Numbernan 4:1-49
4 Yehova a bisa Moises i Áròn:
2 “Tene un senso di e desendientenan* di Kóhat+ ku tin entre e desendientenan di Levi, segun nan famia i segun nan famianan parti di tata.*
3 Konta tur hòmber di 30 aña+ te ku 50 aña di edat+ ku ta forma parti di e grupo asigná pa traha na e tènt di reunion.+
4 E desendientenan di Kóhat tin un tarea masha sagrado na e tènt di reunion.+ Esaki ta nan tarea:
5 Ora ku e kampamentu ta kla pa bai un otro kaminda, Áròn i su yu hòmbernan mester bini den e tènt, kita e kortina di separashon+ i tapa e arka+ di Testimonio kuné.
6 Ademas, nan mester tapa e arka ku un tela di kueru di kachó di awa, habri un paña blou riba dje i prepará pa karg’é usando e baranan.*+
7 Riba e mesa di pan di ofrenda+ tambe nan mester habri un paña blou. Nan mester pone e skalchinan, e kòpinan, e kònchinan i e kanikanan ku ta usa pa ofrenda di bibida+ riba e mesa. Nan mester pone e pannan di ofrenda+ tambe riba e mesa.
8 Nan mester habri un paña kòrá bibu riba e kosnan ei, tapa nan* ku un tela di kueru di kachó di awa i prepará pa karga e mesa usando e baranan.+
9 Despues, nan mester kohe un paña blou i tapa e kándelar+ ku ta ser usá pa iluminashon, e kándelar su lampinan,+ su tannan pa tene mecha,* su panchinan pa karga mecha kimá*+ i tur su pòchinan ku zeta ku ta ser usá pa ten’é sendé.
10 Nan mester lora e kándelar i tur su artíkulonan di uso den un tela di kueru di kachó di awa i pone nan riba un pida palu largu pa transportá nan.
11 Nan mester habri un paña blou riba e altar di oro,+ tap’é ku un tela di kueru di kachó di awa i prepará pa karg’é usando e baranan.+
12 Anto nan mester kohe tur e artíkulonan+ ku nan ta usa regularmente ora nan ta sirbi den e lugá santu, pone nan den un paña blou, lora nan den un tela di kueru di kachó di awa i pone nan riba un pida palu largu pa transportá nan.
13 Nan mester kita e shinishinan* for di riba e altar pa kima ofrenda+ i habri un paña di lana koló püs* riba e altar.
14 Riba dje, nan mester pone tur e artíkulonan ku nan ta usa ora nan ta sirbi na e altar, esta, e panchinan pa karga karbon sendé,* e fòrkinan, e skòpnan, e kònchinan, sí, tur e artíkulonan di uso di e altar.+ Nan mester habri un tela di kueru di kachó di awa riba e kosnan ei i prepará pa karga e altar usando e baranan.+
15 Ora ku e kampamentu ta kla pa bai, Áròn i su yu hòmbernan mester tapa e kosnan di e lugá santu+ i tur e artíkulonan ku ta pertenesé na e lugá santu. Despues ku nan kaba, e desendientenan di Kóhat mester drenta pa karga e kosnan ei,+ pero nan no tin mag di mishi ku e kosnan di e lugá santu pa nan no muri.+ Esei ta e kosnan di e tènt di reunion ku e desendientenan di Kóhat mester karga.
16 Eleazar,+ yu hòmber di Saserdote Áròn, ta e persona responsabel pa zeta pa e lampinan,+ sensia ku ta hole dushi,+ ofrenda di grano ku ta ser ofresé regularmente i e zeta santu.+ E tin ku supervisá e trabounan ku ta tuma lugá na e tabernakel i kontrolá tur loke tin den e tabernakel, inkluso e artíkulonan di uso di e lugá santu.”
17 Yehova a sigui bisa Moises i Áròn:
18 “Sòru pa e famianan kohatita,+ ku ta di e tribu di Levi, no ser destruí.
19 P’esei, kumpli ku boso responsabilidatnan pa e kohatitanan por keda na bida, sí, pa nan no muri, ora nan yega serka di e kosnan masha sagrado.+ Áròn i su yu hòmbernan mester bai den e tènt di reunion i mustra kada kohatita kiko ta su tarea i kiko e mester karga.
20 E kohatitanan no tin mag di drenta i mira e kosnan santu. Nan no tin mag di wak e kosnan ei ni sikiera pa un ratu so, sino nan ta muri.”+
21 Yehova a bisa Moises:
22 “Tene un senso di e desendientenan di Gèrsòn,+ segun nan famia i segun nan famianan parti di tata.
23 Bo mester registrá tur hòmber di 30 aña te ku 50 aña di edat ku ta forma parti di e grupo asigná pa sirbi na e tènt di reunion.
