Numbernan 16:1-50
16 Kore+ a djòin Dátan i Abiram, e yu hòmbernan di Éliab,+ i Òn, yu hòmber di Pelèt, den un rebelion. Kore tabata yu hòmber di Ízar,+ ñetu di Kóhat+ i bisañetu di Levi.+ Dátan, Abiram i Òn tabata desendiente di Ruben.+
2 Nan a lanta kontra Moises, huntu ku 250 israelita ku tabata kabesante di e pueblo,* representante di e kongregashon i hòmber prominente.
3 Pues, nan a bini huntu; nan a bai serka Moises i Áròn i bisa nan:+ “Nos ta fadá di boso! Henter e pueblo ta santu,+ i Yehova ta meimei di e pueblo.+ Dikon antó boso mester halsa boso mes riba e kongregashon di Yehova?”
4 Ora Moises a tende esei, mesora el a kai na rudia i bùig te na suela.
5 Anto el a bisa Kore i tur e hendenan ku tabata apoyá Kore: “Mañan mainta, Yehova lo laga nos sa ken ta pertenesé na dje,+ ken ta santu i ken tin mag di yega serka dje.+ I e persona ku e skohe+ tin mag di yega serka dje.
6 Kore, abo i tur e hendenan ku ta apoyá bo+ mester hasi lo siguiente: Kohe panchi pa karga karbon sendé.*+
7 Mañan, pone karbon sendé i sensia aden dilanti di Yehova, i e hòmber ku Yehova skohe+ ta e persona santu. Yunan di Levi,+ boso a hasi di mas!”
8 Moises a bisa Kore: “Yunan di Levi, skucha, por fabor.
9 Yehova, Dios di Israel, a separá boso for di e pueblo di Israel,+ i el a permití boso yega serka dje. El a nombra boso pa rindi sirbishi na su tabernakel i pa para dilanti di e israelitanan pa sirbi nan.+ Esei no ta basta pa boso?*
10 El a laga boso yega serka dje huntu ku tur boso rumannan, e yu hòmbernan di Levi. Awor boso ke ta saserdote tambe?+
11 Bon mirá, abo i tur e hendenan ku a reuní akinan i ku ta apoyá bo ta lantando kontra Yehova. Kiko Áròn a hasi ku boso ta kritik’é?”+
12 Mas despues, Moises a manda yama Dátan i Abiram,+ e yu hòmbernan di Éliab, pero nan a bisa: “Nos no ta bini!
13 No ta basta ku bo a saka nos for di un pais ku tabata produsí lechi i stropi di abeha na abundansia pa laga nos muri den desierto?+ Anto awor, bo ke manda riba nos tambe?*
14 Bo no a hiba nos na niun pais ku ta produsí lechi i stropi di abeha na abundansia,+ ni bo no a duna nos niun kunuku ni plantashon di wendrùif komo herensia. Akaso bo ke pa e pueblo sigui bo siegamente?* Nos no ta bini!”
15 Moises a rabia mashá, i el a bisa Yehova: “No aseptá nan ofrenda di grano. Mi no a kita ni un buriku for di nan, ni mi no a perhudiká niun di nan.”+
16 Moises a bisa Kore: “Presentá mañan dilanti di Yehova, abo i tur hende ku ta apoyá bo, i Áròn tambe.
17 Kada hende mester kohe su panchi pa karga karbon sendé i pone sensia aden, i kada hende tin ku bini ku su panchi dilanti di Yehova. Na tur, nan lo bini ku 250 panchi pa karga karbon sendé. Anto abo i Áròn tambe mester tin boso panchi.”
18 Pues, kada hende a kohe su panchi i pone karbon sendé i sensia aden, i nan a bai para na entrada di e tènt di reunion huntu ku Moises i Áròn.
19 Ora Kore a reuní e hòmbernan ku tabata apoy’é+ na entrada di e tènt di reunion, henter e pueblo a mira Yehova su presensia briante.*+
20 E ora ei, Yehova a bisa Moises i Áròn:
21 “Separá boso for di e grupo akí pa mi por kaba ku nan den un fregá di wowo.”+
22 Anto nan a kai na rudia ku nan kara te na suela i bisa: “O Dios, abo ku ta duna bida na tur hende,*+ bo ta laga piká di un hende pone bo rabia ku henter e pueblo?”+
23 Yehova a bisa Moises:
24 “Bisa e pueblo: ‘Hala for di e tèntnan di Kore, di Dátan i di Abiram!’”+
25 Moises a lanta bai serka Dátan i Abiram, i e ansianonan+ di Israel a bai huntu kuné.
26 Moises a bisa e pueblo: “Por fabor, hala leu for di e tèntnan di e hòmbernan malbado akí i no mishi ku nada ku ta pertenesé na nan pa boso no ser destruí pa motibu di nan piká.”
27 Mesora nan a hala leu for di e tèntnan di Kore, di Dátan i di Abiram. Dátan i Abiram a sali pafó i bin para na entrada di nan tènt, huntu ku nan esposanan i nan yunan.
