Esekiele 37:1-28

  • Ponatshegelo ya mokgatšha wa marapo a a omeletseng (1-14)

  • Dithobane tse pedi di a kopanngwa (15-28)

    • Setšhaba se le sengwe se busiwa ke kgosi e le nngwe (22)

    • Kgolagano ya kagiso e tla nnela ruri (26)

37  Maatla a ga Jehofa a ne a le mo go nna, mme Jehofa o ne a ntsaya ka moya wa gagwe a bo a mpaya fa fatshe mo gare ga mokgatšha,+ mme o ne o tletse marapo.  O ne a dira gore ke a dikologe, mme ke ne ka lemoga gore go ne go na le marapo a mantsi thata a a gasameng mo mokgatšheng oo, mme a ne a omeletse thata.+  O ne a mpotsa jaana: “Morwa motho, a marapo ano a ka tshela?” Mme ke ne ka re: “Morena Molaodimogolo Jehofa, tota ke wena o itseng.”+  Ka jalo, o ne a nthaya a re: “Porofetela marapo ano, mme o a reye o re, ‘Lona marapo a a omeletseng, utlwang lefoko leno la ga Jehofa:  “‘Seno ke se Morena Molaodimogolo Jehofa a se bolelelang marapo ano: “Ke tla dira gore mohemo o tsene mo go lona, mme lo tla tshela.+  Ke tla tsenya mesifa le nama mo go lona, e bile ke tla lo apesa letlalo ke bo ke tsenya mohemo mo go lona, mme lo tla tshela; lo tla tshwanelwa ke go itse gore ke nna Jehofa.”’”  Foo ke ne ka porofeta fela jaaka ke ne ke laetswe. Fela fa ke porofeta, go ne ga utlwala modumo wa go tlharakana, mme marapo a ne a simolola go kopana mmogo.  Go tswa foo, ke ne ka bona mesifa le nama di tla mo go one, mme letlalo le ne la a apesa. Le fa go ntse jalo, go ne go sa ntse go se na mohemo mo go one.  Foo o ne a nthaya a re: “Porofetela phefo. Porofeta wena morwa motho, mme o reye phefo o re, ‘Seno ke se Morena Molaodimogolo Jehofa a se buang: “Wena phefo,* tlaa o tswa kwa dikarolong tse nnê, mme o budulele batho bano ba ba bolailweng, gore ba tle ba tshele.”’” 10  Ka jalo, ke ne ka porofeta fela jaaka a ne a ntaetse, mme mohemo* o ne wa tsena mo go bone, mme ba ne ba simolola go tshela ba bo ba ema ka dinao,+ e ne e le mophato o mogolo thata wa masole. 11  Foo o ne a nthaya a re: “Morwa motho, marapo ano ke batho botlhe ba Iseraele.+ Jaanong ba re, ‘Marapo a rona a omeletse, e bile tsholofelo ya rona e nyeletse.+ Re kgaotswe mo go sengwe le sengwe.’ 12  Ka jalo, porofeta mme o ba reye o re, ‘Seno ke se Morena Molaodimogolo Jehofa a se buang: “Ke tla bula mabitla a lona+ ke bo ke lo ntsha mo go one, lona batho ba me, mme ke tla lo tlisa mo lefatsheng la Iseraele.+ 13  Mme lo tla tshwanelwa ke go itse gore ke nna Jehofa fa ke bula mabitla a lona le fa ke lo ntsha mo go one, lona batho ba me.”’+ 14  ‘Ke tla tsenya moya wa me mo go lona, mme lo tla tshela,+ e bile ke tla dira gore lo nne mo lefatsheng la lona; mme lo tla tshwanelwa ke go itse gore nna Jehofa, ke buile e bile ke dirile seo,’ go bua Jehofa.” 15  Jehofa o ne a bua le nna gape a re: 16  “Mme wena morwa motho, tsaya thobane mme o kwale jaana mo go yone, ‘Ya ga Juda le ya batho ba Iseraele ba ba nang le ene.’*+ Go tswa foo, o tseye thobane e nngwe o bo o kwala jaana mo go yone, ‘Ya ga Josefa, thobane ya ga Eferaime, le botlhe ba Iseraele ba ba nang le ene.’