Danjel 3:1-30
3 Ir-Re Nebukadnessar għamel statwa* tad-deheb għolja 60 kubitu* u wiesgħa sitt kubiti.* Hu poġġieha fil-pjanura taʼ Dura fil-provinċja taʼ Babilonja.
2 Imbagħad ir-Re Nebukadnessar bagħat għas-satrapi,* il-prefetti, il-gvernaturi, għal dawk li jagħtu l-pariri, għal dawk li jieħdu ħsieb it-teżori, l-imħallfin, il-maġistrati, u l-amministraturi kollha tal-provinċji biex jiġu għall-inawgurazzjoni tal-istatwa li għamel hu.
3 Għalhekk is-satrapi, il-prefetti, il-gvernaturi, dawk li jagħtu l-pariri, dawk li jieħdu ħsieb it-teżori, l-imħallfin, il-maġistrati, u l-amministraturi kollha tal-provinċji nġabru għall-inawgurazzjoni tal-istatwa li għamel ir-Re Nebukadnessar. U huma qagħdu quddiemha.
4 L-uffiċjal li kien iħabbar għajjat b’leħen għoli: “Nies taʼ popli u lingwi differenti, ir-re kkmanda
5 li xħin tisimgħu l-ħoss tal-qarn, tal-flawt,* taż-żittru, tal-arpa żgħira, tal-istrument tal-korda, tal-istrument taż-żaqq, u tal-istrumenti mużikali l-oħrajn kollha, għandkom tinżlu mal-art biex tagħtu qima lill-istatwa tad-deheb li għamel ir-Re Nebukadnessar.
6 Kull min ma jinżilx mal-art biex jagħtiha qima, se jintefaʼ fil-forn tan-nar mill-ewwel.”
7 Għalhekk, meta n-nies kollha taʼ kull poplu u lingwa semgħu l-ħoss tal-qarn, tal-flawt, taż-żittru, tal-arpa żgħira, tal-istrument tal-korda, u tal-istrumenti mużikali l-oħrajn kollha, niżlu mal-art u taw qima lill-istatwa tad-deheb li kien għamel ir-Re Nebukadnessar.
8 Dak il-ħin, xi wħud mill-Kaldin ġew u akkużaw* lil-Lhud.
9 Huma qalu lir-Re Nebukadnessar: “Re, jalla tgħix għal dejjem!
10 Re, int tajt il-kmand biex kull raġel li jismaʼ l-ħoss tal-qarn, tal-flawt, taż-żittru, tal-arpa żgħira, tal-istrument tal-korda, tal-istrument taż-żaqq, u tal-istrumenti mużikali l-oħrajn kollha, għandu jinżel mal-art u jagħti qima lill-istatwa tad-deheb;
11 u min ma jinżilx mal-art u jagħtiha qima għandu jintefaʼ fil-forn tan-nar.
12 Imma Sidrak, Mesak, u Għabednego, il-Lhud li int inkarigajt biex imexxu l-provinċja taʼ Babilonja, ma wrewkx rispett. Re, huma mhux qed jaqdu lill-allat tiegħek, u rrifjutaw li jagħtu qima lill-istatwa tad-deheb li għamilt int.”
13 Imbagħad Nebukadnessar irrabja ħafna u ta l-kmand biex Sidrak, Mesak, u Għabednego jittieħdu quddiemu. Għalhekk, ħadu lil dawn l-irġiel quddiem ir-re.
14 Nebukadnessar qalilhom: “Sidrak, Mesak, u Għabednego, veru li intom mhux qed taqdu lill-allat tiegħi u rrifjutajtu li tagħtu qima lill-istatwa tad-deheb li għamilt jien?
15 Issa jekk meta tisimgħu l-ħoss tal-qarn, tal-flawt, taż-żittru, tal-arpa żgħira, tal-istrument tal-korda, tal-istrument taż-żaqq, u tal-istrumenti mużikali l-oħrajn kollha tkunu lesti li tinżlu mal-art u tagħtu qima lill-istatwa li għamilt, ikun tajjeb. Imma jekk tirrifjutaw li tagħtuha qima, intom se tintefgħu fil-forn tan-nar mill-ewwel. U liema alla jistaʼ jeħliskom minn taħt idejja?”
