Anggapoy espisipikon ibabaga na Biblia tungkol ed euthanasia. a Anggaman ontan, say ibabaga na satan tungkol ed bilay tan patey et makatulong pian makapanggawa tayoy balansin desisyon. Talagan mauges so pamatey, balet agkaukolan ya gawaen so ami-amin ya paraan pian salien ya parukeyen so bilay na toon ompapatey la.

 Ibabaga na Biblia ya say Amalsa ed sikatayo et say Dios, say “subol na bilay.” (Salmo 36:9; Gawa 17:28) Diad pakanengneng na Dios, say bilay et talagan mabmabli. Atan so rason no akin ya igaganggan na Dios ya agtayo nepeg ya pultoten so bilay na arum ya too tan anggan say mismon bilay tayo. (Exodo 20:13; 1 Juan 3:15) Ibabaga met na Biblia ya kaukolan tayoy manalwar pian agnipeligro so bilay tayo tan say bilay na arum. (Deuteronomio 22:8) Malinew sirin ya labay na Dios ya pablien tayo so regalo to ya bilay.

Panon to no say sakey ya too et talagan grabe la so sakit to?

 Agkokonsintien na Biblia so pamatey ed sakey ya too anggano mapatpatnag ya asingger lan ompatey. Say sakey ya alimbawa ed satan et samay agawa ed si Arin Saul na Israel. Nen asugatan na grabe diad guerra, imbaga tod lingkor to ya duyoken toy espada pian ompatey la. (1 Samuel 31:3, 4) Ag-inmunor imay lingkor nen Saul. Balet, walay laki ya nantila tan imbaga ton ginawa to imay pagagawa nen Saul. Si David​—sakey ya toon miparay kanonotan to ed Dios—​et imbaga to ya kanepegan na sayan laki so ompatey lapud nankasalanan ed dala.​—2 Samuel 1:6-16.

Kasin kaukolan ya parukeyen so bilay anggan antoy nagawa?

 No mapatnag ya magano lan ompatey so sakey ya too, ag-ibabaga na Biblia ya kaukolan ya parukeyen ni so proseso na ipatey to. Imbes, balanse so Biblia tungkol ed saya. Talagan kabkabusol tayoy patey lapud resulta itan na kasalanan. (Roma 5:12; 1 Corinto 15:26) Siempre, agtayo labay so ompatey, pero agtayo nepeg ya takotan itan, lapud impromisa na Dios ya bilayen to iray inatey. (Juan 6:39, 40) Say sakey ya toon rerespetoen toy bilay et mananap na sankaabigan ya paraan na panagpatambal. Pero agto labay ya ibagan kaukolan ton pilien iramay paraan ya parukeyen to labat so proseso na ipatey na sakey ya toon asingsingger lan ompatey.

Kasin say pambikkel et kasalanan ya agnaperdona?

 Andi, ag-ibabaga na Biblia ya say pambikkel et kaiba ed saray kasalanan ya agnaperdona. Tua, seryoson kasalanan so pambikkel, b pero seguradon natatalosan na Dios iray rason ya nayarin manresulta ed pambikkel, singa say sakit ed isip, sobran stress, odino anggan saray bengatla ya posiblin atawir na sakey ya too. (Salmo 103:13, 14) Uusaren to so Biblia pian onlemew so liknaan na saramay maneermen. Ibabaga met na Biblia ya “walay kioli na saray matunong tan saray agmatunong.” (Gawa 24:15) Ipapanengneng na satan ya walay ilalo ya nabilay iray totoon akagawa na seryoso iran kasalanan, singa saramay nambikkel.