*+ 17  Morago ga moo, o di pataganye gore e nne thobane e le nngwe fela mo seatleng sa gago.+ 18  Fa batho ba gaeno* ba go raya ba re, ‘A ga o kitla o re bolelela gore dilo tseno di kaya eng?’ 19  o ba reye o re, ‘Seno ke se Morena Molaodimogolo Jehofa a se buang: “Ke tla tsaya thobane ya ga Josefa, e e mo seatleng sa ga Eferaime, le ditso tsa Iseraele tse di nang le ene, mme ke tla di baya mo thobaneng ya ga Juda; ke tla dira gore di nne thobane e le nngwe fela,+ mme di tla nna thobane e le nngwe fela mo seatleng sa me.”’ 20  Dithobane tse o kwalang mo go tsone di tshwanetse go nna mo seatleng sa gago gore ba di bone. 21  “Go tswa foo, o ba reye o re, ‘Seno ke se Morena Molaodimogolo Jehofa a se buang: “Ke tla ntsha Baiseraele kwa ditšhabeng tse ba neng ba gasametse kwa go tsone, mme ke tla ba phutha go tswa kwa dikarolong tse di farologaneng ke bo ke ba tlisa mo lefatsheng la bone.+ 22  Ke tla dira gore ba nne setšhaba se le sengwe fela mo lefatsheng la bone,+ mo dithabeng tsa Iseraele, mme botlhe ba tla busiwa ke kgosi e le nngwe fela.+ Ga ba kitla ba tlhola ba nna ditšhaba tse pedi e bile ga ba kitla ba tlhola ba kgaoganngwa go nna magosi a mabedi.+ 23  Ga ba kitla ba tlhola ba iteswafatsa ka medingwana ya bone e e ferosang sebete* le ka ditiro tsa bone tse di makgapha le ka melato ya bone yotlhe.+ Ke tla ba golola mo ditirong tsa bone tsa go sa ikanyege tse di neng tsa dira gore ba leofe, mme ke tla ba itshekisa. Ba tla nna batho ba me, mme nna ke tla nna Modimo wa bone.+ 24  “‘“Motlhanka wa me Dafide o tla nna kgosi ya bone,+ mme botlhe ba tla nna le modisa a le mongwe fela.+ Ba tla tsamaya mo ditshwetsong tsa me tsa boatlhodi e bile ba tla ikobela melao ya me ka kelotlhoko.+ 25  Ba tla nna mo lefatsheng le ke neng ka le naya motlhanka wa me e bong Jakobe, lefatshe le borraalonamogolo ba neng ba nna kwa go lone,+ mme ba tla nna mo go lone ka bosakhutleng,+ bone le bana* ba bone le ditlogolwana tsa bone;+ mme motlhanka wa me Dafide o tla nna kgosana ya bone ka bosakhutleng.+ 26  “‘“Mme ke tla dira kgolagano ya kagiso le bone;+ kgolagano e ke e dirang le bone e tla nna e e nnelang ruri. Ke tla ba baya mo lefatsheng la bone ke bo ke dira gore ba nne bantsi+ e bile ke tla baya lefelo la me le le boitshepo mo go bone ka bosakhutleng. 27  Tente ya me* e tla nna le* bone, e bile ke tla nna Modimo wa bone, mme bone ba tla nna batho ba me.+ 28  Mme ditšhaba di tla tshwanelwa ke go itse gore nna, Jehofa, ke dira gore batho ba Iseraele ba nne boitshepo fa lefelo la me le le boitshepo le tla bo le le mo go bone ka bosakhutleng.”’”+

Dintlha Tse di Kwa Tlase

Kgotsa “mohemo; moya.”
Kgotsa “moya.”
Kgotsa “ba e leng balekane ba gagwe.”
Kgotsa “ba e leng balekane ba gagwe.”
Seheb., “bomorwa batho ba gaeno.”
Polelwana eno ka Sehebera e ka tswa e amana le lefoko le le kayang “boloko” mme e dirisitswe e le go bontsha letlhoo.
Seheb., “barwa.”
Kgotsa “Lefelo le ke nnang mo go lone; Legae la me.”
Kgotsa “mo godimo ga.”