16 Sidrak, Mesak, u Għabednego qalulu: “Re Nebukadnessar, m’għandniex għalfejn inwiġbuk dwar dan.
17 Re, jekk għandu jiġri hekk, l-Alla tagħna li lilu naqdu hu kapaċi jeħlisna mill-forn tan-nar u minn taħt idejk.
18 Imma anki jekk ma jeħlisniex, re, kun af li aħna mhux se naqdu lill-allat tiegħek jew nagħtu qima lill-istatwa tad-deheb li għamilt int.”
19 Imbagħad Nebukadnessar tant irrabja maʼ Sidrak, Mesak, u Għabednego li wiċċu nbidel,* u kkmanda biex isaħħnu l-forn sebaʼ darbiet iktar milli kienu jsaħħnuh is-soltu.
20 Hu kkmanda lil xi rġiel b’saħħithom mill-armata tiegħu biex jorbtu lil Sidrak, Mesak, u Għabednego u jitfgħuhom fil-forn tan-nar.
21 Imbagħad rabtu lil dawn l-irġiel waqt li kienu għadhom lebsin l-imnatar, il-brieret, u l-ħwejjeġ l-oħrajn kollha tagħhom u tefgħuhom fil-forn tan-nar.
22 Minħabba li l-kmand tar-re kien tant aħrax u l-forn kien jaħraq ħafna, l-irġiel li qabdu lil Sidrak, Mesak, u Għabednego nqatlu bil-fjammi tan-nar.
23 Imma dawn it-tlett irġiel, Sidrak, Mesak, u Għabednego, waqgħu marbutin fil-forn tan-nar.
24 Imbagħad ir-Re Nebukadnessar beda jibżaʼ, qam jiġri, u qal lill-uffiċjali tiegħu taʼ pożizzjoni għolja: “Aħna mhux tlett irġiel irbatna u tfajna fin-nar?” Huma wieġbu: “Iva re.”
25 Hu qal: “Araw, jien qed nara erbat irġiel jimxu fin-nar. Huma mhux marbutin u mhux imweġġgħin, u r-rabaʼ wieħed jixbah lil bin l-allat.”
26 Nebukadnessar resaq lejn il-bieb tal-forn tan-nar, u qal: “Sidrak, Mesak, u Għabednego, qaddejja tal-Alla l-Iktar Għoli, oħorġu u ejjew hawn!” U Sidrak, Mesak, u Għabednego hekk għamlu.
27 U s-satrapi, il-prefetti, il-gvernaturi, u l-uffiċjali taʼ pożizzjoni għolja tar-re li kienu miġburin hemm, raw li n-nar ma kellu ebda effett fuq dawn l-irġiel. Lanqas xagħra minn rashom ma nħarqet, l-imnatar tagħhom baqgħu l-istess, u lanqas biss kellhom riħa taʼ ħruq fuqhom.
28 Imbagħad Nebukadnessar qal: “Ħa jkun imfaħħar l-Alla taʼ Sidrak, Mesak, u Għabednego, li bagħat l-anġlu tiegħu u ħeles lill-qaddejja tiegħu. Huma fdaw fih u marru kontra l-kmand tar-re u kienu lesti li jmutu minflok ma jaqdu jew jagħtu qima lil xi alla ieħor, ħlief lill-Alla tagħhom.
29 Għalhekk, qed nagħti dan il-kmand li jekk ikun hemm xi ħadd minn kwalunkwe poplu jew lingwa differenti li jgħid xi ħaġa kontra l-Alla taʼ Sidrak, Mesak, u Għabednego għandu jiġi mqattaʼ biċċiet, u d-dar tiegħu għandha ssir latrina pubblika;* għax m’hemm l-ebda alla ieħor li hu kapaċi jeħles bħalu.”
30 Imbagħad ir-re reġaʼ ta pożizzjoni għolja lil Sidrak, Mesak, u Għabednego fil-provinċja taʼ Babilonja.
Noti taʼ taħt
^ Jew “xbieha.”
^ Jew “tal-fifra.”
^ Jew “immalafamaw.”
^ Jew “l-attitudni tiegħu nbidlet kompletament.”
^ Jew forsi “miżbla.”
