ENOKU e dinte mirë ç’do të thoshte të ndiheshe vetëm. Ai ishte krejt ndryshe nga bashkëkohësit e tij. Ndër gjithë ata që jetuan në atë kohë, vetëm për të Bibla thotë: «Vazhdoi të ecte me Perëndinë e vërtetë.» Si arriti ta bënte këtë një njeri prej mishi e gjaku? Çfarë mësojmë nga guximi i tij?

Enoku eci me Perëndinë e vërtetë të paktën në dy mënyra. Së pari, nuk pranoi të bëhej si njerëzit e kohës së tij, që s’donin t’ia dinin për Perëndinë. Ai ishte brezi i shtatë, duke nisur nga Adami dhe Eva. Në kohën e Enokut, Adami ishte ende gjallë, ndonëse shumë i moshuar. (Shih tabelën «Nga patriarkët deri në ditët e gjykatësve».) Qëndrimi rebel i çiftit të parë e kishte infektuar gjithë familjen njerëzore. Djali i tyre, Kaini, kishte vrarë të vëllanë, Abelin, njeriun e parë me besim. Edhe disa pasardhës të Kainit ishin po aq mizorë, në mos më shumë. (Zan. 4:23, 24) Por Enoku tregoi guxim dhe nuk u ndikua nga qëndrimi i dhunshëm i asaj kohe. Ai mbeti njeri i mirë e paqësor, dhe kjo ia gëzonte zemrën Perëndisë.

Vite para se të lindte Enoku, njerëzit ‘kishin filluar të thërritnin emrin e Jehovait’. (Zan. 4:26) Me sa duket, po e bënin këtë jo për ta lëvduar, por në mënyrë blasfemuese. Enoku nuk pranoi të futej në të njëjtin kallëp, sepse e donte dhe e nderonte thellësisht emrin e shenjtë të Jehovait.

Mënyra e dytë si eci me Perëndinë Enoku, ishte duke përmbushur caktimin që i dha Jehovai. Për këtë i duhej edhe më shumë guxim, sepse kishte si caktim të shpallte një mesazh të fortë gjykimi kundër njerëzve të ligj. Mesazhi ishte ky: «Ja, Jehovai erdhi me dhjetëra mijë engjëjt e tij të shenjtë, që të ekzekutojë gjykimin kundër të gjithëve, si edhe të shpallë fajtorë tërë ata që shpërfillin Perëndinë për gjithë veprat e tyre të liga dhe për gjithë fjalët skandaloze që thanë kundër tij këta mëkatarë mospërfillës ndaj Perëndisë.»

E vure re që mesazhi ishte në kohën e shkuar, sikur Jehovai ta kishte sjellë tashmë gjykimin? Kjo s’linte pikë dyshimi se fjalët që shpalli Enoku, do të përmbusheshin me patjetër. Dhe mesazhi ishte goxha i fortë. Enoku tha se ata ‘e shpërfillnin Perëndinë’, ‘bënin vepra të liga’, thoshin ‘fjalë skandaloze’ dhe ishin «mëkatarë  mospërfillës». Ato fjalë duhet t’i kenë xhindosur bashkëkohësit e Enokut. Prapëseprapë, plot guxim ai nuk i hoqi asnjë presje mesazhit të Jehovait.

Si reaguan njerëzit? Bibla nuk e tregon, por lë të nënkuptohet se Enokut i kanosej një e keqe e madhe. Nga e dimë? Për të lexojmë: «Më pas, ai nuk ishte më, sepse Perëndia e mori.» Në ç’kuptim? Ka shumë të ngjarë që njerëzit e ligj ta kenë përndjekur Enokun ngaqë e urrenin. Por Jehovai e donte shumë. Ndaj, në vend që t’i linte t’i bënin keq a ta vritnin, e vuri në gjumin e vdekjes, që të mos vuante. Në këtë mënyrë, Enoku do të ishte i sigurt në kujtesën e Jehovait, ku askush nuk do t’i bënte keq.

Por para kësaj, Jehovai i bëri një dhuratë speciale. Bibla thotë: «Përpara se ta merrte Perëndia, [Enoku] mori dëshmi se kishte vërtet pëlqimin e tij.» Ndoshta me anë të një vegimi, Jehovai i tregoi ç’e ardhme e mrekullueshme e priste—një jetë plot paqe në tokën parajsore. Para se të binte në gjumin e vdekjes, Enoku ishte më se i sigurt për këtë: Jehovai e donte dhe e kishte shpërblyer për besimin e fortë dhe për guximin e patundur.

Lexoje këtë tregim në Bibël:

• Zanafilla 5:21-24

• Hebrenjve 11:5

• Juda 14, 15

Për diskutim:

Në cilat mënyra tregoi guxim Enoku?

 Gërmo më thellë

1. 1. Në ç’kuptim njerëzit filluan «të thërritnin emrin e Jehovait»? (Zan. 4:26; w01 15/9 29 ¶3)

   Përgjigjja

2. 2. Enoku ishte besniku i parë që mori një caktim. Çfarë caktimi? Si e përmbushi? (w01 15/9 31 ¶5)

   Përgjigjja

3. 3. Nga e dinte Enoku, madje para se të profetizonte, se guximi i tij do të sprovohej? (w06 1/10 19 ¶13-14) (Figura A)

   Përgjigjja

4. 4. Si do ta shpjegoje pse Enoku nuk shkoi në qiell, siç mendojnë disa? (Gjoni 3:13; Hebr. 11:5, 13)

   Përgjigjja

 Reflekto për mësimet

• Kur mund të na duhet më shumë guxim për të predikuar? Njësoj si Enoku, çfarë mund të na ndihmojë? (Figura B)

  Përgjigjja

• Si ndihet Jehovai kur ecim me të plot guxim? (Prov. 27:11; Hebr. 11:5)

  Përgjigjja

• Si mund ta imitosh guximin e Enokut?

  Përgjigjja

Zgjero këndvështrimin

• Çfarë mëson për Jehovain nga ky tregim?

  Përgjigjja

• Si lidhet ky tregim me qëllimin e Jehovait?

  Përgjigjja

• Për çfarë do ta pyesësh Enokun kur të ringjallet?

  Përgjigjja