Esekiele 4:1-17

  • Go bontshiwa gore Jerusalema e tlile go dikaganyediwa (1-17)

    • Molato o rwalwa malatsi a le 390 le malatsi a le 40 (4-7)

4  “Mme wena morwa motho, tsaya setena o bo o se baya fa pele ga gago. O gabe motse wa Jerusalema mo go sone.  O dire e kete o a o tlhasela,+ o age lobota go o dikologa,+ o dire thotana go o dikologa,+ o kampe go o dikologa gore o lwe le one o bo o beye dikota tse dikgolo tse di thubang dipota go o dikologa.+  Tsaya pane mme o e beye jaaka lobota lwa tshipi fa gare ga gago le motse. Go tswa foo, o lebise sefatlhego sa gago kwa go one, ka go dira jalo o tla bo o bontsha kafa motse oo o tla tlhaselwang ka gone. Seno ke sesupo mo bathong ba Iseraele.+  “Go tswa foo, o rapame ka letlhakore la molema o bo o baya molato wa batho ba Iseraele mo go wena.*+ O tla rwala molato wa bone malatsi otlhe a o tla a fetsang o rapame ka letlhakore leo.  Mme ke tla go naya malatsi a le 390, a a lekanang le dingwaga tsa molato wa bone,+ mme o tla rwala molato wa batho ba Iseraele.  O tshwanetse go a wetsa. “Go tswa foo, o rapame lekgetlo la bobedi, ka letlhakore la moja, mme o tla rwala molato wa batho ba Juda+ malatsi a le 40. Letsatsi le emela ngwaga, letsatsi le emela ngwaga, ke se ke se go neileng.  Mme o lebise sefatlhego sa gago kwa dithakong tse di agilweng go dikologa Jerusalema+ o menne lebogo la seaparo sa gago, mme o porofete gore o tla tlhaselwa.  “Ke tla go bofa ka megala gore o se ka wa kgona go pitikologela mo letlhakoreng le lengwe go fitlha o weditse malatsi a gago a go o tlhasela.  “Mme o tseye korong, barele,* dinawa tse dikima, letlhodi, lebêlêbêlê,* korong e e tlhabang mme o di tsenye mo selwaneng se le sengwe o bo o itirela senkgwe ka tsone. Gonne o tla se ja malatsi otlhe a o tla a fetsang o rapame ka letlhakore, malatsi a le 390.+ 10  O tla lekanya* dijo tsa bokete jwa dishekele di le 20* ka letsatsi o bo o di ja. O tla di ja ka dinako tse di tlhomilweng. 11  “Mme o tla nwa dikopi di le pedi fela tsa metsi.* O tla a nwa ka dinako tse di tlhomilweng. 12  “O tla ja senkgwe seo jaaka fa o ja senkgwe sa barele se se kgolokwe; o tla se besa ba ntse ba go lebile, o dirisa mantle a batho a a omileng go gotsa molelo.” 13  Jehofa o ne a tswelela a re: “Eno ke tsela e ka yone Baiseraele ba tla jang senkgwe sa bone se le leswe mo ditšhabeng tse ke tla ba phatlalaletsang kwa go tsone.”+ 14  Foo ke ne ka re: “E seng jalo, Morena Molaodimogolo Jehofa! Go tloga ke sa le mosha go fitlha jaanong, ga ke ise nke ke iteswafatse ka go ja nama ya phologolo e e fitlhetsweng e sule kgotsa ya phologolo e e garotsweng,+ e bile ga ke ise nke ke tsenye nama epe e e leswafetseng* mo molomong wa me.”+ 15  Ka jalo, o ne a nthaya a re: “Go siame, ke tla go letla gore o dirise dibi tsa dikgomo mo boemong jwa mantle a batho, mme o tla besa senkgwe sa gago mo go tsone.” 16  Go tswa foo, o ne a nthaya a re: “Morwa motho, jaanong ke senya mabolokelo a senkgwe* mo Jerusalema,+ mme ba tla ja senkgwe sa bone sa bokete jo bo lekanyeditsweng ba le mo matshwenyegong a magolo,+ e bile ba tla nwa metsi a bone a a lekanyeditsweng ba tshogile.+ 17  Seno se tla direga gore fa ba tlhoka senkgwe le metsi, ba tle ba lebane ba akabetse ba bo ba swe ka ntlha ya molato wa bone.

Dintlha Tse di Kwa Tlase

Seheb., “lone,” go tewa letlhakore la ga Esekiele.
Semela se se tshwanang le korong.
Semela se se tshwanang le korong se se nang le ditlhaka tse dinnye.
Kgotsa “kala.”
Mo e ka nnang 230 g. Bona Dintlha B14.
Seheb., “selekanyo sa nngwethataro (1/6) ya hine.” Mo e ka nnang 0,6 L. Bona Dintlha B14.
Kgotsa “bodileng.”
Seheb., “ke robaganya dithobane tsa senkgwe.” Gongwe go tewa dithobane tse di neng di dirisediwa go baya senkgwe.