Joshua 9:1-27

  • Bagibeone ba ba botlhale ba dira kagiso (1-15)

  • Leano la Bagibeone le a senoga (16-21)

  • Bagibeone ba tla rwalela dikgong le go ga metsi (22-27)

9  Fa dikgosi tsotlhe tse di neng di le ka fa bophirima jwa Joredane+ di utlwa se se diragetseng, e leng dikgosi tse di kwa kgaolong e e dithaba, tse di kwa Shefela, tse di mo losing lotlhe lwa Lewatle le Legolo*+ le tse di fa pele ga Lebanona: Bahite, Baamore, Bakanana, Baperise, Bahife le Bajebuse,+  di ne tsa dira tumalano ya go lwantsha Joshua le Baiseraele.+  Banni ba Gibeone+ le bone ba ne ba utlwa se Joshua a neng a se dirile Jeriko+ le Ai.+  Ka jalo, ba ne ba dira ka botlhale mme ba tsenya mefago mo dikgetsaneng tse di onetseng ba di pega mo ditonking tsa bone, mmogo le medutwana* ya beine e e onetseng e e neng e phanyegile e bile e rokilwe;  gape ba ne ba rwele ditlhako* tse di onetseng e bile ba apere diaparo tse di onetseng. Senkgwe sotlhe sa mefago ya bone se ne se omeletse e bile se foforega.  Go tswa foo, ba ne ba ya kwa go Joshua kwa kampeng kwa Gilegala+ mme ba bua le ene le banna ba Iseraele ba re: “Re tswa kwa lefatsheng le le kgakala. Jaanong dirang kgolagano le rona.”  Mme banna ba Iseraele ba ne ba raya Bahife+ ba re: “Gongwe lo nna gaufi le rona. Ka jalo, re ka dira jang kgolagano le lona?”+  Ba ne ba araba Joshua ba re: “Re batlhanka* ba gago.” Foo Joshua o ne a ba raya a re: “Lo bomang, mme lo tswa kae?”  Mme bone ba ne ba mo raya ba re: “Rona batlhanka ba gago, re tswa kwa lefatsheng le le kgakala thata+ ka ntlha ya leina la ga Jehofa, Modimo wa gago, ka gonne re utlwile ka go tuma ga gagwe le ka sotlhe se a se dirileng kwa Egepeto+ 10  le ka sotlhe se a se dirileng dikgosi tse pedi tsa Baamore tse di neng di le ka kwa letlhakoreng le lengwe* la Joredane, e bong Kgosi Sihone+ wa kwa Heshebone le Kgosi Oge+ wa kwa Bashana, yo o neng a le kwa Ashetarothe. 11  Ka jalo, bagolwane ba rona le banni botlhe ba lefatshe la rona ba ne ba re raya ba re, ‘Itseeleng mefago ya loeto mme lo ye go ba kgatlhantsha. Lo ba reye lo re: “Re tla nna batlhanka ba lona;+ jaanong dirang kgolagano le rona.” ’+ 12  Senkgwe seno se re neng ra se tsaya e le mefago ya rona, se ne se fisa mo letsatsing la fa re ne re tswa kwa matlong a rona re tla fano mo go lona. Jaanong lo kgona go bona gore se omeletse e bile se a foforega.+ 13  Le medutwana eno ya beine e ne e le mesha fa re ne re e tlatsa, mme jaanong e phanyegile.+ Le diaparo tsa rona le ditlhako* tsa rona, di onetse ka ntlha ya loeto lo loleele thata.” 14  Foo banna ba Iseraele ba ne ba tsaya* mefago e mengwe ya bone, le fa go ntse jalo, ba ne ba se ka ba botsa Jehofa.+ 15  Ka jalo, Joshua o ne a dira kagiso le bone+ a bo a dira kgolagano le bone gore a ba tlogele ba tshela, mme dikgosana tsa phuthego le tsone di ne tsa ba ikanela ka go dira maikano.+ 16  Kwa bokhutlong jwa malatsi a le mararo, fa ba sena go dira kgolagano le bone, ba ne ba utlwa gore ba ne ba nna gaufi le bone, ba agile gaufi le bone. 17  Foo Baiseraele ba ne ba tsamaya mme ba ya kwa metseng ya bone mo letsatsing la boraro; metse ya bone e ne e le Gibeone,+ Kefira, Beerothe le Kiriathe-jearime.+ 18  Le fa go ntse jalo, Baiseraele ga ba a ka ba ba tlhasela, ka gonne dikgosana tsa phuthego di ne di ba diretse maikano ka leina la ga Jehofa,+ Modimo wa Iseraele. Ka jalo, phuthego yotlhe e ne ya simolola go ngongoregela dikgosana. 19  Foo dikgosana tsotlhe di ne tsa raya phuthego yotlhe tsa re: “E re ka re ba ikanetse ka leina la ga Jehofa, Modimo wa Iseraele, ga re a letlelelwa go ba utlwisa botlhoko. 20  Seno ke se re tla se dirang: Re tla ba tlogela ba tshela, gore Modimo a se ka a re galefela ka ntlha ya maikano a re ba diretseng one.”+ 21  Mme dikgosana di ne tsa oketsa ka go re: “Ba tlogeleng ba tshele mme ba tla nna ba ba rwalelang dikgong le ba ba gelang phuthego yotlhe metsi.” Seno ke se dikgosana di neng di se ba solofeditse. 22  Jaanong Joshua o ne a ba bitsa mme a ba raya a re: “Ke ka ntlha yang fa lo re tsieditse ka go re raya lo re, ‘Re tswa kwa lefelong le le kgakala thata le lona,’ mme gone lo nna gaufi thata le rona?+ 23  Go tloga jaanong lo hutsegile,+ mme ka metlha lo tla nna makgoba, lo tla nna ba ba rwalelang dikgong le ba ba gelang ntlo ya Modimo wa me metsi.” 24  Ba ne ba araba Joshua ba re: “Re dirile jalo ka gonne rona batlhanka ba gago re ne re boleletswe ka tsela e e utlwalang sentle gore Jehofa, Modimo wa gago o ne a laetse Moshe motlhanka wa gagwe go lo naya lefatshe leno lotlhe, le go nyeletsa banni botlhe ba lone.+ Ka jalo, re ne re tshogetse matshelo a rona ka ntlha ya lona,+ mme ke sone se re neng ra dira seno.+ 25  Jaanong re mo diatleng tsa gago. Re dire se wena o bonang se le molemo e bile se siame.” 26  Mme ke sone se a neng a se ba dira; o ne a ba boloka mo diatleng tsa Baiseraele, mme ga ba a ka ba ba bolaya. 27  Mme mo letsatsing leo, Joshua o ne a dira gore ba nne ba ba rwalelang dikgong le ba ba gelang phuthego le sebeso sa ga Jehofa metsi kwa lefelong le a le tlhophang,+ mme ba ne ba nna jalo go fitlha mo letsatsing leno.+

Dintlha Tse di Kwa Tlase

Go tewa Lewatle la Mediterranean.
Bona “Modutwana” mo Ditlhaloso Tsa Mafoko.
Seheb., “bompaatšhane.”
Kgotsa “makgoba.”
Go tewa letlhakore le le ka fa botlhaba.
Seheb., “bompaatšhane.”
Kgotsa “tlhatlhoba.”