Numbernan 25:1-18
25 Tempu ku Israel tabata biba na Sítim,+ e pueblo a kuminsá kometé inmoralidat seksual ku e hende muhénan di Móab.+
2 E muhénan a invitá e pueblo pa bai ku nan pa hasi sakrifisio na nan diosnan,+ i e pueblo a kuminsá kome e sakrifisionan i bùig pa nan diosnan.+
3 Asina Israel a partisipá den adorashon di* Baal di Péòr,+ i Yehova a bira furioso riba Israel.
4 Yehova a bisa Moises: “Sòru pa tur e kabesantenan responsabel pa esei* ser matá, i kologá nan kurpa dilanti di Yehova di dia kla* pa e furia di Yehova por kita for di riba Israel.”
5 E ora ei, Moises a bisa e huesnan di Israel:+ “Kada un di boso mester mata e hòmbernan ku ta kai bou di boso ku a partisipá den adorashon di* Baal di Péòr.”+
6 Anto nèt na e momento ei, un israelita a kana bini ku un muhé madianita+ den e kampamentu. Moises i henter e pueblo* di Israel, ku tabata yora na entrada di e tènt di reunion, a mira esei.
7 Ora Fínehas,+ yu hòmber di Eleazar i ñetu di Saserdote Áròn, a mira esei, el a lanta mesora i pasa kohe un lansa.*
8 El a bai tras di e hòmber israelita te den tènt, i el a pasa e lansa dor di nan tur dos; el a pasa e lansa dor di e hòmber i el a pas’é dor di e muhé su partinan íntimo.* E ora ei, e malesa ku tabata afektá e israelitanan a stòp.+
9 Na tur, 24.000 hende a muri+ pa motibu di e malesa.
10 Anto Yehova a bisa Moises:
11 “Fínehas,+ yu di Eleazar i ñetu di Saserdote Áròn, a kita mi furia for di riba e pueblo di Israel, pasobra e no a tolerá pa niun hende den e pueblo ta infiel na mi.*+ P’esei, maske mi ta eksigí pa hende adorá ami so,*+ mi no a mata tur e israelitanan.
12 Pa e motibu ei, bisa Fínehas ku mi ta bai sera un pakto di pas kuné.
13 E pakto ei lo hasi posibel pa e i su yu hòmbernan sirbi komo saserdote pa un tempu largu,+ pasobra e no a tolerá pa niun hende ta infiel na Dios.+ Asina, el a haña pordon di piká* pa e pueblo di Israel.”
14 Por sierto, nòmber di e hòmber israelita ku a ser matá huntu ku e muhé madianita tabata Zimri. Zimri tabata yu hòmber di Salú, kende tabata un di e kabesantenan di e tribu di Símeòn.
15 Nòmber di e muhé madianita ku a ser matá tabata Kòzbi, yu muhé di Zur,+ kende tabata kabesante di un di e tribunan* di Mádian.+
16 Mas despues, Yehova a bisa Moises:
17 “Trata e madianitanan manera enemigu i mata nan,+
18 pasobra nan a trata boso manera enemigu. Nan a traha plan astuto kontra boso, tantu den e kaso di Péòr*+ komo den e kaso di Kòzbi, yu muhé di un kabesante di Mádian. Kòzbi a ser matá+ ora e malesa tabata afektá e hendenan pa motibu di Péòr.”+
Nota
^ Òf: “a uni su mes ku.”
^ Lit.: “e kabesnan di e pueblo.”
^ Lit.: “dilanti di Yehova, dilanti di solo.”
^ Òf: “a uni nan mes ku.”
^ Lit.: “asamblea.”
^ Òf: “sper.”
^ Òf: “su barika.”
^ Òf: “pa niun hende adorá otro dios.”
^ Òf: “eksigí deboshon eksklusivo.”
^ Òf: “a hasi ekspiashon.”
^ Òf: “e famianan.”
^ Evidentemente, den e kaso akí, “Péòr” ta referí na e dios falsu ku hende tabata adorá na Péòr.
