Numbernan 18:1-32
18 Anto Yehova a bisa Áròn: “Abo, bo yu hòmbernan i bo desendientenan lo karga e konsekuensianan si un hende kibra kualke regla di e lugá santu.+ Ademas, abo i bo yu hòmbernan lo karga e konsekuensianan si un hende kibra kualke regla di boso sirbishi komo saserdote.+
2 Laga bo ruman hòmbernan di e tribu di Levi, e tribu di bo antepasadonan, tambe bini pa nan por traha huntu ku bo i yuda abo+ i bo yu hòmbernan dilanti di e tènt di Testimonio.+
3 Nan tin ku hasi e trabou ku bo duna nan, i nan tin ku hasi tur e tareanan den e tènt.+ Pero nan no tin mag di yega serka di e altar* ni serka di e artíkulonan di uso di e lugá santu, sino tantu nan komo boso lo muri.+
4 Nan lo traha huntu ku bo i kumpli ku tur nan asignashonnan relashoná ku sirbishi di e tènt di reunion. Ademas, niun persona ku no ta outorisá* no tin mag di yega serka di boso.+
5 Boso mester kumpli ku boso responsabilidatnan relashoná ku e lugá santu+ i e altar+ pa mi furia+ no bolbe lanta kontra e pueblo di Israel.
6 Mi a skohe boso rumannan, esta, e levitanan, for di tur e israelitanan; mi ta duna boso nan komo regalo.+ Nan lo pertenesé na ami, Yehova, i nan lo traha na e tènt di reunion.+
7 Abo ku bo yu hòmbernan ta responsabel pa e tareanan di saserdote ku tin di haber ku e altar i boso ta responsabel pa loke tin tras di e kortina.*+ Esei ta boso sirbishi.+ Mi a duna boso e sirbishi di saserdote komo un regalo; si kualke persona ku no ta outorisá* yega serka di e lugá santu, mester mat’é.”+
8 Yehova a sigui bisa Áròn: “Mi mes a pone bo na enkargo di e kontribushonnan ku e israelitanan ta duna mi.+ Mi ta duna abo i bo yu hòmbernan un parti di tur e kosnan santu ku e israelitanan duna komo kontribushon. Esei ta un areglo permanente pa boso.+
9 For di e ofrendanan ku ta ser kimá i ku ta masha sagrado, esaki lo ta pa boso: tur ofrenda ku nan hasi, inkluso e ofrendanan di grano,+ e ofrendanan pa piká+ i e ofrendanan pa kulpa+ ku nan trese pa mi. E ofrendanan ei ta algu masha sagrado pa bo i pa bo yu hòmbernan.
10 Boso mester kome nan na un lugá masha santu.+ Tur hende hòmber entre boso tin mag di kome nan. E ofrendanan ei mester ta algu santu pa boso.+
11 Esakinan tambe ta pa boso: e regalonan ku e israelitanan duna komo kontribushon+ i tur nan ofrendanan ku nan move bai bini.+ Mi ta duna abo, bo yu hòmbernan i bo yu muhénan tur e kosnan ei. Esei ta un areglo permanente pa boso.+ Tur persona puru den bo kas tin mag di kome nan.+
12 Mi ta duna bo e promé frutanan*+ ku nan ta duna ami,+ Yehova: e mihó zeta, e mihó biña nobo i e mihó grano.
13 E promé frutanan hechu di tur loke nan tera ta produsí ku nan trese pa ami, Yehova, ta pa bo.+ Tur persona puru den bo kas tin mag di kome nan.
14 Tur kos na Israel ku ta dediká na Dios* lo bira di bo.+
15 Tur promé yu ku nase di tur ser bibu,*+ ku e israelitanan ofresé na ami, Yehova, lo bira di bo, sea ta promé yu di hende òf di bestia. Pero pa e promé yu di hende i pa e promé yu di bestia impuru,* bo mester aseptá un preis di reskate.+
16 Ora e promé yu ku nase tin mas ku un luna, bo mester aseptá e preis di reskate p’e, esta, e balor stipulá di 5 siklo* di plata,+ segun e siklo ofisial di e lugá santu.* (Esei ta 20 gera.*)
17 Solamente pa e promé yu machu di baka, di karné òf di kabritu, bo no tin mag di aseptá un preis di reskate.+ Nan ta santu. Bo mester sprengu nan sanger riba e altar,+ i bo mester laga nan vèt kima i saka huma komo un ofrenda ku ta ser kimá; holó di e ofrenda ta agradabel pa Yehova.+
18 E karni ta pa boso. E karni lo ta pa boso, meskos ku e pechu di e ofrenda ku boso ta move bai bini. E pia drechi tambe ta pa boso.+
19 Tur e kontribushonnan sagrado ku e israelitanan duna ami, Yehova,+ mi ta duna abo, bo yu hòmbernan i bo yu muhénan; esei ta un areglo permanente pa boso.+ Ami, Yehova, ta sera un pakto permanente* ku abo i bo desendientenan.”
