Bon Notisia Segun Mateo 23:1-39
23 Hesus a bisa e multitut di hende i su disipelnan:
2 “E eskribanan i e fariseonan a kai sinta riba stul di Moises.
3 P’esei, hasi tur loke nan bisa boso, pero no sigui nan mal ehèmpelnan, pasobra nan no ta hasi loke nan ta bisa.+
4 E reglanan ku nan ta pone riba skouder di hende ta karga pisá,+ pero nan mes no ta saka man* hisa e karganan ei.+
5 Tur loke nan ta hasi, nan ta hasi pa hende mira.+ Por ehèmpel, nan ta hancha e kahitanan* ku nan ta bisti komo amuleto+ i nan ta hasi e frañanan di nan pañanan mas largu.+
6 Na bankete, nan gusta e lugánan mas prominente. Den snoa, nan ta bai sinta te dilanti.*+
7 I riba plasa, nan gusta pa hende kumindá nan ku rèspèt i yama nan Rabi.*
8 Ma boso, no laga niun hende yama boso Rabi, pasobra ta un Maestro so boso tin.+ Boso tur ta ruman.
9 I no yama ningun hende riba tera tata, pasobra ta un Tata so boso tin,+ kende ta den shelu.
10 No laga ningun hende yama boso lider, pasobra ta un Lider so boso tin: Kristu.
11 E persona di mas grandi* entre boso mester ta boso sirbidó.+
12 Tur hende ku halsa nan mes lo keda humiá,+ pero ken ku humiá su mes lo keda halsá.+
13 Ai di boso, eskriba i fariseo. Hipókritanan! Boso ta sera porta di e Reino di shelu pa hende no drenta. Boso mes tampoko no ta drenta, i e hendenan ku ta riba kaminda pa drenta tampoko boso no ta laga drenta.+
14 * ——
15 Ai di boso, eskriba i fariseo. Hipókritanan!+ Boso ta krusa laman i tera seku pa hasi un hende kreyente,* i ora e bira un kreyente, boso ta pon’é bira un persona ku meresé di ser tirá den Gehena.* Boso ta hasié un persona dos biaha mas pió ku boso!
16 Ai di boso, guia siegu!+ Boso ta bisa: ‘Un hende no ta mará na nada si e hura pa tèmpel, pero si e hura pa e oro ku tin den* tèmpel, e ora ei sí e tin ku kumpli ku loke el a hura.’+
17 Boso ta hende bobo i siegu! Kiko ta mas importante? E oro ku tin den tèmpel òf e tèmpel ku a santifiká e oro?
18 Boso ta bisa tambe: ‘Un hende ku ta hura pa altar no ta mará na nada, pero si e hura pa e ofrendanan ku tin riba altar, e ora ei sí e tin ku kumpli ku loke el a hura.’
19 Siegunan! Kiko ta mas importante? E ofrendanan ku ta riba altar òf e altar ku ta santifiká e ofrendanan ei?
20 Pues, si un hende hura pa altar, e ta hurando pa tur loke tin riba e altar.
21 Si un hende hura pa tèmpel, e ta hurando pa tèmpel i pa Dios ku ta biba den e tèmpel.+
22 Si un persona hura pa shelu, e ta hurando pa trono di Dios i pa Dios, kende ta sintá riba e trono.
23 Ai di boso, eskriba i fariseo. Hipókritanan! Boso ta duna un désimo parti di menta, di eneldo i di komino,*+ pero boso ta neglishá e kosnan mas importante di Lei, esta, hustisia,+ miserikòrdia+ i fieldat. Ta bèrdat ku boso mester duna désimo parti, pero boso no mester neglishá e otro kosnan.+
24 Guia siegu,+ boso ta sefta sangura*+ i guli kamel!+
25 Ai di boso, eskriba i fariseo. Hipókritanan! Boso ta laba parti pafó di un kòpi i parti pafó di un tayó,+ pero paden ta yen di golosidat*+ i egoismo.+
26 Fariseo siegu! Laba parti paden di e kòpi i di e tayó promé i parti pafó tambe lo keda limpi.
27 Ai di boso, eskriba i fariseo. Hipókritanan!+ Boso ta manera graf blanchá.+ Di pafó, nan ta masha bunita pero paden, nan ta yen di wesu di hende morto i tur sorto di sushedat.*
28 Den boso kaso ta meskos: Di pafó, boso ta parse hende masha hustu, pero di paden, boso ta hende hipókrita i malbado.*+
29 Ai di boso, eskriba i fariseo. Hipókritanan!+ Boso ta traha graf pa e profetanan i dòrna graf di hende hustu,+
30 i boso ta bisa: ‘Si nos tabata biba den tempu di nos antepasadonan, nos lo no tabata nan kómplise den dramamentu di sanger di e profetanan.’
31 Ke men, boso mes ta atmití ku boso ta desendiente di e hendenan ku a mata e profetanan.+
32 Kaba ku e trabou ku boso antepasadonan a kuminsá kuné!*
33 Boso ta kolebra* venenoso!+ Kon boso lo por evitá di haña e kastigu di ser tirá den Gehena?*+
34 P’esei, mi ta bai manda algun profeta+ i algun hòmber sabí i algun maestro+ serka boso. Boso lo mata algun di nan,+ kologá algun di nan na staka, suta*+ algun di nan den boso snoanan i persiguí+ algun di nan di stat pa stat.
35 Boso lo ta kulpabel di sanger di tur hende hustu ku keda dramá riba tera, kuminsando ku Abel+ bai te Zakarías, yu hòmber di Barakías. Zakarías tabata dilanti di tèmpel, pegá ku altar, ora boso a mat’é.+
36 Mi ta sigurá boso: E generashon akí lo no keda sin haña kastigu pa tur e kosnan akí ku nan a hasi.
37 Herúsalèm, Herúsalèm, bo ta mata e profetanan i bo ta piedra e personanan ku Dios a manda serka bo.+ Vários biaha, mi a purba di trese bo yunan huntu, manera un galiña ta hala su puitunan huntu bou di su alanan, pero boso no tabata ke!+
38 Boso tèmpel* lo keda bandoná!+
39 Mi ta bisa boso: Di awor padilanti, boso lo no mira mi mas. Boso lo mira mi atrobe dia boso bisa: ‘Bendishoná ta e persona ku ta bini den nòmber di Yehova!’”*+
Nota
^ Òf: “nan mes no ta dispuesto pa saka ni un dede pa yuda.”
^ Kahita ku tabata kontené algun pasashi di Skritura. E hòmbernan hudiu tabata bisti e kahitanan ei na nan frenta òf na nan brasa pa protehá nan mes kontra maldat.
^ Òf: “bai sinta na e mihó lugánan.”
^ Òf: “Maestro.” “Rabi” tabata un título di rèspèt i di onor.
^ Òf: “E persona di mas importante.”
^ Òf: “e oro di.”
^ Menta, eneldo (na hulandes, dille) i komino ta mata ku hende ta usa komo speserei.
^ Òf: “praga; ashibi.”
^ Òf: “ladronisia.”
^ Òf: “impuresa.”
^ Òf: “i hende ku ta kibra lei.”
^ Òf: “Kaba di yena e baki di midi ku boso antepasadonan a kuminsá yena.”
^ Òf: “Boso ta yu di kolebra.”
^ Lit.: “Boso kas.” Òf posiblemente: “Boso kas lo keda bandoná i bashí.”
