Malaki 2:1-17
2 “Mme jaanong lona baperesiti, taelo eno e lebisitswe kwa go lona.+
2 Fa lo gana go reetsa e bile lo sa tseye go galaletsa leina la me go le masisi,”* go bua Jehofa wa masomosomo, “ke tla lo romelela phutso,+ e bile ke tla dira gore masego a lona a fetoge diphutso. Eleruri, ke dirile gore masego a lona a fetoge diphutso,+ ka gonne ga lo tseye seno masisi.”
3 “Ka ntlha ya ditiro tsa lona, ke tla senya* peo e lo e jetseng,+ e bile ke tla lo gasa boloko mo difatlhegong, boloko jwa diphologolo tse lo ntshang ditlhabelo ka tsone kwa meletlong ya lona; mme lo tla tlosiwa mmogo le jone.*
4 Foo lo tla itse gore ke lo romeletse taelo eno gore kgolagano ya me le Lefi e tle e tswelele,”+ go bua Jehofa wa masomosomo.
5 “Kgolagano e ke e dirileng le ene e ne e le ya botshelo le ya kagiso, tse ke neng ka di mo naya gore a mpoife.* O ne a mpoifa, o ne a tlotla leina la me.
6 Molao* wa boammaaruri o ne o le mo molomong wa gagwe,+ e bile ga a ise a bue sepe se se bosula. O ne a tshela le nna ka kagiso gape o ne a tlhamaletse,+ e bile o ne a thusa batho ba le bantsi gore ba tlogele go dira dilo tse di bosula.
7 Gonne molomo wa moperesiti o tshwanetse go boloka kitso, e bile batho ba tshwanetse go batla kaelo* mo go ene,+ ka gonne ke morongwa wa ga Jehofa wa masomosomo.
8 “Le fa go ntse jalo, lona ka bolona lo fapogile mo tseleng. Lo dirile gore ba le bantsi ba palelwe ke go ikobela molao.+ Lo sentse kgolagano ya ga Lefi,”+ go bua Jehofa wa masomosomo.
9 “Ka jalo, ke tla dira gore lo nyatsege lo bo lo kokobediwe fa pele ga batho botlhe, ka gonne ga lo a ka lwa ikobela ditsela tsa me, mme lo ne lo na le tlhaolele fa lo diragatsa molao.”+
10 “A rotlhe ga re na rre a le mongwe?+ A ga re a bopiwa ke Modimo a le mongwe? Ka jalo, ke ka ntlha yang fa re direlana boferefere,+ re tlola kgolagano e Modimo a e dirileng le borraaronamogolo?
11 Juda o dirile boferefere, e bile go dirilwe selo se se makgapha mo Iseraele le mo Jerusalema; gonne Juda o tlontlolotse Jehofa, yo o ratang se se boitshepo,*+ e bile o nyetse mosadi yo o obamelang modimo o sele.*+
12 Jehofa o tla senya ope fela yo o dirang seno mo ditenteng tsa ga Jakobe, le fa e ka tswa e le mang,* le fa gone a ntshetsa Jehofa wa masomosomo+ setlhabelo sa mpho.”
13 “Mme go na le selo se sengwe gape* se lo se dirang, se se dirang gore sebeso sa ga Jehofa se tlale ka dikeledi le go sisa pelo, mo e leng gore ga a tlhole a tsaya tsia setlhabelo sa lona sa mpho kgotsa a amogela sepe fela se lo se ntshang.+
14 Mme lwa re, ‘Ka lebaka lefe?’ Ka gore Jehofa ke mosupi wa gore o ne wa direla mosadi wa bosha jwa gago boferefere, le fa gone e le molekane wa gago e bile e le mosadi yo o dirileng kgolagano le ene.*+
15 Le fa go ntse jalo, go na le mongwe yo o neng a se ka a dira seno, ka gonne a ne a sa ntse a na le bontlhanngwe jwa moya wa Modimo. Mme ene yoo o ne a batla eng? Losika* lwa Modimo. Jaanong elang megopolo ya lona* tlhoko, e bile lo se ka lwa direla basadi ba bosha jwa lona boferefere.
16 Gonne ke tlhoile* tlhalo,”+ go bua Jehofa, Modimo wa Iseraele, “e bile ke tlhoile motho yo o dirang thubakanyo,” go bua Jehofa wa masomosomo. “Elang megopolo ya lona tlhoko, mme lo se ka lwa dira boferefere.+
17 “Lo lapisitse Jehofa ka mafoko a lona.+ Le fa go ntse jalo, lwa re, ‘Re mo lapisitse ka eng?’ Ka go bua lo re, ‘Mongwe le mongwe yo o dirang bosula o siame mo matlhong a ga Jehofa, e bile o a mo itumelela,’+ kgotsa ka go bua lo re, ‘O kae Modimo wa tshiamiso?’”
Dintlha Tse di Kwa Tlase
^ Kgotsa “lo sa re sepe ka go galaletsa leina la me.”
^ Seheb., “kgalema.”
^ Go tewa ba isiwa kwa lefelong le go latlhelwang boloko jwa diphologolo tse go ntshiwang ditlhabelo ka tsone kwa go lone.
^ Kgotsa “ntlotle.”
^ Kgotsa “Taelo.”
^ Seheb., “molao.”
^ Kgotsa gongwe “lefelo le le boitshepo.”
^ Seheb., “morwadia modimo o sele.”
^ Seheb., “yo o tsogileng le yo o arabang.”
^ Seheb., “selo sa bobedi.”
^ Kgotsa “mosadi yo o mo nyetseng semolao.”
^ Go tewa ditlogolwana tse di neng di tla ikanyega mo Modimong.
^ Seheb., “moya wa lona.”
^ Seheb., “o tlhoile.”