24 Esakinan ta e kosnan ku e famianan gersonita ta asigná pa transportá:+
25 Nan mester karga e telanan di e tabernakel,+ e tènt di reunion i su telanan pa tap’é, e tela di kueru di kachó di awa ku tin riba dje,+ e kortina* di entrada di e tènt di reunion,+
26 e kortinanan rònt di e plenchi,+ e kortina* di entrada di e plenchi+ ku ta rònt di e tabernakel i e altar, e kabuyanan, tur e hèrmèntnan i tur loke ta ser usá pa sirbi na tabernakel. Esei ta tarea di e gersonitanan.
27 Áròn i su yu hòmbernan mester supervisá tur tarea di e gersonitanan+ i tur loke e gersonitanan mester karga. Boso mester duna nan e tarea di transportá tur e kosnan ei.
28 Esei ta e tarea ku e famianan gersonita tin ku hasi na e tènt di reunion.+ Nan lo traha bou di guia di Ítamar,+ yu hòmber di Saserdote Áròn.
29 Pa loke ta e desendientenan di Merari,+ bo mester registrá nan segun nan famia i segun nan famianan parti di tata.
30 Bo mester registrá tur hòmber di 30 aña te ku 50 aña di edat ku ta forma parti di e grupo asigná pa sirbi na e tènt di reunion.
31 Pa loke ta nan sirbishi na e tènt di reunion, nan tin ku transportá+ lo siguiente: e erantenan+ di e tabernakel i e tabernakel su baranan,+ su pilánan+ i su basenan;+
32 e pilánan+ ku ta rònt di e plenchi i nan basenan,+ nan stakanan+ i nan kabuyanan, huntu ku tur hèrmènt i tur loke ta nesesario pa hasi e trabou akí. Boso mester asigná kada merarita loke e tin ku transportá.
33 Esei ta e tareanan ku e famianan desendiente di Merari+ tin ku hasi na e tènt di reunion, bou di guia di Ítamar, yu di Saserdote Áròn.”+
34 Anto Moises i Áròn i e kabesantenan di e pueblo+ a registrá e desendientenan di Kóhat,+ segun nan famia i segun nan famianan parti di tata.
35 Nan a registrá tur hòmber di 30 aña te ku 50 aña di edat ku a forma parti di e grupo asigná pa sirbi na e tènt di reunion.+
36 Na tur, nan a registrá 2.750 hòmber segun nan famia.+
37 Eseinan tabata e hòmbernan registrá di e famianan kohatita, sí, tur hòmber ku tabata sirbi na e tènt di reunion. Moises i Áròn a registrá nan di akuerdo ku e òrdu ku Yehova a duna pa medio di Moises.+
38 E desendientenan di Gèrsòn+ a ser registrá segun nan famia i segun nan famianan parti di tata.
39 A registrá tur hòmber di 30 aña te ku 50 aña di edat ku a forma parti di e grupo asigná pa sirbi na e tènt di reunion.
40 Na tur, nan a registrá 2.630 hòmber segun nan famia i segun nan famianan parti di tata.+
41 E hòmbernan ei tabata e hòmbernan registrá di e famianan desendiente di Gèrsòn, sí, tur hòmber ku tabata sirbi na e tènt di reunion. Moises i Áròn a registrá nan di akuerdo ku e òrdu di Yehova.+
42 E desendientenan di Merari a ser registrá segun nan famia i segun nan famianan parti di tata.
43 A registrá tur hòmber di 30 aña te ku 50 aña di edat ku a forma parti di e grupo asigná pa sirbi na e tènt di reunion.+
44 Na tur, nan a registrá 3.200 hòmber segun nan famia.+
45 E hòmbernan ei tabata e hòmbernan registrá di e famianan desendiente di Merari ku Moises i Áròn a registrá di akuerdo ku e òrdu ku Yehova a duna pa medio di Moises.+
46 Moises i Áròn i e kabesantenan di Israel a registrá tur e levitanan akí segun nan famia i segun nan famianan parti di tata;
47 nan tabatin entre 30 i 50 aña di edat, i nan tur tabata asigná pa sirbi na e tènt di reunion i pa karga e kosnan di e tènt.+
48 Na tur, nan a registrá 8.580 hòmber.+
49 Nan a ser registrá di akuerdo ku e òrdu ku Yehova a duna pa medio di Moises, sí, kada hòmber segun e tarea ku el a haña i segun loke e tabatin ku transportá. Nan a ser registrá presis manera Yehova a ordená Moises.
Nota
^ Òf: “i segun nan kasnan paterno; i segun nan antepasadonan.”
^ Òf: “e yu hòmbernan.”
^ Òf: “i prepará e baranan pa karg’é.”
^ Òf: “tap’é.” Esta, e mesa.
^ Lit.: “pa karga kandela.”
^ Òf: “shinishi yen di vèt.” Esta, shinishi mesklá ku vèt di sakrifisio.
^ Òf: “koló lila.”
^ Òf: “skrin.”
^ Òf: “skrin.”
