Numbernan 31:1-54
31 Yehova a bisa Moises:
2 “Tuma vengansa+ riba e madianitanan+ pa loke nan a hasi ku e israelitanan. Despues di esei, lo bo bai sosegá serka bo antepasadonan.”*+
3 Pues, Moises a bisa e pueblo: “Prepará un grupo di hòmber pa bai guera* kontra Mádian i pa hasi loke Yehova a bisa i tuma vengansa riba Mádian.
4 For di kada tribu di Israel, boso mester skohe 1.000 hòmber pa bai guera.”
5 Pues, for di e míles di hòmbernan di Israel,+ nan a prepará 12.000 hòmber pa bai guera, sí, 1.000 hòmber di kada tribu.
6 Kaba, Moises a manda nan bai guera, sí, 1.000 hòmber di kada tribu. Fínehas,+ yu hòmber di Saserdote Eleazar, a bai huntu ku e ehérsito; e tabata enkargá ku e artíkulonan santu i e tròmpètnan+ pa duna señal di guera.
7 Nan a bringa kontra Mádian, manera Yehova a bisa Moises, i nan a mata tur hòmber.
8 Entre e hòmbernan ku nan a mata tabatin e sinku reinan di Mádian, esta, Evi, Rékèm, Zur, Hur i Reba. Ademas, nan a mata Bálam,+ yu hòmber di Béòr, ku spada.
9 Pero e israelitanan a kapturá e hende muhénan i e muchanan di Mádian. Nan a bai tambe ku tur e bakanan, e karnénan i e kabritunan i tur e sobrá pertenensianan di e madianitanan komo botin.
10 E israelitanan a kima tur e statnan kaminda e madianitanan tabata biba i tur nan kampamentunan.*
11 E israelitanan a bai ku henter e botin, tur loke e pueblo tabatin, i nan a kapturá tantu hende komo bestia.
12 Kaba, nan a hiba e prezunan i e botin kaminda Moises, Saserdote Eleazar i e pueblo* di Israel tabata, na e kampamentu den e sabananan di Móab,+ banda di riu Yordan, enfrente di Yériko.
13 Anto Moises i Saserdote Eleazar i tur e kabesantenan di e pueblo a sali bai topa nan pafó di e kampamentu.
14 Pero Moises a rabia ku e komandantenan di ehérsito, esta, e kabesantenan di 1.000 i e kabesantenan di 100 ku a bini bèk for di guera.
15 Moises a bisa nan: “Boso a laga tur e hende muhénan na bida?
16 Ta nèt nan ta esnan ku a skucha Bálam i pone e israelitanan kometé infieldat+ kontra Yehova i adorá e dios falsu di Péòr.+ Komo konsekuensia, malesa a afektá e pueblo di Yehova.+
17 P’esei, mata tur mucha hòmber i tur hende muhé ku a yega di tene relashon seksual ku hende hòmber.
18 Pero tur mucha muhé ku no a yega di tene relashon seksual ku hende hòmber,+ boso tin mag di laga na bida.
19 I boso mester keda shete dia pafó di e kampamentu. Kada un di boso ku a mata un hende* òf ku a mishi ku un hende ku a ser matá+ mester purifiká su mes+ riba e di tres dia i riba e di shete dia; sí, tantu boso komo boso prezunan mester purifiká boso mes.
20 Boso tin ku purifiká tur paña, tur artíkulo di kueru, tur kos trahá di lana di kabritu i tur opheto di palu.”
21 Saserdote Eleazar a bisa e hòmbernan di e ehérsito ku a bai guera: “Esaki ta un lei ku Yehova a duna Moises:
22 ‘Oro, plata, koper, heru, staña* i chumbu,
23 esta, tur kos ku por ku kandela, boso mester pasa den kandela, i nan lo bira puru. Ademas, boso mester purifiká nan ku awa di purifikashon.+ Tur kos ku no por ku kandela, boso mester laba ku awa di purifikashon.
24 Riba e di shete dia, boso mester laba boso pañanan i boso lo ta puru. Despues di esei, boso tin mag di drenta e kampamentu.’”+
25 Anto Yehova a bisa Moises lo siguiente:
26 “Hasi un inventario di loke boso a bini kuné komo botin; konta tantu e hende muhénan komo e bestianan ku boso a kapturá. Hasi esei huntu ku Saserdote Eleazar i huntu ku e kabesantenan di e famianan parti di tata* ku tin den e pueblo.
