re kopa gore re dire sengwe se re ka se kang ra se kgona. (Duteronome 30:11-14) Jehofa o re itse go feta kafa rona re ikitseng ka teng. O itse dilo tse re di kgonang le tse re sa di kgoneng. (Pesalema 103:14) Moaposetoloi Paulo a re: “Modimo o a ikanyega, e bile ga a na go lo lesa lo raelwa go feta se lo ka se itshokelang, mme mmogo le thaelo gape o tla dira tsela ya go tswa gore lo kgone go e itshokela.” (1 Bakorintha 10:13) Ga re belaele gore Jehofa o tla re thusa go dira se se siameng. O tla re naya “maatla a a fetang a a tlwaelegileng” gore re  kgone go itshokela mathata. (2 Bakorintha 4:7) Paulo o ne a re: “Mo dilong tsotlhe ke na le nonofo ka ntlha ya yo o nnayang maatla.” O ne a bua jalo ka gonne Jehofa o ne a mo thusitse go lebana le mathata a gagwe.—Bafilipi 4:13.

RATA SE MODIMO A SE RATANG

20. Re tshwanetse go tshwana le Modimo ka eng, mme ka ntlha yang?

20 Fa re batla go nna ditsala tsa ga Jehofa, re tshwanetse go tlogela dilo tse a sa di rateng, mme ga se gone fela. (Baroma 12:9) Re tshwanetse go rata dilo tse Modimo a di ratang. Dilo tseo di tlhalosiwa mo go Pesalema 15:1-5. (E bale.) Ditsala tsa ga Jehofa di leka go tshwana le ene ka go nna le “lorato, boipelo, kagiso, bopelotelele, bopelonomi, molemo, tumelo, bonolo, boikgapo.”—Bagalatia 5:22, 23.

21. O ka dira jang gore o kgone go etsa Modimo?

21 O ka dira jang gore o kgone go etsa Modimo? O tshwanetse go rata se Jehofa a se ratang ka go bala le go ithuta Baebele ka metlha. (Isaia 30:20, 21) Fa o ntse o tsweletse o dira jalo, o tla rata Jehofa le go feta mme go tla nna motlhofo gore o mo ikobele.

22. Go tla direga eng fa o ikobela Jehofa?

22 Go fetola kafa o ntseng o tshela ka teng go ka tshwana le go apola diaparo tse di kgologolo o bo o apara tse disha. Baebele ya re o ‘apole botho jo bogologolo’ mme o “apare botho jo bosha.” (Bakolosa 3:9, 10) Le fa go ka tswa go le thata go dira diphetogo tseno, Jehofa a re o tla re naya “maduo a magolo” fa re mo ikobela. (Pesalema 19:11) Tlhopha go ikobela Jehofa mme o bontshe gore Satane o maaka. Direla Jehofa ka gonne o mo rata e seng ka gonne o gabile sengwe. Mme fa o dira jalo, o tla nna tsala ya Modimo!

^ ser. 16 Ga go reye gore Satane o laola batho ba ba lekang go go thibela go ithuta Baebele. Mme Satane ke “modimo wa tsamaiso eno ya dilo” e bile “lefatshe lotlhe le namaletse mo maatleng a [gagwe].” Ka jalo, ga go gakgamatse fa batho bangwe ba leka go re thibela go direla Jehofa.—2 Bakorintha 4:4; 1 Johane 5:19.