Numbernan 19:1-22
-
E baka kòrá i e awa di purifikashon (1-22)
19 Yehova a sigui bisa Moises i Áròn:
2 “Yehova a duna e siguiente lei: ‘Bisa e israelitanan ku nan mester trese pa boso un baka kòrá, salú, ku no tin defekto+ i ku nunka no a karga yugo.
3 Boso mester duna Saserdote Eleazar e baka, i e mester hiba e baka pafó di e kampamentu i laga mat’é den su presensia.
4 Anto Saserdote Eleazar mester kohe un poko di e sanger ku su dede i spat e shete biaha den direkshon di entrada di e tènt di reunion.+
5 Kaba, mester kima e baka su dilanti. Mester kima e kueru, e karni i e sanger di e baka huntu ku e sushi den su tripa.+
6 I e saserdote mester kohe taki di palu di seda, un pida tela kòrá bibu i un bòshi di taki di hysop*+ i benta nan den e kandela ku ta kimando e baka.
7 Anto e saserdote mester laba su pañanan i baña* ku awa. Despues di esei, e tin mag di drenta e kampamentu, pero lo e keda impuru te anochi.*
8 E persona ku a kima e baka mester laba su pañanan i baña* ku awa, i lo e keda impuru te anochi.
9 Un hòmber ku ta puru mester kohe e shinishinan di e baka+ i pone nan na un lugá spesial,* pafó di e kampamentu. E pueblo* di Israel mester warda e shinishinan ei pa traha awa di purifikashon.+ E baka* ta un ofrenda pa piká.
10 E persona ku kohe e shinishinan di e baka mester laba su pañanan i keda impuru te anochi.
Esaki ta un mandamentu permanente pa e israelitanan i pa e estranheronan ku ta biba entre nan:+
11 Ken ku mishi ku un hende morto lo keda impuru shete dia.+
12 E persona ei mester purifiká su mes ku e awa di purifikashon* riba e di tres dia, i lo e bira puru riba e di shete dia. Pero si e no purifiká su mes riba e di tres dia, lo e no bira puru riba e di shete dia.
13 Si un persona mishi ku kadaver di un hende i e no purifiká su mes, e ta hasi e tabernakel* di Yehova impuru;+ mester mata e persona ei.*+ E ta impuru, i lo e keda impuru, pasobra no a sprengu awa di purifikashon+ riba dje.
14 Esaki ta e lei ku ta konta ora ku un hende muri den un tènt: Tur hende ku drenta e tènt i tur hende ku tabata den e tènt lo keda impuru shete dia.
15 Tur pòchi habrí, ku no tin un tapa mará riba dje, ta impuru.+
16 Ademas, tur hende den kunuku ku mishi ku un persona ku a ser matá ku spada òf ku un persona ku a muri un morto natural òf ku wesu di hende òf ku un graf lo keda impuru shete dia.+
17 Pa purifiká e persona impuru, mester kohe un poko shinishi di e ofrenda pa piká ku a ser kimá, pone e shinishi den un pòchi i basha riba dje awa fresku saká for di un fuente di awa ku ta kore.
18 Anto un hòmber ku ta puru+ mester kohe un bòshi di taki di hysop,+ dòp nan den e awa i spat e riba e tènt, riba tur e pòchinan i riba tur hende ku tabata den e tènt. E mester hasi esei tambe ku e persona ku a mishi ku sea un graf òf wesu di hende òf kadaver di un hende ku a ser matá òf kadaver di un hende ku a muri un morto natural.
19 E persona puru lo spat e awa riba e persona impuru riba e di tres dia i tambe riba e di shete dia, i e persona impuru lo ser purifiká di su piká riba e di shete dia.+ E ora ei, e mester laba su pañanan i baña den awa, i anochi, lo e bira puru.
20 Pero un persona impuru ku no purifiká su mes mester ser eliminá for di e kongregashon,*+ pasobra el a hasi e lugá santu di Yehova impuru. E ta impuru pasobra no a spat awa di purifikashon riba dje.
21 Esaki ta un mandamentu permanente pa e pueblo di Israel: E persona ku ta spat awa di purifikashon+ tambe mester laba su pañanan. Ken ku mishi ku awa di purifikashon lo keda impuru te anochi.
22 Tur loke un persona impuru mishi kuné ta bira impuru, i un persona ku mishi ku e kosnan ei tambe ta impuru te anochi.’”+