27 Parti e botin den dos. Duna e hòmbernan ku a partisipá den e bataya mitar di e botin, i duna e restu di e pueblo e otro mitar.+
28 Bo mester tuma un kontribushon* pa Yehova for di e botin di e sòldánan ku a partisipá den e bataya: un di kada 500 hende muhé, baka, buriku i karné òf kabritu.
29 Bo mester tuma e kontribushon ei ku a bini for di e mitar di e sòldánan i duna Saserdote Eleazar esei komo kontribushon pa Yehova.+
30 Bo mester tuma un kontribushon for di e otro mitar ku a duna e restu di e israelitanan: Di kada 50 hende muhé, baka, buriku, karné òf kabritu i tur tipo di bestia doméstiko, bo mester tuma un. Eseinan bo ta duna e levitanan,+ kendenan ta kumpli ku nan responsabilidatnan na e tabernakel di Yehova.”+
31 Anto Moises i Eleazar a hasi manera Yehova a bisa Moises.
32 Esaki ta loke a resta di e botin ku e sòldánan a bini kuné for di guera: 675.000 karné i kabritu,
33 72.000 baka,
34 61.000 buriku
35 i 32.000 mucha muhé ku no a yega di tene relashon seksual ku hende hòmber.+
36 Mitar di e botin, esta, e botin di e hòmbernan ku a partisipá den guera, tabata 337.500 karné i kabritu.
37 E kontribushon pa Yehova for di e karnénan i e kabritunan tabata 675 karné i kabritu.
38 Tabatin 36.000 baka, i e kontribushon pa Yehova tabata 72 baka.
39 Tabatin 30.500 buriku, i e kontribushon pa Yehova tabata 61 buriku.
40 Tabatin 16.000 mucha muhé, i e kontribushon pa Yehova tabata 32 mucha muhé.
41 Anto Moises a duna Saserdote Eleazar e kontribushon pa Yehova,+ manera Yehova a bisa Moises.
42 Pa loke ta e mitar botin ku tabata pertenesé na e israelitanan, esta, e mitar ku Moises a kita for di e parti di e hòmbernan ku a bai guera,
43 e mitar ei di e karnénan i e kabritunan tabata 337.500,
44 e bakanan tabata 36.000,
45 e burikunan tabata 30.500
46 i e mucha muhénan* tabata 16.000.
47 Anto Moises a tuma for di e mitar ku tabata pertenesé na e israelitanan un di kada 50 hende i un di kada 50 bestia. Eseinan el a duna e levitanan,+ kendenan tabata kumpli ku nan responsabilidatnan na e tabernakel di Yehova,+ manera Yehova a bisa Moises.
48 Anto e komandantenan di e diferente trupanan* di ehérsito,+ esta, e kabesantenan di 1.000 i e kabesantenan di 100, a bai serka Moises.
49 Nan a bis’é: “Mi señor, nos a konta tur e hòmbernan di guera ku tabata bou di nos mando, i no falta ni un hende.+
50 P’esei, laga kada un di nos ofresé loke nos tin komo un ofrenda na Yehova, sea ta opheto di oro, kadena di pia, armbant, renchi di seyo, renchi di orea i otro hoya, pa nos haña pordon di piká* dilanti di Yehova.”
51 Pues, Moises i Saserdote Eleazar a aseptá e oro for di nan man, esta, tur e hoyanan.
52 E oro di e kontribushon ku e kabesantenan di 1.000 i e kabesantenan di 100 a duna Yehova a pisa, na tur, 16.750 siklo.*
53 Kada un di e hòmbernan di e ehérsito a tuma un parti di e botin pa su mes.
54 Moises i Saserdote Eleazar a aseptá e oro for di e kabesantenan di 1.000 i e kabesantenan di 100, i nan a hiba esei den e tènt di reunion pa e pueblo di Israel kòrda kon Yehova a yuda nan.*
Nota
^ Lit.: “lo bo ser reuní ku bo pueblo.” Un ekspreshon poétiko ku ta referí na morto.
^ Òf: “pa e ehérsito.”
^ Òf: “nan kampamentunan rondoná pa muraya.”
^ Lit.: “asamblea.”
^ Un metal koló shinishi kla ku ta moli i fásil pa dobla. Na hulandes, tin.
^ Òf: “e kabesantenan di e kasnan paterno.”
^ Òf: “belasting.”
^ Òf: “e almanan humano.”
^ Lit.: “e gruponan di mil.”
^ Òf: “pa hasi ekspiashon pa nos.”
^ Òf posiblemente: “pa laga Yehova kòrda riba e pueblo di Israel.”
