MANUNAN ARTIKULO | AKIN A NANIRAP TAN INATEY SI JESUS?
Talaga Kasin Agawa?
Nen taon 33 C.E., si Jesus a Nazareno et pinatey. Sikatoy lingon inakusaan ya manrerebelde ed gobierno, anggapoy panangasin sinisiplatan, tan impasak ed poste. Ansakisakit so impatey to. Balet binilay lamet na Dios, tan kayari 40 agew, sinmegep ed tawen.
Sayan nikadkaduman salaysay et nabasa tayod apatiran Ebanghelyo na Kristianon Griegon Kasulatan, a tatawagen met ya Balon Sipan. Talaga kasin agawa iratan? Importantin nonoten iyan tepet. Ta no ag-agawa iraya, anggapoy kakanaan na pananisia na saray Kristiano tan anggad kugip labat so manbilay ya anggapoy anggaan diad Paraiso. (1 Corinto 15:14) Balet no talagan agawa iratan, walay marakep ya ilaloan na totoo, anggan sika met. Kanian, kasin tua o inimbento labat iray salaysay ed Ebanghelyo?
NO ANTOY IPAPANENGNENG NA EBIDENSYA
Aliwan singa saray istoryan gawagawa labat, napatnagan ya saray akasulat ed Ebanghelyo et talagan susto, anggan saray angkelag ya detalye. Singa bilang, amayamay ditan so ngaran na tuan lugar, tan arum ed saratan et sarag nin pasyaran natan. Abitla met iray tuan totoo, tan susuportaan na saray historian ya talagan nambilay ira.—Lucas 3:1, 2, 23.
Si Jesus et binitlan mismo na saray sekular a managsulat nen inmuna tan komaduan siglo. * Say paraan na impamatey ed sikato ya nabasad saray Ebanghelyo et miparad panagpatey na saray Romano ed saray kriminal ed saman a panaon. Ontan met, say impangisalaysay ed saratan et base ed tuan agawa tan anggapo ray inyamot a detalye, anggan saray lingo na arum ya disipulo nen Jesus. (Mateo 26:56; Lucas 22:24-26; Juan 18:10, 11) Amin iraya et mabiskeg ya ebidensya ya saray nansulat na Ebanghelyo et matua tan susto iray insulat da nipaakar ed si Jesus.
SAY INKIOLI BALET NEN JESUS EY?
Dakel so manisia ya si Jesus et nambilay tan inatey, balet wala ray agmanisia ya sikatoy binilay lamet. Anggan saray apostol to et ag-anisia diad gapo nen abalitaan dan sikatoy abilay lamet. (Lucas 24:11) Balet nakal so panduaruwa da nen aminpiga dan anengneng tan saray arum ya disipulo ya mabilay si Jesus. Diad tua, amay sakey ya inkagawa et masulok ya 500 so akanengneng ed sikato.—1 Corinto 15:6.
Anggano posiblin naerel tan pateyen iray disipulo, makpel dan impaamta ed amin so inkioli nen Jesus, anggan diad saramay amatey ed sikato. (Gawa 4:1-3, 10, 19, 20; 5:27-32) Wala kasi ontan ya pakpel na dakel ya disipulo no ag-ira seguradon abilay lamet si Jesus? Diad tua, say inkioli nen Jesus so rason no akin ya baleg so impluensya na saray Kristiano ed mundo nensaman tan natan.
Nanengneng ed saray salaysay na Ebanghelyo ed impatey tan inkioli nen Jesus so amin lan pakapatnagan na sakey ya napanmatalkan ya rekord na saray agawa. No basaen tan talosan mon maong, nakombinsi ka ya talagan agawa iratan. Tan lalo kan nakombinsi no natalosan mo no akin ya agawa iratan. Ipaliwawa itan ed onsublay ya artikulo.
^ par. 7 Si Tacitus, ya inyanak nen manga 55 C.E, et insulat ton say “Christus, ya nanlapuan na tawag [ya Kristiano] et dinmalan ed graben impandusa na sakey ya opisyal na gobierno tayo ya si Poncio Pilato legan na uley nen Tiberio.” Si Jesus et binitla met nen Suetonius (inmunan siglo); Judion historian ya si Josephus (inmunan siglo); tan Pliny the Younger, gobernador na Bitinia (kagapo na komaduan siglo).
