Esekiele 13:1-23

  • Molaetsa wa se se tla diragalelang baporofeti ba maaka (1-16)

    • Dipota tsa kalaka di tla wa (10-12)

  • Molaetsa wa se se tla diragalelang baporofeti ba maaka ba basadi (17-23)

13  Mme Jehofa o ne a bua le nna gape a re:  “Morwa motho, bolelela baporofeti ba Iseraele molaetsa wa katlholo,+ mme o reye ba ba itlhamelang dipolelelopele*+ o re, ‘Utlwang lefoko la ga Jehofa.  Seno ke se Morena Molaodimogolo Jehofa a se buang: “Ruri baporofeti ba ba dimatla ba tla lebana le ditlamorago tse di botlhoko, ba ba porofetang se se mo megopolong ya bone, mme nna ke sa ba bontsha ponatshegelo epe!+  Wena Iseraele, baporofeti ba gago ba tshwana le bophokoje ba ba mo maropeng.  Ga lo kitla lo ya kwa dikarolong tse di thubegileng mo dipoteng tsa maje gore lo di agele batho ba Iseraele sesha,+ gore Baiseraele ba tle ba tswelele ba eme mo tlhabanong mo letsatsing la ga Jehofa.”+  “Ba ba reng, ‘Jehofa o buile jaana,’ mme gone Jehofa a sa ba roma, ba bone diponatshegelo tse di seng boammaaruri e bile ba buile dipolelelopele tsa maaka, mme ba letetse gore lefoko la bone le diragale.+  A ga se ponatshegelo e e seng boammaaruri e lo e boneng e bile a ga lo a bua polelelopele ya maaka fa lo re, ‘Jehofa o buile jaana,’ mme gone ke sa bua sepe?”’  “‘Ka jalo, seno ke se Morena Molaodimogolo Jehofa a se buang: “‘E re ka lo buile se se seng boammaaruri e bile diponatshegelo tsa lona e le tsa maaka, ke tlhabana le lona,’ go bua Morena Molaodimogolo Jehofa.”+  Ke tla otlolola seatla sa me ke bo ke otlhaya baporofeti ba diponatshegelo tsa bone di seng boammaaruri le ba ba buang dipolelelopele tsa maaka.+ Ga ba kitla ba nna bangwe ba batho ba ke atamalaneng thata le bone; e bile ga ba kitla ba kwalwa mo lenaaneng la maina a batho ba Iseraele; e bile ga ba kitla ba boela kwa lefatsheng la Iseraele; mme lo tla tshwanelwa ke go itse gore ke nna Morena Molaodimogolo Jehofa.+ 10  Ke tla dira seno ka gonne ba timeditse batho ba me, ba re, “Go na le kagiso!” mme go se na kagiso.+ Fa go agiwa lobota lo lo kgaoganyang lo lo sa nonofang, ba lo dila ka kalaka.’*+ 11  “Bolelela ba ba dilang lobota loo ka kalaka gore lo tla wa. Go tla na pula e kgolo, go tla na sefako,* e bile diphefo tsa matsubutsubu di tla lo diga.+ 12  Mme fa lobota lo wa ba tla lo botsa ba re, ‘Kalaka ya lona e lo thusitse ka eng?’+ 13  “Ka jalo, seno ke se Morena Molaodimogolo Jehofa a se buang: ‘Ke tla dira gore diphefo tsa matsubutsubu di tsubutle ke shakgetse, ke tla nesa pula e kgolo ke galefile, e bile ke tla nesa sefako ke gaketse thata. 14  Ke tla thuba lobota lo lo neng lwa lo dila ka kalaka ke bo ke lo digela fa fatshe, mme motheo wa lone o tla senoga. Fa motse o wa, le lona lo tla nyelela; mme lo tla tshwanelwa ke go itse gore ke nna Jehofa.’ 15  “‘Fa ke tshololela tšhakgalo ya me mo loboteng le mo go ba ba neng ba lo dila ka kalaka, ke tla lo raya ke re: “Lobota ga lo tlhole lo le teng, le ba ba neng ba lo dila ga ba tlhole ba le teng.+ 16  Baporofeti ba Iseraele ga ba tlhole ba le teng, ba ba porofetelang Jerusalema le ba ba mmonelang diponatshegelo tsa kagiso, mme gone go se na kagiso,”’+ go bua Morena Molaodimogolo Jehofa. 17  “Mme wena morwa motho, leba kwa go bomorwadia batho ba gaeno ba ba itlhamelang dipolelelopele, mme o ba bolelele molaetsa wa katlholo. 18  Ba reye o re, ‘Seno ke se Morena Molaodimogolo Jehofa a se buang: “Ruri go latlhega basadi ba ba neng ba rokaganya mabanta a a rwalwang mo mabogong* le ba ba direlang ditlhogo tse di farologaneng masire a a rwalwang gore ba tsome matshelo* a batho! A lo tsoma matshelo* a batho ba me, mme lona lo leka go boloka matshelo* a lona? 19  A lo tla dira gore ke se ka ka nna boitshepo mo bathong ba me ka ntlha ya barele* ya dilekanyo tsa seatla le dithathana tsa senkgwe,+ lo bolaya ba ba sa tshwanelang go swa mme lo boloka ba ba sa tshwanelang go tshela, lo dira jalo ka go aketsa batho ba me, ba ba reetsang maaka a lona?”’+ 20  “Ka jalo, seno ke se Morena Molaodimogolo Jehofa a se buang: ‘Jaanong basadi ke lona, ga ke rate mabanta a lona a lo a dirisang go tsoma batho jaaka e kete lo tsoma dinonyane, mme ke tla a kgaola mo mabogong a lona ke bo ke golola batho ba lo ba tsomang jaaka e kete lo tsoma dinonyane. 21  Ke tla gagola masire a lona ke bo ke golola batho ba me mo seatleng sa lona, mme ga ba kitla ba tlhola ba nna sengwe se lo ka se tshwarang fa lo tsoma; mme lo tla tshwanelwa ke go itse gore ke nna Jehofa.+ 22  Gonne lo dirile gore mosiami a kgobege marapo ka ntlha ya maaka a lona+ mme nna ke sa mmakela matshwenyego,* e bile lo nonotshitse diatla tsa modirabosula+ gore a se ka a tlogela go dira dilo tse di bosula mme a tswelele a tshela.+ 23  Ka jalo, basadi ke lona ga lo kitla lo tlhola lo bona diponatshegelo tse di seng boammaaruri e bile ga lo kitla lo tlhola lo dira tiro ya boitseanape;+ mme ke tla golola batho ba me mo seatleng sa lona, mme lo tla tshwanelwa ke go itse gore ke nna Jehofa.’”

Dintlha Tse di Kwa Tlase

Kgotsa “ba ba porofetang go tswa mo pelong ya bone.”
Go tewa go agiwa lobota lo lo mo teng ga ntlo lo lo seng thata lo bo lo tshasiwa kalaka gore lo lebege lo nonofile.
Seheb., “mme lona sefako, lo tla wa.”
Go tewa mabanta a boselamose a a rwalwang mo dikgonong kgotsa mo mabogong.
Seheb., “ne′phesh.Bona Ditlhaloso Tsa Mafoko.
Seheb., “ne′phesh.Bona Ditlhaloso Tsa Mafoko.
Seheb., “ne′phesh.Bona Ditlhaloso Tsa Mafoko.
Semela se se tshwanang le korong.
Kgotsa “ke sa mo utlwisa botlhoko.”