Amacebo Azakunceda Ukuthi Unganathi Wedlulise

UTONY okukhulunywe ngaye esihlokweni sokuqala wabaphakathi kwezinhlupho ezinengi ngoba wayengavumi ukuthi ulohlupho lokunatha kakhulu utshwala. Lanxa wayebuhlohla okuzwayo wawungeke umbone edakiwe. Khonokho kwakusenza engaboni hlupho ngokunatha kakhulu. Yindaba indlela ayebona ngayo ingaqondanga?

Utshwala babuyiphambanisa kakhulu indlela ayesahlulela ngayo. Ukunatha kakhulu kwakuyiphambanisa indlela ingqondo kaTony eyayisebenza ngayo kungelani lokuthi wayekunanzelela lokhu loba hatshi. Ukunatha kakhulu kwakubangela ukuthi angenelisi ukubona ukuthi kuyamphambanisa.

Okunye okwakuphambanisa uTony yikuthi wayengafuni ukwekela umkhuba wakhe wokunatha. Enye indoda okuthwa ngu-Allen layo yayingavumi ukuthi ilohlupho endabeni yokunatha. U-Allen uthi: “Ngangifihla ukuthi ngiyanatha. Ngangidinga lokuyizizatho ukuze kungakhanyi kuyinto enkulu ukunatha kwami. Engangikufuna nje yikuthi ngingeqi lelilodwa ilanga nginganathanga.” Lanxa abanye abantu babebona ukuthi uTony lo-Allen akuselanto abangayenza benganathanga, bona bobabili babengaboni hlupho. Amadoda la kwakumele athathe inyathelo sibili. Kwakumele enzeni?

Thatha Inyathelo

Abanengi abaphumeleleyo ukulwisana lomkhuba wokunatha kakhulu utshwala balandela amazwi kaJesu athi: “Nxa ilihlo lakho lesokudla likwenzisa isono, likopole ulilahlele khatshana ngoba kungcono ukulahlekelwa yisitho somzimba esisodwa kulokuthi umzimba wakho wonke uphoselwe eGehena.”—UMathewu 5:29.

Lapha uJesu wayengatsho ukuthi sekumele sizilimaze imizimba. Wenza isifaniso echasisa ukuthi kumele sizimisele ukwenza konke okusemandleni ethu ukuze sitshiye loba kuyini engadanisa uJehova. Kwesinye isikhathi inyathelo okuyabe kumele silithathe liyabe libuhlungu sibili, kodwa kuyilo elingasinceda ukuthi singanathi kakhulu. Nxa abanye bekutshela ukuthi usunatha kakhulu, vuma uzame ukulungisisa. a Nxa ubona ukuthi kuzaba nzima ukuthi ulinganisele, kungaba ngcono ukuthi uhle wekele khona ukunatha. Lanxa kungabe kunzima yikho okungavikela impilo yakho.

Kuyini okungakunceda nxa ubuhlohla kakhulu utshwala lanxa ungayisuye lowana ongasenelisi ukwenza loba yini nxa enganathanga?

Ungaluthola Ngaphi Uncedo?

1. Woba lokholo lokuthi uJehova uzakuncedisa nxa ungahlala uthandaza ngenhliziyo yonke. Kulecebo elihle eBhayibhilini ongalisebenzisa nxa ufuna ukuthokozisa uJehova uNkulunkulu elithi: “Lingakhathazeki ngaloba yini kodwa bikelani uNkulunkulu zonke izicelo zenu ngomthandazo langokumncenga kanye lokumbonga. Nxa lingenza njalo, ukuthula kukaNkulunkulu okwedlula konke ukuzwisisa kuzalinda izinhliziyo zenu lengqondo zenu ngoKhristu uJesu.” (KwabaseFiliphi 4:6, 7) Kuyini esingakucela nxa sikhuleka ukuze sibe lokuthula kukaNkulunkulu?

Kuqakathekile ukuthi uthobeke uvume ukuthi ulohlupho endabeni yokunatha futhi kumele wenze utshintsho. UJehova uzakuncedisa nxa ungamtshela ukuthi uhlela ukwenzani ukuze unqobe uhlupho lolu. IBhayibhili lithi: “Ofihla iziphambeko zakhe kasoze aphumelele, kodwa ozivumayo azitshiye uzatshengiswa isihawu.” (IZaga 28:13) UJesu wathi singathandaza sithi: “Ungasingenisi ekulingweni kodwa usisindise komubi.” (UMathewu 6:13; amabala angaphansi) Kuyini okumele ukwenze nxa usuthandazile?