28 E ora ei, Moises a bisa: “Asin’akí boso lo sa ku ta Yehova a manda mi hasi tur e kosnan akí i ku mi no a hasi nada riba mi mes:*
29 Si e hendenan akí muri un morto natural meskos ku tur hende i si nan haña mesun kastigu ku tur hende, no ta Yehova a manda mi.+
30 Pero si Yehova hasi algu ekstraordinario ku nan i tera habri* i guli nan huntu ku tur loke ta pertenesé na nan i nan baha bibu den Graf,* boso lo sa sigur ku e hendenan akí a falta Yehova rèspèt.”
31 Manera el a kaba di papia e palabranan ei, tera a habri.+
32 Sí, tera a habri* i guli nan, nan famianan, tur hende ku tabata pertenesé na Kore+ i tur nan propiedatnan.
33 Asina, nan i tur hende ku tabata pertenesé na nan a baha bibu den Graf,* i tera a tapa nan. Pues, nan a disparsé for di e kongregashon.+
34 Ora ku tur e israelitanan ku tabata pará rònt di nan a tende kon nan tabata grita, nan a hui bai, pasobra nan tabata bisa: “Un bes akí tera ta guli nos tambe!”
35 Anto kandela a sali for di Yehova+ i kaba ku e 250 hòmbernan ku tabata ofresé sensia.+
36 Anto Yehova a bisa Moises:
37 “Bisa Eleazar, yu di Saserdote Áròn, saka e panchinan pa karga karbon sendé+ for di e kandela, pasobra e panchinan ei ta santu. Bis’é tambe ku e mester plama e karbonnan sendé leu for di einan.
38 Mester usa e panchinan pa karga karbon sendé di e hòmbernan ku a peka, i ku a paga pa esei ku nan bida,* pa traha plachi di metal fini pa fura e altar kuné.+ E hòmbernan a bini ku e panchinan dilanti di Yehova, i e panchinan ei a bira santu. E plachinan mester sirbi komo un señal di spièrtamentu pa e israelitanan.”+
39 Pues, Saserdote Eleazar a kohe e panchinan di koper pa karga karbon sendé ku e hòmbernan ku a ser kimá a bini kuné, i el a bati nan hasi nan plat pa fura e altar kuné.
40 El a hasi manera Yehova a bisa pa medio di Moises. Esei a sirbi komo un rekordatorio pa e israelitanan ku niun persona ku no ta outorisá,* esta, niun hende ku no ta desendiente di Áròn, no tin mag di yega serka pa kima sensia dilanti di Yehova+ pa no pasa ku niun hende loke a pasa ku Kore i ku e hendenan ku tabata apoy’é.+
41 Su siguiente dia, henter e pueblo di Israel a kuminsá akusá Moises i Áròn,+ bisando: “Boso dos a mata e pueblo di Yehova.”
42 Ora e pueblo ku a lanta kontra Moises i Áròn a wak den direkshon di e tènt di reunion, nan a mira ku e nubia a tapa e tènt i ku Yehova su presensia briante a aparesé.+
43 Moises i Áròn a bai para dilanti di e tènt di reunion,+
44 i Yehova a bisa Moises:
45 “Boso sali bai for di meimei di e pueblo akí pa mi kaba ku nan den un fregá di wowo.”+ E ora ei, nan dos a kai na rudia ku nan kara te na suela.+
46 Anto Moises a bisa Áròn: “Kohe e panchi pa karga karbon sendé i pone karbon di e altar+ i sensia aden, i bai lihé serka e pueblo i purba di haña pordon pa nan piká,*+ pasobra Yehova su furia a lanta. E hendenan a kuminsá muri!”*
47 Mesora Áròn a kohe e panchi, manera Moises a bis’é, i el a kore bai meimei di e kongregashon, pero e hendenan tabata muriendo kaba pa motibu di e kalamidat ku Dios a manda. Pues, el a pone sensia den e panchi pa karga karbon sendé, i el a kuminsá purba di haña pordon pa piká di e pueblo.
48 El a keda pará entre e hendenan ku a muri i e hendenan ku a keda bibu, i finalmente e kalamidat a stòp.
49 E kantidat di hende ku a muri debí na e kalamidat tabata 14.700, sin konta e hendenan ku a muri pa motibu di Kore.
50 Ora ku por fin e kalamidat a stòp, Áròn a bai bèk serka Moises na entrada di e tènt di reunion.
Nota
^ Lit.: “asamblea.”
^ Lit.: “pa karga kandela.”
^ Òf: “Boso ta haña ku tur esei ta algu insignifikante?”
^ Òf: “bo ke bin hunga bas riba nos tambe?”
^ Lit.: “Bo ke saka wowo di e hòmbernan ei?” Kisas, esaki ta referí na e hendenan ku a djòin e rebelion.
^ Lit.: “su gloria.”
^ Lit.: “O Dios, e Dios di spiritu di tur karni.”
^ Òf: “nada di mi propio kurason.”
^ Lit.: “habri su boka.”
^ Lit.: “habri su boka.”
^ Òf: “ku a peka kontra nan mes alma.”
^ Lit.: “niun hende straño.”
^ Òf: “purba di hasi ekspiashon pa nan.”
^ Òf: “Plaga a kuminsá!”
