Numbernan 36:1-13
-
Lei di matrimonio pa hende muhé ku ta heredero (1-13)
36 E kabesnan di famia ku tabata desendiente di Gálad (Nan ta di e famianan di e yu hòmbernan di Yósef) a bai papia ku Moises i ku e kabesantenan, esta, ku e kabesnan di famia di e israelitanan. Gálad tabata yu hòmber di Makir+ i ñetu di Mánases.
2 Nan a bisa: “Yehova a manda mi shon repartí e pais pa medio di tiramentu di lòt.+ Asina ei, e israelitanan por haña nan herensia. Ademas, Yehova a manda mi shon duna e herensia di nos ruman hòmber Zelófehad na su yu muhénan.+
3 Pero si e mucha muhénan kasa ku hòmber di un otro tribu di Israel, e tereno di e mucha muhénan lo ser kitá for di e herensia di nos antepasadonan. I e tereno ei lo bira parti di e herensia di e tribu ku e mucha muhénan ta bai pertenesé na dje. Pues, nos lo pèrdè un parti di e herensia ku nos a haña pa medio di tiramentu di lòt.
4 I ora ku Aña di Libertat*+ yega pa e pueblo di Israel, e herensia di e mucha muhénan lo bira definitivamente parti di e herensia di e tribu ku nan ta pertenesé na dje e tempu ei. Di e manera ei, nos lo pèrdè un parti di e herensia di e tribu di nos antepasadonan.”
5 Anto riba òrdu di Yehova, Moises a bisa e israelitanan: “E tribu di e yu hòmbernan di Yósef tin rason.
6 Esaki ta e mandamentu ku Yehova a duna pa e yu muhénan di Zelófehad: ‘Nan por kasa ku ken ku nan ke, basta ta ku un hende di e tribu di nan tata.
7 Niun herensia di e israelitanan no tin mag di pasa pa un otro tribu. E israelitanan mester keda ku herensia di e tribu di nan antepasadonan.
8 I tur yu muhé ku tin un herensia entre e tribunan di Israel mester kasa ku un hòmber di e tribu di nan tata.+ Asina, e israelitanan por keda ku herensia di nan antepasadonan.
9 Niun herensia di e israelitanan no tin mag di pasa pa un otro tribu, pasobra kada tribu di Israel mester keda ku su propio herensia.’”
10 E yu muhénan di Zelófehad a hasi manera Yehova a bisa Moises.+
11 Pues, Mahla, Tirsa, Hogla, Milka i Noa, esta, e yu muhénan di Zelófehad,+ a kasa ku yu hòmber di e ruman hòmbernan di nan tata.
12 Nan a kasa ku hòmber di e famia di Mánases, yu hòmber di Yósef, pa asina nan herensia keda den e tribu di nan tata.
13 Eseinan ta e mandamentunan i e leinan ku Yehova a duna e israelitanan pa medio di Moises den e sabananan di Móab, banda di riu Yordan, enfrente di Yériko.+
Nota
^ Òf: “Aña di Hubileo.”
