Numbernan 28:1-31
28 Yehova a sigui bisa Moises:
2 “Duna e israelitanan e siguiente òrdu: ‘Sòru pa boso ofresé mi mi ofrenda, esta, mi kuminda. Na nan tempu stipulá,+ boso mester ofresé ofrenda ku ta ser kimá komo un holó ku ta agradabel pa mi.’
3 Ademas, bisa nan: ‘Esaki ta e ofrenda ku tin ku ser kimá i ku boso mester ofresé na Yehova: Tur dia, boso mester ofresé dos lamchi di karné machu i salú, di un aña bieu; nan ta ofrenda kimá ku mester ofresé diariamente.+
4 Bo mester ofresé un lamchi mainta, i e otro lamchi, ora anochi ta bai sera.*+
5 Huntu ku kada un di e ofrendanan ei, boso mester ofresé un ofrenda di grano: un désimo parti di un efa* di hariña fini* mesklá ku un kuart hin* di zeta di oleifi puru.+
6 Esei ta un ofrenda kimá ku mester ofresé tur dia;+ e ta un areglo ku a ser establesé na seru Sinaí; sí, e ta un ofrenda ku ta ser kimá pa Yehova, i su holó ta agradabel p’e.
7 Anto e ofrenda di bibida ku ta kompañá e ofrenda ei mester ta un kuart hin di bibida alkohóliko pa kada lamchi di karné machu.+ Basha e bibida alkohóliko den e lugá santu komo un ofrenda di bibida pa Yehova.
8 Boso mester ofresé e otro lamchi di karné machu ora anochi ta bai sera komo un ofrenda ku ta ser kimá; lo e sirbi komo un holó ku ta agradabel pa Yehova. Boso mester ofresé e lamchi ei huntu ku un ofrenda di grano i un ofrenda di bibida, manera esnan ku boso a ofresé mainta.+
9 Pero riba dia di sabat,+ boso mester ofresé dos lamchi di karné machu mas. Nan mester ta salú, i nan mester ta un aña bieu. Anto boso mester ofresé dos désimo parti di un efa di hariña fini mesklá ku zeta komo ofrenda di grano plùs e ofrenda di bibida ku ta kompañá e ofrenda ei.
10 Esei ta e ofrenda kimá pa dia di sabat; mester ofres’é huntu ku e ofrenda kimá di tur dia i e ofrenda di bibida ku ta kompañá esei.+
11 Riba e promé dia di kada luna,* boso mester ofresé e siguiente ofrenda kimá na Yehova: dos toro yòn, un chubatu di karné i shete lamchi di karné machu i salú, di un aña bieu.+
12 Boso mester ofresé tambe tres désimo parti di un efa di hariña fini mesklá ku zeta komo ofrenda di grano+ pa kada toro, dos désimo parti di un efa di hariña fini mesklá ku zeta komo ofrenda di grano pa e chubatu di karné+
13 i un désimo parti di un efa di hariña fini mesklá ku zeta komo ofrenda di grano pa kada lamchi di karné machu. Esei ta un ofrenda kimá, un holó agradabel,+ un ofrenda ku ta ser kimá pa Yehova.
14 E ofrendanan di bibida mester ta mitar hin di biña pa kada toro,+ un terser parti di un hin di biña pa e chubatu di karné+ i un kuart hin di biña pa kada lamchi di karné machu.+ Esei ta e ofrenda kimá di tur luna, sí, pa kada luna di aña.
15 Ademas di e ofrenda kimá di tur dia i e ofrenda di bibida ku ta kompañ’é, boso mester ofresé Yehova un chubatu di kabritu yòn komo ofrenda pa piká.
16 Riba e di 14 dia di e promé luna, lo ta Pasku Hudiu na onor di Yehova.+
17 I riba e di 15 dia di e luna ei, lo tin un fiesta. Durante shete dia, boso mester kome pan sin zürdeg.+
18 Riba e promé dia, lo tin un reunion santu.* Boso no tin mag di hasi niun trabou duru.
19 I boso mester ofresé e siguiente ofrenda kimá na Yehova: dos toro, un chubatu di karné i shete lamchi di karné machu di un aña bieu. E bestianan ku boso ta ofresé mester ta bestia salú.+
20 Boso mester ofresé nan huntu ku e ofrendanan di grano di hariña fini mesklá ku zeta+ ku mester kompañá nan: tres désimo parti di un efa di hariña pa kada toro i dos désimo parti di un efa di hariña pa e chubatu di karné.
21 Boso mester ofresé un désimo parti di un efa di hariña pa kada un di e shete lamchinan di karné machu.
22 Ademas, boso mester ofresé un chubatu di kabritu komo ofrenda pa piká pa boso haña pordon pa boso pikánan.*
23 Ademas di e ofrenda kimá di mainta, ku ta parti di e ofrenda kimá di tur dia, boso mester ofresé tur e ofrendanan ei.
24 Durante shete dia, boso mester ofresé e ofrendanan ei komo kuminda.* Boso mester ofresé nan di e mesun manera kada dia; nan ta ofrenda ku ta ser kimá; nan holó ta agradabel pa Yehova. Mester ofresé nan huntu ku e ofrenda kimá di tur dia i e ofrenda di bibida ku ta kompañá e ofrenda ei.
25 Riba e di shete dia, boso mester tene un reunion santu.+ Boso no tin mag di hasi niun trabou duru.+
26 Riba dia di e promé frutanan hechu,+ durante boso Fiesta di Kosecha,* ora boso ta ofresé un ofrenda di grano fresku na Yehova,+ boso mester tene un reunion santu.+ Boso no tin mag di hasi niun trabou duru.+
27 Boso mester ofresé lo siguiente komo ofrenda kimá pa sirbi komo un holó ku ta agradabel pa Yehova: dos toro yòn, un chubatu di karné i shete lamchi di karné machu di un aña bieu.+
28 Komo ofrenda di grano di hariña fini mesklá ku zeta ku mester kompañá e bestianan ei, boso mester ofresé tres désimo parti di un efa di hariña pa kada toro, dos désimo parti di un efa di hariña pa e chubatu di karné
29 i un désimo parti di un efa di hariña pa kada un di e shete lamchinan di karné machu.
30 Boso mester ofresé tambe un chubatu di kabritu yòn pa boso haña pordon pa boso pikánan.+
31 Boso mester ofresé e ofrendanan ei ademas di e ofrenda kimá di tur dia i e ofrenda di grano i e ofrenda di bibida ku mester kompañá nan. E bestianan ku boso ta ofresé mester ta bestia salú.’”+
Nota
^ Lit.: “entre e dos anochinan.” Evidentemente, esaki ta referí na ora solo baha i ta kuminsá bira skur.
^ Un désimo parti di un efa tabata e kantidat ku tabata pas den un baki di mas o ménos 2 liter. Wak Ap. B14.
^ Òf: “hariña di bon kalidat.”
^ Lit.: “di boso lunanan.”
^ Òf: “un reunion pa adorá Dios.”
^ Òf: “ofrenda pa piká pa hasi ekspiashon pa boso.”
^ Lit.: “pan.”