20 Yehova a sigui bisa Áròn: “Lo bo no tin herensia na Israel, ni lo bo no haña pida tereno entre e israelitanan.+ Ami lo pèrkurá pa bo nesesidatnan* na Israel.+
21 Tende Áròn, mi ta duna e yunan di Levi tur désimo parti+ di loke ta ser produsí na Israel komo nan porshon,* komo kompensashon pa nan sirbishi, sí, nan sirbishi na e tènt di reunion.
22 E pueblo di Israel no tin mag di yega serka di e tènt di reunion mas. Si nan hasi esei, nan lo peka i muri.
23 E levitanan mester kumpli ku e sirbishi di e tènt di reunion, i nan ta e hendenan ku lo karga konsekuensia di e fayonan ku e pueblo kometé+ relashoná ku e lugá santu. Esaki ta un mandamentu permanente durante tur boso generashonnan: E levitanan no tin mag di haña herensia* entre e israelitanan.+
24 Pues, e désimo parti di e kontribushonnan ku e pueblo ta duna ami, Yehova, mi ta duna e levitanan komo nan porshon. Ta p’esei mi a bisa: ‘E levitanan no tin mag di haña herensia+ entre e israelitanan.’”
25 Anto Yehova a bisa Moises:
26 “Bo tin ku bisa e levitanan: ‘Boso lo haña désimo parti serka e israelitanan, i mi ta duna boso esei komo boso porshon.+ I for di e désimo parti ei, boso mester duna Yehova un désimo parti komo kontribushon.+
27 Dios lo konsiderá e kontribushon ei komo grano, biña òf zeta ku boso mes a produsí.
28 Di e manera ei, boso tambe mester duna Yehova un kontribushon for di tur désimo parti ku boso haña serka e israelitanan. Esei boso tin ku duna Saserdote Áròn komo kontribushon na Yehova.
29 For di tur regalo ku boso haña, boso mester duna e mihó parti komo kontribushon na Yehova.+ Boso kontribushon ta algu santu.’
30 I bisa e levitanan: ‘Ora boso ta duna e mihó parti di e regalonan ei, Dios lo konsiderá esei komo si fuera ta grano, biña òf zeta ku boso a produsí nan ta.
31 Boso i boso hendenan di kas tin mag di kome loke resta di e kosnan ku e israelitanan a duna boso. Boso tin mag di kome nan kaminda boso ke. E kosnan ei ta boso salario pa boso sirbishi na e tènt di reunion.+
32 Tanten ku boso ta duna e mihó parti di e regalonan ei, boso lo no peka den e asuntu akí. Boso no tin mag di hasi mal uso di e kosnan santu di e israelitanan; si boso hasi esei, boso lo muri.’”+
Nota
^ Evidentemente, esaki ta referí na e altar pa kima ofrenda.
^ Lit.: “niun hende straño.” Esta, hende ku no ta di famia di Áròn.
^ Lit.: “kualke hende straño.” Esta, hende ku no ta di famia di Áròn.
^ Òf: “produktonan.”
^ Es desir, tur loke tabata sagrado pa Dios debí ku hende a dediká e kosnan ei na Dios pa semper. I nan no por a kumpra e kosnan ei bèk.
^ Lit.: “di tur karni.”
^ Esta, bestia ku hende no por a ofresé komo sakrifisio na Dios.
^ Òf: “segun e siklo santu.”
^ Lit.: “pakto di salu.” Esta, un pakto permanente i inkambiabel.
^ Lit.: “Ami ta bo porshon.” Òf: “Ami ta bo porshon i bo herensia.”
^ Lit.: “herensia.”
^ Òf: “tereno; teritorio.”