2. IBhayibhili lingakunceda. ‘Ilizwi likaNkulunkulu liyaphila njalo lilamandla, liyenelisa ukuveza imicabango lenhloso zenhliziyo.’ (KumaHebheru 4:12) Abantu abanengi abaphumelelayo ukutshiya ukunatha kakhulu utshwala bathi bancedwa yikubala amavesi eBhayibhili nsuku zonke kanye lokucabangisisa ngawo. Omunye umlobi wehubo wathi: ‘Uyajabula umuntu ongalandeli izeluleko zababi kodwa othokoziswa ngumthetho kaJehova, obala umthetho kaNkulunkulu ngelizwi eliphansi ubusuku lemini. Konke akwenzayo kuzaphumelela.’—IHubo 1:1-3.

U-Allen owancedwa yikufunda iBhayibhili laboFakazi baJehova ukuze anqobe umkhuba wokunatha kakhulu uthi, “Angithandabuzi ukuthi kungasikubala iBhayibhili okwanginceda ukuthi ngitshiye utshwala ngabe vele sengafa.”

3. Zama ukuba ngumuntu ozibambayo. IBhayibhili lisitshela ukuthi abanye ababeyizidakwa batshintsha baba ngamaKhristu ngoba besebegezizwe “ngomoya kaNkulunkulu” bahlanzeka. (1 KwabaseKhorinte 6:9-11) Umoya ongcwele kaNkulunkulu wabancedisa ukuthi bazibambe futhi batshiye ukunatha kakhulu utshwala. IBhayibhili lithi “akumelanga lidakwe liwayini elenza abantu baziphathe butshapha, kodwa qhubekani ligcwaliswa ngomoya.” (Kwabase-Efesu 5:18; KwabaseGalathiya 5:21-23) UJesu Khristu wathembisa ukuthi “uBaba osezulwini uzimisele kakhulu ukubapha umoya ongcwele labo abawucelayo.” Yikho wathi, “qhubekani licela lizaphiwa.”—ULukha 11:9, 13.

Abafuna ukuthokozisa uJehova bangenelisa ukuzibamba nxa bangabala iBhayibhili futhi baqhubeke bethandaza bemcela ukuthi abancedise. Nxa uphela amandla sekusithi ukhalale khumbula amazwi la aseBhayibhilini athi: “Ohlanyela efuna ukuthokozisa umoya uzavuna ukuphila okungapheliyo kulowomoya. Yikho-ke kasingayekeli ukwenza okuhle ngoba ngesikhathi esifaneleyo sizavuna nxa kuyikuthi asidinwa.”—KwabaseGalathiya 6:8, 9.

4. Khetha kuhle abangane. “Ohamba labahlakaniphileyo uzahlakanipha, kodwa ozwanana lezithutha uzangena emanyaleni.” (IZaga 13:20) Batshele abangane bakho ukuthi usutshiya umkhuba wokunatha kakhulu utshwala. IBhayibhili liyakuxwayisa ukuthi abanye abangane bakho bazakhuluma kubi ngawe ngoba usutshiye ‘ukunatha kakhulu, amadili axokozelayo lemibuthano yokubhudla utshwala.’ (1 UPhetro 4:3, 4) Zimisele ukuqeda ubungane labantu abazama ukukuyenga ukuthi unathe kakhulu utshwala.

5. Khetha ukuthi uzanatha utshwala obunganani. “Yekelani ukubunjwa ngumumo lo wezinto, kodwa guqulwani litshintshe indlela elicabanga ngayo ukuze lihlolisise lizibonele intando kaNkulunkulu enhle, eyamukelekayo lepheleleyo.” (KwabaseRoma 12:2) Sebenzisa izimiso eziseBhayibhilini ukuze ukhethe ukuthi usuzabe unatha isilinganiso esinganani kulokuthi uqondiswe ngabangane bakho abangakhonzi uJehova loba ‘umumo lo wezinto.’ Ungenza njalo uJehova uzathokoza. Manje ungasibona njani isilinganiso esingasoze sikufake engozini?

Loba yisiphi isilinganiso esiphambanisa indlela ocabangayo ngayo siyingozi kuwe. Nxa ukhetha ukuthi uzanatha isilinganiso esinganani, ungakhethi esizakutshiya sekusele kancane ukuthi udakwe. Ungaziqili endabeni le woba leqiniso lokuthi yisiphi isilinganiso ongasoze usidlule nxa unatha. Khetha isilinganiso esikufaneleyo esingasoze sikutshiye usengozini futhi uzimisele ukunganathi usidlule.

