Malaki 3:1-18

  • Morena wa boammaaruri o tla go phepafatsa tempele ya gagwe (1-5)

    • Morongwa wa kgolagano (1)

  • Ba kgothalediwa go boela kwa go Jehofa (6-12)

    • Jehofa ga a fetoge (6)

    • “Boelang mo go nna, mme le nna ke tla boela mo go lona” (7)

    • ‘Tlisang ditsabosome tsotlhe, mme Jehofa o tla lo tshololela masego’ (10)

  • Basiami le badirabosula (13-18)

    • Buka ya kgakologelo e kwalwa fa pele ga Modimo (16)

    • Pharologanyo fa gare ga basiami le badirabosula (18)

3  “Ke tla roma morongwa wa me, mme o tla bula* tsela fa pele ga me.+ Mme ka tshoganyetso Morena wa boammaaruri, yo lo mmatlang, o tla tla mo tempeleng ya gagwe;+ mme morongwa wa kgolagano o tla tla, ene yo lo mo itumelelang. Ruri o tla tla,” go bua Jehofa wa masomosomo.  “Mme gone, ke mang yo o tla itshokelang letsatsi le a tlang ka lone, e bile ke mang yo o tla kgonang go ema fa a tlhaga? Gonne o tla bo a tshwana le molelo wa moitshekisi le sesepa*+ sa batlhatswi ba matsela.  O tla nna fa fatshe jaaka motho yo o itshekisang le yo o phepafatsang selefera+ a bo a phepafatsa bomorwa Lefi; o tla ba itshekisa jaaka gauta le jaaka selefera, mme eleruri Jehofa o tla ba tsaya e le batho ba ba isang setlhabelo sa mpho ka tshiamo.  Mme setlhabelo seo sa mpho sa Juda le sa Jerusalema tota se tla bo se itumedisa* Jehofa, jaaka mo malatsing a bogologolo le jaaka mo dingwageng tsa kgale.+  “Ke tla lo atamela gore ke lo atlhole, mme ka bonako ke tla atlhola baloi,+ ba ba dirang boaka, ba ba dirang maikano a maaka,+ ba ba tsietsang mothapiwa,+ motlholagadi le khutsana,*+ e bile ke tla atlhola ba ba ganang go thusa* motswakwa.+ Batho bano ga ba a ka ba mpoifa,” go bua Jehofa wa masomosomo.  “Gonne ke nna Jehofa; ga ke fetoge.*+ Mme lona lo bomorwa Jakobe; ga lo ise lo fele.  Go tloga mo malatsing a borraalonamogolo lo fapogile melao ya me e bile ga lo a e ikobela.+ Boelang mo go nna, mme le nna ke tla boela mo go lona,”+ go bua Jehofa wa masomosomo. Le fa go ntse jalo, lwa re: “Re tshwanetse go boa jang?”  “A motho fela a ka kgothosa Modimo? Mme lo a nkgothosa.” E bile lwa re: “Re go kgothositse jang?” “Ka go sa tlise ditsabosome* le meneelo.  Ruri lo hutsegile,* ka gonne lo a nkgothosa, tota setšhaba sotlhe fela se dira jalo. 10  Tlisang ditsabosome tsotlhe* mo mabolokelong,+ gore go tle go nne le dijo mo ntlong ya me;+ tsweetswee, ntekeng,” go bua Jehofa wa masomosomo, “gore lo bone gore a ga nkitla ke lo bulela dikgoro tsa morwalela tsa magodimo+ ke bo ke lo tshololela* masego go fitlha lo sa tlhole lo tlhoka sepe.”+ 11  “Ga nkitla ke tlhola ke letla ditshenekegi gore di senye maungo a naga ya lona, e bile morara* o o mo tshimong ya lona ga o kitla o tlhoka go ntsha maungo,”+ go bua Jehofa wa masomosomo. 12  “Ditšhaba tsotlhe di tla tshwanelwa ke go bolela gore lo itumetse,+ ka gonne lo tla nna lefatshe la boitumelo,” go bua Jehofa wa masomosomo. 13  Jehofa a re, “Mafoko a lo a buileng ka nna a ntlhabile.” Mme lwa re: “Ke eng se re se buileng ka wena?”+ 14  “Lwa re, ‘Go direla Modimo ga go na mosola.+ Re solegetswe molemo ke eng ka go diragatsa maikarabelo a a re a neileng le ka go tsamaya re kotlomane pelo fa pele ga ga Jehofa wa masomosomo? 15  Go tloga jaanong, re tla nna re re batho ba ba ikgodisang ke bone ba ba itumetseng le gore ba ba dirang bosula ke bone ba ba atlegileng.+ Ba leka Modimo mme ba bo ba sa diragalelwe ke sepe.’” 16  Ka nako eo, ba ba boifang Jehofa ba ne ba buisana, mongwe le mongwe a bua le molekane wa gagwe, mme Jehofa o ne a nna a tlhwaya tsebe a bo a reetsa. Mme buka ya kgakologelo e ne ya kwalwa fa pele ga gagwe+ e kwalelwa ba ba boifang Jehofa le ba ba akanyang ka* leina la gagwe.+ 17  Jehofa wa masomosomo a re, “Mme ba tla nna ba me,+ mo letsatsing leo ke tla ba dira batho ba ba kgethegileng.*+ Ke tla ba tlhomogela pelo, fela jaaka rre a tlhomogela morwawe yo a mo direlang pelo.+ 18  Mme gape lo tla bona pharologanyo fa gare ga motho yo o siameng le motho yo o bosula,+ fa gare ga yo o direlang Modimo le yo o sa mo direleng.”

Dintlha Tse di Kwa Tlase

Kgotsa “baakanya.”
Kgotsa “potase,” sesepa se se dirilweng ka molora wa leiso.
Kgotsa “kgotsofatsa.”
Seheb., “ngwana yo o se nang rre.”
Kgotsa “ba ba ganang ka ditshwanelo tsa.”
Kgotsa “ga ke a fetoga.”
Kgotsa “dikarolo tsa bolesome.”
Kgotsa gongwe “Lo mphutsa ka phutso.”
Kgotsa “dikarolo tsotlhe tsa bolesome.”
Seheb., “goromeletsa.”
Kgotsa “diterebe; moretlwa.”
Seheb., “tlhatlhanyang ka.” Kgotsa gongwe “ba ba tlotlang.”
Kgotsa “thuo e e tseelwang kwa godimo.”