Joshua 8:1-35

  • Joshua o tlhoma ba ba tla lalelang Ai (1-13)

  • Motse wa Ai o a gapiwa (14-29)

  • Go balwa Molao kwa Thabeng ya Ebale (30-35)

8  Go tswa foo, Jehofa o ne a raya Joshua a re: “O se ka wa boifa kgotsa wa tshoga.+ Tsaya batlhabani botlhe mme o tsamaye o ye go tlhabana le Ai. Bona, ke tsentse kgosi ya Ai le batho ba yone le motse wa yone le lefatshe la yone mo seatleng sa gago.+  O dire Ai le kgosi ya teng fela jaaka o dirile Jeriko le kgosi ya teng,+ mme gone lo ka nna lwa ikgapela dilo tse di mo motseng oo le leruo la teng. O tlhome ba bangwe kwa morago ga motse gore ba o lalele.”  Ka jalo, Joshua le batlhabani botlhe ba ne ba ya go tlhabana le Ai. Joshua o ne a tlhopha batlhabani ba ba maatla ba le 30 000 mme a ba romela go le bosigo.  O ne a ba neela taelo eno: “Bonang, lo tla lalela motse ka fa morago. Lo se ka lwa tsamaela kgakala thata le motse, mme lotlhe lo bo lo ipaakantse.  Nna le batho botlhe ba ba nang le nna re tla atamela motse mme fa batho ba tswa ba tla go re kgatlhantsha jaaka la ntlha,+ re tla tshaba fa pele ga bone.  Fa ba tswa ba re latelela, re tla ba katosetsa kgakala le motse, ka gonne ba tla re, ‘Ba a re tshaba jaaka la ntlha.’+ Mme re tla tshaba fa pele ga bone.  Foo lo tswe mo lo laletseng gone, mme lo tlhasele motse; Jehofa, Modimo wa lona o tla o tsenya mo diatleng tsa lona.  Fela fa lo sena go gapa motse, lo o fise ka molelo.+ Lo dire go ya ka fa lefokong la ga Jehofa. Bonang, ke lo neile ditaelo.”  Go tswa foo, Joshua o ne a ba romela mme ba ne ba ya kwa lefelong le ba neng ba ya go lalela kwa go lone; ba ne ba nna fa gare ga Bethele le Ai go ela kwa bophirima jwa Ai, mme Joshua ene o ne a lala le batho mo bosigong joo. 10  Fa Joshua a sena go tsoga phakela thata a bo a phutha* mephato, ene le bagolwane ba Iseraele ba ne ba ba etelela pele go ya Ai. 11  Batlhabani botlhe+ ba ba neng ba na le ene ba ne ba tsamaya mme ba atamela fa pele ga motse. Ba ne ba nna ka fa bokone jwa Ai, mokgatšha o le fa gare ga bone le Ai. 12  Mo nakong eno, o ne a tsere banna ba ka nna 5 000 mme a ba beile+ fa gare ga Bethele+ le Ai, go ela kwa bophirima jwa motse gore ba ba lalele. 13  Ka jalo, batho ba ne ba tlhoma kampa e kgolo go ela ka fa bokone jwa motse+ mme masole a a sireletsang kwa morago a ne a le ka fa bophirima jwa motse,+ mme mo bosigong joo Joshua o ne a tsena mo gare ga mokgatšha.* 14  Mme fela fa kgosi ya Ai e bona seno, ene le banna ba motse ba ne ba itlhaganela mo mosong phakela thata ba ya go kgatlhantsha Baiseraele gore ba tlhabane le bone kwa lefelong lengwe le le lebaganeng le sekaka. Le fa go ntse jalo, o ne a sa itse gore go na le ba ba ba laletseng ka kwa morago ga motse. 15  Fa banna ba Ai ba tlhasela, Joshua le Baiseraele botlhe ba ne ba tshaba ka tsela e e yang kwa ntlheng ya naga.+ 16  Foo batho botlhe ba ba neng ba le mo motseng ba ne ba bidiwa gore ba ba lelekise; mme fa ba ntse ba lelekisa Joshua ba ne ba katoga motse. 17  Go ne go sa sala monna ope kwa Ai le Bethele, yo o neng a sa ya go lelekisa Baiseraele. Ba ne ba tlogela motse o sa tswalwa mme ba lelekisa Baiseraele. 18  Jaanong Jehofa o ne a raya Joshua a re: “Otlololela lerumo le le konopiwang le le mo seatleng sa gago kwa ntlheng ya Ai,+ ka gonne ke tla e tsenya mo seatleng sa gago.”+ Ka jalo, Joshua o ne a otlololela lerumo le le konopiwang le le neng le le mo seatleng sa gagwe kwa ntlheng ya motse. 19  Fela fa a otlolola seatla sa gagwe, ba ba laletseng motse ba ne ba tswa ka bonako mo lefelong la bone, mme ba sianela mo motseng ba bo ba o gapa. Ka bonako fela ba ne ba fisa motse ka molelo.