6. Funda ukwala. “Ilizwi lenu elithi ‘Yebo’ kalibe nguyebo, lelithi ‘Hatshi’ kalibe nguhatshi.” (UMathewu 5:37) Nxa omunye umuntu ekupha utshwala wena ubona ukuthi usufikile esilinganisweni sakho khuluma ngomusa wale. IBhayibhili lithi, “Amazwi enu kawahlale elomusa, efakwe isawudo ukuze likwazi ukuthi kumele limphendule njani umuntu ngamunye.”—KwabaseKholose 4:6.

7. Cela uncedo. Abangane bakho abathanda uJehova bazahlonipha isinqumo sakho sokuthi awusafuni kunatha kakhulu yikho bacele bakuncedise unanzelele indlela onatha ngayo. IBhayibhili lithi, “Ababili bangcono kuloyedwa ngoba balomvuzo omuhle ngomsebenzi wabo onzima. Phela nxa omunye wabo angawa, omunye wakhe angamvusa.” (UmTshumayeli 4:9, 10; UJakhobe 5:14, 16) Eyinye inhlanganiso ye-United States encedisa abantu abafuna ukutshiya utshwala ithi: “Ukwehlisa indlela onatha ngayo akulula kwesinye isikhathi. Yikho kuhle ukuthi ucele abemuli kanye labangane bakho ukuthi bakuncedise ukuze uphumelele.”

8. Zimisele ukwenza okukhethileyo. “Kumele libe ngabantu abenza lokho ilizwi elikutshoyo lingabi ngabalizwayo nje kuphela, liziyenga ngemicabango engamanga. Kodwa lowo okhangelisisa umthetho opheleleyo wenkululeko futhi aqhubeke ekuwo uba ngulowo owenzayo umsebenzi, hatshi ozwayo abesekhohlwa njalo uzathokoza ngakwenzayo.”—UJakhobe 1:22, 25.

Okungakunceda Uphumelele

Ayisibo bonke abanatha kakhulu abacina sebephilela ukunatha. Abanye banatha kakhulu baze bacine besehluleka ukuphila nxa benganathanga. Abantu abanjalo bangagula nxa bangaphongubutshiya ngoba bayabe sebephila ngabo yikho bangadinga ukuncediswa ngodokotela labezempilakahle. U-Allen uthi, “Ngathi ngiqalisa ukutshiya utshwala ngagula okuzwayo. Yikho ngananzelela ukuthi phezu kokufunda iBhayibhili kwakumele ngiyebonana lodokotela.”

Abantu abanengi abazimisele ukutshiya utshwala ukuze bathokozise uJehova bayadinga ukuncediswa ngabezempilakahle ukuze banqobe umkhuba lo. b Abanye bayalaliswa esibhedlela ngoba bayabe sebegula, abanye bayaphiwa eminye imithi ebanceda bangalukhanuki kakhulu utshwala loba benelise ukungasalunathi. INdodana kaNkulunkulu yathi: “Abaphilileyo abamdingi udokotela, abagulayo yibo abamdingayo.”—UMakho 2:17.

Kunceda Ngani Ukulalela Okutshiwo NguJehova?

UJehova uyasitshela amacebo asincedayo esebenzisa iBhayibhili ngendaba yokunatha utshwala ngoba ufuna sikholise ukuphila khathesi lasesikhathi esizayo. U-Allen seleminyaka engu-24 wekela utshwala, uthi umbonga engaqedi uJehova ngomncedisa ukuthi anqobe umkhuba wokunatha kakhulu. Engakaqalisi ukufunda ngoJehova wayezitshela ukuthi kasoze loba sekutheni enelise ukutshintsha impilo yakhe.

Nxa usalwisana lomkhuba wokunatha kakhulu kwesinye isikhathi ungabona angani awusoze wafa wenelisa ukunqoba. Lanxa kunjalo ungakhalali ngoba ungenelisa. U-Allen labanye abanengi benelisile ukutshiya utshwala loba ukwehlisa isilinganiso sotshwala ababebunatha. Abazisoli ngitsho ngabakwenzayo lawe awusoze uzisole.

Kungelani lokuthi ukhethe ukuthi usuzanatha kancane loba ukuhle ubutshiye utshwala, hlala ukhumbula ukuthi uJehova uyakuthanda futhi uthi, “Aluba ubungayilalela imithetho yami, ukuthula kwakho bekuzakuba njengomfula, lokulunga kwakho kube njengamagagasi olwandle.”—U-Isaya 48:18.

