Danjel 6:1-28
6 Darju għoġbu jinkariga 120 satrapa* fuq is-saltna kollha.
2 Fuqhom kien hemm tliet uffiċjali taʼ pożizzjoni għolja u wieħed minnhom kont jien, Danjel, u s-satrapi kienu jgħidulna kulma jiġri ħalli r-re ma jmurx minn taħt.
3 Maż-żmien, jien kont qed nuri li kont iktar ikkwalifikat mill-uffiċjali taʼ pożizzjoni għolja u s-satrapi l-oħra, għax ingħatajt abbiltà* speċjali, u r-re kellu l-ħsieb li jagħtini l-awtorità fuq is-saltna kollha.
4 Dak iż-żmien, l-uffiċjali taʼ pożizzjoni għolja u s-satrapi kienu qed ifittxu xi ħaġa biex jakkużawni biha rigward kwistjonijiet tas-saltna,* imma ma setgħu jsibu xejn fuqiex jakkużawni jew xi korruzzjoni, għax jien kont taʼ min jafdani u la kont traskurat u lanqas korrott.
5 Imbagħad dawn l-irġiel qalu: “Mhu se nsibu xejn li lil Danjel nistgħu nakkużawh biha, sakemm ma nsibux xi ħaġa li tmur kontra l-liġi tal-Alla tiegħu.”
6 Allura dawn l-uffiċjali għolja u s-satrapi daħlu bħala grupp għand ir-re u qalulu: “Re Darju, jalla tgħix għal dejjem!
7 L-uffiċjali rjali, il-prefetti, is-satrapi, l-uffiċjali taʼ pożizzjoni għolja, u l-gvernaturi kollha tkellimna flimkien u qbilna li għandek toħroġ liġi li ddaħħal fis-seħħ projbizzjoni: Għal 30 jum, kull min jitlob lil xi alla jew lil xi bniedem ħlief lilek, re, għandu jiġi mitfugħ fil-ħofra tal-iljuni.
8 Issa oħroġ il-liġi u ffirmaha ħalli ma tkunx tistaʼ tinbidel, skont il-liġi tal-Medin u l-Persjani, li ma tistax titħassar.”
9 Allura r-Re Darju ffirma l-liġi dwar il-projbizzjoni.
10 Imma malli sirt naf li l-liġi ġiet iffirmata, jien mort id-dar tiegħi li kellha t-twieqi fil-kamra taʼ fuq miftuħin lejn Ġerusalemm. Hemmhekk, jien kont ninżel għarkopptejja tliet darbiet kuljum biex nitlob u nfaħħar lil Alla, bħalma dejjem kont nagħmel.
11 Dak iż-żmien, dawn l-irġiel daħlu fid-dar tiegħi u sabuni nitlob u nissupplika lill-Alla tiegħi għall-ħniena.
12 Għalhekk, daħlu quddiem ir-Re u fakkruh dwar il-liġi rjali u qalulu: “Re, int iffirmajt il-liġi li tgħid li għal 30 jum kull min jitlob lil xi alla jew lil xi bniedem ħlief lilek, għandu jiġi mitfugħ fil-ħofra tal-iljuni, hux hekk?” Ir-re wieġeb: “Il-kwistjoni hi stabbilita sew skont il-liġi tal-Medin u tal-Persjani, u ma tistax tiġi mħassra.”
13 Huma mill-ewwel qalu lir-re: “Danjel, li hu mill-eżiljati taʼ Ġuda, la wera rispett lejk, Re, u lanqas lejn il-liġi li int iffirmajt, għax qed jitlob tliet darbiet kuljum.”
14 Malli r-re semaʼ dan, hu kien imdejjaq ħafna, u pprova jara kif jistaʼ jeħlisni; u baqaʼ jagħmel sforz biex isalvani sakemm niżlet ix-xemx.
15 Fl-aħħar, dawn l-irġiel daħlu bħala grupp għand ir-re u qalulu: “Ftakar li l-liġi tal-Medin u tal-Persjani hi li kwalunkwe projbizzjoni jew liġi li r-re jkun stabbilixxa ma tistax tinbidel.”
16 Allura r-re ta kmand u lili, Danjel, ħaduni u tefgħuni fil-ħofra tal-iljuni. Ir-re qalli: “L-Alla tiegħek li int il-ħin kollu taqdi, se jeħilsek.”
17 Imbagħad ġabu ġebla u qegħduha fuq id-daħla* tal-ħofra, u r-re ssiġillaha biċ-ċurkett tas-siġill tiegħu u biċ-ċurkett tas-siġill tan-nies importanti tiegħu, ħalli xejn ma jkun jistaʼ jbiddel id-deċiżjoni li ttieħdet kontrija, Danjel.
18 Imbagħad ir-re mar fil-palazz tiegħu. Hu sam il-lejl kollu, u ma riedx li jġibulu lil min idoqqlu l-mużika, u ma setax jorqod.*
19 Malli sebaħ, ir-re għaġġel u mar fejn il-ħofra tal-iljuni.
20 Kif kien qrib il-ħofra, hu għajjatli b’leħnu miksur. Ir-re staqsieni: “Danjel, qaddej tal-Alla l-ħaj, l-Alla tiegħek li dejjem taqdi kien kapaċi jeħilsek mill-iljuni?”
21 Jien mill-ewwel wiġibt lir-re: “Re, jalla tgħix għal dejjem!
22 Alla tiegħi bagħat l-anġlu tiegħu u għalaq ħalq l-iljuni, u huma ma weġġgħunix, għax hu ra li jien kont innoċenti; u jien m’għamiltlek xejn ħażin.”
23 Ir-re tgħidx kemm feraħ, u ta kmand biex itellgħuni mill-ħofra. Meta tellgħuni mill-ħofra, jien lanqas girfa ma kelli, għax fdajt fl-Alla tiegħi.
24 Ir-re ta kmand, u nġiebu l-irġiel li kienu akkużawni,* u huma flimkien mat-tfal u n-nisa tagħhom ġew mitfugħin fil-ħofra tal-iljuni. L-iljuni qabżu fuqhom u farrku l-għadam tagħhom qabel messew il-qiegħ tal-ħofra.
25 Imbagħad ir-Re Darju kiteb lin-nies taʼ popli u lingwi differenti li kienu joqogħdu mad-dinja kollha: “Jalla jkollkom ħafna paċi!
26 Jien qed noħroġ kmand li f’kull territorju tas-saltna tiegħi, in-nies għandhom jitriegħdu bil-biżaʼ quddiem l-Alla taʼ Danjel. Għax hu l-Alla l-ħaj u jibqaʼ għal dejjem. Is-saltna tiegħu qatt mhu se tinqered, u t-tmexxija tiegħu hi għal dejjem.
27 Hu jsalva, jeħles, u jagħmel mirakli u affarijiet tal-għaġeb fis-sema u fuq l-art, għax hu ħeles lil Danjel minn taħt difrejn l-iljuni.”
28 Allura jien, Danjel, irnexxejt matul it-tmexxija taʼ Darju u matul it-tmexxija taʼ Ċiru l-Persjan.
Noti taʼ taħt
^ Letteralment “spirtu.”
^ Jew “tal-istat.”
^ Letteralment “il-bokka.”
^ Letteralment “tarlu n-ngħas.”
^ Jew “immalafamawni.”