+ 20  Fa banna ba Ai ba retologa, ba ne ba bona mosi wa motse o tlhatlogela kwa loaping, mme ba ne ba se na maatla a go tshabela gope. Foo batho ba ba neng ba ntse ba tshabela kwa ntlheng ya naga, ba ne ba retologela mo go ba ba ba lelekisang. 21  E rile Joshua le Iseraele yotlhe ba bona gore balaledi ba ne ba gapile motse e bile ba bona le mosi wa motse o tlhatloga, ba ne ba retologa mme ba tlhasela banna ba Ai. 22  Mme ba bangwe ba ne ba tswa mo motseng go tla go ba kgatlhantsha, mo e leng gore banna ba Ai ba ne ba sala ba le fa gare, Baiseraele ba bangwe ba le ka fa letlhakoreng leno mme ba bangwe ba le ka fa go le lengwe, mme ba ne ba ba kgemetha go fitlha go se na ope yo o falotseng kgotsa yo o tshabileng.+ 23  Le fa go ntse jalo, ba ne ba tshwara kgosi ya Ai+ mme ba e tlisa fa pele ga ga Joshua. 24  Fa Baiseraele ba sena go feleletsa go bolaya banni botlhe ba Ai kwa nageng, kwa ba neng ba ba lateletse gone e bile botlhe fela ba ole ka tšhaka, go tswa foo, Baiseraele botlhe ba ne ba boela kwa Ai mme ba e kgemetha ka tšhaka. 25  Botlhe ba ba neng ba wa mo letsatsing leo, go simolola ka monna go fitlha ka mosadi, ba ne ba le 12 000, batho botlhe ba Ai. 26  Joshua o ne a se ka a busa seatla sa gagwe se a neng a otlolotse lerumo le le konopiwang+ ka sone go fitlha a bolaile banni botlhe ba Ai.+ 27  Le fa go ntse jalo, Baiseraele ba ne ba itseela leruo le dilo tse di neng di le mo motseng oo, go ya ka ditaelo tse Jehofa a neng a di neile Joshua.+ 28  Go tswa foo, Joshua o ne a fisa Ai mme a dira gore e sale e le mokoa o o nnelang ruri wa marope,+ jaaka fa e ntse go fitlha mo letsatsing leno. 29  O ne a pega kgosi ya Ai mo koteng* go fitlha maitseboa, mme fa letsatsi le ne le tloga le phirima, Joshua o ne a ntsha taelo ya gore ba folose setopo sa gagwe mo koteng.+ Ba ne ba se latlhela fa kgorong ya motse ba bo ba dira mokoa o mogolo wa maje mo godimo ga gagwe, o o sa ntseng o le koo go fitlha mo letsatsing leno. 30  Ka yone nako eo Joshua o ne a agela Jehofa, Modimo wa Iseraele sebeso mo Thabeng ya Ebale,+ 31  fela jaaka Moshe motlhanka wa ga Jehofa a ne a laetse Baiseraele le jaaka go kwadilwe jaana mo bukeng ya Molao+ wa ga Moshe: “Sebeso sa maje a a feletseng, a go sa dirisiwang sedirisiwa sepe sa tshipi mo go one.”+ Ba ne ba isetsa Jehofa ditlhabelo tse di fisiwang mo go sone mmogo le ditlhabelo tsa go abelana.+ 32  Go tswa foo, o ne a kwala mo majeng Molao+ o Moshe a neng a o kwadile fa pele ga Baiseraele.+ 33  Baiseraele botlhe, bagolwane ba bone, balaodi le baatlhodi ba bone ba ne ba eme mo matlhakoreng oomabedi a Letlole fa pele ga baperesiti ba Balefi ba ba neng ba tshwere letlole la kgolagano ya ga Jehofa. Batswakwa mmogo le batho ba mo lefelong leo ba ne ba le teng.+ Halofo ya bone e ne e eme fa pele ga Thaba ya Gerisime mme halofo e nngwe e eme fa pele ga Thaba ya Ebale+ (fela jaaka Moshe motlhanka wa ga Jehofa a ne a laetse pelenyana),+ gore go segofadiwe batho ba Iseraele. 34  Morago ga seno, o ne a balela mafoko otlhe a Molao+ kwa godimo, ditshegofatso+ le diphutso,+ go ya ka sotlhe se se neng se kwadilwe mo bukeng ya molao. 35  Mo mafokong otlhe a Moshe a neng a a laetse, go ne go se na lefoko lepe le Joshua a neng a se ka a le balela kwa godimo fa pele ga phuthego yotlhe ya Iseraele,+ go akaretsa basadi le bana le batswakwa+ ba ba neng ba nna* le bone.+

Dintlha Tse di Kwa Tlase

Kgotsa “rulaganya.”
Kgotsa “lebala le le kwa tlase.”
Kgotsa “mo setlhareng.”
Seheb., “tsamaya.”