[Amabala angaphansi]

[Ibhokisi]

 Usubuswa Butshwala Yini?

Zibuze:

• Khathesi sengibunatha kakhulu yini utshwala kulakuqala?

• Senginatha sonke isikhathi yini?

• Sengithanda utshwala obudaka kakhulu yini?

• Nginatha utshwala ukuze ngilwisane lokukhathazeka yini kumbe ukuze ngibalekele inhlupho zami?

• Ukhona yini umngane kumbe ilunga lemuli eselike langitshela ukuthi nginatha kakhulu?

• Ukunatha sekuke kwangidalela inhlupho nxa ngisendlini, emsebenzini kumbe nxa ngivakatsha?

• Kungangithwalisa nzima yini ukutshiya ukunatha okweviki eyodwa nje?

• Ngikhululekile yini ukuba phakathi kwabantu abanganathiyo?

• Ngiyabafihlela yini abanye ukuthi nginatha utshwala obunengi kanganani?

Nxa kuyikuthi uphendule umbuzo owodwa kumbe eyedlula lapho ngo-ye, kutsho ukuthi kumele utshintshe indlela onatha ngayo.

[Ibhokisi]

Okungakunceda Ukhethe Kuhle Endabeni Yotshwala

Ungakanathi utshwala cabanga ngalokhu okulandelayo:

• Kuyikuhlakanipha yini ukuthi nginathe utshwala kumbe kumele ngingabuthinti?

Ongakwenza: Nxa usehluleka ukunatha ngesilinganiso esifaneleyo kungaba ngcono ukuthi unganathi.

• Nginathe utshwala obunengi okunganani?

Ongakwenza: Wohle ukhethe ukuthi uzanatha utshwala obunengi okunganani ukungaqalisi ukunatha.

• Ngizabunatha nini?

Ongakwenza: Ungabunathi nxa uzatshayela imota kumbe uzakwenza umsebenzi ofuna ingqondo ziphaphame, kumbe nxa uzakwenza izinto eziphathelane lokukhonza loba nxa uzithwele kumbe unatha imithi ethile..

• Ngizabunatha ngingaphi?

Ongakwenza: Ungabunatheli endaweni lapho abantu abadakwa khona, ungabunathi ucatshile kumbe uphambi kwabantu abangaphatheki kuhle ngotshwala.

• Ngizabunatha labobani?

Ongakwenza: Natha labangane kumbe amalunga emuli akukhuthaza ukwenza okuhle, ungabunathi lezidakwa.

[Ibhokisi]

ILizwi LikaNkulunkulu Lanceda Isidakwa

USupot ohlala eThailand wayeyisidakwa. Waqalisa enatha ntambama kuphela kodwa kancane kancane wayesenatha ekuseni ngitsho lasemini. Wayejayele ukunatha efuna nje ukuthi adakwe. Waqalisa ukufunda iBhayibhili laboFakazi bakaJehova. Wafunda ukuthi uJehova uNkulunkulu uyakuzonda ukudakwa yikho wayekela ukunatha. Kodwa ngemva kwesikhathi waphinda wawubuyelela umkhuba wakhe wokunatha. Lokhu kwayidanisa imuli yakhe.

USupot wayelokhu esamthanda uJehova futhi efuna ukumkhonza ngendlela ayamukelayo. Abangane bakhe baqhubeka bemncedisa futhi bakhuthaza imuli yakhe ukuthi baqede isikhathi esinengi bendawonye lokuthi bangakhalali ukumncedisa. Amazwi acacileyo aku-1 Khorinte 6:10 athi ‘izidakwa azisoze zilithole ilifa loMbuso kaNkulunkulu’ amnceda uSupot wabona ukuthi wayelohlupho olukhulu sibili. Wabona ukuthi kwakumele enze konke okusemandleni akhe ukuthi ayekele umkhuba wokunatha kakhulu.

Wazimisela uSupot ukuthi angasabuthinti ngitsho utshwala. Umoya ongcwele kaNkulunkulu, iLizwi lakhe kanye lamalunga emuli kuhlanganise lebandla bamncedisa ukuthi athole amandla okutshiya ukutshwala. Imuli yakhe yathokoza kakhulu ngesikhathi ezinikela kuNkulunkulu futhi ebhabhathizwa. Khathesi uSupot uyathokoza ngoba esengumngane kaNkulunkulu njalo usebenzisa isikhathi sakhe ukuze ancedise abanye bafunde ngoNkulunkulu.