Joshua 18:1-28

  • Lefatshe le le setseng le abiwa kwa Shilo (1-10)

  • Boswa jwa ga Benjamine (11-28)

18  Go tswa foo, phuthego yotlhe ya Baiseraele e ne ya phuthegela kwa Shilo,+ mme ba ne ba tlhoma tente ya bokopanelo gone,+ ka gonne jaanong lefatshe le ne le fentswe fa pele ga bone.+  Mme go ne go sa ntse go setse ditso di le supa tsa Baiseraele tse di neng di ise di abelwe boswa.  Ka jalo, Joshua o ne a raya Baiseraele a re: “Lo tlile go okaoka ka lobaka lo lo kae go tsena lo ya go rua lefatshe le Jehofa, Modimo wa borraalonamogolo a le lo neileng?+  Nnayang banna ba le bararo go tswa mo lotsong longwe le longwe gore ke ba rome; ba tswe ba ye go tsamaya mo lefatsheng mme ba dire mmapa wa lone go ya ka boswa jwa bone. Go tswa foo, ba boele kwa go nna.  Ba tshwanetse go le ikgaoganyetsa ka dikabelo di le supa.+ Juda o tla tswelela a le mo karolong ya gagwe ya naga ka fa borwa,+ mme ditlogolwana tsa ga Josefa di tla tswelela di le mo karolong ya tsone ya naga ka fa bokone.+  Mme lona, lo dire mmapa wa lefatshe gore e nne dikabelo di le supa lo bo lo di tlisa fano kwa go nna, mme ke tla latlhela bola+ fano ka ga lona fa pele ga ga Jehofa, Modimo wa rona.  Balefi bone ga ba na kabelo epe mo gare ga lona+ ka gonne boperesiti jwa ga Jehofa ke boswa jwa bone;+ mme Gada, Rubene le halofo ya lotso lwa ga Manase+ ba setse ba tsere boswa jwa bone ka fa letlhakoreng le le kwa botlhaba jwa Joredane, jo Moshe motlhanka wa ga Jehofa a neng a bo ba naya.”  Banna bao ba ne ba ipaakanyetsa go tsamaya, mme Joshua o ne a laela banna bano ba ba neng ba ya go dira mmapa wa lefatshe a re: “Tsamayang lo ye go ralala lefatshe mme lo dire mmapa wa lone lo bo lo boela kwa go nna, mme ke tla latlhela bola fano fa pele ga ga Jehofa mo Shilo+ ka ga lona.”  Foo banna bao ba ne ba tsamaya mme ba ralala lefatshe ba dira mmapa wa lone go ya ka metse gore e nne dikabelo di le supa, ba o kwala mo bukeng. Morago ga moo, ba ne ba boela kwa go Joshua kwa kampeng kwa Shilo. 10  Go tswa foo, Joshua o ne a latlhela bola ka ga bone kwa Shilo fa pele ga ga Jehofa.+ Ke gone kwa Joshua a neng a kgaoganyetsa Baiseraele lefatshe go ya ka dikabelo tsa bone.+ 11  Go ne ga tswa karolo e e abilweng ka bola ya lotso lwa ga Benjamine go ya ka malapa a bone, mme karolo ya naga e ba e abetsweng e ne e le fa gare ga karolo ya ga Juda+ le karolo ya ga Josefa.+ 12  Ka fa letlhakoreng le le ka fa bokone, molelwane wa bone o ne o simologa kwa Joredane, mme molelwane oo o ne o tlhatlogela kwa mokgokoloseng wa Jeriko+ kwa bokone o bo o tlhatlogela kwa thabeng go ya kwa ntlheng ya bophirima, mme o ne o fetela kwa nageng ya Bethe-afene.+ 13  Mme molelwane oo o ne o tswa koo o fetela kwa Luse, kwa mokgokoloseng o o kwa borwa jwa Luse, e leng Bethele;+ molelwane oo o ne o fologela kwa Atarothe-adare+ mo thabeng e e kwa borwa jwa Bethe-horona yo o Kwa Tlase.+ 14  Mme molelwane oo o ne wa tshwaiwa ka fa letlhakoreng le le kwa bophirima mme o ne wa dikologa wa ya ntlheng ya borwa o tswa mo thabeng e e lebaganeng le Bethe-horona o ya kwa borwa; o ne o felela kwa Kiriathe-baale, e leng Kiriathe-jearime,+ motse wa Juda. Leno ke letlhakore le le ka fa bophirima. 15  Letlhakore le le ka fa borwa le ne le simologa kwa bofelelong jwa Kiriathe-jearime, mme molelwane o ne o fetela kwa bophirima; o ne o ya kwa motsweding wa metsi a Nefetoa.+ 16  Molelwane oo o ne o fologela kwa bofelelong jwa thaba e e lebaganeng le Mokgatšha wa ga Morwa Hinoma,+ o o mo Mokgatšheng* wa Refaime+ go ya kwa bokone, mme o ne o fologela kwa Mokgatšheng wa Hinoma, o ya kwa mokgokoloseng wa Bajebuse+ kwa borwa o bo o fologela kwa Ene-rogele.+ 17  Mme o ne wa tshwaiwa go ya ntlheng ya bokone o bo o fetela kwa Ene-shemeshe go tswa foo o bo o ya kwa Gelilothe, e e fa pele ga thotana ya Adumime,+ mme o ne o fologela kwa lejeng+ la ga Bohane+ morwa Rubene. 18  Mme o ne o fetela kwa mokgokoloseng o o kwa bokone fa pele ga Araba o bo o fologela kwa Araba. 19  Molelwane oo o ne o fetela kwa mokgokoloseng o o kwa bokone wa Bethe-hogola,+ mme molelwane o ne wa felela kwa ntlheng e e ka fa bokone jwa Lewatle la Letswai,*+ kwa bofelelong jwa Joredane kwa borwa. Ono e ne e le molelwane o o ka fa borwa. 20  Mme Joredane e ne ya nna molelwane wa bone o o ka fa letlhakoreng la botlhaba. Jono e ne e le boswa jwa ditlogolwana tsa ga Benjamine go ya ka malapa a bone, go ya ka melelwane e e mo matlhakoreng otlhe a boswa joo. 21  Mme metse ya lotso lwa ga Benjamine go ya ka malapa a bone e ne e le: Jeriko, Bethe-hogola, Emeke-kesise, 22  Bethe-araba,+ Semaraime, Bethele,+ 23  Afime, Para, Ofera, 24  Kefera-amoni, Ofeni le Geba,+ metse e le 12 le metsana ya yone. 25  Gibeone,+ Rama, Beerothe, 26  Misepe, Kefira, Mosaha, 27  Rekeme, Irepeele, Tarala, 28  Sela,+ Ha-elefe, Jebuse, e leng Jerusalema,+ Gibea+ le Kiriathe, metse e le 14 le metsana ya yone. Jono e ne e le boswa jwa ditlogolwana tsa ga Benjamine go ya ka malapa a bone.

Dintlha Tse di Kwa Tlase

Kgotsa “mo Lebaleng le le Kwa Tlase.”
Go tewa Lewatle le le Suleng.