Numbernan 12:1-16
12 Awor, Míriam i Áròn a kuminsá kritiká Moises pa motibu di e señora di Kus ku e tabata kasá kuné.+
2 Nan tabata bisa: “Ta via Moises so Yehova a papia antó? E no a papia via nos tambe?”+ I Yehova tabata skucha nan.+
3 Moises tabata e hòmber di mas mansu*+ riba tera.
4 Diripiente, Yehova a bisa Moises, Áròn i Míriam: “Boso tres bai na e tènt di reunion.” Pues, nan tres a bai einan.
5 I Yehova a baha den e pilá di nubia,+ para na entrada di e tènt i yama Áròn i Míriam. Anto nan dos a bai mas serka.
6 Anto el a bisa nan: “Por fabor, tende loke mi ta bisa boso. Si tabatin un profeta di Yehova entre boso, lo mi a lag’é sa ta ken mi ta den un vishon,+ i lo mi a papia kuné den un soño.+
7 Pero ku mi sirbidó Moises, mi no a hasi esei! Mi a konfi’é ku henter mi pueblo.*+
8 Kuné, mi ta papia kara kara,*+ palabra kla i sin charada. I e ta mira presensia di Yehova. Kon bini boso ta tribi di kritiká mi sirbidó Moises?”
9 Pues, Yehova tabata furioso riba nan, i el a bai laga nan.
10 E nubia a kita for di riba e tènt, i mesora Míriam a haña lepra. El a keda blanku blanku manera sneu.+ Áròn a bira wak Míriam, i el a mira ku Míriam a haña lepra.+
11 Mesora Áròn a bisa Moises: “Mi shon, mi ta roga bo! Por fabor, no laga nos ser kastigá pa e piká akí. Nos a hasi kos di bobo!
12 Por fabor, no laga Míriam keda manera un yu ku a nase morto i ku su karni ta mitar putrí!”*
13 Pues, Moises a kuminsá sklama na Yehova: “O Dios, por fabor, kura Míriam! Kur’é, por fabor!”+
14 Yehova a kontestá Moises: “Si ta su tata a skupié den su kara, lo e no a karga su bèrgwensa* pa shete dia? Lag’é pasa shete dia den karentena pafó di e kampamentu.+ Despues, e tin mag di bini bèk paden.”
15 Pues, nan a tene Míriam shete dia den karentena pafó di e kampamentu.+ E pueblo no a sigui ku nan biahe sino ta te ora ku Míriam a bini bèk den e kampamentu.
16 E ora ei, e pueblo a sali for di Hazeròt+ i establesé nan kampamentu den desierto di Paran.+
